សមាសធាតុ​ក្នុង​គ្រាប់​អង្ករ​ទាំងមូល​នៃ​ស្រូវ​ពូជ​​ផ្សេងៗ

អ្នកស្រាវជ្រាវ​នៃ ARS សិក្សា​អំពី​ថ្នាក់​ពណ៌​ចំនួន ៥ របស់​កន្ទក់​គឺ ស ត្នោត​ស្រាល ត្នោត ក្រហម និង​ស្វាយ/ខ្មៅ ។

អ្នកស្រាវជ្រាវ​នៃ ARS សិក្សា​អំពី​ថ្នាក់​ពណ៌​ចំនួន ៥ របស់​កន្ទក់​គឺ ស ត្នោត​ស្រាល ត្នោត ក្រហម និង​ស្វាយ/ខ្មៅ ។ ក្រុម​ស្រាវជ្រាវ​បាន​វិភាគ​កំហាប់​សារធាតុ​គីមី​រុក្ខជាតិ និង​វីតាមីន E នៅ​ក្នុង​ថ្នាក់​អង្ករ​នីមួយៗ ។ ពួកគេ​បាន​រក​ឃើញ​ថា កន្ទក់​មាន​ពណ៌​ក្រហម​និង​ស្វាយ​ មាន​កំហាប់ Phenolic និង Flavonoid ខ្ពស់​ជាង​កន្ទក់​ដែល​មាន​ពណ៌​ស្រាល​ជាង ។ កំហាប់​វីតាមីន E ប្រែប្រួល​តាម​ប្រភេទ​កន្ទក់ ប៉ុន្តែ​មិន​ពាក់ព័ន្ធ​នឹង​ពណ៌​របស់​កន្ទក់​ទេ ។

គ្រាប់​អង្ករ​ទាំងមូល (Whole-grain rice) ​មាន​វីតាមីន និង​ធាតុ​រ៉ែ​ចំនួន ១៥ ប្រភេទ រួមមាន វីតាមីន B ប៉ូតាស្យ៉ូម ម៉ាញេស្យ៉ូម និង​ដែក ដែល​ទាំងអស់​នេះ​គឺ​ជា​ជីវជាតិ​ដែល​រាងកាយ​​ត្រូវការ​ចាំបាច់​ដើម្បី​​ចម្រើន រីក​លូតលាស់​ជាធម្មតា ។ ក្រៅពី​ជីវជាតិ​ទាំងនេះ មាន​សារធាតុ​គីមី​រុក្ខជាតិ​​ជីវសកម្ម (Bioactive phytochemicals) ​នៅ​ក្នុង​ស្រូវ ក៏​ដូចជា​នៅ​ក្នុង​គ្រាប់​ធញ្ញជាតិ​ទាំងមូល បន្លែ ផ្លែឈើ សណ្ដែក និង​គ្រាប់​រុក្ខជាតិ​ដទៃទៀត ។ ទោះបី​ជា​តួនាទី​របស់​សារធាតុគីមី​រុក្ខជាតិ​ទាំងនេះ​នៅ​ក្នុង​បរិបទ​សុខភាព​របស់​មនុស្ស​មិន​ទាន់​បាន​បញ្ជាក់​ក៏​ដោយ ក៏​មាន​ភ័ស្តុតាង​មួយ​ចំនួន​បញ្ជាក់​ថា ធាតុ​គីមី​រុក្ខជាតិ​ខ្លះ​មាន​អត្ថប្រយោជន៍​ជា​អាហារូបត្ថម្ភ ។

បច្ចុប្បន្ន​នេះ ការ​សិក្សា​ជាច្រើន​ដឹកនាំ​ដោយ​លោក Ming-Hsuan Chen បម្រើការ​នៅ​មជ្ឈមណ្ឌល​ជាតិ​ស្រាវជ្រាវ​ពី​ស្រូវ Dale Bumpers នៃ​សេវាស្រាវជ្រាវ​កសិកម្ម (ARS) នៅ​ក្រុង​ Stuttgart រដ្ឋ Arkansas បាន​ផ្ដល់​នូវ​ចំណេះដឹង​អំពី​សមាសធាតុ​គីមី និង​ជីវអត្ថិភាព​ប្រកប​ដោយ​សក្ដានុពល​នៃ​សមាសធាតុ​នៅ​ក្នុង​ក្រុម​តំណាង​មួយ​នៃ​ស្រូវ​ពូជ​ផ្សេងៗ ។

ស្រូវ​ ជា​ធញ្ញជាតិ​មួយ​ប្រភេទ​ដូចគ្នា​នឹង​ពោត ស្រូវ​អូត ស្រូវ​សាលី​ក្រហម​និង​ស និង​ស្រូវ​បាលេ ។ ឧទាហរណ៍ ការ​ប្រមូលផ្ដុំ​គ្រាប់​ធញ្ញជាតិ​តូច​ជាតិ​របស់ ARS នៃ​ក្រសួង​កសិកម្ម​សហរដ្ឋអាមេរិក (NSGC) នៅ​ក្រុង Aberdeen រដ្ឋ Idaho មាន​សំណាក​ស្រូវ​លើស​ពី ១៨០០០ ប្រភេទ​ដែល​មាន​ពណ៌​ផ្សេងៗ ហៅ​ថា «បញ្ឆិក» មក​ពី​ជុំវិញ​ពិភពលោក ។ បញ្ឆិក​ទាំងនេះ​ផ្ដល់​នូវ​ធនធាន​ដ៏​មាន​តម្លៃ​ដល់​ជម្រើសវិទូក្នុង​ការ​អភិវឌ្ឍ​ពូជ​ស្រូវ​ថ្មីៗ ​តាម​តម្រូវការ​ផ្នែក​ក្សេត្រសាស្ត្រ និង​អាហារូបត្ថម្ភ ។

អង្ករ​​ត្រូវ​បាន​ចាត់ចូល​ជាថ្នាក់​ពណ៌​ចំនួន​៧ ដោយ​ផ្អែក​លើ​ពណ៌​របស់​កន្ទក់ៈ ស ប្រផេះ​ស្រាល ប្រផេះ​អុចៗ ប្រផេះ ក្រហម ស្រដៀង​ស្វាយ និង​ស្វាយ ។

កន្ទក់​ គឺ​ជា​ស្រទាប់​ខាងក្រៅ​នៃ​គ្រាប់​អង្ករ ជា​ប្រភព​នៃ​ធាតុគីមី​រុក្ខជាតិ ដែល​គេស្គាល់​ថា​ជា «Gamma-oryzarol» និង​ជា​ប្រភព​នៃ​វីតាមីន E ពីរ​ទម្រង់ គឺ Tocopherols និង Tocotrienols ។ សមាសធាតុ​អាហារូបត្ថម្ភ​ទាំងនេះ​អាច​ការពារ​ការ​បំផ្លាញ​ដោយ​អុកស៊ីតកម្ម​នៅ​ក្នុង​ម្ហូបអាហារ និង​មាន​សកម្មភាព​ផ្នែក​ជីវសាស្ត្រ​ទូលំទូលាយ ។

ក្រុម​ស្រាវជ្រាវ​បាន​ប្រើការ​វិភាគ និង​វិធីសាស្ត្រ​វិភាគ​ជាច្រើន​ដើម្បី​កំណត់​ពីទម្រង់ (Profile) ​នៃ Tocopherols, Tocotrienols និង Gamma-oryzarol នៅ​ក្នុង​ថ្នាក់​ពណ៌​​របស់​កន្ទក់​ចំនួន​៥: ស ប្រផេះ​ស្រាល ប្រផេះ ក្រហម និង​ស្វាយ ។ ពួកគេ​បាន​រក​ឃើញ​ថា មាន​ភាព​ខុសគ្នា​យ៉ាងខ្លាំង​នៅ​ក្នុង​កំហាប់​នៃ​វីតាមីន E ទាំង​ពីរ​ទម្រង់ និង​កំហាប់ Gamma-oryzanol នៅ​ក្នុង​កន្ទក់​នៃ​ថ្នាក់ពណ៌​ទាំង​៥ ​ដែល​បាន​សិក្សា ។ លោក Chen មាន​ប្រសាសន៍​ថា «ភាព​ខុស​គ្នា​នេះ​បង្ហាញ​ថា ជម្រើសវិទូ​អាចសម្រាំង​បញ្ឆិក NSGC នៅ​ក្នុង​គ្រប់​ថ្នាក់​ពណ៌​ទាំងអស់​ ដើម្បី​ទទួល​បាន​បរិមាណ​ខ្ពស់​នៃ​វីតាមីន E និង Oryzanol» ។

ការ​សិក្សា​បង្ហាញ​ថា គ្រាប់​ធញ្ញជាតិ​មាន​ជាតិ​ពណ៌ ឬ​ពណ៌​ចាស់ ដូចជា ពណ៌​ក្រហម និង​ស្វាយ មាន​បរិមាណ​សមាសធាតុសារធាតុ​គីមី​រុក្ខជាតិ​មួយ​ចំនួន​ខ្ពស់​ជាង​ពូជ​ដែល​មិន​មាន​ជាតិពណ៌ ។ ក្រុម​ការងារ​ក៏​បាន​វិភាគ​សារធាតុ​គីមី​រុក្ខជាតិ​ផ្សេង​ទៀត​ផង​ដែរ ជាពិសេស Phenolics និង Flavonoids នៅ​ក្នុង​កន្ទក់​មាន​ថ្នាក់ពណ៌​ទាំង​៥ ។ អ្នកស្រាវជ្រាវ​ចង់​វាស់វែង​​អំពី​កំហាប់​នៃបរិមាណ​ដែល​អាច​ចម្រាញ់​ចេញ​បាន និង​នៅ​ជាប់​នឹង​ភ្នាស​កោសិកា នៅ​ក្នុង​ពូជ​ស្រូវ​ដែល​មាន​ពណ៌​ស្រាល​ចំនួន​​ប្រភេទ​គឺ ស ប្រផេះ​ស្រាល និង​ប្រផេះ និង​នៅ​ក្នុង​ពូជស្រូវ​មាន​ពណ៌​ចាស់​គឺ ក្រហម និង​ស្វាយ ។

Phenolics និង Flavonoids នៅ​ជាប់​នឹង​ភ្នាស​កោសិកា​នៅ​ក្នុង​គ្រាប់​ស្រូវ ​គឺ​មាន​ចំណាប់​អារម្មណ៍​ច្រើន​ដោយសារ​ការ​សិក្សា​ពី​មុន​ដោយ​អ្នកស្រាវជ្រាវ​ផ្សេងៗ​បាន​បង្ហាញ​ថា សមាសធាតុ Phenolic នៅ​ជាប់​នឹង​ភ្នាស​កោសិកា​អាច​បំបែក​ដោយ​អង់ហ្ស៊ីម​រំលាយ​អាហារ និង​មីក្រូរុក្ខជាតិ​នៅ​ក្នុង​ពោះវៀន ។ ការ​រំដោះ​ចេញ​ពី​ភ្នាស​កោសិកា​នេះ​មាន​ន័យ​ថា សមាសធាតុ​ទាំងនេះ​មាន​អត្ថិភាព​សម្រាប់​ការ​បឺត​យក​របស់​រាងកាយ ។ លើស​ពី​នេះ លោក Chen បាន​មាន​ប្រសាសន៍​ថា បរិមាណ​ជីវជាតិ​រុក្ខជាតិ​ដែល​អាច​បឺត​យក​បាន​នៅ​ក្នុង​ស្រូវ ​អាច​ត្រូវ​បានប៉ាន់​ប្រមាណ​មិន​បាន​គ្រប់គ្រាន់​ ដោយសារ​​ជាធម្មតា​ទម្រង់ជាប់​នឹង​ភ្នាស​កោសិកា​មិន​ត្រូវ​បាន​វាស់វែង ។

ដើម្បី​វាស់វែង​សមាសធាតុ Phenolics និង Flavonoids នៅ​ក្នុង​ពូជ​ស្រូវ​នីមួយៗ​ដែល​បាន​សិក្សា ធាតុ​រំលាយ​ត្រូវ​បាន​ប្រើ​ដើម្បី​រំដោះ​បរិមាណ​ដែល​អាច​ចម្រាញ់​ចេញ​បាន ហើយ​សូឡុយស្យុង​អាល់កាឡាំង​ត្រូវ​បាន​ប្រើ​ដើម្បី​រំដោះ​បរិមាណ​ដែល​នៅ​ជាប់​នឹង​ភ្នាស់​កោសិកា ។

ការសិក្សា​នេះ​បាន​បង្ហាញ​ថា កន្ទក់​ពណ៌​ក្រហម និង​ស្វាយ​ មានកំហាប់ Phenolics និង Flavonoids ដែល​អាច​ចម្រាញ់​យក​បាន និង​នៅ​ជាប់​នឹង​ភ្នាស់​កោសិកា ច្រើន​ជាង​កន្ទក់​ដែល​មាន​ពណ៌​ស្រាល​ជាង ។ វា​ក៏​មាន​ភាព​វិជ្ជមាន​ផង​ដែរ​ចំពោះ​កន្ទក់​ពណ៌​ស និង​ប្រផេះ​ស្រាល ដែល​ជា​ធម្មតា​ស្ថិត​នៅ​ជាមួយ​អង្ករ​ដែល​លក់​នៅ​លើ​ទីផ្សារ គឺ​ថា សមាសភាគ Phenolics ត្រូវ​បាន​រក​ឃើញ​ថា មាន​ប្រមាណ ៣០ ទៅ ៥០% នៃ​ចំនួន Phenolics សរុប​របស់​គ្រាប់​ស្រូវ ។​

លោក Chen មាន​ប្រសាសន៍​ថា «យើង​បាន​រក​ឃើញ​កន្ទក់​ពណ៌​ស្វាយ​នៃ​ពូជ​ស្រូវ​មួយ​ប្រភេទ​ដែល​មាន​បរិមាណ​ច្រើន​ទាំង Phenolics និង​វីតាមីន E» ។ ការ​វាស់វែង​ពីប្រភេទ និង​បរិមាណ​ជាក់លាក់​នៃ​សារធាតុ​គីមី​រុក្ខជាតិ​នៅ​ក្នុង​ម្ហូបអាហារ​ផ្សេងៗ​គឺ​ជា​តម្រូវការ​ចាំបាច់ មុន​នឹង​ការ​សាកល្បង​ផ្នែក​វិជ្ជសាស្ត្រ​ណា​មួយ​ត្រូវ​បាន​ធ្វើ​ឡើង​ដើម្បី​ស្វែងរក​សក្ដានុពល​របស់​សារធាតុ​ទាំងនេះ​ទៅ​លើ​អត្ថប្រយោជន៍​ផ្នែក​សុខភាព​របស់​មនុស្ស ។

របកគំហើញ​នានា​នៅ​ក្នុង​ការ​សិក្សា​នេះ​ត្រូវ​បាន​បោះពុម្ព​ផ្សាយ​នៅ​ឆ្នាំ​២០១១ នៅ​ក្នុង​ទស្សនាវដ្ដី​វិទ្យាសាស្ត្រ​ម្ហូបអាហារ (Journal of Food Science) និង​នៅ​ឆ្នាំ​២០១២ នៅ​ក្នុង​ទស្សនាវដ្ដី​គីមី​វិទ្យា​ម្ហូបអាហារ (Journal of Food Chemistry) ។

ប្រតិកម្ម​របស់​អ្នកបរិភោគ​គឺ​ជា​គន្លឹះ​សំខាន់

ការ​សិក្សា​មួយ​ផ្សេង​ទៀត​របស់ ARS បាន​បង្ហាញ​​ពី​ភាព​​ខុសគ្នា​ផ្នែក​រសជាតិ​បណ្ដាល​មក​ពី​ពណ៌​ផ្សេងៗ​របស់​កន្ទក់​នៅ​ក្នុង​គ្រាប់​ស្រូវ​ទាំងមូល ។ អ្នកបច្ចេកទេស​ម្ហូបអាហារ អ្នកស្រី Karen Bett-Garber បាន​វិភាគ និង​កំណត់​លក្ខណៈ​សម្បត្តិ​រសជាតិ​អង្ករ​ នៅ​អង្គភាព​ស្រាវជ្រាវ​ការ​កែច្នៃ​ម្ហូបអាហារ និងវិញ្ញាណ​គុណភាព (Sensory quality) របស់ ARS នៅក្រុង New Orleans រដ្ឋ Louisiana ។ ការ​សិក្សា​ផ្នែកញាណ​នេះ​បង្កើន​ការ​យល់​ដឹង​អំពី​រសជាតិ​ខុសៗ​គ្នា​ជាប់​ពាក់ព័ន្ធ​នឹង​ពណ៌​របស់​កន្ទក់​ដែល​ដឹង​ដោយ​ញាណ​របស់​អ្នកបរិភោគ ។

អ្នកស្រី Bett-Garber មាន​ប្រសាសន៍​ថា «អង្ករ​សម្រូប​​ត្រូវ​បាន​កំណត់​​ចរិត​លក្ខណៈ​អាស្រ័យ​លើ​រសជាតិ មិន​មែន​នៅ​លើ​ពណ៌​របស់​គ្រាប់​អង្ករ​ទាំងមូល​ទេ» ។ អ្នកស្រី​បាន​បង្កើត​សន្ទានុក្រម​រសជាតិ​អង្ករ​ពណ៌ និង​ភាព​ខុសគ្នា​នៃ​រសជាតិ នៃ​គ្រាប់​អង្ករ​ទាំងមូល​នីមួយៗ​ដែល​បាន​យក​មក​សិក្សា ដែល​នឹង​ជួយ​ឲ្យ​អ្នកស្រាវជ្រាវ ជម្រើសវិទូ និង​អ្នកលក់ដូរ អាច​ពិណ៌នា​អំពី​រសជាតិ​នៃ​​គ្រាប់​អង្ករ​ពណ៌​ទាំងមូល​របស់​ស្រូវ​ពូជ​ផ្សេងៗ ។

ស្រទាប់​កន្ទក់​នីមួយៗ រួម​ជាមួយ​ទម្រង់​សារធាតុ​គីមី​រុក្ខជាតិ​ផ្ទាល់ខ្លួន​របស់​វា​ ចំពោះ​ពូជ​ស្រូវ​ទាំងអស់​ដែល​អ្នកស្រី​ Bett-Garber បាន​សិក្សា ត្រូវ​បាន​រក្សា​នៅ​ដដែល (មាន​ន័យ​ថា អង្កាម​មិន​ត្រូវ​បាន​បក​ចេញ​ដោយ​កិន និង​សម្រិត​ទេ) ។ សម្រាប់​ការ​សិក្សា​នេះ គណៈកម្មការ​​មាន​គ្នា ១០ នាក់ ដែល​ត្រូវ​បាន​បណ្ដុះបណ្ដាល​អំពី​ការវិភាគ​តាម​បែប​ពិណ៌នា បាន​បង្កើត​ការ​ពិពណ៌នា​ចំនួន ២៥ ដើម្បី​កំណត់​រសជាតិ​បាយ​ដែល​ដាំ​ពី​គ្រាប់​អង្ករ​ទាំងមូល ។ បន្ទាប់​មក ពួក​គេ​វាយ​តម្លៃ​រសជាតិ​នៃ​សំណាក​អង្ករ​ចំនួន ២២ ដែល​មាន​កន្ទក់​ពណ៌​ស ប្រផេះ​ស្រាល ក្រហម ឬ​ស្វាយ ។

សន្ទានុក្រម​ដែល​ជា​លទ្ធផល​បាន​ពិពណ៌នា​អំពី​រសជាតិ រួម​នឹង​ភាព​ខុសគ្នា​ផង​ដែរ រវាង​ពណ៌​របស់​កន្ទក់ និង​ប្រភេទ​នៃ​គ្រាប់​អង្ករ​ទាំង​មូល ។ ឧទាហរណ៍ អង្ករ​ពណ៌​ប្រផេះ​ត្រូវ​បាន​ពិពណ៌នា​ថា មាន​រសជាតិ​អាមីដុង​ខ្លាំង ដូច​គ្រាប់​ធញ្ញជាតិ​ឆ្អិន និង​ដូច​ពោត​ផ្ទុះ​ដាក់​ប៊័រ ។ អង្ករ​​ពណ៌​ស្វាយ (ខ្មៅ) មាន​រសជាតិ​​ប្រេង ដូច​ផ្លែ​ប៊ែរី​ខ្មៅ និង​ដូច​ផ្សែង​ខ្លោច ។ ហើយ​អង្ករ​នៃ​ពូជ​ស្រូវ​ដែល​មាន​ពណ៌​ចាស់​ហាក់​មាន​រសជាតិ​ល្វីង និង​មាន​ភាព​​ស្វិត​ជាង​នៅ​ក្នុង​មាត់ ។ លទ្ធផល​នៃ​ការ​សិក្សា​នេះ​ត្រូវ​បាន​បោះពុម្ព​នៅ​ឆ្នាំ​២០១២​ នៅ​ក្នុង​ទស្សនាវដ្ដី​ការសិក្សា​ផ្នែក​ញាណ (Journal of Sensory Studies) ។

ការ​ប្រឈម​នានា​សម្រាប់​ការ​ស្រាវជ្រាវ​ និង​កម្មវិធី​ជម្រើស​វិទ្យា​នៅ​ពេល​អនាគត រួម​មាន ការ​លើក​ស្ទួយ​តម្លៃ​អាហារូបត្ថម្ភ​របស់​ស្រូវ ​ដោយ​រក្សា​បាន និង​បង្កើន​រសជាតិ​របស់​វា ។ ជាមួយ​គ្នា​នេះ​ផង​ដែរ ការ​សិក្សា​ទាំងនេះ​ផ្ដល់​នូវ​ពន្លឺ​អំពី​សមាសធាតុ​គីមី និង​សក្ដានុពល​នៃ​ការ​ទទួល​យក​របស់​អ្នក​បរិភោគ​ចំពោះ​អង្ករ​មាន​ពណ៌​នៃ​ពូជ​ស្រូវ​ផ្សេងៗ ៕ អត្ថបទដោយ Rosalie Marion Bliss មន្ត្រី​ព័ត៌មាន​នៃ ARS

បកប្រែ​ និង​ផ្សព្វផ្សាយ​ដោយ​មាន​ការ​អនុញ្ញាត​ពី USDA Agricultural Research/April 2013

ស្រូរ​គ្រាប់​វែង​របស់​អាមេរិក​ដាំ​នៅ​ក្នុង​ស្រែ ។

ស្រូរ​គ្រាប់​វែង​របស់​អាមេរិក​ដាំ​នៅ​ក្នុង​ស្រែ ។ នៅ​អង្គភាព​ស្រាវជ្រាវ​ការ​កែច្នៃ​ម្ហូបអាហារ និងវិញ្ញាណ​គុណភាព (Sensory quality) របស់ ARS នៅក្រុង New Orleans រដ្ឋ Louisiana អ្នកបច្ចេកទេស​ម្ហូបអាហារ អ្នកស្រី Karen Bett-Garber បាន​បង្កើត​សន្ទានុក្រម​រសជាតិ​​​ខុសគ្នា​នៃ​ពណ៌​កន្ទក់​នៅ​ក្នុង​គ្រាប់​អង្ករ​ទាំងមូល​ដែល​មាន​ពណ៌​ខុសៗ​គ្នា

ពាក្យ​បច្ចេកទេស​ប្រើ​ក្នុង​អត្ថបទ​នេះ

សារធាតុ​គីមី​រុក្ខជាតិ (Phytochemical): គឺ​ជា​សមាសធាតុ​គីមី (ជា​ទម្រង់​បេតា​ការ៉ូតែន) ដែល​កើត​មាន​ជា​ធម្មជាតិ​នៅ​ក្នុង​រុក្ខជាតិ ។

បញ្ឆិក (Accession): រាល់​ជីវករ ឬ​ពូជ​ដែល​ត្រូវ​បាន​ចុះ​បញ្ជី ។

 

About ឈូកខ្មែរ

...ផ្ដល់​ចំណេះដឹង​សកល​ជា​ភាសា​ជាតិ
This entry was posted in កសិកម្ម, វិទ្យាសាស្ត្រ​ថ្មី and tagged , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s