ប្រវត្តិសាស្ត្រប្រទេសកម្ពុជា
និពន្ធដោយលោក អាដេម៉ារ ឡឺក្លែរ
ក្បាលទី២
ប្រទេសកម្ពុជាតាមរាជពង្សាវតារ
និងឯកសារប្រវត្ដិសាស្ដ្រផ្សេងទៀត
ជំពូកទី៣
ពីការបែកបាក់បន្ទាយលង្វែក
នៅក្នុងឆ្នាំ១៥៨៥ រហូតមកដល់សព្វថ្ងៃនេះ
១. ព្រះបាទរាមាជើងព្រៃ (១៥៩៤-១៥៩៥)
យើងបានឃើញរួចហើយពីខាងលើថាព្រះរាជាកម្ពុជាព្រះបរមឥន្ទរាជា (ព្រះសត្ថា) បានភៀសព្រះអង្គចេញពីបន្ទាយលង្វែក តាំងតែពីមុនពេលដែលសៀមវាយលុកចូលមក ដោយទុកឱ្យព្រះឧភយោរាជ (1) ស្រីសុរិយោពណ៌ ដែលទើបវាយសៀមឈ្នះនៅអម្រិតបូរ (បរិបូណ៌) នៅការពាររាជធានី ។ ទ្រង់បានយាងជាមួយនឹងព្រះរាជវង្សទាំងអស់កាត់ទៅរកព្រះរាជបុត្រច្បង ព្រះជ័យជេដ្ឋា ដែលរងការគាបសង្កត់ពីទ័ពសៀមមកពីទិសខាងត្បូង ហើយបានវាយដកថយទៅកាន់ស្រីសឈរ (2) ជាមួយនឹងព្រះអនុជចៅពញាតន់ និងពួកអឺរ៉ុប២នាក់ផង ។
គង់នៅស្រីសឈរបានបន្ដិច ព្រះរាជវង្សានុវង្សយល់ឃើញថា សុវត្ថិភាពនៅទីនេះមិនល្អ ក៏នាំគ្នាធ្វើដំណើរទៅស្ទឹងត្រែង (3) ។ ទីកន្លែងត្រង់នេះ ប្រហែលមិនមែនជាទឹកដីរបស់លាវទេមើលទៅនាសម័យនោះ ប៉ុន្ដែ ក៏ប្រហែលជាគ្មានទំនាក់ទំនងអ្វីធំដុំជាមួយកម្ពុជាដែរ ព្រោះនៅឆ្ងាយ គឺនៅពីខាងជើងជួរសម្បុកសម្បូរ និងព្រះតាពាង (ប៉ាតាង) ទៅទៀត ម្យ៉ាងទៀត អ្នកស្រុកភាគច្រើនជាជនជាតិលាវផង (4) ។
រាជពង្សាវតារបានលើកមូលហេតុផ្សេងចំពោះការធ្វើដំណើរទៅស្ទឹងត្រែងនេះ ដោយលើកឡើងថា មានព្រះវង្សមួយអង្គព្រះនាមថា ព្រះរាមាជើងព្រៃ (5) មានបំណងដណ្ដើមយកមហាក្សត្រីយ៍ព្រះភគវតីស្រីចក្រពត្ដិ ជាព្រះជាយាទី១របស់ព្រះសត្ថា ធ្វើឱ្យស្ដេចអង្គនេះភ័យបារម្ភចំពោះព្រះក្សត្រីយ៍ ក៏នាំគ្នារត់ភៀសព្រះកាយទៅស្ទឹងត្រែងទៅ ដើម្បីបានគេចផុតពីគោលបំណងអាក្រក់របស់ព្រះរាមាជើងព្រៃផង និងបានគេចផុតពីទ័ពសៀម ដែលធ្វើដំណើរមកដល់ទន្លេមេគង្គរួចទៅហើយផង ។
ពេលនោះ ព្រះទេវីក្សត្រីយ៍ ជាព្រះមាតុច្ឆារបស់ព្រះរាជា មិនបានយាងទៅតាមព្រះរាជាទេ តែបានភៀសព្រះកាយចេញពីស្រីសន្ធរទៅគង់នៅឯភ្នំពាមជាំង ជាមួយរាជបុត្រារបស់ព្រះសត្ថា គឺចៅពញាតន់ និង ចៅពញាយោម (6) ហើយនិងនាម៉ឺនដែលស្មោះត្រង់មួយចំនួន ។ ចំណែកឯ ឌីយឺហ្គោបែឡូសូ និងមិត្ដភក្ដិរបស់គេវិញ ដែលទើបតែត្រលប់មកពីម៉ានីល ប្រហែលជាបានធ្វើដំណើរទៅតាមព្រះឧភយោរាជ និងព្រះរាជានៅឯស្ទឹងត្រែង ហើយទាល់តែដល់ពេលក្រោយយូរណាស់ គឺពេលដែលទ័ពឆ្មក់កម្ពុជាដែលមិនទាន់មានការរៀបរយត្រឹមត្រូវ បើកការវាយប្រហារទៅលើទ័ពសៀមដែលចង់ពង្រីកអំណាចមកទិសខាងកើត និងខាងត្បូង ទើបពួកនេះត្រលប់ចុះមកវិញដើម្បីចូលរួមជាមួយ ។ បេឡូសូ ត្រូវសៀមចាប់បាននៅក្នុងការប្រយុទ្ធមួយនៅក្នុងឆ្នាំ១៥៩៤ ។ ចំណែកឯ ប្លារូហ្ស៍ អង់តូនីញ៉ូម៉ាសាដូ និងប៉ង់តាលេអុងការណៃរ៉ូ ត្រូវចាប់ខ្លួនបានពេលក្រោយបន្ដិចនៅក្នុងការប្រយុទ្ធតាមនាវា ។
ព្រះឧភយោរាជព្រះសត្ថា និងព្រះរាជាជ័យជេដ្ឋា បានសុគតនៅក្នុងឆ្នាំ១៥៩៤ នៅឯស្ទឹងត្រែង ព្រះសត្ថាពេលនោះ មានព្រះជន្មាយុ៤១ព្រះវស្សា ទ្រង់បានសោយរាជ្យ ឬដឹកនាំប្រទេសបាន១៧ឆ្នាំ ឯព្រះជ័យជេដ្ឋាមានព្រះជន្មាយុ៣០ព្រះវស្សាទ្រង់បានសោយរាជ្យក៏ប៉ុន្ដែមិនបានដឹកនាំប្រទេសទេអស់ពេល១០ឆ្នាំ (7) ។
បើតាមការនិទានតៗគ្នានៅសម្បូរ ព្រះអដ្ឋិធាតុរបស់ស្ដេចទាំង២អង្គ បានត្រូវគេនាំយកមកបញ្ចុះនៅក្នុងចេតិយមួយនៅក្នុងបរិវេណវត្ដសម្បូរ ។ សម្បូរពេលនោះ គឺជាទីក្រុងធំមួយ ។
ដោយពិនិត្យឃើញថានគរគ្មានស្ដេច ហើយពញាតន់ក៏គ្មានសមត្ថភាពនឹងឈ្លោះដណ្ដើមរាជសម្បត្ដិបាន (8) ព្រះវង្សារាមាជើងព្រៃដែលមានព្រះជន្ម៥០ព្រះវស្សាទៅហើយ បានចាប់ផ្ដើមដណ្ដើមយកអំណាច ។ ទ្រង់បានចាប់ផ្ដើមរជ្ជកាលរបស់ព្រះអង្គដោយបង្ហាញឱ្យឃើញនូវភាពមោះមុតឥតខ្លាចស្លាប់ គឺទ្រង់បានកេណ្ឌទ័ពដោយស្ងាត់កំបាំង រួចវាយចូលរាជធានីភ្លាម គ្មានឱ្យនរណាដឹងទាន់ សម្លាប់ឧត្ដមសេនីយ៍ភ្យាមហាមន្ដ្រីសៀម ដែលគ្រប់គ្រងនៅទីនោះជាមួយនឹងពលរេហ៍សៀម២ម៉ឺននាក់ ។ បន្ទាប់មក ប្រហែលដោយខ្លាចពួកសៀមវិលត្រលប់មកវិញ ណាមួយរាជធានីស្ថិតនៅជិតព្រំប្រទល់ខែត្របាត់ដំបង និងអង្គរ ជាទីដែលសៀមបានដាក់ទ័ពប្រមូលផ្ដុំផង ព្រះរាជាក៏យាងមកគង់នៅឯស្រីសន្ធរវិញ ហាក់បីដូចថាព្រះអង្គជាព្រះរាជាពេញសិទ្ធិ មានបរិពារហែហម និងសេវាបម្រើផ្សេងៗសម្រាប់ព្រះរាជវាំង ។
នៅពេលបានទទួលព័ត៌មានស្ដីពីមរណភាពរបស់ស្ដេចទាំងពីរអង្គដែលជាអ្នកគាំពាររបស់ខ្លួន បេឡូសូ ដែលនៅជាប់ក្នុងទីឃុំឃាំងរបស់សៀមមានការអស់សង្ឃឹមជាខ្លាំងថានឹងលែងអាចវិលត្រលប់មកជាន់ដីកម្ពុជាវិញជារៀងរហូតហើយ ក៏យល់ព្រមបំពេញបេសកកម្មឱ្យស្ដេចសៀម ដោយធ្វើដំណើរទៅហ្វីលីពីនស្នើសុំឱ្យអភិបាលក្រុងម៉ានីល ចងមេត្រីភាពរវាងអេស្ប៉ាញ និងស្រុកសៀម ។ ពេលទៅដល់ម៉ានីល បេឡូសូ បានជួបជាមួយមិត្ដភក្ដិរបស់គាត់ដែលទើបតែទៅដល់ដែរ ក្រោយពីបានចាប់ពួកទាហានដែលស្ដេចសៀមប្រគល់ភារកិច្ចឱ្យថែរក្សាពួកគេបោះចូលទៅក្នុងទឹកសមុទ្រ ឬចងដាក់ច្រវាក់ ដោយមានការឃុបឃិតពីក្រុមអ្នកដើរសំពៅចិន រួចក៏បើកសំពៅរត់ទៅ ។ បេឡូសូក៏ចាប់ប្រែចិត្ដវិញ មិនបានធ្វើកិច្ចការដើម្បីគាំទ្រឱ្យមានចំណងមេត្រីភាពជាមួយសៀមទេ តែបែរជាទៅសំណូមពរឱ្យជួយគាត់មកកម្ពុជាវិញ តែមិនមែនគាំទ្រព្រះរាមាជើងព្រៃដែលខ្លួនចាត់ទុកថាជាស្ដេចជ្រែករាជ្យ ហើយដែលប្រហែលជានឹងមិនស្វាគមន៍ខ្លួនផងនោះទេតែគឺដើម្បីជួយដល់រជ្ជទាយាទរបស់ព្រះមហាក្សត្រដែលសុគតទៅនៅឯស្ទឹងត្រែងទៅវិញ ។ ដោយមានការគាំទ្រពីពួកដូមីនីកាំង និងពួកអូហ្គូស្តាំងនៅម៉ានីល ដែលមានបំណងចង់ឱ្យអេស្ប៉ាញដណ្ដើមយកកម្ពុជា ដើម្បីខ្លួនបានប្រែក្លាយប្រទេសនេះឱ្យកាន់សាសនាកាតូលិកវិញ រួចហើយពង្រីកឥទ្ធិពលរបស់ខ្លួន ។ ទីបំផុតបេឡូសូក៏និយាយបញ្ចុះបញ្ចូលលោកអភិបាលល្វីប៉េរ៉េដាសម៉ារីញ៉ា ដែលជាកូនរបស់សពលោក ហ្គោមេប៉េរ៉េដាសម៉ារីញ៉ា បានសម្រេចដោយទទួលបានទ័ពអេស្ប៉ាញ ១២០នាក់ និងកប៉ាល់៣គ្រឿង ស្ថិតនៅក្រោមបញ្ជារបស់អនុសេនីយ៍ឯក ជន និងជេរៃហ្គាលីណាតូ មានដើមកំណើតមកពីឡាសប៉ាល់ម៉ាស (កោះកាណារី) ហើយនិងពួកដូមីនីកាំង៣នាក់ ក្នុងនោះមានលោកឪពុក អាឡុងសូជីមឺណេ អាយុប្រហែល៧០ឆ្នាំ និងលោកឪពុក ឌីយឺហ្គោអាឌូអាត ដែលជាមនុស្សអង់អាចក្លាហានផងដែរ ។កប៉ាល់ទាំង៣ចេញដំណើរពីម៉ានីលនៅថ្ងៃទី១៩ខែមករាឆ្នាំ១៥៩៦ ។មានតែកប៉ាល់២ទេដែលបានធ្វើដំណើរមកដល់កម្ពុជា គឺកប៉ាល់ដែលបញ្ជាដោយបេឡូសូ និងប្លារូហ្ស៍ ចំណែកកប៉ាល់១ទៀតដែលបញ្ជាដោយ ហ្គ្រេហ្គ័រដឺវ៉ាហ្គាស វង្វេងផ្លូវ ឬមកដល់ក្រោយក៏មិនដឹង ។
មកដល់កម្ពុជា បេឡូសូចតកប៉ាល់នៅបារ៉ារ៉ា (ខែត្របារាជ) ។ គឺនៅទីនោះឯង ដែល បេឡូសូ បានទទួលដំណឹងថា ព្រះរាមាជើងព្រៃដណ្ដើមយករាជសម្បត្ដិបានហើយយាងមកគង់នៅស៊ីស្ទ័រ(ស្រីសន្ធរ) ។ បេឡូសូគិតថាត្រូវចុះចូលនឹងព្រះរាជាថ្មីនេះហើយបានបញ្ជូនព័ត៌មានស្ដីពីការមកដល់របស់ខ្លួនទៅថ្វាយព្រះរាមាជើងព្រៃ ។ ដើម្បីលើកជើង បេឡូសូ ព្រះរាមាជើងព្រៃ បានបញ្ជូនទៅវិញនូវលិខិតតែងតាំង បេឡូសូ ជាអភិបាលខែត្រ និងលិខិតអនុញ្ញាតឱ្យ ប្លាសរូហ្ស៍ មានសិទ្ធិធ្វើដំណើរទៅទីណាក៏បាននៅក្នុងព្រះរាជាណាចក្រ រួចទ្រង់រង់ចាំស្ដាប់ដំណឹងឆ្លើយតបពីមិត្ដរបស់អតីតព្រះមហាក្សត្រទាំងព្រះទ័យព្រួយបារម្ភទៅវិញ ។ បេឡូសូ និងប្លាសរូហ្ស៍ បានធ្វើដំណើរឡើងតាមទន្លេមេគង្គ មកដល់ភ្នំពេញដែលកាលនោះគេហៅថា ចតុម្មុខ ។ បើតាមឯកសាររបស់ពួកអេស្ប៉ាញ និងព័រទុយហ្គាល់ ថា ចតុម្មុខនាពេលនោះជាមជ្ឈមណ្ឌលពាណិជ្ជកម្មធំមួយ មានជនជាតិចិនរស់នៅចំនួន៣ពាន់នាក់ ។ ពេលនោះមានជម្លោះមួយបានផ្ទុះឡើងរវាងពួកចិននឹងពួកអឺរ៉ុប ។ ដោយមានការគាំទ្រពីពួកជប៉ុន ដែលកាន់គ្រិស្ដសាសនាចំនួន២០នាក់ ពួកអឺរ៉ុបបានបើកការវាយប្រហារទៅលើពួកចិន ហើយសម្លាប់ពួកនេះ អស់៣រយនាក់រួចរឹបអូសយកសំពៅចិនទាំងអស់ព្រមទាំងទំនិញផង ។ ច្រើនថ្ងៃក្រោយមក បេឡូសូ និងប្លាសរូហ្ស៍ បានបញ្ជូនសំណើទៅសុំចូលគាល់ព្រះរាជា មិនមែនដើម្បីរាយការណ៍ថ្វាយអំពីព្រឹត្ដិការណ៍វាយប្រហារនោះទេ តែគឺដើម្បីថ្វាយសត្វលាមួយក្បាល និងជំនូនមួយចំនួនដែលអភិបាលក្រុងម៉ានីលបានបន្ទុកបណ្ដាក់ឱ្យខ្លួននាំយកមកថ្វាយ ។ ប៉ុន្ដែព្រះរាជាបានបដិសេធមិនព្រមទទួលទេ ដរាបណាពួកអឺរ៉ុបមិនទាន់ប្រគល់សំពៅ និងទំនិញទៅឱ្យពួកចិនវិញ ។
ឆ្លើយតបទៅនឹងព្រះរាជឥរិយាបថនេះ បេឡូសូ និងប្លាសរូហ្ស៍បានសម្រេចចាត់ចែងសភាពការណ៍ឱ្យបានលឿន ។ គេនាំគ្នាធ្វើដំណើរចេញពីភ្នំពេញទៅកាន់ស្រីសន្ធរ ជាមួយនឹងដូមីនីកាំងឌីយ៉ឺហ្គោអាឌូអាត និងកម្លាំងមោះមុតដាច់ខាតចំនួន៣៨នាក់ (9) ។ ចេញដំណើរពីក្បាលព្រលប់ ដើរចម្ងាយ៣០គីឡូម៉ែត្រ ពួកនេះបានមកដល់រាជធានីនៅប្រហែលជាម៉ោង២ទៀបភ្លឺ ហើយបានចាប់បើកការវាយប្រហារទៅលើព្រះរាជវាំងមុនថ្ងៃរះ ។ ព្រះរាមាជើងព្រៃ បានត្រូវពួកនេះធ្វើឃាត នៅពេលដែលទ្រង់កំពុងរៀបចំភៀសខ្លួនចេញជាមួយស្រីស្នំ និងសេនាការពារ ចំណែកឯពួកនាម៉ឺនសព្វមុខមន្ដ្រី និងរាជបរិពារ ដែលមានតែលំពែង និងធ្នូស្នាជាអាវុធ បានត្រូវបាញ់សម្លាប់អស់ជាច្រើន (ព្រឹត្ដិការណ៍នេះកើតឡើងនៅក្នុងខែឧសភា ឆ្នាំ១៥៩៦) (10) ។ ប្រតិបត្ដិការនេះ ទទួលបានជោគជ័យទាំងស្រុង ក៏ប៉ុន្ដែពួកអ្នកផ្សងព្រេងបានត្រូវអ្នកស្រុកចោមរោមវាយបកវិញ ក្រោយពីបានពិនិត្យឃើញថាពួកនេះមានចំនួនតិចជាង ដោយបង្ខំឱ្យពួកគេដកថយមកកាន់ភ្នំពេញវិញទាំងលំបាក ជាទីដែលគេចតកប៉ាល់ទុក ។ បើកុំតែមេទ័ពខ្មែរត្រូវរបួសដោយលំពែងធ្លាយពោះស្លាប់ កុំអីពួកនេះពិបាកនឹងគេចខ្លួនរួចណាស់ ។ គាប់ជួនពេលនោះ ហ្គាលីណាតូ និងពលទាហានរបស់គេ បានធ្វើដំណើរពីបារាជមកដល់ល្មម ធ្វើឱ្យសភាពការណ៍នៅភ្នំពេញល្អប្រសើរឡើងវិញ ។ ក៏ប៉ុន្ដែមិនបានប៉ុន្មានថ្ងៃផង ក្រោយពីបានបើកការប្រជុំក្រុមប្រឹក្សាសង្គ្រាមមួយរួចមក ហើយពិនិត្យឃើញថា ពួកខ្មែរអាចនឹងបើកការប្រយុទ្ធបកម្ដងទៀតធ្វើឱ្យមានការលំបាកក្នុងការទប់ទល់ ហ្គាលីណាតូ បានសម្រេចលើកយុថ្កាបើកកប៉ាល់ចេញពីភ្នំពេញចុះតាមទន្លេមេគង្គ ធ្វើដំណើរទៅកាន់តុងកឹងវិញក្នុងគោលបំណងទៅទាមទារយកកប៉ាល់មួយគ្រឿងដែលពួកចិនបាននាំយកទៅក្រោយពីបានធ្វើឃាតលោកអភិបាលក្រុងម៉ានីល និងក្រុមនាវិករួចមក ។ ទៅដល់តុងកឹង បែឡូសូ និងប្លារូហ្ស៍ ដែលនៅតែមានគំនិតមិនចង់បោះបង់គម្រោងការរបស់ខ្លួននៅកម្ពុជានោះ បាននាំគ្នាដើរបែកចេញពីជនរួមជាតិគេ ឆ្លងកាត់ជួរភ្នំអាណ្ណាម ស្រុករបស់អ្នកព្រៃខា ចូលមកស្រុកលាវ រួចត្រលប់មកកម្ពុជាវិញ ។ មកដល់ស្ទឹងត្រែង ពួកគេបានបញ្ចុះបញ្ចូលអ្នកអង្គម្ចាស់តន់ថា ឱកាសដណ្ដើមយករាជសម្បត្ដិមកដល់ហើយ ហើយយាងព្រះអង្គឱ្យធ្វើដំណើរមកជាមួយគេ ។ ពេលធ្វើដំណើរមកដល់ស្រីសន្ធរ ពួកនាម៉ឺនសព្វមុខមន្ដ្រីដែលកំពុងតែនឿយណាយនឹងអនាធិបតេយ្យ បណ្ដាលមកពីមរណភាពរបស់ព្រះរាមាជើងព្រៃផង ពីព្រោះថាកម្ពុជាពេលនោះ មិនមែនគ្រាន់តែគ្មានស្ដេចសោយរាជ្យប៉ុណ្ណោះទេ គឺខ្វះទាំងអ្នកឡើងស្នងរាជ្យបន្ដថែមទៀត ក៏សម្រេចនាំគ្នាលើកចៅពញាតន់ ឱ្យឡើងគ្រងរាជបល្ល័ង្កនៅថ្ងៃទី១៤ ខែឧសភា ឆ្នាំ១៥៩៦ ទៅ ។
២. ព្រះបរមរាជា ឬចៅពញាតន់ (១៥៩៦-១៥៩៧)
ចៅពញាតន់ពេលនោះមានព្រះជន្មាយុ១៨ព្រះវស្សា (11) ។ នាម៉ឺនសព្វមុខមន្ដ្រីបានជ្រើសតាំងព្រះអង្គជាមហាក្សត្រនៅថ្ងៃទី១៤ ខែឧសភា ឆ្នាំ១៥៩៦ ដោយថ្វាយព្រះនាមថា «សម្ដេចព្រះបរមរាជា »។
ក្រោយពីបានឡើងសោយរាជ្យ ព្រះបរមរាជាបានសព្វព្រះរាជហឫទ័យតបស្នងសងគុណដល់ បែឡូសូ និងប្លារូហ្ស៍ ភ្លាម ដោយទ្រង់លើកអ្នកទី១ឱ្យធ្វើជាស្ដេចត្រាញ់នៅលើដីបាភ្នំ និងអ្នកទី២ឱ្យធ្វើជាស្ដេចត្រាញ់នៅលើដីទ្រាំង ។ តាមមើលទៅ ប្រជាជនប្រហែលជាមិនសូវពេញចិត្ដប៉ុន្មានទេ នឹងការតែងតាំងពួកអ្នកផ្សងព្រេងទាំង២ ឱ្យក្លាយទៅជាអភិបាលខែត្រដ៏មានអំណាចនៅក្នុងព្រះរាជាណាចក្រនេះ ហើយមានមន្ដ្រីជាច្រើននាក់ដែលមិនសប្បាយចិត្ដ ។ ដោយហេតុនេះ ព្រះរាជាដែលគង់នៅក្រោមស្វេតច្ឆត្រ មិនសូវជាស្រួលប៉ុន្មានទេ ។ បែឡូសូ និងប្លារូហ្ស៍ យល់ហេតុការណ៍នេះច្បាស់ណាស់ ក៏តាំងស្វះស្វែងរកជំនួយពីខាងក្រៅ ។ បែឡូសូបានសុំជំនួយពីពួកព័រទុយហ្គាល់ នៅម៉ាឡាកា ឯប្លារូហ្ស៍ ទៅសុំជំនួយពីពួកអេស្ប៉ាញនៅឯហ្វីលីពីន ។ អភិបាលក្រុងម៉ានីលបានប្រគល់ទាហាន ២០០នាក់ ឱ្យជិះកប៉ាល់៣គ្រឿងចេញមក ក៏ប៉ុន្ដែគ្មានកប៉ាល់ណាមួយបានមកដល់កម្ពុជាទេ ហើយមានតែកប៉ាល់១ប៉ុណ្ណោះដែលបានត្រលប់ទៅដល់ហ្វីលីពីនវិញ ។ ដូច្នេះ បែឡូសូ និងប្លារូហ្ស៍ មិនអាចពឹងផ្អែកអ្នកណាបានក្រៅតែពីពឹងលើខ្លួនឯងឡើយ ។
នៅពេលនោះ ពួកចាម និងម៉ាឡេ ដែលព្រះរាជាខ្មែរមុនៗអនុញ្ញាតឱ្យរស់នៅប្រមូលផ្ដុំគ្នានៅក្នុងខែត្រត្បូងឃ្មុំ បើទោះបីថាពួកនេះជាជនបរទេសហើយកាន់សាសនាមហាម៉ាត់ក៏ដោយ បាននាំគ្នាបះបោរឡើង ។ ពួកនេះបានពិនិត្យមើលឃើញថាព្រះរាជាណាចក្រចុះទន់ខ្សោយ ក៏មានបំណងចង់កាន់អាវុធឡើងទាមទារឯករាជ្យ ក្រោមការដឹកនាំរបស់មេ២នាក់ គឺចាមឈ្មោះ ពោធិរតន៍ ដែលប្រហែលជាជាប់ខ្សែស្រឡាយនឹងរាជវង្សចាមពីមុន និងជនម៉ាឡេឈ្មោះ ល័កស្មណៈ (12) ដែលពង្រត់ម្ចាស់ក្សត្រី១អង្គដែលខ្លួនធ្លាប់ស្រឡាញ់ប្រហែលជាក្សត្រីយ៍ដែលធ្លាប់រៀបអាពាហ៍ពិពាហ៍ជាមួយ បែឡូសូ ហើយទ្រង់មានគំនុំស្អប់ពួកអឺរ៉ុប ជំរុញឱ្យល័កស្មណៈធ្វើការសងសឹកថ្វាយ ។ បែឡូសូ និងប្លារូហ្ស៍ បានកេណ្ឌទ័ពនៅក្នុងអាណាខែត្រទឹកដីរបស់ខ្លួន រួចចេញច្បាំងវាយកម្ទេចពួកចាម និងម៉ាឡេ បះបោរបរាជ័យអស់ទៅ ។ ពេលមកដល់រាជធានីស្រីសន្ធរ ព្រះបរមរាជាចៅពញាតន់ បានចាត់ឱ្យអ្នកទាំង២បន្ដដំណើរទៅកាន់ភ្នំពេញ ដើម្បីជួយរៀបចំសណ្ដាប់ធ្នាប់ ដែលល្អក់កករដោយជម្លោះរវាងពួកជប៉ុន និងអេស្ប៉ាញ ២កប៉ាល់ដែលទើបតែមកដល់ ដោយដឹកអាវុធយុទ្ធភណ្ឌមកផ្គត់ផ្គង់កប៉ាល់៣មុន ដែលនៅម៉ានីលគេមិនដឹងថាបាត់ដំណឹងទៅហើយទេ ។ ក៏ប៉ុន្ដែបែឡូសូ និងប្លារូហ្ស៍មកដល់យឺតពេល ពួកជប៉ុនបានសម្លាប់ពួកអេស្ប៉ាញអស់ជាច្រើន ។ បន្ទាប់មក ពួកជប៉ុនបានរួមដៃជាមួយនឹងពួកម៉ាឡេ ព្រួតគ្នាវាយមកលើទ័ពដ៏តិចតួចរបស់ បែឡូសូ និងប្លារូហ្ស៍ ហើយសម្លាប់អ្នកទាំង២បាន ក្រោយពីការប្រយុទ្ធដ៏អង់អាចក្លាហានរួចមក ។
ព្រះបរមរាជាចៅពញាតន់ក្រោយពីបានជ្រាបពីដំណឹងនេះបានបញ្ជាទ័ពផ្ទាល់ខ្លួនព្រះអង្គចេញពីស្រីសន្ធរ មកវាយពួកម៉ាឡេដែលស្ថិតនៅក្រោមបញ្ជាការរបស់ល័កស្មណៈ និងពួកចាមដែលស្ដាប់តាមបញ្ជារបស់ពោធិរតន៍ ។ ក៏ប៉ុន្ដែដោយចៃដន្យអាក្រក់ ព្រះរាជាត្រូវបានសត្រូវធ្វើឃាតនៅក្នុងការប្រយុទ្ធដំបូង នៅក្នុងឆ្នាំ១៥៩៧ ទៅ (13) ។
៣. ព្រះបរមរាជាទី២ ឬពញាអន (១៥៩៧-១៥៩៩)
ព្រះរាជាដែលនាម៉ឺនសព្វមុខមន្ដ្រី និងព្រះរាជវង្សានុវង្ស បានជ្រើសរើសឱ្យឡើងសោយរាជ្យបន្ដពីចៅពញាតន់ គឺព្រះបិតុលារបស់ព្រះអង្គមួយអង្គ ព្រះនាមថា ពញាអន ។ ទ្រង់មានព្រះអភិសេកនាមថា «សម្ដេចព្រះបរមរាជាបរមបពិត្រ» ។
និយាយអំពីពួកចាម និងម៉ាឡេវិញ ក្រោយពីទទួលជ័យជម្នះលើចៅពញាតន់រួចហើយ បានដណ្ដើមយកខែត្រ២ដាក់ជាចំណុះ ហើយក៏តាំងរៀបចំការគ្រប់គ្រងឡើងវិញសាជាថ្មី ។ ក៏ប៉ុន្ដែពួកអ្នកស្រុកមិនព្រមស្ដាប់បញ្ជាពួកនេះទេ ព្រោះថាជាជនបរទេសមិនចេះនិយាយខ្មែរ ម្ល៉ោះហើយម្នាក់ៗគ្មាននរណាចង់ធ្វើជាមន្ដ្រី ឬក៏ជាទាហានបម្រើឡើយ ។ ទោះជាយ៉ាងណាក្ដី ពួកនេះនៅតែអាចជ្រើសរើសទ័ពបានពីក្នុងចំណោមពួកចាម និងម៉ាឡេ មកពីគ្រប់ទិសទីក្នុងព្រះរាជាណាចក្រកម្ពុជា ដែលមានបំណងចង់មកជួយពួកអ្នកកាន់សាសនាដូចគ្នាដែរ ។ ប៉ុន្ដែស្ថានភាពរបស់ពួកនេះបានស្រុតចុះជារៀងរាល់ថ្ងៃ ។
ព្រះរាជាដែលទើបនឹងឡើងសោយរាជ្យថ្មី បានបើកការវាយប្រហារមកលើពួកនេះយ៉ាងអង់អាចក្លាហាននៅលើសមរភូមិជាច្រើន ។ នៅទីបញ្ចប់ទ្រង់ទទួលបាននូវជ័យជម្នះ ។ មេកោយរបស់ពួកនេះត្រូវចាប់បានហើយសម្លាប់ចោលជាមួយនឹងកូនចៅបះបោរមួយចំនួន ចំណែកអ្នកដែលដោយរោយតាមគេបានត្រូវលើកលែងទោស ។
ការបះបោររបស់ពួកបរទេសទើបតែស្ងប់បាត់ទៅមិនទាន់ទាំងបានប៉ុន្មានផង ក៏លេចមានការបះបោរមួយទៀត ដឹកនាំដោយអ្នកស្រុកអាយម្នាក់ឈ្មោះថា នាយកែវ មានដើមកំណើតចេញមកពីខែត្រតាកែវ នៅក្បែរចតុម្មុខ (ភ្នំពេញ) ដែលបានប្រកាសខ្លួនថាជា ស្ដេចកែវព្រះភ្លើង ។ ជននេះជាមនុស្សចេះដឹងម្នាក់ហើយ អាចកៀងគរគេឯងឱ្យចុះចូលដើរតាម បង្កបានជាទ័ពមួយកង ។ ព្រះរាជាពញាអន បានដឹកនាំទ័ពមកវាយស្ដេចកែវព្រះភ្លើងនេះ២ដង ក៏ប៉ុន្ដែមិនអាចធ្វើអ្វីបាន ។
ក្រោយពីប្រតិបត្ដិការលើកទី២ ព្រះរាជាដែលមានចរិតច្រឡើសបើសបន្ដិចដែរ បានជួបនឹងនារីម្នាក់ឈ្មោះ ទាវ នៅពេលទ្រង់យាងវិលត្រលប់ទៅស្រីសន្ធរវិញ ក៏ចាប់ចិត្ដស្រលាញ់ចង់បាននាងមកធ្វើជាស្នំ ។ ប៉ុន្ដែ នាងទាវដែលស្ម័គ្រស្មោះជាមួយពញាថីជាស្វាមីបានប្រកែកមិនយល់ព្រមស្រលាញ់ព្រះអង្គវិញទេ ជាហេតុធ្វើឱ្យព្រះរាជាខ្ញាល់ ហើយបញ្ជាឱ្យគេចាប់នាងចងដាក់ច្រវាក់ ។ ហេតុការណ៍នេះបានធ្វើឱ្យ ពញាថី ខឹងសម្បានឹងព្រះរាជាជាខ្លាំង ក៏រត់មកចុះចូលជាមួយស្ដេចកែវព្រះភ្លើង ហើយរៀបផែនការធ្វើគុតព្រះរាជា ប៉ុន្មានខែក្រោយមក នៅក្នុងការស្កាត់លួចវាយប្រហារមួយក្នុង១៥៩៨ ។
នាសម័យនោះ មានពួកអឺរ៉ុបជាច្រើននាក់ ជាពិសេសគឺពួកព័រទុយហ្គាល់ និងអេស្ប៉ាញ សុទ្ធតែមានឥទ្ធិពលជាខ្លាំងមកលើរាជវាំងកម្ពុជា ។ ពួកនេះមានរបររកស៊ីរីកចម្រើនល្អណាស់ បង្កើតបានជាការរំខានដល់ពួកចិន ចាម និងម៉ាឡេ ដែលរកស៊ីធ្វើពាណិជ្ជកម្មដែរ ម្ល៉ោះហើយ ក៏នាំគ្នាខិតខំធ្វើយ៉ាងណាឱ្យពួកនេះធ្លាក់ចូលក្នុងភាពអាប់យស ។ ក្រោយពីមរណភាពរបស់ បែឡូសូ និងប្លារូហ្ស៍ នៅក្នុងឆ្នាំ១៥៩៧រួចមក ឥទ្ធិពលរបស់ពួកព័រទុយហ្គាល់ និងអេស្ប៉ាញក៏ធ្លាក់ចុះ ហើយពួកនេះត្រូវបង្ខំចិត្ដចាកចេញពីកម្ពុជា វិលត្រលប់ទៅហ្វីលីពីនវិញ ។
ប៉ុន្ដែការបណ្ដេញកាត់កាល់នេះមិនមានអាយុកាលយូរប៉ុន្មានទេពីព្រោះថា ប៉ុន្មានឆ្នាំក្រោយនោះបន្ដិចគេប្រទះឃើញពួកសេស្វ៊ីត និងកាតូលិកនិកាយផ្សេងៗទៀតជាច្រើននៅកម្ពុជា រួចមាននិគមព័រទុយហ្គាល់មួយ ដែលបានគេចចេញផុតពីការសម្លាប់រង្គាលរបស់ពួកម៉ាកាសា តាមការអុចអាលពីពួកហូឡង់ ដែលជាសត្រូវរបស់ពួកគេ ពួកព័រទុយហ្គាល់នេះ និងបព្វជិតសាសនាកាតូលិករបស់គេបានមកតាំងទីលំនៅមុនដំបូងនៅភ្នំពេញ ដែលគេហៅថា កូលំប៉េ រួចបន្ទាប់មកបានទៅតាំងទីលំនៅនៅឯពញាឮដែលគេហៅថា ពីញ៉ាលូ ។ មានពួកជប៉ុនមួយចំនួនដែលត្រូវគេធ្វើបាបនៅឯប្រទេសជប៉ុនដោយសារការកាន់សាសនាកាតូលិក បានមកចូលរួមជាមួយពួកព័រទុយហ្គាល់នេះដែរ ហើយបានមកតាំងនៅលើដងទន្លេក្បែរភ្នំពេញត្រង់កន្លែងមួយដែលពួកអឺរ៉ុបហៅតាមឈ្មោះរបស់គេថា ចូវដុក ។
៤. ព្រះរាជានុសិទ្ធិ ចៅពញាយោម (១៥៩៩-១៦០០)
ព្រះអង្គម្ចាស់យោម ជាព្រះរាជបុត្រាទី៣របស់ព្រះសត្ថា ពេលនោះទើបតែមានព្រះជន្មាយុ ១៥ព្រះវស្សាប៉ុណ្ណោះ (14) ។ ទ្រង់ត្រូវទទួលបន្ទុកដឹកនាំគ្រប់គ្រងប្រទេសជាតិ ដោយទទួលព្រះឋានៈជាសម្ដេចព្រះកែវហ្វ៊ា (15) គឺថា ទ្រង់មានអំណាចដូចជាព្រះរាជា ក៏ប៉ុន្ដែមិនមែនជាស្ដេចទេ ។ ពេលនោះនាម៉ឺនសព្វមុខមន្ដ្រី មិនចង់លើកចៅពញាយោម ឱ្យឡើងសោយរាជ្យទេ គេស្រលាញ់ព្រះស្រីសុរិយោពណ៌ជាង ដែលព្រះបរមឥន្ទរាជា (ព្រះសត្ថា) បានលើកឱ្យធ្វើជាឧបរាជរួចជាឧភយោរាជ ហើយត្រូវសៀមចាប់យកទៅជាឈ្លើយតាំងតែពីពេលក្រុងលង្វែកត្រូវបែកបាក់ម្ល៉េះ ។
ចៅពញាយោម ក្នុងព្រះឋានៈជាព្រះរាជានុសិទ្ធិ ទ្រង់គង់នៅឯរាជធានីស្រីសន្ធរ ហើយបានចាប់បន្ដធ្វើសង្គ្រាមជាមួយស្ដេចកែវព្រះភ្លើង ។ ទីបញ្ចប់ទ្រង់ចាប់ស្ដេចកែវព្រះភ្លើងបាន ហើយបានបញ្ជាឱ្យគេសម្លាប់ចោលទៅ ។
ចៅពញាយោមមានព្រះទ័យស្រាល ហើយក៏ខិលខូចមិនចាញ់ពញាអនប៉ុន្មានដែរ ។ ទ្រង់សព្វព្រះទ័យនឹងការបរបាញ់សត្វ និងការសប្បាយផ្សេងៗណាស់ ហើយមិនខ្លាចនឹងចាប់ប្រពន្ធ ឬកូនក្រមុំប្រជាជនទេ កាលណាទ្រង់សព្វព្រះទ័យ ហើយមិនសូវយកព្រះទ័យទុកដាក់នឹងកិច្ចការព្រះនគរឡើយ ។ ម្ល៉ោះហើយក៏កើតមានអំពើឧក្រិដ្ឋពាសពេញប្រទេស បណ្ដាចៅហ្វាយខែត្រក៏មិនបានយកចិត្ដទុកដាក់ ហើយក៏មិនដែលទទួលទោសពៃរ៍អ្វីដែរ ។ មានការចាប់ពង្រត់អ្នកស្រុកដែលនៅឆ្ងាយពីទីប្រជុំជនយកពីកន្លែងមួយទៅលក់ជាខ្ញុំនៅកន្លែងមួយទៀត គឺលក់ទៅវិញទៅមកចុះឡើងជាច្រើនលើកច្រើនសា ។
សម្ដេចព្រះទេវីក្សត្រីយ៍ ជាព្រះអយ្យការបស់ចៅពញាយោមដែលគង់នៅឯចតុម្មុខ និងនាម៉ឺនសព្វមុខមន្ដ្រីទាំងអស់ នៅពេលដែលសង្កេតឃើញថា ប្រជារាស្ដ្ររងទុក្ខខ្លោចផ្សាហើយមិនសប្បាយចិត្ដនឹងចៅពញាយោមដូច្នេះ ក៏បានចាត់គ្នាឱ្យទៅគាល់ស្ដេចសៀម សុំឱ្យបញ្ជូនព្រះឧភយារាជស្រីសុរិយោពណ៌ (16) និងព្រះរាជបុត្រទាំងអស់មកវិញ ។
ស្ដេចសៀមពេលនោះ បានទទួលយកសំណូមពរតែមួយចំណែកទេ គឺបានអនុញ្ញាតឱ្យវិលត្រលប់មកកម្ពុជាវិញតែព្រះស្រីសុរិយោពណ៌ និងព្រះរាជបុត្រាប្អូនព្រះនាមព្រះឧទ័យប៉ុណ្ណោះ ចំណែកឯព្រះជ័យចេស្ដា ជាព្រះរាជបុត្រាច្បង ទុកឱ្យនៅនឹងស្រុកសៀមសិន ។
ព្រះរាជានុសិទ្ធិពញាយោម នៅពេលដែលបានទទួលដំណឹងថា ព្រះស្រីសុរិយោពណ៌ យាងមកដល់ ស្លាកែត (17) ហើយ ទ្រង់បានទប់ព្រះទ័យមិនឱ្យមានរឱសឋានអ្វីទេ ហើយបាននាំនាម៉ឺនសព្វមុខមន្ដ្រីជាច្រើនទៅគាល់ រួចបានបង្វែរអំណាចជាផ្លូវការថ្វាយនៅក្នុងឆ្នាំ១៦០០ ។
៥. ព្រះស្រីសុរិយោពណ៌ (១៦០០-១៦១៨)
ព្រះឧបយុវរាជ បានឡើងគង់លើរាជបល្ល័ង្កនៅក្នុងឆ្នាំ១៦០០ ដោយទទួលព្រះនាមថា «ព្រះបាទសម្ដេចស្ដេចព្រះរាជឱង្ការព្រះស្រីសុរិយោពណ៌ទេវតារាជាបរមរាជាធិរាជរាមា» ។ ពេលនោះទ្រង់មានព្រះជន្មា៤៦ព្រះវស្សាហើយ ។ មហេសីរបស់ព្រះអង្គបានឡើងទៅជាព្រះអគ្គមហេសី ហើយមានព្រះឋានៈជា «សម្ដេចព្រះភគវតី ស្រីសុជាតិ» ។ ព្រះឧទ័យជាព្រះរាជបុត្រា ដែលទើបតែមានព្រះជន្មាយុ១៣ព្រះវស្សា បានឡើងជាព្រះមហាឧបរាជ រីឯព្រះរាជានុសិទ្ធិចៅពញាយោម នៅរក្សាព្រះឋានៈជា ព្រះកែវហ្វ៊ា ដដែល ។
ចៅពញាយោមបានសម្ដែងឱ្យឃើញតាមរយៈការនាំនាម៉ឺនសព្វមុខមន្ដ្រីទៅចូលគាល់ព្រះឧបយុវរាជនៅឯស្លាកែតថា ព្រះអង្គស្វាគមន៍អបអរការយាងមកដល់របស់ព្រះរាជា ដែលព្រះអយ្យកាព្រះអង្គបានជ្រើសរើសឡើង តែក្នុងព្រះទ័យរបស់រាជានុសិទ្ធិវិញ បានសន្សំទុកនូវគម្រោងការដ៏សែនឧក្រិដ្ឋជាច្រើន ។
បន្ទាប់ពីបានឡើងសោយរាជ្យសម្បត្ដិភ្លាម ព្រះរាជាស្រីសុរិយោពណ៌បានចាត់ឱ្យឧកញ៉ាតេជោព្រះអង្គដែលអ្នកស្រុកហៅថា តេជោក្រហមក ហើយនិងឧកញ៉ាយមរាជមឿង ដឹកនាំទ័ពទៅបង្ក្រាបអ្នកស្រុកកំពង់ស្វាយ ស្រីសន្ធរ នគរវត្ដ ត្បូងឃ្មុំ និងបាភ្នំ ដែលកន្លងមកបះបោរមិនព្រមទទួលស្គាល់អំណាចរបស់ព្រះកែវហ្វ៊ា ។ យុទ្ធនាការនេះមិនជាយូរប៉ុន្មានទេ ពីព្រោះខែត្រទាំងអស់នោះ មិនបានប្រឆាំងទប់ទល់នឹងទ័ពរបស់ព្រះរាជាឡើយ ហើយឆាប់នាំគ្នាមកសារភាពចុះចូលជាបន្ទាន់ ។
ក្រោយមកទៀត តេជោព្រះអង្គ បានទទួលព្រះរាជបញ្ជាឱ្យទៅបង្ក្រាបជនបះបោរម្នាក់ឈ្មោះថា អ្នកព្រះរៀម ហៅ កូម៉ែល ដែលកំពុងតែកទ័ពនៅក្នុងខែត្រទ្រាំងប្រកបដោយជោគជ័យ ។ គេនិយាយថាជននេះបានប្រើប្រាស់សីលធ្មប់បំពុលទឹកត្រពាំង និងទឹកអណ្ដូងទាំងអស់ដែលស្ថិតនៅតាមផ្លូវដែលទ័ពព្រះរាជាធ្វើដំណើរទៅ ធ្វើឱ្យទាហានពុលស្លាប់អស់ជាច្រើន ។
ពេលនោះស្ដេចសៀមបានយល់ព្រមបញ្ជូនព្រះជ័យចេស្ដា ឱ្យវិលត្រលប់មកកម្ពុជាវិញ តាមសំណូមពររបស់ព្រះរាជាកម្ពុជាជាព្រះបិតា ។ ក្នុងព្រះរាជដំណើរយាងត្រលប់មកវិញនេះ ព្រះជ័យចេស្ដា បានបង្ក្រាបធ្វើឱ្យបណ្ដាខែត្រដែលនៅតាមផ្លូវមានសន្ដិភាពឡើងវិញ មានខែត្រនាងរង បាត់ដំបង ពោធិ៍សាត់ កំពត រហូតដល់កោះស្លាកែត រួចទ្រង់យាងកាត់ទៅជួបជាមួយតេជោព្រះអង្គដែលទើបតែដាក់តាំងទ័ពនៅពីមុខបន្ទាយខ្មាំងនៅទ្រាំង ។ ក្រោយពីបានជួបជាមួយកងទ័ព ហើយទទួលព័ត៌មានអំពីយុទ្ធសាស្ដ្របំពុលទឹករបស់ កូម៉ែល ព្រះជ័យចេស្ដា បានចេញបញ្ជាហាមមិនឱ្យទាហានផឹកទឹកត្រពាំងដែលនៅតាមដងផ្លូវទេ រួចបានចាត់ឱ្យកេណ្ឌអ្នកស្រុកទៅដងទឹកពីទីឆ្ងាយ ដាក់បំពង់រាប់ពាន់សែន យកមកឱ្យទាហានផឹកវិញ ។
យប់មួយនៅពេលដែលពួកខ្មាំងនៅក្នុងបន្ទាយទ្រាំងមិនបានគិតដល់ថានឹងមានការប្រយុទ្ធ តេជោព្រះអង្គ និងយមរាជមឿងបានប្រមូលទាហានដែលមានកាំភ្លើងកាន់នៅដៃ វាយលុកចូលទៅក្នុងបន្ទាយ ហើយបាញ់សម្លាប់ពួកខ្មាំងទាំងអស់ រួមទាំងកូម៉ែល និងពួកធ្មប់ផង ។
ចប់សង្គ្រាម ព្រះរាជាណាចក្របានសុខសន្ដិភាពហើយ ព្រះស្រីសុរិយោពណ៌ បានលើកតេជោព្រះអង្គ ឱ្យធ្វើជាចៅហ្វាយខែត្រសំរោងទង ។
រយៈកាលបន្ដិចក្រោយមក តេជោព្រះអង្គបានទទួលមរណភាពទៅដោយជរាភាព ។ ពេលនោះព្រះរាជាបានលើកខ្ញុំបម្រើរបស់តេជោព្រះអង្គម្នាក់ឈ្មោះ យ៉ត (18) មានដើមកំណើតជាជនជាតិព្នង ឱ្យឡើងធ្វើជាចៅហ្វាយខែត្របន្ដ ពីព្រោះខ្ញុំនេះតែងតែដើរតាមនាយចៅហ្វាយទៅគ្រប់សមរភូមិប្រយុទ្ធ និងរៀនសូត្រចេះដឹងពីចិត្ដគំនិត និងល្បិចប្រយុទ្ធផ្សេងៗរបស់ចៅហ្វាយនាយ ហើយបានបង្ហាញឱ្យឃើញថាមានប្រាជ្ញាឈ្លាសវៃជាច្រើនលើកច្រើនសា ។ នាយយ៉តនេះបានចាប់បន្ដធ្វើការបង្ក្រាបឱ្យស្រុកមានសុខសន្ដិភាពប្រកបដោយជោគ ជ័យ ដែលត្រូវអាក់ខានមួយរយៈដោយមរណភាពរបស់តេជោព្រះអង្គ ។
គឺនៅពេលនោះហើយដែលព្រះរាជាបានសម្រេចប្ដូរព្រះរាជវាំងពីកោះស្លាកែត ដោយនាំព្រះរាជបរិពារ រាជវង្សានុវង្ស និងនាម៉ឺនសព្វមុខមន្ដ្រីមកគង់នៅឯល្វាឯម (19) ដែលស្ថិតនៅចំពីមុខភ្នំពេញវិញ ។ ទ្រង់បានលើកព្រះអគ្គមហេសីសម្ដេចព្រះភគវតីស្រីសុជាតិឱ្យឡើងជា ព្រះមហាក្សត្រីយ៍ ។ ខែត្រស្រីសឈរក៏ត្រូវបែងចែកជា២គឺ មួយផ្នែកខាងលើនៅរក្សាឈ្មោះថា ស្រីសឈរ ដដែល ឯមួយផ្នែកខាងក្រោមមានឈ្មោះថា ល្វាឯម នៅក្នុងឆ្នាំ១៦០៤ ។
ហើយនៅពេលនោះដែរដែលព្រះរាជា ដែលទ្រង់គ្រងតែអាវផាយពណ៌លឿងតាមរបៀបសៀម និងបានសម្រេចឱ្យនាម៉ឺនសព្វមុខមន្ដ្រី តាំងពីពួកមហាតលិក និងនាយពលឡើងទៅ បោះបង់សម្លៀកបំពាក់របៀបលង្វែក ដែលបង់កក្រមាវែងចេញ ហើយឱ្យស្លៀកពាក់ដូចព្រះអង្គវិញ ។ ទាំងការនិយាយស្ដីក៏ទ្រង់ឱ្យដូរគឺឱ្យហៅព្រះអង្គថា ព្រះស្រីសុរិយោពណ៌សម្ដេចមនាថ វិញ ។ ស្ដ្រីៗដែលមានឋានៈខ្ពស់ត្រូវឆ្លើយនឹងព្រះរាជាថា ព្រះពរ ឆ្លើយនឹងព្រះមហាក្សត្រីយ៍ថា ព្រះម៉ែ ហើយឆ្លើយនឹងពួកអ្នកអង្គម្ចាស់ថា ព្រះបាទម្ចាស់ ។
នៅពេលនោះ អតីតរាជានុសិទ្ធិព្រះកែវហ្វ៊ាយោមមិនអាចលាក់កំបាំងគំនិតដែលចង់ដណ្ដើមយកអំណាចតទៅទៀតបានទេ ទ្រង់បានគេចខ្លួនទៅគង់នៅក្នុងខែត្រស្ទោង ចន្លោះខែត្រជីក្រែង និងខែត្រកំពង់ស្វាយ នៅក្នុងឆ្នាំ១៦១១ ហើយចាប់កេណ្ឌកងទ័ព ។ ព្រះស្រីសុរិយោពណ៌ បានលើកទ័ពទៅវាយកែវហ្វ៊ាយោម ចាប់ខ្លួនបាន ហើយបានបញ្ជាឱ្យគេធ្វើឃាតចោលទៅ ។
ពួកសៀមដែលតាមដានសភាពការណ៍នៅកម្ពុជាជាប់ នៅពេលដែលទទួលព័ត៌មានស្ដីអំពីការបំបែកខ្លួនរបស់ពញាយោម ក៏បញ្ជូនទ័ពមួយកងចូលមកដល់ក្នុងខែត្រពោធិ៍សាត់ ដោយយកលេសថាមកជួយព្រះរាជាកម្ពុជា ។ ព្រះស្រីសុរិយោពណ៌ បានដឹកនាំទ័ពទៅជួបជាមួយទ័ពសៀម ពួកនេះក៏ចាប់បើកការវាយប្រហារមកលើព្រះរាជា តែត្រូវព្រះរាជារុញច្រានឱ្យដកថយទៅប្រទល់ដែនវិញទៅ ។ ព្រះរាជាបានយាងទៅកាន់ស្លាកែតនៅក្នុងខែត្រកំពត ជាទីដែលព្រះអង្គគង់នៅតាំងពីពេលយាងត្រលប់ពីស្រុកសៀមម្ល៉េះ ។
នៅក្នុងឆ្នាំ១៦០១ ព្រះសុរិយោពណ៌ បានកសាងវត្ដសម្បុក ប្រទានដី កាត់ឫសសីមា រួចទ្រង់បញ្ជាចៅហ្វាយខែត្រឱ្យរៀបចំទទួលទូតមកពីទិសឧត្ដរ និងទិសបូព៌ា បណ្ដាអ្នកប្រាជ្ញបណ្ឌិតមកពីបរទេស ជាពិសេស ឱ្យថ្វាយតង្វាយដែលព្រះរាជាកម្ពុជាតាំងពីបុរាណកាលធ្លាប់ថ្វាយជូនដល់ស្ដេចភ្លើង និងស្ដេចទឹករាល់៣ឆ្នាំម្ដង ដើម្បីឱ្យជួយថែរក្សាផ្លូវ និងព្រៃព្រឹក្សា កុំឱ្យសត្រូវបៀតបៀនបាន ។
ព្រះស្រីសុរិយោពណ៌គ្រងរាជសម្បត្ដិបាន១៣ឆ្នាំហើយ ប៉ុន្ដែមិនទាន់ទទួលព្រះរាជាភិសេកនៅឡើយ ។ ព្រះរាជាភិសេកនេះបានប្រព្រឹត្ដទៅនៅក្នុងខែធ្នូ ឆ្នាំ១៦១៣ (20) ព្រះរាជាទ្រង់កាន់ព្រះខ័នរាជ្យ គង់នៅក្រោមស្វេតច្ឆត្រ ហើយទទួលព្រះនាមថា «ព្រះបាទសម្ដេចព្រះបរមរាជាធិរាជរាមធិបតីព្រះស្រីសុរិយោពណ៌» ។
៦. ព្រះជ័យជេដ្ឋា ឬជ័យជេស្ដាទី២ (១៦១៨-១៦២២)
ប្រាំឆ្នាំក្រោយមកគឺនៅក្នុងឆ្នាំ១៦១៨ ដោយនឿយណាយនឹងគ្រប់គ្រងប្រទេសជាតិ ណាមួយមានអាពាធផង ព្រះស្រីសុរិយោពណ៌បានផ្ដល់ដំណឹងដល់ព្រះជ័យជេដ្ឋាជាព្រះរាជបុត្រាច្បងរបស់ព្រះអង្គ ដែលសៀមទុកឱ្យនៅនឹងស្រុកគេនៅឡើយថា ព្រះអង្គមានបំណងចង់ដាក់រាជសម្បត្ដិថ្វាយ ។ ព្រះជ័យជេដ្ឋាក៏សុំការអនុញ្ញាតពីព្រះរាជាអយុធ្យា ធ្វើដំណើរមកកម្ពុជាវិញ ដោយមានទ័ពសៀមហែហមមកជាមួយផង និងពួកខ្មែរដែលនៅបម្រើព្រះអង្គ ហើយដែលមានបំណងចង់មកតាមដែរ ។ មកដល់បរិបូណ៌ ទ្រង់បានបញ្ជាឱ្យទ័ពសៀមវិលត្រលប់ទៅវិញ រួចក៏យាងកាត់មករកល្វាឯម ។ ពេលនោះទ្រង់មានព្រះជន្ម៤០ព្រះវស្សាហើយ ។
ព្រះស្រីសុរិយោពណ៌ក៏លើកព្រះជ័យជេដ្ឋាឱ្យឡើងគ្រងរាជបល្ល័ង្ក មានព្រះនាមថា «ព្រះបាទសម្ដេចព្រះរាជឱង្កាព្រះជ័យជេដ្ឋាធិរាជរាមាធិបតីបរមបពិត្រ» ។ ព្រះឧទ័យជាព្រះអនុជ ដែលមានព្រះជន្ម៣៩ព្រះវស្សា បានទទួលព្រះឋានៈជាព្រះមហាឧបរាជ ។
មួយឆ្នាំក្រោយមក ព្រះស្រីសុរិយោពណ៌បានសោយទិវង្គតទៅ នៅក្នុងព្រះជន្ម៦៤ព្រះវស្សា ។ ព្រះជ័យជេដ្ឋា និងព្រះឧទ័យបានរៀបចំព្រះរាជពិធីបូជាព្រះសពព្រះវររាជបិតា រួចហើយបានយកព្រះអដ្ឋិធាតុទៅបញ្ចុះនៅក្នុងចេតិយមួយសង់នៅលើភ្នំព្រះរាជទ្រព្យ នៅក្បែរឧត្ដុង្គ ភ្នំនោះក៏ដូរឈ្មោះទៅជាត្រៃត្រិង្សចាប់ពីពេលនោះរហូតមក ។
នៅរវាងឆ្នាំ១៦២០ ព្រះរាជាជ័យជេដ្ឋា បានធ្វើដំណើរបូជនីយេសក៍មកកាន់ភ្នំត្រៃត្រិង្ស ទ្រង់ចាប់ព្រះទ័យជាខ្លាំងនឹងស្រុកឧត្ដុង្គ ក៏បញ្ជាឱ្យសង់រាជវាំងមួយនៅពីខាងជើងស្រះកែវ រួចបានចេញបញ្ជាឱ្យដូរឈ្មោះរាជធានីដែលនៅក្បែរព្រះរាជវាំងនោះថាជា «ឧត្ដុង្គមានជ័យ» វិញ ។ នៅឆ្នាំ១៦២២ ទ្រង់បានឱ្យជីកស្រះមួយទៀតនៅពីខាងក្រោយស្រះកែវនោះ ។ គឺនៅក្នុងឱកាសនោះឯងដែលទ្រង់បានចេញបញ្ជាឱ្យនាម៉ឺនសព្វមុខមន្ដ្រី ហៅព្រះអង្គថា «សម្ដេចព្រះនរាយណ៍មនាថ» ។
នៅក្នុងឆ្នាំ១៦២៣ ទ័ពសៀមពីរកងបានចូលមកលុកលុយព្រះរាជាណាចក្រកម្ពុជា មួយកងចូលមកពីទិសខាងជើង ដឹកនាំដោយព្រះរាជបុត្រស្ដេចសៀម និងមួយកងទៀតដឹកនាំដោយឧត្ដមសេនីយ៍ភ្យាថៃណាំ ចូលមកក្នុងខែត្របន្ទាយមាសពីទិសខាងត្បូង ។ ព្រះជ័យជេដ្ឋា បានដឹកនាំទ័ពចេញទៅវាយទ័ពសៀមនៅទិសខាងជើងឱ្យបរាជ័យនៅបរិបូណ៌ ត្រង់ភ្នំចង្កង់ (21) ឯព្រះឧទ័យ បានដឹកនាំទ័ពចេញវាយសៀមឱ្យបរាជ័យនៅបន្ទាយមាស បង្ខំឱ្យចុះទូកចេញទៅវិញទៅ ។ មួយឆ្នាំក្រោយមក ទ័ពសៀមចុះសំពៅវិលត្រលប់មកម្ដងទៀត ក៏ប៉ុន្ដែត្រូវព្យុះបក់បោកបង្ខំឱ្យត្រលប់ចូលទៅក្នុងទន្លេមេណាមវិញដើម្បីជៀសវាងការខូចខាត ជាហេតុធ្វើឱ្យស្ដេចសៀមព្រះចៅ ប្រាសាទថោង បោះបង់យុទ្ធនាការនេះចោល ។ ដើម្បីរំលឹកដល់ជ័យជម្នះនេះ ហើយដើម្បីសម្ដែងការដឹងគុណដល់ព្រះរតនត្រ័យផង ព្រះរាជាបានចេញបញ្ជាឱ្យកសាងប្រាង្គមួយនៅលើកំពូលភ្នំព្រះរាជទ្រព្យពីលើចេតិយដែលដាក់អដ្ឋិធាតុព្រះបិតាព្រះអង្គ ។
ឡើងគ្រងរាជបល្ល័ង្កមិនបានប៉ុន្មានផង ព្រះជ័យជេដ្ឋាបានទទួលយកក្សត្រីអាណ្ណាមមួយអង្គដែលព្រះរាជាអាណ្ណាមបានបញ្ជូនមកថ្វាយ ធ្វើជាព្រះជាយា ហើយបានលើកព្រះក្សត្រីនោះឡើងជា «សម្ដេចភគវតីព្រះស្រីវរក្សត្រីយ៍» ។
ព្រះក្សត្រីយ៍នេះមានសម្ពស្សល្អខ្លាំងណាស់ហើយចេះធ្វើឱ្យព្រះរាជាស្រលាញ់ និងស្ដាប់បង្គាប់ ។ គេបានចាត់ទុកថា ទំនាក់ទំនងរវាងព្រះរាជាអាណ្ណាមជាមួយព្រះរាជាកម្ពុជា បានចាប់ផ្ដើមកើនឡើងពីត្រឹមពេលដែលក្សត្រីយ៍រូបនេះយាងមកដល់រាជវាំងកម្ពុជា ។
នៅក្នុងឆ្នាំ១៦២៣ មានទូតអាណ្ណាមមួយក្រុម បាននាំយកជំនូនល្អៗមកថ្វាយព្រះរាជាជ័យជេដ្ឋា ជាព្រះរាជបុត្រសុណិសារបស់ព្រះរាជាអាណ្ណាម ហើយស្នើសុំព្រះរាជានុញ្ញាតឱ្យប្រជាជនអាណ្ណាមចូលមករស់នៅចុងខាងត្បូងនៃព្រះរាជាណាចក្រ ហើយសុំព្រះរាជានុញ្ញាតបង្កើតទីស្នាក់ការគយមួយកន្លែងនៅព្រៃនគរ (សាយហ្គន) (22) ដើម្បីគាំទ្រដល់កិច្ចការទាំងអស់នេះ ។ ព្រះរាជាអាចនឹងលំបាកក្នុងការប្រកែកមិនយល់ព្រមតាមសំណើ ហើយព្រះរាជក្សត្រីយ៍ក៏ប្រហែលជាបានទទូចឱ្យព្រះរាជាបំពេញតាមបំណងរបស់ព្រះបិតាផងដែរ នៅទីបញ្ចប់ព្រះរាជាក៏យល់ព្រមផ្ដល់ការអនុញ្ញាតតាមការស្នើសុំទាំង២ ។ គឺដោយបែបនេះហើយដែលពួកយួនចូលមករស់នៅក្នុងស្រុកខ្មែរ ហើយចាប់ផ្ដើមទន្ទ្រានដណ្ដើមយកទឹកដីដែលយើងហៅសព្វថ្ងៃថា កូសាំងស៊ីន ។
នៅសម័យនោះ តាមការរៀបរាប់ផ្សេងៗដែលប្រហែលជាគេនិយាយបំផ្លើសច្រើន បានដំណាលពីអ្នកស្រុកអាតូពឺ រើសបានមាសនៅនឹងបាតស្ទឹងពេលទឹកស្រក ព្រះរាជាក៏យាងទៅកាន់ទីកន្លែងនោះ (23) ។ ពាណិជ្ជករជាតិហូឡង់ លោក ហ្សេរ៉ាវ៉ាន់វូសូវ បានសរសេរពីរឿងនេះនៅក្នុងឆ្នាំ១៦៤២ថា «នៅត្រង់ទីកន្លែងនោះ(បឹតហ្សុង-បាចុង-ស្ទឹងត្រែង) មានស្ទឹងមួយហូរចុះពីទិសខាងកើតមក ។ បើឡើងតាមស្ទឹងនេះទៅចម្ងាយ៣០ម៉ៃល៍ មានកន្លែងមួយឈ្មោះថា ណាមម៉យ មានពួកលូវែន (លាវ) រស់នៅ និងមានខ្មែរខ្លះដែររស់នៅទីនោះដែរ ។ កាលពី២០ឆ្នាំមុន ព្រះរាជាកម្ពុជាបានយាងតាមទូកមកដល់កន្លែងដែលអ្នកស្រុករើសបានមាស នៅ២០ម៉ៃល៍ពីខាងលើណាមម៉យ ជាមួយទ័ពជប៉ុន ចិន ម៉ាឡេ និងខ្មែរចំនួន៣០០នាក់ ។ ក៏ប៉ុន្ដែទឹកមិនស្អាត ធ្វើឱ្យមនុស្សស្លាប់អស់ជាច្រើន នៅសល់មិនដល់៥០នាក់ផងទេ ដែលអាចវិលត្រលប់ពីបេសកកម្មនេះវិញ ។ ទោះជាយ៉ាងណាក្ដី ពួកលូវែនបានអះអាងថា មានរ៉ែមាសជាច្រើន តែអ្នកស្រុកមិនបានទាញយកផលទេ ដោយមិនចេះធ្វើជំនួញ» ។
ព្រះជ័យជេដ្ឋា បានសុគតទៅនៅក្នុងឆ្នាំ១៦២៨ ក្នុងព្រះជន្មាយុ៥៨ព្រះវស្សា ក្រោយពីទ្រង់ឡើង សោយរាជ្យបាន១០ឆ្នាំ ។
៧. រយៈកាលចន្លោះរាជសម្បត្ដិ (១៦២៨-១៦២៩)
ព្រះឧទ័យជាព្រះអនុជ នៅពេលនោះមានព្រះជន្មាយុ៤៨ព្រះវស្សាហើយ ។ ព្រះអង្គបានធ្វើជាឧបរាជតាំងពីឆ្នាំ១៦១៨មក ទ្រង់ក៏ចាប់កាន់កិច្ចការព្រះនគរជាបន្ដក្នុងព្រះឋានៈជាព្រះឧបយុវរាជ មានព្រះនាមថា «ព្រះធម្មនាថយោមរាជធម្ម» ។
ព្រះឧទ័យកាន់កាប់អំណាចរហូតដល់ឆ្នាំ១៦២៩ ដល់ពេលដែលព្រះរាជបុត្រច្បងរបស់ព្រះជ័យជេដ្ឋា ព្រះនាមថា ចៅពញាសូរ ដែលបានសាងព្រះផ្នួសតាំងតែពីមុនពេលព្រះបិតាទ្រង់សុគត បានលាចាកព្រះផ្នួសមកវិញ ពេលនោះទ្រង់មានព្រះជន្ម២៦ព្រះវស្សាហើយ ។ ព្រះឧទ័យជាព្រះរាជានុសិទ្ធិ ដែលបានទទួលព្រះឋានៈមួយ ដែលធម្មតាមិនអនុញ្ញាតឱ្យព្រះអង្គទទួលរាជសម្បត្ដិបានទេ ទ្រង់ក៏សម្រេចរៀបចំអភិសេកព្រះភាគិនេយ្យឱ្យឡើងសោយរាជ្យសម្បត្ដិឡើង ។
៨. ព្រះស្រីធម្មោរាជាទី១-ចៅពញាសូរ (១៦២៩-១៦៣០)
ព្រះរាជពិធីអភិសេកចៅពញាសូរបានប្រព្រឹត្ដទៅក្នុងឆ្នាំ១៦២៩ ហើយទទួលព្រះនាមថា «ព្រះបាទសម្ដេចស្ដេចព្រះរាជឱង្ការព្រះស្រីធម្មោរាជាធិរាជរាមាធិបតី» ។ រាជពង្សាវតារជួនកាលហៅព្រះអង្គថា ព្រះស្រីធម្មោរាជា ជួនកាលទៀតហៅព្រះអង្គថា ព្រះរាជសម្ភារ ។
ព្រះរាជាវ័យក្មេងនេះ មិនចង់កាន់អំណាចទេ ម្ល៉ោះហើយទ្រង់បានប្រគល់កិច្ចការព្រះនគរទាំងអស់ឱ្យព្រះបិតុលាចាត់ចែង ចំណែកខ្លួនព្រះអង្គបានយាងទៅគង់នៅឯកោះឃ្លោក សព្វថ្ងៃហៅថា ខ្សាច់កណ្ដាល គិតគូរអំពីអក្សរសាស្ដ្រវិញ ។ គឺជាក្សត្រមួយអង្គពូកែខាងរឿងសាសនា និងអក្សរសាស្ដ្រ ហើយគេនិយាយថាព្រះអង្គបាននិពន្ធកាព្យឃ្លោង និងរឿងរ៉ាវប្រវត្ដិសាស្ដ្រជាច្រើន ប៉ុន្ដែមិនឃើញមានសេសសល់អ្វីរហូតមកដល់យើងទេ ។ ទ្រង់បានឱ្យដូរពិធីការដែលព្រះរាជាមុនៗបានប្ដូរជាច្រើនលើកច្រើនសាមកហើយ ដោយឱ្យអ្នកទាំងពួងហៅព្រះអង្គថា ព្រះរាជសម្ភារបារមីពិសេស និងឱ្យហៅអតីតព្រះរាជានុសិទ្ធិថា ព្រះភូវនាថ ។
ទ្រង់បានឯកភាពជាមួយព្រះជ័យជេដ្ឋា លះបង់ភាពជាបព្វជិតនៅឆ្នាំបន្ទាប់ ដើម្បីដឹកនាំទ័ពទៅវាយលុកខែត្រកូរ៉ាត ក្នុងព្រះរាជបំណងដណ្ដើមយកពីសៀមមកវិញ ។ ក៏ប៉ុន្ដែត្រូវបរាជ័យ មិនអាចឈរជើងបាន ក៏ដកទ័ពមកវិញ ដោយនាំយកឈ្លើយជាច្រើនមកជាមួយផង ។ ពេលយាងត្រលប់មកដល់អង្គរវត្ដវិញ ព្រះឧបយុវរាជបានយាងទាំងគ្រួសារកាត់ទៅជួបនឹងព្រះអង្គ ធ្វើឲ្យព្រះអង្គបានជួបជាមួយព្រះសុជាតិក្សត្រី ជាព្រះមហេសីរបស់ព្រះបិតុលាព្រះអង្គ ដែលគេបានផ្គូផ្គងជាមួយព្រះអង្គពីមុន តែត្រូវព្រះបិតុលារៀបអាពាហ៍ពិពាហ៍ជាមហេសី ក្នុងពេលដែលព្រះអង្គកំពុងបំពេញបព្វជ្ជា ។ ទ្រង់ក៏ចាប់ផ្ដើមស្រលាញ់ព្រះនាងដោយបានសុំណាត់ជួបជាមួយព្រះនាងនៅមុខនាគ ហើយក៏ស្រលាញ់គ្នាទៅ ។
ពេលយាងត្រលប់មកឧត្ដុង្គវិញ ព្រះឧភយោរាជក៏ប្រឈួន ការថែធួនក៏មិនដិតដល់ ទំនាក់ទំនងស្នេហារវាងព្រះរាជា និងព្រះក្សត្រីអង្គវតីចេះតែបន្ដទៅ ។ រាជពង្សាវតារមួយនិយាយថាអ្នកទាំង២សង្ឃឹមថាបានជួបគ្នានៅពេលដែលព្រះឧភយោរាជសុគត ក៏ប៉ុន្ដែផ្ទុយទៅវិញ ព្រះរាជានុសិទ្ធិបែរជាជាសះស្បើយ ធ្វើឱ្យអ្នកទាំង២មានការភិតភ័យជាខ្លាំង ខ្លាចត្រូវគេវែកមុខរាយការណ៍ថ្វាយព្រះបិតុលា ព្រោះនរណាក៏ដឹងដែរថា ព្រះអង្គស្រលាញ់គ្នា ។ ភ័យពេក ព្រះអង្គវតី បានលួចរត់ចេញពីរាជវាំងរបស់ព្រះឧភយោរាជ ទៅគង់នៅព្រះរាជាវាំងរបស់ព្រះរាជាជាមួយសហាយវិញ ។
ព្រឹត្ដិការណ៍ក្នុងរាជវង្សនេះបានបង្កឱ្យកើតមានរឿងអាស្រូវជាខ្លាំងៈ មនុស្សជាច្រើនបន្ទោសថាព្រះឧភយោរាជបានដណ្ដើមយកគូស្នេហារបស់ព្រះរជ្ជទាយាទ អ្នកខ្លះទៀតបន្ទោសព្រះរាជាដែលបានដណ្ដើមយកព្រះជាយារបស់ព្រះឧភយោរាជ ដែលខិតខំដឹកនាំប្រទេសជាតិក្នុងនាមជាព្រះយោមរាជធំ រួចហើយបានប្រគល់រាជសម្បត្ដិមកឱ្យថែរក្សាវិញ ហើយមានអ្នកខ្លះទៀតកាន់ជើងព្រះអង្គវតីដែលសព្វព្រះទ័យនឹងព្រះរាជាក្មេង ដែលជាគូសង្សារចាស់ជាជាងស្រលាញ់ព្រះស្វាមីចាស់ដែលគ្រាន់តែជាឧភយោរាជប៉ុណ្ណោះ ។ ព្រះឧភយោរាជ និងព្រះរាជាក៏ចាប់តាំងកេណ្ឌទ័ពតែសព្វៗខ្លួន ហើយសង្គ្រាមបង្ហូរឈាមតែគ្រួសារឯងក៏បានផ្ទុះឡើង ។ ប៉ុន្ដែ តាំងពីការប្រយុទ្ធគ្នាដំបូងម្ល៉េះ ទ័ពព្រះរាជាត្រូវបរាជ័យ ហើយមេទ័ពរបស់ព្រះរាជា៤នាក់ ដែលសុទ្ធជាជនជាតិចិនក៏ត្រូវគេសម្លាប់បាន ។ ព្រះរាជា និងព្រះអង្គវតីក៏នាំគ្នាគេចខ្លួនទៅកាន់ខែត្រកញ្ជរ តែត្រូវទ័ពព្រះឧភយោរាជមួយកងតាមទាន់ ហើយធ្វើឃាតនឹងកាំភ្លើងសុគតទៅ ។
ព្រះស្រីធម្មោរាជាសោយរាជ្យបាន១ឆ្នាំ ហើយក៏សុគតទៅក្នុងព្រះជន្មាយុ២៩ព្រះវស្សា (24) ។
៩. ព្រះអង្គទងរាមាធិបតី-ចៅពញានូ (១៦៣០-១៦៤០)
ព្រះរាជាដែលឡើងសោយរាជ្យបន្ដពីព្រះអង្គសូរ គឺចៅពញានូ ដែលទទួលការអភិសេកក្រោមព្រះនាមថា «ព្រះបាទសម្ដេចព្រះរាជឱង្ការព្រះអង្គទងរាជាធិរាជរាមាធិបតីបរមបពិត្រ» នៅក្នុងព្រះជន្មាយុ២៣ព្រះវស្សា ។ រាជពង្សាវតារនិយាយថាទ្រង់សោយរាជ្យបាន៥ឆ្នាំ ក៏ប៉ុន្ដែការគណនាបង្ហាញថាទ្រង់សោយរាជ្យបាន៩ឆ្នាំយ៉ាងតិច ។ ទ្រង់បានបង្ក្រាបការបះបោរមួយរបស់អ្នកស្រុករលាំងទ្រុល ដឹកនាំដោយជនហិណ្ឌូម្នាក់ ដែលត្រូវចាប់ខ្លួនបាន រួចហើយទ្រង់បានបញ្ជាឱ្យគេកាត់ក្បាលសម្លាប់ចោល ។
ព្រះរាមាធិបតីទ្រង់បានផ្លាស់ប្ដូររូបមន្ដពិធីការដែលកំណត់ឡើងដោយព្រះធម្មោរាជា ដោយទ្រង់ឱ្យអ្នកផងហៅព្រះអង្គថា ព្រះករុណាពិសេសព្រះអង្គរាជ ។ ទ្រង់សោយរាជ្យសម្បត្ដិនៅរាជធានីឧត្ដុង្គ ។ ព្រះរាមាធិបតីបានចូលទិវង្គត នៅក្នុងខែមិថុនា ឆ្នាំ១៦៤០ (25) ។
១០. ព្រះបទុមរាជាទី១-ព្រះអង្គនន់ (១៦៤១)
តាមការបង្ហាញពីព្រះឧភយោរាជព្រះឧទ័យ អតីតព្រះយោមរាជធំ នាម៉ឺនសព្វមុខមន្ដ្រីបានលើកព្រះរាជបុត្រាច្បងរបស់ព្រះអង្គ ដែលមានព្រះជន្មាយុ២៤ព្រះវស្សាហើយ ឱ្យឡើងសោយរាជ្យបន្ដ ក្រោមព្រះនាមថា «ព្រះបាទសម្ដេចស្ដេចព្រះរាជឱង្ការព្រះបទុមរាជាធិរាជរាមាធិបតី» ។ បើតាមសម្ដីរបស់លោក ហ្សេរ៉ាវ៉ាន់វូសូវ ព្រះរាជាអង្គនេះត្រឹមត្រូវ ស្លូត ហើយមានព្រះរាជអាកប្បកិរិយាល្អ ។ តាមមើលទៅ គឺប្រហែលដោយទ្រង់បានការពារពួកហូឡង់ ដែលបានកសាងអគារពាណិជ្ជកម្មមួយនៅខាងក្រោមពញាឮបន្ដិច (26) ។
ក្រោយពេលទ្រង់ឡើងសោយរាជ្យបានបន្ដិច មានកើតជំងឺមួយធំនៅក្នុងខែកក្កដា ឆ្នាំ១៦៤០ ធ្វើឱ្យស្លាប់ប្រជាជនកម្ពុជាអស់ជាច្រើន ។ ជំងឺនេះបានធ្វើឱ្យមេអគារពាណិជ្ជកម្មហូឡង់នៅកម្ពុជាឈ្មោះ វ៉ាន់ឌែរហាហ្គិន ស្លាប់ក្នុងពេលតែ២៤ម៉ោងប៉ុណ្ណោះ ។
ព្រះបទុមរាជាសោយរាជ្យសម្បត្ដិនៅឧត្ដុង្គបានប្រហែល១ឆ្នាំ ស្រាប់តែចៅពញាចន្ទ ជាព្រះរាជបុត្រាទី៣របស់ព្រះជ័យជេដ្ឋាជាមួយម៉មលាវឈ្មោះថា នាងអ្នកបុស្សា ហើយត្រូវជាព្រះអនុជរបស់ព្រះអង្គទងចៅពញានូ មិនសប្បាយព្រះទ័យនឹងព្រះឧភយោរាជព្រះឧទ័យ ដែលដកហូតរាជបល្ល័ង្កពីព្រះអង្គយកទៅឱ្យព្រះអង្គនន់វិញ ក៏បានលើកផែនការក្បត់ ហើយបានលួចធ្វើឃាតព្រះឧទ័យព្រមទាំង រាជវង្សានុវង្សជាច្រើនអង្គទៀត នៅក្នុងពិធីកំសាន្ដមួយ នៅក្នុងថ្ងៃទី៥ ខែមករា ឆ្នាំ១៦៤២ ដោយមានការជួយគាំទ្រពីពួកម៉ាឡេ និងចាម ដែលទ្រង់បានសន្យាថា នឹងផ្ដល់ផលប្រយោជន៍ឱ្យជាក្រោយ (27) ។
រួចចៅពញាចន្ទ បានបញ្ជូនទ័ព៥កង ឱ្យចេញទៅជួបជាមួយព្រះរាជាអង្គនន់ ដែលកំពុងតែប្រពាតការបរបាញ់សត្វនៅចម្ងាយប្រហែល៦០លីយឺពីរាជធានីនៅក្នុងខែត្រមួយនៅមាត់សមុទ្រ ហើយដែលមានមហាតលិកការពារតែ៦០នាក់ប៉ុណ្ណោះ ។ ព្រះអង្គត្រូវទ័ពទាំង៥កងព័ទ្ធវាយប្រហារ រួចចាប់នាំខ្លួនមកកាន់រាជធានីឧត្ដុង្គ ។
បន្ទាប់ពីឃាតកម្មមកលើព្រះឧទ័យ មានរាជកុមារ៣អង្គបានភៀសខ្លួនរួចពីការកាប់សម្លាប់រង្គាល ។ គឺរាជបុត្ររបស់ព្រះរាជា និងត្រូវជាព្រះរាជនត្ដារបស់ព្រះឧទ័យ ។ រាជកុមារទាំង៣អង្គបានគេចចូលទៅជ្រកកោននៅក្នុងវត្ដមួយ ម្ល៉ោះហើយក៏ទទួលបាននូវសិទ្ធិជ្រកកោន ដែលនៅសម័យនោះ គ្មាននរណារំលោភបានទេនៅក្នុងឥណ្ឌូចិនទាំងមូល ។ ចៅពញាចន្ទធ្វើហាក់ដូចជាបានបំភ្លេចកុមារទាំងនោះហើយ ប៉ុន្ដែបានតាមដានរហូត ។ រហូតដល់ពេលដែលមានប្រជាជន១ម៉ឺន២ពាន់នាក់ខឹងសម្បា ហើយកាន់អាវុធឡើងធ្វើឱ្យកុមារទាំង៣រត់ចេញពីវត្ដរួចចាប់កុមារបងទាំង២មកប្រគល់ឱ្យពញាចន្ទ ។ រាជកុមារពៅបានត្រូវព្រះវររាជមាតាជួយសង្គ្រោះយកទៅចិញ្ចឹមបីបាច់ថែរក្សា មិនព្រមប្រគល់ឱ្យពញាចន្ទទេ ។ ប៉ុន្មានឆ្នាំក្រោយមក ព្រះរាជាបានលើកព្រះរាជកុមារនេះ ឱ្យឡើងធ្វើជាមហាឧបរាជ ។
ឯកសាររបស់ពួកហូឡង់បានរៀបរាប់ថា រាជកុមារទាំង២បានរងនូវការធ្វើទារុណកម្មអាក្រក់ខ្លាំងណាស់ មុននឹងត្រូវគេសម្លាប់ ។ គេយកព្រះអង្គទៅដាក់គុក ហើយឱ្យសោយតែសាច់ដែលគេកាត់ចេញពីខ្លួនព្រះអង្គ ។ តែរាជកុមារទាំង២មានសេចក្ដីក្លាហាន ខុសប្លែកពីកុមារទាំងឡាយ ។ នៅពេលដែលទ្រង់ត្រូវគេសម្លាប់ដោយចងភ្ជាប់ទៅនឹងដើមចេក ទ្រង់បានសំណូមពរហើយពិនិត្យបញ្ជាក់ថា គេបានសំលៀងកាំបិតដែលត្រូវយកមកកាប់ខ្លួនព្រះអង្គជា២កំណាត់នោះមុតល្អហើយ ។ ការធ្វើឃាតរាជកុមារទាំង២បានធ្វើឱ្យប្រជារាស្ដ្រមានការភិតភ័យជាខ្លាំង ហើយគ្មាននរណាម្នាក់ហ៊ានចេញមុខមកជួយឡើយ ។
តាមពិតទៅ អ្នកអង្គម្ចាស់ចន្ទ ទ្រង់ដឹកនាំប្រទេសក្នុងព្រះនាមព្រះរៀមរបស់ព្រះអង្គ ហើយអ្វីៗសុទ្ធតែធ្វើទៅតាមបញ្ជារបស់ព្រះរៀមទាំងអស់ ។ ប៉ុន្ដែដោយប្រជារាស្ដ្រស្អប់ព្រះអង្គ តែស្រលាញ់ព្រះរៀមម្ល៉ោះហើយទ្រង់ក៏សម្រេចចិត្ដកម្ចាត់ព្រះរៀមចេញ ។ ពួកហូឡង់និយាយថា ទ្រង់បានរៀបចំធ្វើឱ្យព្រះអនុជថ្លៃរបស់ព្រះរាជាចោទប្រកាន់ព្រះរាជាថា បានចែចង់ព្រះជាយារបស់ព្រះអង្គ រួចហើយទ្រង់បានចេញបញ្ជាឱ្យគេកាត់កព្រះរាជាទៅ ។ បន្ទាប់មក អ្នកអង្គម្ចាស់ចន្ទបានបញ្ជាឱ្យគេសម្លាប់ព្រះអនុជថ្លៃនោះចោលទៀត ដោយចោទថា បានធ្វើការចោទប្រកាន់មិនត្រឹមត្រូវទៅលើព្រះរាជា ។ រឿងកំប្លែងទាំងអស់នោះ មានគោលបំណងជាពិសេស គឺដើម្បីរក្សារាជសម្បត្ដិទុកខ្លួនឯង ។
១១. ព្រះបទុមរាជាទី២ ពញាចន្ទ-ស្ដេចចូលសាសនាជ្វា (១៦៤២-១៦៥៩)
ក្រោយពីបានអនុវត្ដអំពើឧក្រិដ្ឋខាងលើរួចហើយ អ្នកអង្គម្ចាស់ចន្ទ ដែលមានព្រះជន្ម២៦ព្រះវស្សា បានឱ្យគេរៀបចំពិធីអភិសេកព្រះអង្គក្រោមព្រះនាមថា «ព្រះបាទសម្ដេចព្រះបទុមរាជាធិរាជរាមាធិបតី» ។ អ្នកអង្គម្ចាស់ឯម រាជបុត្រារបស់ព្រះឧទ័យ ដែលព្រះវររាជមាតាបានជួយសង្គ្រោះ ត្រូវបានលើកឱ្យឡើងឋានៈ ជាព្រះកែវហ្វ៊ា ។ ពួកហូឡង់និយាយថា ចៅពញាចន្ទនេះ មានកិត្ដិនាមល្បីខាងមានចិត្ដអាក្រក់ និងកាចសាហាវ ហើយព្រះរាជាទាំងអស់ រួមទាំងព្រះរាជាមុនៗផង ខ្លាចរអាគ្រប់គ្នា នៅពេលទតឃើញនូវអត្ដចរិតឃោរឃៅរបស់ព្រះអង្គនាថ្ងៃមួយ (28) ។
ចាប់តាំងតែពីពេលដែលបានឡើងគ្រងរាជបល្ល័ង្ក ទ្រង់បានចេញព្រះរាជបញ្ជាមួយបញ្ជាក់អំពីព្រះឋានៈរបស់ព្រះរាជវង្សានុវង្សទាំងអស់ជាភាសាបាលី ហើយទ្រង់បានសម្រេចឱ្យឆ្លើយនឹងព្រះរាជាថា ព្រះករុណាពិសេស ហើយឆ្លើយនឹងសមាជិកព្រះរាជវង្សថា ព្រះបាទម្ចាស់ ។
នៅសម័យនោះ ពួកហូឡង់បានបើកអគារពាណិជ្ជកម្មរបស់គេនៅកម្ពុជាបាន២-៣ឆ្នាំហើយ។ ពួកនោះ បានជួបជាមួយពួកព័រទុយហ្គាល់ដែលមានវត្ដមានតាំងតែពីឆ្នាំ១៥៥៣មកម្ល៉េះ ហើយថែមទាំងបានបំពេញភារកិច្ចធំៗថ្វាយដល់រាជវង្សថែមទៀតផង ដូចដែលយើងបានឃើញរួចមកហើយនៅចុងសតវត្សរ៍មុន ។ ពួកព័រទុយហ្គាល់មានអគារពាណិជ្ជកម្មនៅកំពង់ហ្លួង ឯពួកហូឡង់មានអគារនៅពញាឮ ។ ពួកជាតិសាសន៍នេះទាំង២មានការប្រកួតប្រជែងខាងពាណិជ្ជកម្មស្រួចស្រាល់ខ្លាំងណាស់ ដូច្នេះហើយការស្អប់គ្នាទៅវិញទៅមកក៏ខ្លាំងណាស់ដែរ ។ គេបានចាប់ផ្ដើមដណ្ដើមទីតាំងគ្នាទៅវិញទៅមករួចមកហើយនៅក្នុងចុងបូព៌ាទាំងមូល ហើយគេក៏តាំងចាប់ផ្ដើមជេរគ្នាទៅវិញទៅមក ដណ្ដើមគាប់គួរជាមួយព្រះរាជាកម្ពុជា សំដៅបំផ្លាញគ្នាទៅវិញទៅមកដែរ ។
នៅក្នុងឆ្នាំ១៦៣៦ ពួកអ្នកស្រុកបានចូលយកទំនិញរបស់កប៉ាល់ឈ្មោះ ន័រវីក ដែលលិចនៅក្បែរមាត់សមុទ្រកម្ពុជា ពួកហូឡង់ក៏ប្ដឹងរកយុត្ដិធម៌ (29) ។ ពេលនោះព្រះរាជាដែលពិភាល់ថាពួកនេះជាចារកម្មរបស់ពួកសៀមបានឆ្លើយតបទៅវិញថា ព្រះអង្គមានសិទ្ធិ និងទទួលយករាល់របស់របរផ្សេងៗដែលបានមកពីការលិចលង់របស់កប៉ាល់បរទេស ។ ពួកហូឡង់ឆ្លើយថាពួកគេមិនមែនជាជនបរទេសទៀតទេ ព្រោះគេបានមកតាំងទីលំនៅនៅក្នុងព្រះរាជាណាចក្រកម្ពុជារួចទៅហើយ ។ ទឡ្ហីករណ៍នេះមិនត្រឹមត្រូវទេ ពីព្រោះថា នៅឯអឺរ៉ុប គេសន្មត់ថា រាល់កប៉ាល់របស់ប្រទេសមួយដែលលិចនៅលើឆ្នេរសមុទ្ររបស់ប្រទេសមួយទៀត គេតែងតែចាត់ទុកជាកប៉ាល់បរទេសហើយ ។ នៅថ្ងៃទី២៨ ខែមេសា ឆ្នាំ១៦៣៨ លោកឧត្ដមសេនីយ៍ វ៉ាន់ឌីយ៉ឺម៉ិន ដែលឈរជើងនៅឯ បាតាវីយ៉ា បានបញ្ជូនឈ្មោះ ប៉ូលគ្រុក ឱ្យធ្វើដំណើរមកកាន់រាជវាំងឧត្ដុង្គ ដើម្បីធ្វើការដោះស្រាយ ។ ពេលនោះ ពួកព័រទុយហ្គាល់ ដែលបានសម្លាប់ពួកហូឡង់អស់២នាក់កាលពីមួយឆ្នាំមុន បានសម្រេចចិត្ដថា នឹងធ្វើឱ្យបេសកកម្មនេះបរាជ័យ ។ រឿងរ៉ាវនេះបានអូសបន្លាយពេលជាង៣ឆ្នាំមកហើយ ដោយលោកឧត្ដមសេនីយ៍នៃក្រុមហ៊ុនពាណិជ្ជកម្មហូឡង់នឹកគិតស្មានថា ខ្លួននេះបានត្រូវព្រះរាជា និងព្រះមហាឧបរាជចាត់ទុកដូចជាបងប្អូនរួចទៅហើយ តែស្ដេចទាំង២អង្គនេះ បានប្រកែកមិនយល់ព្រមទទួលលិខិតរបស់គាត់ទេ ហើយទទួលមានព្រឹត្ដិការណ៍ចៅពញាចន្ទ និងពួកអ៊ិស្លាមធ្វើឃាតព្រះរាជា ព្រះឧភយោរាជជាមួយនឹងមន្ដ្រីអ្នកមុខអ្នកការនៅក្នុងព្រះរាជាណាចក្រកាលពីថ្ងៃទី៥ ខែមករា ឆ្នាំ១៦៤២ ពួកហូឡង់ក៏ចាប់ផ្ដើមគិតរកដំណោះស្រាយសាជាថ្មី ។
ព្រះរាជាថ្មីបានផ្ញើព្រះរាជសារលិខិតមួយច្បាប់ទៅឱ្យឧត្ដមសេនីយ៍ (30) ក្រុមហ៊ុនហូឡង់ដែលឈរជើងនៅឯកោះជ្វា បញ្ជាក់ថាព្រះអង្គមានបំណងចង់រក្សាទំនាក់ទំនងល្អជាមួយគ្នា ។ លោកឧត្ដមសេនីយ៍នៅពេលបានដឹងថា បេសកជនរបស់គាត់មិនទាន់បានចូលគាល់ព្រះរាជានៅឡើយទេ ផ្ទុយពីពួកអេស្ប៉ាញ និងព័រទុយហ្គាល់ បែរជាទទួលបាននូវការប្រោសប្រណីជាច្រើន មិនតែប៉ុណ្ណោះព្រះរាជាបានទាំងបញ្ជូនដំរី២ក្បាលទៅជូនលោកអភិបាលក្រុងម៉ានីលថែមទៀតផងនោះ ក៏ចាត់តាំងឱ្យលោក គ័រណីក្លែក ជាមេខាងផ្នែកពាណិជ្ជកម្ម ធ្វើដំណើរតាមកប៉ាល់២គ្រឿងមកកម្ពុជានៅក្នុងខែឧសភា ឆ្នាំ១៦៤២ ។ លោក គ័រណីក្លែក មានភារកិច្ចមកទូលសរសើរព្រះរាជាដែលទទួលបានជ័យជម្នះលើពួកខ្មាំងសត្រូវ ដែលកន្លងមកបានធ្វើឱ្យព្រះអង្គបាត់បង់អស់នូវសិទ្ធិស្របច្បាប់ទាំងឡាយ ហើយទ្រង់បានកម្ទេចចោលពួកស្ដេចជ្រែករាជ្យទាំងអស់ ។ គាត់ក៏មានភារកិច្ចត្រូវរាយការណ៍ថ្វាយព្រះរាជា សូមឱ្យព្រះអង្គប្រុងប្រយ័ត្ននឹងល្បិចកលរបស់ពួកព័រទុយហ្គាល់ ដែលកន្លងមកបានលួចបំពុលព្រះរាជា ប៊័រណេអូ និងនាម៉ឺនសព្វមុខមន្ដ្រីមួយចំនួន និងសូមឱ្យព្រះអង្គរក្សាទំនាក់ទំនងល្អជាមួយពួកហូឡង់ ដែលជានិច្ចជាកាលជាមិត្ដដ៏ល្អសម្រាប់ព្រះរាជាដែលទទួលរាក់ទាក់ពួកគេ ។
នៅពេលដែលការចរចាខាងលើកំពុងតែប្រព្រឹត្ដទៅ នៅក្នុងឆ្នាំដដែលនោះ ព្រះរាជាដែលបានទទួលយកនារីម៉ាឡេម្នាក់ជាព្រះជាយា ។ ប្រហែលជាដើម្បីបំពេញព្រះទ័យព្រះជាយានេះផង ហើយក៏ប្រហែលដើម្បីលើកទឹកចិត្ដពួកម៉ាឡេ និងចាមដែលបានជួយឱ្យព្រះអង្គដណ្ដើមយករាជបល្ល័ង្កមកវិញបានផង ទ្រង់បានប្ដូរចូលសាសនាមហាម៉ាត់វិញដោយឱ្យគេកាត់ស្បែក ហើយទ្រង់ប្រកាសប្ដូរព្រះនាមថា អ៊ីប្រាហ៊ីម វិញ ។ លោកហ្សេរ៉ាវ៉ាន់វូសូហ្វ បាននិយាយថា ព្រះរាជាទ្រង់បានផ្ដល់ផលប្រយោជន៍ជាច្រើនដល់ពួកម៉ាឡេ និងចាម ។ ហេតុការណ៍នេះ បានធ្វើឱ្យប្រជាជនមិនសប្បាយចិត្ដទេ គេបានហៅព្រះរាជាថាជាស្ដេចចេញសាសនា និងជាស្ដេចចូលសាសនាជ្វា ។
ពួកម៉ាឡេ និងចាមដែលកាន់សាសនាមហាម៉ាត់ទាំងអស់នេះច្រើនតែជាពាណិជ្ជករ ម្ល៉ោះហើយគឺជាសត្រូវនឹងពួកអឺរ៉ុប ដែលជាដៃគូប្រកួតប្រជែង ។ ដល់ពេលបានក្លាយជាអ្នកជិតស្និទ្ធនឹងព្រះរាជា ពួកនេះក៏ប្រែក្លាយទៅជាកាចសាហាវ ។ ដោយខ្លាចរអាការវាយប្រហាររបស់ពួកនេះ និងដោយពួកព័រទុយហ្គាល់ចេះតែផ្សព្វផ្សាយពាក្យមិនល្អពីខ្លួនផង ពួកហូឡង់ក៏សម្រេចចិត្ដដកថយចេញពីកម្ពុជាដែលមិនមែនជាទីសុខសាន្ដសម្រាប់ខ្លួនទេ ។ បេសកជនរបស់ឧត្ដមសេនីយ៍បាតាវីយ៉ា បានចាកចេញពីកម្ពុជា ហើយនាយអគារពាណិជ្ជកម្មហូឡង់នៅកម្ពុជា ក៏ត្រូវគេបញ្ជាឱ្យដកចេញទៅវិញដែរ ដរាបណារាជរដ្ឋាភិបាលកម្ពុជាមិនបានបំពេញសេចក្ដីត្រូវការរបស់ខ្លួននោះ ។
តើមានអ្វីកើតឡើងក្រោយពីពួកហូឡង់ចាកចេញផុតទៅ ? យើងបានដឹងអំពីអ្វីៗដែលកើតមានជាបន្ដមកទៀតតែដោយសារឯកសារពួកហូឡង់ប៉ុណ្ណោះ ។ ពួកហូឡង់មិនបានប្រាប់ឱ្យដឹងពិតប្រាកដថាតើអ្នកណាដែលជាមេភ្លើងទេ ក៏ប៉ុន្ដែពួកគេបានសរសេរថា ក្រោមការញុះញង់របស់ពួកព័រទុយហ្គាល់ និងពួកម៉ាឡេ និងដោយមានការថ្វាយយោបល់ពីឧកញ៉ាពីរេស្នេដុល (?) ព្រះរាជាបានចេញបញ្ជាឱ្យកាប់សម្លាប់ពួកហូឡង់វាយកម្ទេចអគារ និងដណ្ដើមយកកប៉ាល់ហូឡង់ឈ្មោះន័រវីក និងសំពៅឈ្មោះ រីវីក ផង ។ ព្រះរាជបញ្ជានេះត្រូវបានគេអនុវត្ដតាមនៅថ្ងៃទី៣ ខែកុម្ភៈ ឆ្នាំ១៦៤៤ លើកលែងតែកប៉ាល់ន័រស្វ៊ីកមួយចេញដែលគេមិនអាចចាប់បាន ។ ក៏ប៉ុន្ដែចៃដន្យអាក្រក់នេះ បានធ្លាក់ទៅលើកប៉ាល់ឈ្មោះ អូរ៉ង់ហ្សេ ដែលទើបតែមកដល់ពីកោះហ្វៃយ៉ូវ៉ាន់ (តៃវ៉ាន់) (31) ទៅវិញ ដោយគ្មានបានដឹងរឿងរ៉ាវដែលកើតមាននៅកំពង់ហ្លួងទេ ។ អ្នកដើរកប៉ាល់នេះ បានត្រូវពួកជប៉ុន ដែលមានគ្នាប្រហែលជា១០នាក់ បង្ខំឱ្យចុះមកដីហើយសម្លាប់អស់មួយចំនួន មួយចំនួនទៀតត្រូវចាប់ជាឈ្លើយ ។
ពេលទទួលបាននូវដំណឹងនេះ ពួកហូឡង់នៅបាតាវីយ៉ាបានសម្រេចចិត្ដធ្វើការសងសឹកវិញ ដោយបញ្ជូនកប៉ាល់៥គ្រឿងមកកម្ពុជា និងទូកសំប៉ានជាច្រើន ដឹកនាំទាហាន១៦០នាក់ និងនាវិក២៤០នាក់ ។ គេនឹងធ្វើការសងសឹកដោយការបង្ហូរឈាមប្រសិនបើព្រះរាជាអ៊ីប្រាហ៊ីម មិនព្រមប្រគល់ចំណាប់ខ្មាំងមកឱ្យវិញ ហើយមិនធ្វើឱ្យមានទំនាក់ទំនងដូចកាលពីមុនឆ្នាំ១៦៤០ទេ ។ ក្រុមហ៊ុនពាណិជ្ជកម្មហូឡង់ទើបតែបានផ្ញើការសរសើរមកថ្វាយព្រះរាជា ស្រាប់តែត្រូវធ្វើសង្គ្រាមមួយទៅវិញ ក៏ប៉ុន្ដែពួកគេចង់បានសន្ដិភាព ។ កប៉ាល់ទាំងអស់បានចេញដំណើរនៅថ្ងៃទី២៣ ខែមីនា ឆ្នាំ១៦៤៤ ឡើងមកតាមទន្លេបាសាក់ ហើយបានមកបោះយុថ្កានៅនឹងពាមទន្លេសាប ពីខាងលើភ្នំពេញ-ចតុម្មុខបន្ដិច គឺប្រហែលជាចម្ងាយ១៦គីឡូម៉ែត្រពីអគារពាណិជ្ជកម្មហូឡង់ ។
នៅពេលដែលកិច្ចចរចាចាប់ផ្ដើមឡើងនៅថ្ងៃទី៧ ខែកក្កដា ពួកមន្ដ្រីខាងកម្ពុជាបានសំណូមពរឱ្យពន្យារពេល៧ថ្ងៃ ដោយហេតុថាព្រះមាតារបស់ព្រះរាជាទើបនឹងសុគត ។ ដោយពិនិត្យឃើញថាគ្មានអ្វីប្លែក គួរឱ្យសង្ស័យនៅតាមមាត់ទន្លេ មេបញ្ជាការហូឡង់ក៏យល់ព្រមតាមសំណើ ហើយថែមទាំងបានសម្ដែងការចូលរួមមរណទុក្ខ ដោយការបាញ់កាំភ្លើងធំគោរពទៀតផង ។
កប៉ាល់ហូឡង់នៅក្នុងទឹករហូតដល់៦ខែ តែនៅមិនទាន់មានលទ្ធផលអ្វីបន្ដិចសោះ ។ ដល់ថ្ងៃទី២០ ខែមករា ឆ្នាំ១៦៤៥ មេបញ្ជាការហូឡង់ក៏សម្រេចចិត្ដនាំគ្នាចេញកប៉ាល់ធ្វើដំណើរបន្ដទៅកាន់លង្វែក ។ ទៅជិតដល់កំពង់ហ្លួងទៅហើយ ស្រាប់តែមានលេចឮដំណឹងថា គេកំពុងប្រមូលឫស្សីមកគរនៅភ្នំពេញ ជាមួយនឹងអាវុធយុទ្ធភណ្ឌផ្សេងៗទៀត ។ មេបញ្ជាការក៏បញ្ជាឱ្យធ្វើដំណើរចុះមកវិញ តែត្រូវទូកតូចៗជាច្រើនស្កាត់វាយនៅពាក់កណ្ដាលផ្លូវ ។ កប៉ាល់ហូឡង់បានវាយរុញច្រានទូកទាំងអស់នោះចេញបាន តែត្រូវរងការបាញ់ឥតដាច់ពីលើគោកថែមទៀត ។ យប់មកដល់ កប៉ាល់បានបោះយុថ្កាសម្រាកសិន ។ ដល់ពេលព្រឹកស្អែកឡើង គេពិនិត្យឃើញមានស្ពានមួយប្រវែង១២០ម៉ែត្រ ទទឹង៦ម៉ែត្រនៅកាត់ទទឹងទន្លេ និងមានកាំភ្លើងធំ៨ដើមរៀបតម្រៀបគ្នានៅលើច្រាំងទន្លេខាងលិច ឯខាងកើតទន្លេវិញមានប៉មមួយកំពុងសង់ឡើងមិនទាន់រួច ។ មេបញ្ជាការហូឡង់បានសម្រេចថា ត្រូវតែវាយបើកផ្លូវចេញ ហើយការប្រយុទ្ធក៏ចាប់ផ្ដើមឡើង ។ មេបញ្ជាការនោះបានត្រូវគ្រាប់ដាច់ក្បាលបាត់ តាំងតែពីចាប់ផ្ដើមប្រយុទ្ធភ្លាមម្ល៉េះ ហើយខាងហូឡង់បានបាត់បង់កម្លាំងអស់១២០នាក់ ក៏ប៉ុន្ដែកប៉ាល់បានឆ្លងផុតចូលទៅក្នុងទន្លេធំខាងក្រោមភ្នំពេញ នៅវេលាម៉ោង៤រសៀល ហើយបោះយុថ្កាសម្រាកនៅទីនោះទៅ ។ ឯកសារហូឡង់និយាយថា នៅក្នុងការប្រយុទ្ធគ្នានោះ ខាងខ្មែរបានខូចខាតកម្លាំងរហូតដល់ទៅ១ពាន់នាក់ ។
ដោយមិនអាចទប់ទល់នឹងការវាយប្រហារតទៅទៀត កប៉ាល់ហូឡង់ ក៏ធ្វើដំណើរចុះតាមទន្លេបន្ដទៅទៀត ហើយទៅដល់ផានរ៉ាងនៅថ្ងៃទី១២ខែកក្កដា ។ ស្ដេចនគរចាម្ប៉ាដែលសេសសល់ពីការវាតទីរបស់ពួកអាណ្ណាមនៅពេលនោះ បានទទួលស្វាគមន៍ពួកហូឡង់ ហើយអនុញ្ញាតឱ្យពួកនេះធ្វើពាណិជ្ជកម្មនៅតាមកំពង់ផែរបស់គេ ក៏ប៉ុន្ដែ បានហាមប្រាមមិនឱ្យវាយពួកព័រទុយហ្គាល់នៅក្នុងទឹកដីគេទេ ។ ស្ដេចនគរចាម្ប៉ានោះបានប្រកាសថា អាកប្បកិរិយារបស់ស្ដេចចន្ទអ៊ីប្រាហ៊ីម គឺជាអំពើក្បត់ តែព្រះអង្គបានផ្ដាច់ចំណងទាក់ទងជាមួយតាំងតែពីពេលដែលពញាចន្ទបានធ្វើឃាតព្រះឧភយោរាជឧទ័យ និងព្រះអង្គនន់ ដែលជាមិត្ដភក្ដិមកម្ល៉េះ ។ ក្នុងពេលនោះមាននាវាហូឡង់មួយគ្រឿងទៀតឈ្មោះ អេទ័លប៉ូលែរ ចេញមិនទាន់ផុតពីទន្លេបាសាក់នៅឡើយ ហើយកំពុងតែរងការវាយប្រហារពីទ័ពជើងទឹកកម្ពុជា ដែលដឹកនាំដោយព្រះរាជាផ្ទាល់ព្រះអង្គ និងពួកព័រទុយហ្គាល់ ម៉ាឡេ និងជប៉ុន ជាអ្នកបញ្ជាផង ។ នាវានោះអាចទ្រាំទ្រការវាយប្រហារនោះបានយ៉ាងល្អ ហើយចុះផុតចូលទៅក្នុងលំហសមុទ្រ ឯនាវាកម្ពុជាក៏លែងហ៊ានដេញតាមទៀតដែរ ។
បាតាវីយ៉ាបានស្នើសុំជំនួយអន្ដរាគមន៍ពីស្ដេចសៀមៗបានបញ្ជូននាវា១០គ្រឿងមក ក៏ប៉ុន្ដែនៅពេលមកដល់មាត់ពាមទន្លេមេគង្គ មិនឃើញកងនាវាហូឡង់ នាវាសៀមទាំងអស់នោះក៏ត្រលប់ទៅវិញអស់ទៅ នៅក្នុងខែកញ្ញា ឆ្នាំ១៦៤៥ ។ ប៉ុន្មានខែក្រោយមក ព្រះរាជាកម្ពុជាបានយល់ព្រមប្រទានសន្ដិភាព ដោយទ្រង់បានបញ្ជូនរាជទូតទៅកាន់បាតាវីយ៉ា នៅក្នុងខែឧសភា ឆ្នាំ១៦៤៦ ។ មកខែមេសា ឆ្នាំ១៦៤៧ ទ្រង់បានដោះលែងពួកឈ្លើយសឹកដែលទ្រង់បានចាប់ពីកប៉ាល់អូរ៉ង់ហ្សេ ក៏ប៉ុន្ដែបញ្ហាលំបាកនៅតែមានបន្ដតទៅទៀត រហូតដល់ខែកក្កដា ឆ្នាំ១៦៥២ នៅពេលដែលពួកហូឡង់បានសំណូមពរឱ្យព្រះរាជាបញ្ជូនរាជទូតទៅចរចាសម្រេចជាលើកចុងក្រោយ ។
នៅខែកក្កដា ឆ្នាំ១៦៥៣ ឧត្ដមសេនីយ៍បាតាវីយ៉ាបានជូនដំណឹងទៅព្រះរាជាកម្ពុជាវិញថា ពួកហូឡង់មិនអាចមកបោះទីតាំងនៅលើទឹកដីកម្ពុជាជាមួយនឹងសត្រូវរបស់ខ្លួនបានទេ លើកលែងតែព្រះអង្គបណ្ដេញពួកនោះចេញសិន ។ តាមពិតពួកហូឡង់ពេលនោះកំពុងតែមានសង្គ្រាមជាមួយពួកអង់គ្លេស ដែលទើបតែបានធ្វើឃាតស្ដេចរបស់គេ ។ ព្រះរាជាបានច្រានសំណើនោះ ហើយការចរចាបានបន្ដរហូតដល់ខែកក្កដា ឆ្នាំ១៦៥៦ទើបមានចុះសន្ធិសញ្ញាមួយដែលមិនមានចោទប្រកាន់ទោសកំហុសអ្វីដល់ព្រះរាជាអ៊ីប្រាហ៊ីមឡើយ ឯពួកហូឡង់ក៏មិនបានទទួលនូវការសងសឹកអ្វីដែរ តែបានទទួលផលប្រយោជន៍ខាងពាណិជ្ជកម្មខ្លះ ដែលពួកគេមិនអាចថែរក្សាការពារបាន (32) ។
មកដល់ពេលនេះ គឺក្នុងឆ្នាំ១៦៥៨ ព្រះរាជាអ៊ីប្រាហ៊ីមសោយរាជ្យបាន១៨ឆ្នាំហើយ ។ ពេលនោះមានបុត្រា២អង្គរបស់អតីតព្រះឧភយោរាជព្រះឧទ័យដែលពញាចន្ទ-ព្រះអ៊ីប្រាហ៊ីមបានធ្វើឃាត គឺពញាសូរ (ពញាសូរនេះក្រោយមកបានឡើងសោយរាជ្យមានព្រះនាមថា ព្រះបទុមរាជា) មានព្រះជន្ម២៦ព្រះវស្សា និងព្រះអង្គតន់មានព្រះជន្ម១៨ព្រះវស្សាបានចាប់កាន់អាវុធបះបោរប្រឆាំងនឹងព្រះរាជាឡើង ។ ពេលនោះព្រះរៀមរបស់ក្សត្រាទាំង២ គឺព្រះអង្គឯម ដែលបានរួចរស់រានមានជីវិត ដោយត្រូវព្រះវររាជមាតាយកមកចិញ្ចឹមបីបាច់ថែរក្សា ហើយមានឋានៈជាព្រះកែវហ្វ៊ាមិនបានចូលដៃចូលជើងជាមួយទេ តែបែរជាកាន់ជើងខាងព្រះរាជាទៅវិញ ។
ពញាសូរ និងព្រះអង្គតន់បានត្រូវទ័ពព្រះរាជាវាយឱ្យបរាជ័យ ក៏រត់ទៅជ្រកកោននឹងព្រះមហេសីមេម៉ាយមានសញ្ជាតិអាណ្ណាមរបស់ព្រះជ័យជេដ្ឋា ដែលណែនាំឱ្យក្សត្រទាំង២រត់ទៅសុំជំនួយពីស្ដេចអាណ្ណាម ។ ពេលនោះមានប្រជាជនអាណ្ណាមជាច្រើនដែលជាជនអនាថា ជនរត់ចោលជួរ ជនមានទោសដែលត្រូវបណ្ដេញចេញពីស្រុក និងជនផ្សេងៗទៀតចូលមករស់នៅលាយឡំជាមួយអ្នកស្រុកដើមនៅក្នុងខែត្របារាជ និងដុងណាយ ។ ពេលឃើញក្សត្រខ្មែរទាំង២អង្គរត់មករកជំនួយដូច្នេះ ស្ដេចអាណ្ណាមគិតថាឱកាសល្អមកដល់ហើយក្នុងការដណ្ដើមយកប្រទេសនេះ ។ អ្នកប្រវត្ដិវិទូអាណ្ណាមឈ្មោះ ទ្រឿង វិញ គឺបានសរសេរថា ប្រទេសកម្ពុជាមានទន្លេធំៗ មានដៃច្រើន ដីស្រែក៏មានជីជាតិល្អ គួរឱ្យចង់បានណាស់ ។ ព្រះរាជាអាណ្ណាមក៏យល់ព្រមផ្ដល់ជំនួយដល់ក្សត្រទាំង២ (33) ហើយបានបញ្ជូនទ័ព២ពាន់នាក់ដឹកនាំដោយឧត្ដមសេនីយ៍ ជាងធូ ឱ្យមកជួយ ។ សង្គ្រាមក៏ចាប់ផ្ដើមឡើង ហើយព្រះអង្គឯម បុត្រាទី៣របស់ព្រះឧភយោរាជ ដែលចូលដៃចូលជើងជាមួយនឹងឃាតកសម្លាប់ព្រះបិតា ក៏ត្រូវសុគតទៅនៅក្នុងការប្រយុទ្ធមួយតាមជើងទឹកនៅបារាជ ។ រីឯព្រះរាជាវិញ ត្រូវពួកអាណ្ណាមចាប់បានជាមួយនឹងសេនាអាមាត្យ ហើយដាក់ក្នុងទ្រុងដែកនាំយកទៅកាន់ខែត្រក្វាងប៊ិញនៅជាប់នឹងព្រំដែនតុងកឹង ។ ទ្រង់បានសុគតនៅទីនោះនៅក្នុងឆ្នាំ១៦៥៩ ក្នុងព្រះជន្មាយុ៤០ព្រះវស្សា ។ បើគិតទៅ ព្រះអង្គសោយរាជ្យបានប្រហែលជា១៨ឆ្នាំ ។
ពួកអាណ្ណាមបានអះអាងថា អ្នកទោសដែលគេចាប់បានក្នុងសង្គ្រាមនោះបានត្រូវគេដោះលែងមកកម្ពុជាវិញ តែនៅក្រោយពេលដែលគេបានចុះសន្ធិសញ្ញាសន្ដិភាពមួយ ដែលបញ្ជាក់ច្បាស់ថាប្រទេសកម្ពុជានឹងនាំយកសួយសារអាករទៅថ្វាយស្ដេចអាណ្ណាមជាទៀតទាត់ ហើយពួកប្រជាជនអាណ្ណាមដែលចូលមករស់នៅលើទឹកដីព្រះរាជាណាចក្រកម្ពុជា នឹងទទួលបាននូវសិទ្ធិកម្មសិទ្ធិលើដីដែលខ្លួនកាន់កាប់ ហើយនឹងត្រូវចាត់ទុកដូចជាអ្នករដ្ឋវាសីប៉ុណ្ណោះ ។
ការជ្រៀតជ្រែករបស់ពួកអាណ្ណាមចូលមកក្នុងរឿងរ៉ាវរបស់កម្ពុជាតាមរយៈមហាក្សត្រីមានដើមកំណើតជាអាណ្ណាមនេះ គឺជាសេចក្ដីផ្ដើមនៃការខុសឆ្គងដ៏វែងអន្លាយ ដែលនឹងនាំមកនូវការបាត់បង់ទឹកដីបន្ដិចម្ដងៗ មិនខុសពីការលុកលុយរាតត្បាតពីសំណាក់ពួកសៀមប៉ុន្មានទេ ។ ហេតុការណ៍នេះបានបញ្ចេញឱ្យឃើញនូវអ្វីដែលអាចនឹងកើតមានភ្លាមៗតែម្ដង ៖ ក្រោយពីទទួលជ័យជម្នះ ហើយម្ចាស់ការលើសភាពការណ៍បានហើយ ឧត្ដមសេនីយ៍អាណ្ណាមក៏ចាប់សាកល្បងកម្ទេចក្សត្រាខ្មែរទាំង២អង្គជាបក្សពួកភ្លាមដែរ ។ ក៏ប៉ុន្ដែ ដោយមិនអាចធ្វើអ្វីបាននៅចំពោះមុខប្រទេសទាំងមូល ណាមួយត្រូវបរាជ័យនៅក្នុងការប្រយុទ្ធជាមួយទ័ពរបស់ព្រះអង្គខ្លះផង ឧត្ដមសេនីយ៍អាណ្ណាមនោះត្រូវបង្ខំចិត្ដវាយដកថយ រត់ចេញពីកម្ពុជាទៅវិញ នៅក្នុងឆ្នាំ១៦៥៩ ដោយនាំយកទៅជាមួយនូវជ័យភណ្ឌជាច្រើនទៅផង ។
នៅក្នុងឆ្នាំបន្ទាប់មក ពួកសៀមដែលតែងតែគិតថាកម្ពុជាជាចំណីដ៏ឆ្ងាញ់ពិសារបស់ខ្លួនទៅអនាគត បានបញ្ជូនរាជទូតមួយទៅកាន់រាជវាំងកែចូនៅហាណូយ សុំចងសម្ព័ន្ធមេត្រីភាពប្រឆាំងនឹងពួកង្វៀងនៅខាងត្បូង (ក្រុងវ៉េ) ដែលទីបតែរើបម្រះរួចពីនឹមត្រួតត្រារបស់ពួកអាណ្ណាមខាងជើង ហើយបានបង្ហាញឱ្យឃើញតាមរយៈអន្ដរាគមន៍លើកទី១ខាងលើថា ចង់ងាកមករកដណ្ដើមយកកម្ពុជាដែរ ។
១២. ព្រះបរមរាជាទី៣-ពញាសូរ (១៦៥៩-១៦៧២)
ព្រះបទុមរាជពញាសូរ ជារាជបុត្រាច្បងរបស់ព្រះឧភយោរាជ ដែលស្ដេចចូលសាសនាជ្វាបានធ្វើឃាត ។ ទ្រង់បានសុំជំនួយពីអាណ្ណាម តែត្រូវពួកនេះប្រុងនឹងកម្ទេចចោលទៅវិញ ។ នាម៉ឺនសព្វមុខមន្ដ្រីបានលើកព្រះអង្គឱ្យទទួលការងារដឹកនាំព្រះនគរ ។ ពេលនោះព្រះអង្គមានព្រះជន្ម២៨ព្រះវស្សាហើយ (34) ។
នៅពេលនោះពួកចាម និងម៉ាឡេ នៅក្នុងខែត្រត្បូងឃ្មុំ ដែលធ្លាប់បានបះបោរម្ដងរួចមកហើយនៅក្នុងឆ្នាំ១៥៩៩ មិនសប្បាយចិត្ដនឹងភាពក្រឡាប់ចាក់ក្រោយពីព្រះរាជាអ៊ីប្រាហ៊ីមបានត្រូវធ្វើឃាតដែលធ្វើឱ្យបាត់បង់ផលប្រយោជន៍ខ្លួនអស់ ក៏បះបោរឡើងម្ដងទៀតក្នុងរវាងឆ្នាំ១៦៦០ ។ ព្រះរាជាបានដឹកនាំទ័ពផ្ទាល់ព្រះអង្គ ចេញទៅបង្ក្រាបពួកនេះឱ្យបរាជ័យ រត់គេចកាត់ខែត្រកំពង់ស្វាយរហូតទៅដល់ខែត្រអង្គរ តែត្រូវទ័ពព្រះរាជាតាមដេញវាយប្រហាររហូត ហើយតម្រូវចុះអនុសញ្ញាមួយបង្ខំឱ្យពួកមេៗរបស់ពួកនោះភៀសខ្លួនទៅរស់នៅឯស្រុកសៀមទៅ ។
រាជបុត្រាទាំងអស់របស់ព្រះរាជាចោលសាសនា គឺព្រះអង្គនី ព្រះអង្គឧទ័យ និងព្រះអង្គអំ ក៏បាននាំគ្នាធ្វើដំណើរទៅរស់នៅឯស្រុកសៀមដែរ ជាមួយនឹងស្រីស្នំក្រមការទាំងអស់របស់រាជវាំងមុន មានទាំងព្រះសង្ឃផង សរុបទាំងអស់ ២.២២៤នាក់ ។
ដោយត្រូវធ្វើឱ្យធូរស្រាលពីសត្រូវ មានពួកចាមម៉ាឡេ និងរាជបុត្ររបស់អតីតព្រះមហាក្សត្រ និងបក្សពួក ព្រះបទុមរាជាពញាសូរក៏ចាប់កាន់ព្រះខ័នរាជ្យឡើងគង់លើបល្ល័ង្ករាជ ទទួលព្រះរាជាភិសេកនៅក្នុងឆ្នាំ១៦៦២ ក្រោមព្រះនាមថា «ព្រះបាទសម្ដេចស្ដេចព្រះរាជឱង្ការបរមរាជាធិរាជរាមាធិបតីបរមបពិត្រ» ។
នៅក្នុងឆ្នាំ១៦៦១ ទ្រង់បានលើកព្រះអនុជ គឺព្រះអង្គតន់ ឱ្យឡើងជាទីឧភយោរាជ ប្រហែលដើម្បីបំបែកព្រះអនុជចេញឱ្យឆ្ងាយពីរាជបល្ល័ង្កឱ្យហើយ ហើយទ្រង់បានទទួលព្រះនាងអង្គឡី ជាបងប្អូនជីដូនមួយ ធ្វើជាព្រះអគ្គមហេសី មានព្រះនាមថា «សម្ដេចព្រះភគវតីព្រះចមក្សត្រីយ៍» ។
នៅក្នុងខែកក្កដា ឆ្នាំ១៦៦១នោះ មានជនបារាំងម្នាក់ឈ្មោះ ល្វីសឺវ្រឺយ បានធ្វើដំណើរពីស្រុកសៀមមកតាំងទីនៅត្រង់បាសាក់ ក្បែរស្វាយរៀង ក្នុងនាមជាសាសនទូតរបស់ក្រុមនិកាយផ្សព្វផ្សាយជំនឿ ហើយបានបង្កើតនិគមកាតូលិកអាណ្ណាមមួយនៅទីនោះបានមួយរយៈ ។ បីឆ្នាំក្រោយមក ល្វីសឺវ្រឺយ បានត្អូញត្អែរនៅក្នុងសារលិខិតមួយផ្ញើទៅស្រុកបារាំងថាគាត់មិនអាចបញ្ចុះបញ្ចូលឱ្យអ្នកស្រុកអាយណាម្នាក់ប្ដូរមកកាន់សាសនាកាតូលិកបានទេ ។ នៅពេលដែលគាត់មកពញាឮប៉ុន្មានឆ្នាំក្រោយមកទៀត គាត់បានឃើញថា នៅទីនេះមានអ្នកកាន់សាសនាកាតូលិកប្រហែល៤០០នាក់ ក្នុងនោះមានចម្រុះពួកចិន ព័រទុយហ្គាល់ និងអាណ្ណាម ដែលគាត់ហៅថា ជាពួកកូសាំងស៊ីន ។
នៅឆ្នាំ១៦៧១ ព្រះស្រីជ័យជេដ្ឋា ជារាជបុត្រារបស់ព្រះបទុមវង្សារាជាដែលត្រូវព្រះរាជាចោលសាសនាធ្វើឃាត ហើយក៏ត្រូវជាព្រះភាគិនេយ្យរបស់ព្រះរាជា និងជាព្រះរាជបុត្រាថ្លៃរបស់ព្រះរាជាផងដែរ បានក្បត់នឹងព្រះរាជា ហើយនាំឱ្យពួកបេសកជនធ្វើឃាតព្រះរាជាចោលទៅ ។
ព្រះឧភយោរាជតន់ និងព្រះអង្គនូក៏រត់គេចខ្លួនទៅកូសាំងស៊ីន សុំជំនួយពីពួកអាណ្ណាម ដូចដែលព្រះឧភយោរាជ និងព្រះរាជាទើបសុគតធ្លាប់បានធ្វើរួចម្ដងមកហើយក្នុងឆ្នាំ១៦៥៨ ។
១៣. ព្រះបាទជ័យជេដ្ឋាទី៣-ធម្មោសុរិយោវង្ស (១៦៧២-១៦៧៣)
ស្ដេចនេះជារាជបុត្ររបស់ព្រះអង្គនន់ និងត្រូវជាព្រះរាជនត្ដារបស់ព្រះឧភយោរាជឧទ័យ ដែលបានត្រូវគេធ្វើឃាតនៅឧត្ដុង្គកាលពីឆ្នាំ១៦៤២ ។ ព្រះអង្គទើបតែបានឃុបឃិតធ្វើឃាតព្រះរាជាមុនរួចដែរ រួចហើយបានចាប់កាន់អំណាចភ្លាម និងបានឱ្យគេរៀបចំអភិសេកព្រះអង្គក្រោមព្រះនាមថា «ព្រះធម្មោសុរិយោវង្សរាជាធិរាជបរមបពិត្រ» ។ ពេលនោះព្រះអង្គមានព្រះជន្មាយុ៣៣ព្រះវស្សាហើយ ។ ព្រះអង្គបានចាប់បង្ខំព្រះអគ្គមហេសីរបស់ព្រះរាជាដែលទ្រង់បានធ្វើឃាត គឺសម្ដេចព្រះភគវតីព្រះចមក្សត្រីយ៍ឱ្យទទួលធ្វើជាព្រះអគ្គមហេសីរបស់ព្រះអង្គដែរ ប៉ុន្ដែព្រះចមក្សត្រីយ៍បានធ្វើការសងសឹកនឹងព្រះអង្គវិញ ដោយនាំពួកម៉ាឡេជាកូនចៅដែលធ្លាប់គាំទ្រព្រះរាជាអ៊ីប្រាហ៊ីម ឱ្យមកធ្វើឃាតព្រះរាជា៥ខែក្រោយពីអភិសេករួច ។ តែឃាតកម្មនេះមិនបានប្រគល់រាជសម្បត្ដិទៅឱ្យព្រះរាជវង្សរបស់ព្រះរាជាចោលសាសនាវិញទេ ។
១៤. អ្នកអង្គជ័យ (១៦៧៣-១៦៧៤)
ព្រះកែវហ្វ៊ាអ្នកអង្គជ័យ ជារាជនត្ដារបស់ព្រះឧទ័យយោមរាជធំ និងជារាជបុត្រារបស់ព្រះរាជាបទុមរាជាអង្គសូរ (35) ដែលមានព្រះជន្មាយុ២១ព្រះវស្សាហើយ បានត្រូវនាម៉ឺនសព្វមុខមន្ដ្រីលើកឱ្យឡើងកាន់អំណាច ក្រោមព្រះនាមថា «សម្ដេចព្រះកែវហ្វ៊ា» គឺថាជាព្រះរាជាដែលមិនបានទទួលការអភិសេក ។
នៅឆ្នាំបន្ទាប់មក ព្រះឧភយោរាជអង្គតន់ និងព្រះអង្គនន់ ដែលបានរត់ភៀសព្រះកាយទៅជ្រកកោននឹងពួកអាណ្ណាមក្រោយព្រឹត្ដិការណ៍មានឃាតកម្មទៅលើព្រះរាជាបទុមរាជា បានចូលលុកលុយប្រទេសពីខាងត្បូងមក និយាយថាមិនមែនមកដណ្ដើមអំណាចអ្វីទេ គ្រាន់តែចង់សងសឹកនឹងព្រះរាជា ដែលបើតាមពិតទៅគ្មានមូលហេតុអ្វីនឹងមកសងសឹកសោះ ពីព្រោះថាអ្នកអង្គជ័យនេះមិនមែនជារាជវង្សខាងព្រះរាជាអ៊ីប្រាហ៊ីមឯណា ។ ព្រះឧភយោរាជបាននាំទ័ពអាណ្ណាមយ៉ាងធំមកជាមួយ ហើយធ្វើសង្គ្រាមពេញ១ឆ្នាំ ។ ព្រះរាជាបានដឹកនាំទ័ពចេញប្រយុទ្ធនឹងទ័ពព្រះឧភយោរាជ ហើយត្រូវសុគតនៅមុខកងទ័ពនោះទៅ (36) ។ ទ្រង់បានសោយរាជ្យមិនបាន៣ឆ្នាំផងទេ ។
ពេលនោះ ព្រះឧភយោរាជអង្គតន់ ដែលមានព្រះជន្ម៥១ព្រះវស្សាហើយ បានអាពាធហើយសុគតទៅដែរ ។ ដូច្នេះនៅសល់តែព្រះអង្គនន់មួយអង្គឯងប៉ុណ្ណោះ ។
១៥. រយៈកាលចន្លោះរាជ្យ-ព្រះឧភយោរាជអង្គនន់ (១៦៧៤-១៦៧៥)
ស្ដេចនេះជាបុត្រារបស់ព្រះអង្គឯម ដែលបានគាំទ្រព្រះរាជាចោលសាសនាប្រឆាំងនឹងព្រះអនុជទាំង២ ដែលបានរត់ទៅសុំជំនួយពីស្ដេចកូសាំងស៊ីន ។ ទ្រង់បាននាំព្រះរាជវង្សមកគង់នៅឯរាជធានីឧត្ដុង្គវិញ ហើយក៏ចាប់កាន់កាប់អំណាចក្នុងព្រះនាមថា «សម្ដេចបទុមរាជាឧភយោរាជ» គឺទ្រង់មិនគ្រងរាជ្យទេ ។ មានឯកសារខ្លះនិយាយថា ទ្រង់មានព្រះឋានៈជាសម្ដេចព្រះកែវហ្វ៊ា ។ ការដែលទ្រង់ប្រកាន់យកព្រះឋានៈជាព្រះឧភយោរាជនេះ គឺដើម្បីឱ្យស្របទៅនឹងព្រះរាជបន្ទូលដែលទ្រង់បានប្រកាសពីមុនមកថា ទ្រង់មិនមែនមកប្រយុទ្ធដើម្បីរាជបល្ល័ង្កនោះទេ គឺដើម្បីតែការសងសឹកប៉ុណ្ណោះ ។
ព្រះអង្គនន់កាន់អំណាចមិនបានទាំង៥ខែផង ព្រះអង្គសូរដែលត្រូវជារាជបុត្ររបស់ព្រះបទុមរាជា ដែលសុគតទៅ ហើយត្រូវជាព្រះអនុជរបស់សពអ្នកអង្គជ័យ ដែលពេលនោះមានព្រះជន្ម១៨ព្រះវស្សាហើយ បានប្រមែប្រមូលកងទ័ពប្រឆាំងនឹងព្រះឧភយោរាជអង្គនន់ ។ ព្រះអង្គសូរបានទទួលជោគជ័យល្អបង្គួរ ធ្វើឱ្យព្រះឧភយោរាជទ្រាំមិនបានក៏រត់គេចខ្លួនទៅនៅឯកូសាំងស៊ីនក្បែរភ្នំដឺកា (ត្រង់ព្រំប្រទល់ដែនកម្ពុជា-អាណ្ណាមបច្ចុប្បន្ន) នៅប្រាំតម្លឹង ។ បន្ដិចក្រោយមក រាជវង្សានុវង្សរបស់ព្រះអង្គ ក្នុងនោះមានស្រីស្នំម្នាក់ដែលមានដើមកំណើតជាចិន បាននាំគ្នារត់មករស់នៅជាមួយព្រះអង្គដែរ ។
១៦. ព្រះជ័យជេដ្ឋាទី៤-ព្រះអង្គសូរ រជ្ជកាលទី១ (១៦៧៥-១៦៨៨)
ព្រះអង្គសូរពេលនោះមានព្រះជន្ម១៩ព្រះវស្សាហើយ ។ កាលពីឆ្នាំកន្លងទៅ ទ្រង់បានទាមទារយកអំណាចដែលព្រះអង្គត្រូវទទួលបន្ដពីព្រះអង្គជ័យជាព្រះរៀម ដែលបានសុគតនៅក្នុងការប្រយុទ្ធជាមួយនឹងព្រះអង្គតន់ និងព្រះអង្គនន់ ។ នៅពេលដែលព្រះអង្គនន់រត់ភៀសព្រះកាយទៅនៅឯកូសាំងស៊ីន ព្រះអង្គសូរក៏ចូលកាន់អំណាចនៅក្នុងឆ្នាំ១៦៧៥ ហើយបានឱ្យគេអភិសេកព្រះអង្គនៅរាជធានីឧត្ដុង្គក្រោមព្រះនាមថា «សម្ដេចព្រះជ័យជេដ្ឋាបរមសុរិន្ទ្រធិរាជ» ។ ទ្រង់បានលើកអ្នកព្រះអង្គនន់ ជាបងប្អូនជីដូនមួយឱ្យឡើងជាព្រះឧភយោរាជ ។
នៅក្នុងឆ្នាំបន្ទាប់ ព្រះរាជាបានយាងមកគង់នៅទ្រនំជ្រឹង ក្នុងខែត្រសំរោងទង ហើយបានបញ្ជាឱ្យគេសង់រាជវាំងមួយថ្វាយ ។
នៅសម័យនោះ ប្រហែលជាក្នុងរវាងឆ្នាំ១៦៨០ មានឧត្ដមសេនីយ៍ចិនម្នាក់ខាងរាជវង្សមិញឈ្មោះថា ឌួងង៉ានឌីច ក្រោយពីច្បាំងចាញ់កងទ័ពរបស់ខាងហ៊ី អ្នកកសាងសន្ដតិវង្សថាញ់ បាននាំទ័ពដែលនៅសល់ចុះសំពៅ២០០ ធ្វើដំណើរមកអាណ្ណាម ។ ប៉ុន្ដែខ្យល់ព្យុះបក់បោកលិចសំពៅអស់ សល់តែសំពៅ៥០ និងទ័ព៣ពាន់នាក់ប៉ុណ្ណោះដែលអាចឡើងគោកបាន ក៏នាំគ្នាមកសុំចុះចូលនឹងស្ដេចអាណ្ណាមនៅនឹងទូរ៉ានតែម្ដង ហើយសំណូមពរសុំដីធ្លីដើម្បីរស់នៅ ។ ស្ដេចអាណ្ណាមមិនចង់រក្សាពួកបរទេស៣ពាន់នាក់នេះឱ្យនៅជិតខ្លួនព្រះអង្គទេ ក៏បញ្ជូនឱ្យមករស់នៅក្នុងកម្ពុជាវិញដោយថ្វាយដំណឹងដល់ព្រះជ័យជេដ្ឋាបានជ្រាបផងដែរគឺឱ្យនៅខែត្របារាជ និងដុងណាយ ដែលមានពួកអន្ដោប្រវេសន៍អាណ្ណាមចូលមករស់នៅច្រើនបង្គួររួចទៅហើយ ហើយបានចាត់ទុកថា នេះគឺជាទឹកដីដែលខ្លួនដណ្ដើមបាន ។ ឧត្ដមសេនីយ៍ឌួងង៉ានឌីច មិនសប្បាយចិត្ដនឹងទឹកដីដែលគេបានធ្វើសម្បទានឱ្យរស់នៅទេ ក៏នាំទ័ពពាក់កណ្ដាលទៅរស់នៅឯមីថ វិញទុកឱ្យមេបញ្ជាការរងឈ្មោះ ត្រាន់ រស់នៅនឹងបារាជជាមួយនឹងទ័ពពាក់កណ្ដាលទៀត ។
ពួកចិនទាំងអស់នេះត្រូវរ៉ូវគ្នាជាមួយនឹងពួកអាណ្ណាមណាស់ ព្រោះជាអ្នកមកពីក្រៅដូចគ្នា ប៉ុន្ដែមិនសូវត្រូវគ្នាជាមួយពួកខ្មែរទេ ជាពិសេសជាមួយអាជ្ញាធរខ្មែរដែលគ្រប់គ្រងទឹកដីក្នុងនាមព្រះរាជាកម្ពុជា ។ ម្យ៉ាងទៀត ពួកនេះចូលចិត្ដបង្កចលាចលយ៉ាងខ្លាំង មិនចូលចិត្ដធ្វើការងារ ហើយមិនចង់គោរពច្បាប់ទម្លាប់របស់ព្រះរាជាណាចក្រលើសពីពួកអាណ្ណាមទៅទៀត ។ គេរស់នៅជាកងមិនមែនជាអ្នកស្រុកសមទៅតាមអត្ថន័យរបស់ពាក្យនេះទេ ហើយហាក់ដូចជាចូលចិត្ដនឹងការធ្វើសង្គ្រាមជាជាងរស់នៅក្នុងសន្ដិភាពដូចនៅកម្ពុជានេះ ។
គឺដោយហេតុនេះហើយបានជានៅពេលដែលព្រះអង្គនន់ធ្លាក់ចេញពីអំណាច ទ្រង់បានសម្រេចព្រះទ័យចាប់ផ្ដើមធ្វើការប្រយុទ្ធតបតទៅនឹងព្រះអង្គសូរឡើងវិញនៅក្នុងឆ្នាំ១៦៨២ បើទោះបីថាព្រះអង្គសូរ ធ្លាប់បានលើកទ្រង់ឱ្យឡើងជាទីឧភយោរាជហើយក៏ដោយ ក៏ព្រះអង្គនន់បានមកទាក់ទងនឹងពួកចិនខាងលើនេះ ដែលមានមេកងឈ្មោះថា បាងកន ឱ្យធ្វើជាស្នូលនៃកងទ័ពមួយដ៏រឹងមាំដែរ ។ ព្រះអង្គបានទទួលយកពួកចាម ដែលកំពុងតែរត់គេចខ្លួនពីស្រុកទេសមកឱ្យចូលក្នុងកងទ័ពរបស់ព្រះអង្គថែមទៀត ។ បន្ទាប់មក ទ្រង់ក៏ចាប់វាយដណ្ដើមយកខែត្របាសាក់ ព្រះត្រពាំង ភ្នំពេញ និងឧត្ដុង្គ ។
ព្រះជ័យជេដ្ឋាព្រះអង្គសូរ ពេលនោះមិនបានគិតថានឹងមានកើតសង្គ្រាមដូច្នោះទេ ម្ល៉ោះហើយគ្មានប្រុងប្រៀបអ្វីនឹងទប់ទល់ឡើយ ។ នៅពេលដែលកងទ័ពរបស់ព្រះអង្គនន់ធ្វើដំណើរចេញពីភ្នំពេញ ដែលកាលនោះមានឈ្មោះថា ចតុម្មុខមក ទ្រង់ក៏ភៀសព្រះកាយទៅគង់នៅឯទ្រនំជ្រឹងក្នុងខែត្រសំរោងទង ដែលទ្រង់បានចាត់ឱ្យគេសង់ព្រះរាជដំណាក់មួយថ្វាយពីមុនរួចហើយ ។ បន្ដិចក្រោយមកទើបទ្រង់យាងចេញពីទ្រនំជ្រឹងមកវិញជាមួយនឹងទ័ពមួយកងដែលទ្រង់កេណ្ឌបានពីបណ្ដាខែត្រនៅតំបន់នោះ រួមជាមួយទ័ពជំនួយរបស់សៀមមួយកង ដែលស្ដេចសៀមបានបញ្ជូនឱ្យមកជួយ ។ ទ័ពរបស់ព្រះអង្គបានវាយទ័ពព្រះឧភយោរាជឱ្យបរាជ័យ ពួកចិនរត់ចោលអស់ ព្រះឧភយោរាជក៏គេចខ្លួនព្រះអង្គទៅគង់នៅឯកោះតេង (គឺកោះគូឡាវយាងសព្វថ្ងៃ) ហើយលាក់ខ្លួននៅទីនោះទៅ នៅឆ្នាំ១៦៨៤ ។
ព្រះរាជាក៏យាងត្រលប់ពីទ្រនំជ្រឹង មកគង់នៅឧត្ដុង្គវិញ (ឆ្នាំ១៦៨៥) ។ ក្នុងពេលនោះ ព្រះឧភយោរាជ ក៏បានយាងមកគង់នៅក្នុងខែត្រស្រីសន្ធរ ហើយបានឱ្យគេសង់បន្ទាយការពារមួយនៅទីនោះ ។
នៅក្នុងឆ្នាំបន្ទាប់មកទៀត ព្រះឧភយោរាជបានទទួលទ័ពសៀមមួយកងពីព្រះរាជាអយុធ្យា ដែលតែងតែចង់ដុតភ្លើងសង្គ្រាមស៊ីវិលឱ្យឆេះរោលរាលនៅកម្ពុជា ទ័ពនោះមកតាមជើងគោកផង និងតាមជើងទឹកផង ។ ទ្រង់បានប្រមូលទ័ពចិន និងទ័ពខ្មែររបស់ព្រះអង្គបញ្ចូលជាមួយគ្នា រួចបានចាប់បើកការប្រយុទ្ធជាថ្មី វាយសម្រុកមកដល់ភ្នំពេញនៅដើមឆ្នាំ១៦៨៤ ។ ព្រះរាជាជ័យជេដ្ឋាអង្គសូរបានដឹកនាំទ័ពចេញទៅប្រយុទ្ធទប់ទល់ វាយទ័ពព្រះឧភយោរាជឱ្យបរាជ័យ បង្ខំឱ្យព្រះឧភយោរាជដកថយទៅស្រីសន្ធរដែលរាជពង្សាវតារ២ច្បាប់នៅតែហៅ ស្រីសឈរតាមឈ្មោះដើមដដែល ។ក្រោយបរាជ័យនេះព្រះឧភយោរាជអង្គនន់បានបញ្ជូនរាជទូតទៅសុំជំនួយបន្ថែមពីស្ដេចសៀម ។ គឺរាជទូតរបស់ព្រះអង្គនន់នេះឯង ដែលពួករាជទូតរបស់ស្ដេច ល្វីទី១៤ បានជួបនៅអយុធ្យាក្នុងឆ្នាំ១៦៨៥ ហើយនិយាយថាមានតែព្រះភាគិនេយ្យរបស់ព្រះឧភយោរាជមួយអង្គទេក្នុងចំណោមពួកបរទេសទាំងអស់ ដែលមានសិទ្ធិទទួលព្រះរាជសង្ហាមាស ។ លោក ដឺសូម៉ុង បាននិយាយថា រជ្ជទាយាទកម្ពុជាមួយអង្គដែលបានភៀសព្រះអង្គមកគង់នៅស្រុកសៀម បានសំណូមពរស្ដេចសៀមឱ្យជួយព្រះអង្គបានគង់លើរាជបល្ល័ង្កវិញ ហើយលោកបានបន្ថែមទៀតថា សៀមបានធ្វើអន្ដរាគមន៍រួចមកហើយកាលពីពេលថ្មីៗនេះ ។
នៅក្នុងឆ្នាំ១៦៨៧ ព្រះរាជាជ័យជេដ្ឋាអង្គសូរ បានជាសះស្បើយពីជំងឺអុតធំដែលស្ទើរតែធ្វើឱ្យព្រះអង្គក្ស័យព្រះជន្ម ។ ទ្រង់បានដាក់រាជសម្បត្ដិថ្វាយព្រះមាតា ដើម្បីយាងសាងផ្នួស៧ថ្ងៃ លាបំណន់ដែលបានបន់ស្រន់នៅពេលទ្រង់អាពាធ ។
នៅឆ្នាំ១៦៨៨ សម្ដេចចៅពញាកន និងចិនម្នាក់ឈ្មោះថា តាងចុងស៊ា ឯកសារមួយទៀតថាឈ្មោះ កាន ចុងអ៊ា មានបំណងទម្លាក់ព្រះរាជាពីរាជបល្ល័ង្ក ក៏នាំគ្នាទៅស្រីសន្ធរសុំទ័ព និងអាវុធយុទ្ធភណ្ឌពីព្រះឧភយោរាជ រួចនាំគ្នាមកឈរជើងនៅភ្នំពេញ ។ ពួកនេះហៀបតែនឹងចេញដំណើរទៅឧត្ដុង្គទៅហើយ ស្រាប់តែទ័ពព្រះរាជាមកដល់មុន ហើយបើកការប្រយុទ្ធមកលើ ធ្វើឱ្យពួកនេះភ្ញាក់ខ្លួនភ័យរត់គេចអស់ទៅដោយចោលអាវុធ និងសំពៅ២គ្រឿងនៅលើសមរភូមិ ។ ក្មួយស្រីម្នាក់របស់សម្ដេចពញាកនឈ្មោះ អ្នកអង្គអី ដែលនៅក្នុងសំពៅមួយ ក៏ត្រូវព្រះរាជាចាប់បានជាឈ្លើយ ហើយទទួលយកធ្វើជាព្រះជាយាប៉ុន្មានខែក្រោយមក ។
នៅក្នុងឆ្នាំនោះ ក្រោយពីទ្រង់កាន់អំណាចអស់ពេល១៤ឆ្នាំ ព្រះរាជាក៏បង្គាប់ឱ្យគេរៀបចំអភិសេកព្រះអង្គក្រោមព្រះនាមថា «សម្ដេចព្រះជ័យជេដ្ឋាបរមោសុរិន្ទរាជាធិរាជរាមា» ។
ហើយនៅក្នុងឆ្នាំដដែល ព្រះឧភយោរាជអង្គនន់ ក្រោយពីមិនបានទទួលជំនួយអ្វីពីពួកសៀម ព្រះអង្គក៏យាងទៅកាន់កូសាំងស៊ីន (អតីតនគរចាម្ប៉ា) ដើម្បីសុំជំនួយពីស្ដេចហ៊ានវឿង (37) បានទ័ព២ម៉ឺននាក់បញ្ជាដោយឧត្ដមសេនីយ៍អាណ្ណាមឈ្មោះ អុងធានឃួន និងអុងធុមមូ ។ ទ្រង់បានដឹកនាំទ័ពនេះរហូតមកដល់រាជធានីឧត្ដុង្គ ។
ទ័ពអាណ្ណាមរបស់ព្រះឧភយោរាជវាយដណ្ដើមយករាជធានីបាន រួចហើយបានកៀរអ្នកស្រុកកំពង់ហ្លួង និងបន្ទាយលើយកមកដាក់នៅជ្រោយចង្វាពីមុខភ្នំពេញ ។ សម្ដេចព្រះទាវជាព្រះមាតុច្ឆារបស់ព្រះរាជា ព្រះជន្ម១៥ព្រះវស្សាក៏ស្ថិតនៅក្នុងចំណោមអ្នកស្រុកទាំងនោះដែរ ។ ចំណែកឯព្រះរាជាជ័យជេដ្ឋាបានគេចព្រះអង្គទៅឯស្រុកប្រាំតម្លឹង រួចហើយបានចាត់ឱ្យចៅពញាភក្ដីសង្គ្រាមសួសតាមមករកព្រះមាតុច្ឆាយកទៅវិញ ។ ទ្រង់បានប្រទានចិញ្ចៀនមួយវង់ដើម្បីឱ្យសម្ដេចព្រះទាវជឿទុកចិត្ដ រួចហើយចៅពញាភក្ដី ក៏ចេញដំណើរមកជាមួយអ្នកបម្រើម្នាក់ឈ្មោះ អាគោ នៅថ្ងៃអាទិត្យពេញបូណ៌ខែផល្គុណ (ចុងខែកុម្ភៈ) ។ មកដល់ស្ទឹងឧកញ៉ាហ្លួង ពេលព្រលប់ ចៅពញាភក្ដី ក៏ហែលទឹកឆ្លងកាត់ទៅជ្រោយចង្វា ចូលគាល់ព្រះក្សត្រីបង្ហាញព្រះទម្រង់ ហើយយាងព្រះនាងមកភ្លាមតែម្ដង ។ ចៅពញាភក្ដីដាក់ព្រះក្សត្រីនៅលើស្មា រួចហែលទឹកឆ្លងទន្លេមកវិញ ឯអាគោក៏ហែលចម្លងភីលៀងព្រះនាងមកដែរ ។ ហែលមកដល់ត្រើយម្ខាង ចៅពញាភក្ដីធ្វើអង្រឹងសែងព្រះក្សត្រីរួចចេញដំណើរបន្ដទៀតដោយមិនឱ្យនរណាឃើញទាន់ ។ មកដល់ទំនប់ព្រះទេពរួចមកដល់លំហាចជាកន្លែងដែលព្រះរាជាទ្រង់រង់ចាំព្រះមាតុច្ឆា និងសេនាអង់អាចក្លាហាន ជាមួយនឹងសេនាហែហមមួយកង និងដំរីជាច្រើន ។ ព្រះក្សត្រីយាងគង់លើដំរីមួយក្បាលរហូតមកដល់ប្រាំតម្លឹង ។
ពេលទ្រង់ជ្រាបអំពីការបាត់ខ្លួនរបស់សម្ដេចទាវ ព្រះឧភយោរាជអង្គនន់បានចាត់ឱ្យទ័ពអាណ្ណាម៥ពាន់នាក់ធ្វើដំណើរដេញតាម ។ ទ័ពអាណ្ណាមមកជួបជាមួយទ័ពរបស់ព្រះរាជា ដែលដឹកនាំដោយចៅពញាភក្ដីសង្គ្រាម នៅត្រង់វាលហុង ក៏ត្រូវទ័ពព្រះរាជាវាយឱ្យបរាជ័យរត់ត្រលប់ទៅជ្រោយចង្វាវិញ ។ ឃើញទ័ពអាណ្ណាមបាក់រត់គ្មានសណ្ដាប់ធ្នាប់ដូច្នេះទ័ពព្រះរាជាក៏ដេញតាមវាយរហូតរួចឆ្លងក្បូនឡើងវាយយកបានបន្ទាយជ្រោយចង្វា ។
ពេលនោះទ័ពអាណ្ណាមភិតភ័យខ្លាំងណាស់ បែកបាក់ខ្ចាត់ខ្ចាយ រត់នាំមេកោយរបស់គេ និងព្រះឧភយោរាជយកទៅដល់កូសាំងស៊ីនវិញដោយលំបាក ។ អ្នកស្រុកឧត្ដុង្គ និងកំពង់លែងក៏វិលត្រលប់ពីជ្រោយចង្វាមកទីលំនៅរៀងៗខ្លួនវិញ ។
ពេលនោះសម្ដេចទាវក្សត្រីបានស្នើសុំព្រះរាជាឱ្យយាងជាមួយព្រះនាងសាដាន ត្រលប់តាមផ្លូវដែលព្រះនាងរត់គេចជាមួយចៅពញាភក្ដី ដើម្បីពិនិត្យមើលទីកន្លែងដែលព្រះអង្គបានឈប់សម្រាកលាក់ខ្លួន រួចទ្រង់បានឱ្យគេសង់វត្ដអារាមទុកជាអនុស្សាវរីយ៍ ។ វត្ដទី១គឺវត្ដកានឡាល សង់នៅលើទួលប្រាំតម្លឹង ជាទីកន្លែងដែលព្រះរាជាបាននាំព្រះនាងទៅដល់ក្រោយពីគេចព្រះអង្គរួចមក ។
ដោយយាងបន្ដមកទៀត ឈប់មើលគ្រប់ទីកន្លែងដែលបានឈប់សម្រាក រហូតមកដល់ព្រៃពួនជាទីកន្លែងដែលព្រះក្សត្រីត្រូវពួនលាក់ខ្លួនកុំឱ្យពួកអ្នកដែលតាមមករកព្រះនាងឃើញ ។ ព្រះរាជាក្រោយពីព្រះសណ្ដាប់ដំណើររឿងឃើញថា ព្រះនាងគេចផុតពីគ្រោះថ្នាក់ដោយអព្ភូតហេតុទ្រង់ក៏បញ្ជាឱ្យកសាងវត្ដមួយនៅទីនោះ ។ ទ្រង់បានលើកចៅពញាភុកឱ្យឡើងជាទីឧកញ៉ាធម្មា រួចប្រគល់ភារកិច្ចឱ្យសាងសង់វត្ដនេះ និងជីកស្រះទឹកធំមួយផង ។
នៅពេលនោះ មានលេចពាក្យចចាមអារ៉ាមមិនល្អចំពោះព្រះរាជា និងព្រះក្សត្រី ពាសពេញព្រះរាជាណាចក្រដោយចោទថា ហេតុតែព្រះរាជាយកព្រះទ័យទុកដាក់នឹងព្រះមាតុច្ឆាក្មេងយ៉ាងនេះពីព្រោះព្រះនាងបានសហាយស្មន់ជាមួយព្រះរាជា ។ ព្រះក្សត្រីដែលកំពុងតែគ្រងព្រះពស្ដ្រាតាមរបៀបអ្នកស្រុក ទ្រង់ខ្ញាល់ខ្លាំងណាស់ ហើយបានជេរប្រទេចផ្ដាសាតបតទៅអ្នកដែលបាននិយាយប្រហារព្រះនាងវិញថា «អ្នកណាក៏ដោយ ទោះជាមន្ដ្រីថ្នាក់ណាក៏ដោយ ឬក៏ជាប្រជារាស្ដ្រក៏ដោយដែលបានសង្ស័យមកលើរូបខ្ញុំ និយាយមិនល្អពីអតីតកាលរបស់ខ្ញុំ សូមឱ្យអ្នកទាំងអស់នោះស្លាប់ទៅហើយធ្លាក់ចុះនរកដ៏សែនជ្រៅ កុំឱ្យព្រះពុទ្ធលោកប្រោសបាន» ។
១៧. រយៈកាលចន្លោះរាជ្យ (១៦៨៨)
វត្ដព្រៃពួនកសាងរួចក៏រៀបចំពិធីបញ្ចុះសីមា ពិធីនោះបានធ្វើឱ្យព្រះរាជាទ្រង់នឹកឃើញកាលគ្រងចីវរ ៧ថ្ងៃក្រោមម្លប់ព្រះរតនត្រ័យ ទ្រង់ក៏សម្រេចព្រះទ័យបោះបង់រាជសម្បត្ដិសាងព្រះផ្នួសម្ដងទៀត ។ ព្រះអង្គបានដាក់រាជសម្បត្ដិថ្វាយចៅពញាយ៉ង ត្រូវជាចៅក្មួយ ព្រះជន្ម២២ព្រះវស្សា ដែលបួសជាភិក្ខុ ឯព្រះក្សត្រីក៏បួសជាដូនជី ក្នុងវត្ដព្រៃពួននោះដែរ ។
ក្សត្រទាំង២អង្គគង់នៅក្នុងវត្ដនេះប្រហែលជា៣ខែ រហូតដល់ចេញវស្សា ទើបចាកលាសិក្ខាបទមកវិញ ។ ព្រះរាជាបានយកអំណាចមកកាន់ជាថ្មី ឯព្រះក្សត្រីបានឡើងជាព្រះក្សត្រីឯកនៅក្នុងព្រះរាជវាំង ។
១៨. ព្រះជ័យជេដ្ឋា រជ្ជកាលទី២ (១៦៨៨)
ក្រោយពីលាចាកសិក្ខាបទ ព្រះរាជា និងព្រះវររាជមាតុច្ឆាបានចេញព្រះរាជបញ្ជាឱ្យគេកសាងវត្ដថ្មីមួយទៀតនៅក្នុងខែត្រសំរោងទងត្រង់កន្លែងដែលពេលកំពុងរត់គេចពីសត្រូវ ស្នំព្រះនាងឈ្មោះនាងអំបានថ្វាយផ្កាដល់ព្រះនាងនៅក្រោមម្លប់ដើមជ្រឹង ។ វត្ដនោះមានឈ្មោះថា វត្ដអូជ្រឹង ។
នៅទីបញ្ចប់ ព្រះរាជាបានឱ្យគេសង់វត្ដមួយទៀតនៅគោកចំបក់ ត្រង់កន្លែងមួយដែលអ្វីៗទាំងអស់នៅជុំវិញព្រះរាជាកំពុងតែរំជើបរំជួល អ្នកទាំងអស់គ្នាកំពុងតែភ័យខ្លាច រាជាទតឃើញមេគោមួយក្បាលបំបៅកូន ធ្វើវាហី ជាហេតុធ្វើឱ្យព្រះអង្គមានសេចក្ដីក្លាហានឡើងវិញ ។ វត្ដនោះមានឈ្មោះថា វត្ដមេគោបំបៅកូន ។
បន្ទាប់មក ព្រះរាជាបានឱ្យគេសង់ដំណាក់មួយនៅក្បែរវត្ដចុងក្រោយនេះ រួចហើយទ្រង់ក៏ចាប់រៀបចំរចនាសម្ព័ន្ធរដ្ឋបាលរបស់ព្រះរាជាណាចក្រឡើងវិញ ប្រទានរង្វាន់ដល់អ្នកទាំងឡាយណាដែលធ្លាប់តាមដង្ហែព្រះអង្គដោយស្មោះស្ម័គ្រ ។ ទ្រង់បានចាត់តាំងចតុស្ដម្ភ គឺឧកញ៉ាយោមរាជ ឧកញ៉ាវាំង ឧកញ៉ាក្រឡាហោម និងឧកញ៉ាចក្រីឡើងវិញ បន្ទាប់មកមានរាជតេជោ និងមហាតលិកឆ្វេងស្ដាំគឺមហាទេព និងមហាមន្ដ្រី ។
ព្រះរាជាក៏បានចាត់តាំងផងដែរនូវមន្ដ្រី៥រូបសម្រាប់តាមបម្រើសម្ដេចព្រះទាវជាព្រះមាតុច្ឆា ក្នុងនោះមានឈ្មោះ សួស ជាអ្នកបានជួយសង្គ្រោះព្រះក្សត្រី ដែលមានឋានៈជាក្រឡាពាស ហើយដំឡើងឱ្យទៅជាថ្នាក់សម្ដេចចៅពញា ទទួលបានភូមិ៩ រួមទាំងខ្ញុំ និងអ្នកស្រុក ដែលរស់នៅក្នុងភូមិនោះទាំងអស់ (38) ជាកម្មសិទ្ធិ ។
មន្ដ្រី២រូប គឺអ្នកអ៊ីម ដែលបានចាប់កាន់អាវុធមុនគេ និងចៅជៃលី ដែលបានបង្កការលំបាកជាច្រើនដល់ព្រះរាជាណាចក្រត្រូវដាក់ទោសប្រហារជីវិតបង់ ម្នាក់ដោយជ្រមុជក្នុងទឹកស្រះ ម្នាក់ទៀតជ្រមុជក្នុងទឹកព្រែក ។
បន្ទាប់ពីផ្ដល់យុត្ដិធម៌រួច ព្រះរាជាបានយាងត្រលប់វិលមកគង់នៅឯឧត្ដុង្គ ជាព្រះរាជធានីវិញ ។
ពេលនោះនៅឯខែត្រស្រីសន្ធរមានរាជវង្ស២អង្គគឺ ព្រះអង្គអ្នកចន្ទ និងព្រះអង្គអ្នកអុក ដែលជាមិត្ដភក្ដិរបស់អតីតព្រះឧភយោរាជ បានដឹកនាំអ្នកស្រុកឱ្យបះបោរឡើង ហើយនាំគ្នាធ្វើដំណើរទៅកាន់ខែត្រព្រៃវែងជាទីកន្លែងដែលពួកកាន់សាសនាកាតូលិករស់នៅ ពួកនេះពីមុនដឹកនាំដោយលោកឪពុក សឺវ្រឺយ ។ ព្រះរាជាបានបញ្ជាឱ្យសម្ដេចព្រះស្រឡៅដឹកនាំទ័ពទៅបង្ក្រាបពួកនោះ ចាប់រាជវង្សទាំង២បានហើយធ្វើឃាតចោលនៅនឹងជ្រោយបន្លៀ រួចទ្រង់បានបែងចែកភូមិទាំង៩ជាកម្មសិទ្ធិរបស់រាជវង្សទាំង២ឱ្យទៅសម្ដេចពញាស្រឡៅ និងរាជវង្សផ្សេងៗទៀត (39) ។
ការបះបោរខាងលើនេះមានរយៈពេលប្រហែលជា៣ខែ ។ ក្រោយព្រឹត្ដិការណ៍នេះ ព្រះរាជាបានយាងចេញពីរាជធានីឧត្ដុង្គ មកគង់នៅឯកំពង់ក្រសាំង ត្រង់ទួលព្រះស្រីវិញ ។ នៅទួលក្រសាំងនេះព្រះអង្គបានចាត់តាំងគណៈរដ្ឋមន្ដ្រី ដោយរាប់បញ្ចូលទាំងបុរោហិត ចៅក្រមជាន់ខ្ពស់ ចៅហ្វាយឃ្លាំងទាំង៤ និងចៅហ្វាយស្រុកទាំង១០ថ្នាក់ ។ គឺនៅក្នុងភូមិទួលក្រសាំងនេះឯងដែលអាគោ ខ្ញុំរបស់ពញាភក្ដីសង្គ្រាមបានរៀបអាពាហ៍ពិពាហ៍ជាមួយនាងអំ ភីលៀងដែលបានថ្វាយផ្កាមួយទងដល់ព្រះទាវ ហើយត្រូវបានលើកឱ្យធ្វើជាចៅហ្វាយខែត្រគោកសេះឡើង (40) ។
មានបញ្ហាមួយធំជាងបញ្ហាអាពាហ៍ពិពាហ៍នោះទៅទៀត ដែលធ្វើឱ្យគណៈរដ្ឋមន្ដ្រីឈឺក្បាល គឺបញ្ហាផ្លាស់ប្ដូររាជធានី ។ ក្រោយពីបានសាកសួរទីប្រឹក្សា ហោរា និងព្រះសង្ឃរាជរួចមក គេសម្រេចថារាជធានីទួលក្រសាំងនេះ មានប្រជាជនច្រើន ចង្អៀតណាស់ គួរដូររាជធានីទៅដាក់នៅឯបឹងក្បិនវិញ ។ ការផ្លាស់ប្ដូររាជធានីនេះប្រព្រឹត្ដទៅនៅឆ្នាំបន្ទាប់ ហើយរាជធានីថ្មីមានឈ្មោះថា ដំណាក់ ។
មានការបះបោរមួយទៀតកើតឡើងធ្វើឱ្យសភាពការណ៍ក្នុងព្រះរាជាណាចក្រភាគខាងត្បូងល្អក់កករបន្ដិច ។ នោះគឺការបះបោររបស់ពួកចិននៅមីថ ក្រោមការអុជអាលរបស់ឈ្មោះ ហ៊ិញតាំ ជាជំនួយការម្នាក់របស់ឧត្ដមសេនីយ៍ឌួងង៉ាន់ឌីច ។ ពួកបះបោរបានសម្លាប់ឌួងង៉ាន់ឌីច រួចហើយលើកហ៊ិញតាំឱ្យធ្វើមេ និងប្រកាសទឹកដីម្ដុំនោះជាក្សត្រប្រទេសមួយឯករាជ្យ ។ ពួកបះបោរបានស្លដែកចាក់ធ្វើកាំភ្លើងធំ និងកេណ្ឌបានទូកក្ដារបានជាច្រើន ។ គេបិទផ្លូវចរាចរ បង្កើតគយយាមល្បាត ហើយឃាត់ពួកខ្មែរឱ្យបង់ប្រាក់លោះ ។
ព្រះរាជាកម្ពុជាឈ្វេងយល់ថា ពួកចិននេះនឹងមកវាយប្រហារព្រះរាជាណាចក្រនៅថ្ងៃណាមួយជាមិនខាន ទើបទ្រង់បញ្ជាឱ្យគេសង់កំពែងការពារនៅភ្នំពេញនៅបាក់ណាម និងនៅគោប៊ីច រួចហើយបានឱ្យគេធ្វើធ្នស់បិទទន្លេ នៅត្រង់បាណាម ដោយចងក្បូននឹងច្រវាក់មាំៗ ។
ព្រះឧភយោរាជអង្គនន់ ពេលនោះទ្រង់គង់នៅឯព្រៃនគរ ។ ទ្រង់មានពិភាល់ខ្លាំងណាស់នឹងការបះបោររបស់ពួកចិននេះ ដែលគ្មានសម្ព័ន្ធភាពអ្វីជាមួយព្រះអង្គទេ ក៏សំណូមពរសុំជំនួយពីពួកអាណ្ណាម ។ ពេលនោះពួកអាណ្ណាមប្រុងប្រៀបតែនឹងប្រកាសសង្គ្រាមជាមួយកម្ពុជាទៅហើយ បានហៅហ៊ិញតាំឱ្យមកចុះចូលនឹងខ្លួន រួចឱ្យដឹកទ័ពដើរមុខ ។ ហ៊ិញតាំពេលនោះរីករាយណាស់នឹងបានត្រូវគេទទួលស្គាល់ ចាត់ទុកដូចជាស្ដេច ក៏ចាប់ចេញដំណើរ ហើយធ្លាក់ចូលក្នុងអន្ទាក់របស់ពួកអាណ្ណាម ដែលមានទូកសំពៅច្រើនលើសលុបព័ទ្ធជិតជុំ ។ ហ៊ិញតាំ ក៏ត្រូវពួកអាណ្ណាមចាប់បាន រួចសម្លាប់ចោលទៅ ឯបន្ទាយទាំងឡាយក៏ត្រូវគេបំផ្លាញចោលគ្មានសល់ ។ អាណានិគមចិននៅមីថក៏ត្រូវបានគេប្រគល់ឱ្យអុងប៉ាងចិននៅបារាជឈ្មោះ ត្រាន់ កាន់កាប់គ្រប់គ្រងវិញ ។
ទ័ពអាណ្ណាមក្រោយពីបានកម្ទេចទ័ពពួកបះបោរចិននៅ មីថ រួចហើយ មិនបានឈប់នៅស្ងៀមទេ ។ បានបន្ដដំណើរមកវាយដណ្ដើមយកភ្នំពេញទៀត រហូតទាល់តែបាន ។
ព្រះរាជាកម្ពុជាបានភៀសព្រះកាយមកគង់នៅឯកំពង់ហ្លួង លើច្រាំងខាងស្ដាំទន្លេសាប ត្រឹមឧត្ដុង្គ រួចទ្រង់បានផ្ញើទូតមកសុំចរចាសន្ដិភាព ។ ប៉ុន្មានថ្ងៃក្រោយមក សន្ធិសញ្ញាសន្ដិភាពរវាងកម្ពុជា និងអាណ្ណាម ក៏បានត្រូវចុះហត្ថលេខាជាថ្មី ដោយកំណត់ឱ្យកម្ពុជាលើកសួយសារអាករថ្វាយព្រះរាជាអាណ្ណាមជារៀងរាល់ឆ្នាំ ។
មានការនិទានតៗគ្នាថា ក្បួនច្បាប់ផ្សេងៗរបស់ព្រះរាជាណាចក្របានត្រូវខ្ចាត់ខ្ចាយរប៉ាត់រប៉ាយបាត់អស់ជាមួយនឹងការបាក់បែកលង្វែកកាលពីឆ្នាំ១៥៩៣ ធ្វើឱ្យពួកចៅក្រមមានការលំបាកណាស់ក្នុងការកាត់សេចក្ដី ព្រោះគ្មានអ្វីជាសំអាង កាត់សេចក្ដីទៅតាមតែការចងចាំប៉ុណ្ណោះ ។ ព្រះរាជាមុនៗបានបញ្ជាឱ្យខិតខំប្រមែប្រមូលក្បួនច្បាប់ទាំងអស់ពីតាមបណ្ដាខែត្រ និងវត្ដអារាមឡើងវិញដែរ ហើយគេប្រមូលបានមកវិញជាច្រើន ក៏ប៉ុន្ដែក្បួនច្បាប់ទាំងអស់នោះមិនត្រូវគ្នាទេ មួយចំនួនប្រែខុសច្បាប់ដើមដោយការចម្លងតៗគ្នាមក ។ ដោយពិនិត្យឃើញដូច្នេះ ព្រះរាជាបានចេញបញ្ជាឱ្យប្រមូលក្បួនច្បាប់ទាំងអស់យកមកសិក្សាប្រៀបធៀបគ្នាមើល ហើយបើចាំបាច់ទ្រង់ឱ្យធ្វើវិសោធនកម្ម ។ ទ្រង់បានបន្ទុកបណ្ដាក់ឱ្យអ្នកប្រាជ្ញបណ្ឌិត៦រូបធ្វើការសើរើ ពិនិត្យច្បាប់ទាំង១២ក្បាលឡើងវិញ ។ ពួកអ្នកប្រាជ្ញបណ្ឌិតបានធ្វើការងារនេះសម្រេចក្នុងរយៈពេល៥ឆ្នាំ រួចហើយព្រះជ័យជេដ្ឋាក៏ប្រកាសឱ្យប្រើ ។
មានសេសសល់ច្បាប់នេះរហូតមកដល់សព្វថ្ងៃចំនួន២ច្បាប់ដែលមានភស្ដុតាងបញ្ជាក់អំពីការសើរើពិនិត្យឡើងវិញនេះគឺ ក្រមចោរ រៀបរៀងតាំងពីឆ្នាំ៩៨៣នៃចុល្លសករាជត្រូវនឹងគ្រិស្ដសករាជ១៦២១ និងក្រមសុភាធិបតី រៀបរៀងពីឆ្នាំ៩៨០នៃចុល្លសករាជត្រូវនឹងគ្រិស្ដសករាជ១៦១៨ ។ ច្បាប់ផ្សេងៗទៀតដែលមើលទៅប្រហែលជារៀបរៀងឡើងក្នុងសម័យកាលនោះដែរ ប៉ុន្ដែមិនមានបញ្ជាក់ឈ្មោះព្រះរាជា ឬកាលបរិច្ឆេទច្បាស់លាស់ គឺប្រហែលជាត្រូវបានគេសើរើពិនិត្យឡើងវិញជាច្រើនដង (41) ។
ក្រមចោរមានសេចក្ដីបញ្ជាក់ឱ្យឃើញច្បាស់អំពីព្រះរាជបញ្ជាឱ្យសើរើពិនិត្យឡើងវិញ «ព្រះរាជាជ័យជេដ្ឋា ដែលសោយរាជ្យនៅរាជធានីឧត្ដុង្គ មានព្រះទ័យសន្ដោសត្រាប្រណីដល់រាស្ដ្ររបស់ព្រះអង្គ ។ ព្រះអង្គឈ្វេងយល់ថាទណ្ឌកម្មដែលដាក់ទៅលើពួកឧក្រិដ្ឋថ្នាក់លេខ១នោះមានសភាពធ្ងន់ធ្ងរព្រៃផ្សៃខ្លាំងពេកណាស់ ទ្រង់មានព្រះទ័យចង់ឱ្យលុបចេញវិញ ។ ដោយហេតុនេះ ទ្រង់បានបញ្ជាឱ្យយកទណ្ឌកម្មដែលបានកំណត់ឱ្យដាក់លើឧក្រិដ្ឋកម្មថ្នាក់លេខ២ មកដាក់លើឧក្រិដ្ឋកម្មថ្នាក់លេខ១ ហើយយកទណ្ឌកម្មសម្រាប់ឧក្រិដ្ឋកម្មថ្នាក់លេខ៣ មកដាក់លើឧក្រិដ្ឋកម្មថ្នាក់លេខ២វិញ ។ល ។» សេចក្ដីត្រង់នេះមានន័យថា លុបបំបាត់ទណ្ឌកម្មប្រហារជីវិតបង់ ។ យើងបានឃើញពីខាងលើរួចមកហើយថា មានស្ដេចលាវមួយអង្គគឺ ហ្វាងោម ក៏បានបញ្ជាឱ្យលុបទណ្ឌកម្មនេះចោលដែរ ដោយទ្រង់ពន្យល់ថា គេមិនត្រូវសម្លាប់មនុស្សដែលបានសម្លាប់គេនោះទេព្រោះវានឹងធ្វើឱ្យមានមរណភាពមួយថែមទៀត ។
ក្រោយមក មានច្បាប់មួយទៀតបានកែច្បាប់ព្រះជ័យជេដ្ឋា ដោយប្រែដាក់ឱ្យមានទោសប្រហារជីវិតឡើងវិញ ។ ច្បាប់នោះរៀបរៀងឡើងនៅក្នុងឆ្នាំ១៦៦០ ។ ខ្ញុំជឿថាច្បាប់ឆ្នាំ១៦២១មិនត្រូវបានគេគោរពតាមប៉ុន្មានទេ បើយ៉ាងហោចណាស់ក៏ក្នុងការអនុវត្ដដែរ ។ ជាក់ស្ដែងគឺមានរឿងរ៉ាវទាក់ទងទៅនឹងសម្ដេចព្រះទាវក្សត្រី ដែលមានលើកឡើងនៅក្នុងច្បាប់ទំនៀមពីបុរាណ ក្នុងនោះមាននិយាយអំពីករណីមនុស្សជាច្រើនដែលត្រូវប្រហារជីវិតដោយកាត់ក្បាល (42) ។
ទោះជាយ៉ាងណាក្ដី ប្រហែលជា៧០ឆ្នាំក្រោយមក គឺនៅក្នុងឆ្នាំ១៦៩០ ព្រះជ័យជេដ្ឋាដែលយើងកំពុងតែសិក្សានេះ ទ្រង់បានបញ្ជាឱ្យគេពិនិត្យច្បាប់ឆ្នាំ១៦២១ទាំង១២ច្បាប់ឡើងវិញ រួចបានប្រទាននាមឱ្យថា «ច្បាប់ព្រះជ័យជេដ្ឋា» ប៉ុន្ដែឱ្យដាក់កាលបរិច្ឆេទត្រឹមឆ្នាំ១៦៧៥ ជាឆ្នាំដែលព្រះអង្គឡើងសោយរាជ្យ ។
នៅក្នុងឆ្នាំ១៦៨១គឺ១ឆ្នាំបន្ទាប់ពីច្បាប់ទាំងឡាយបានត្រូវប្រកាសឱ្យប្រើរួចហើយ ព្រះឧភយោរាជអង្គនន់ បានយាងត្រលប់ចូលមកក្នុងស្រុកខ្មែរវិញ ហើយក៏សុគតទៅនៅស្រីសន្ធរ ។ ពេលនោះព្រះអង្គមានព្រះជន្ម៣៧ព្រះវស្សា និងកាន់អំណាចបាន១ឆ្នាំ ហើយការបះបោររបស់ព្រះអង្គមានរយៈពេលពី១៥ទៅ១៦ឆ្នាំ ។ ពេលនោះ ព្រះរាជាទ្រង់គង់នៅឯបឹងក្បិន ។ មិនយូរប៉ុន្មានក្រោយមក ទ្រង់បានយាងត្រលប់មកគង់នៅឯឧត្ដុង្គវិញ ។
រាជពង្សាវតារបានរៀបរាប់ថា នៅក្នុងឆ្នាំ១៦៩២ ព្រះរាជវង្សានុវង្សរបស់ព្រះរាជានគរចាម្ប៉ាបាននាំគ្នាយាងមកដល់ព្រះរាជាណាចក្រកម្ពុជា ដោយមានទាំងសេនាហែហម៥ពាន់នាក់មកជាមួយផង ដើម្បីសុំជ្រកកោនជាមួយព្រះរាជាកម្ពុជា ។ ព្រះជ័យជេដ្ឋា បានប្រទានដីធ្លី និងអនុញ្ញាតឱ្យពួកនោះរស់នៅជិតលង្វែក ។
មួយឆ្នាំបន្ទាប់មកទៀត ច្បាប់អយ្យកោទាក់ទិនទៅនឹងស្ថានសម្រាលទោសបានត្រូវប្រកាសឱ្យប្រើ ។ ហើយច្បាប់មន្ទីររដ្ឋបាល គឺច្បាប់ទាក់ទងនឹង «កងរក្សាព្រះអង្គ» ដែលមិនមែនជាច្បាប់យើងមានសព្វថ្ងៃ តែជាច្បាប់មួយចាស់ជាង ដែលគេបានធ្វើវិសោធនកម្មជាច្បាប់ថ្មីនេះ ក៏ត្រូវបានប្រកាសឱ្យប្រើផងដែរ ។ តាមច្បាប់នេះ អ្នកស្រុកមិនត្រូវចងត្រដោកគោទេនៅពេលបររទេះកាត់រាជធានី មិនត្រូវបាំងឆត្រពេលជិះរទេះ មិនត្រូវក្រៀវគោ មិនត្រូវកាប់សម្លាប់គោយកសាច់បរិភោគទេ រទេះក៏មិនឱ្យលាបពណ៌ឆើតៗចន្ទោល រទេះមិនឱ្យដាក់ចង្កំពណ៌មាសដែរ ។
បីឆ្នាំម្ដងអ្នកស្រុកត្រូវបង់ពន្ធរទេះ និងគោចំនួនស្មើនឹង១ភាគ១០ ហើយព្រះរាជាបានសម្រេចថាគោណាដែលមានសម្បុរពព្រុសដូចរោមលលកត្រូវដកហូតទុកជាព្រះរាជទ្រព្យ ។
នៅក្នុងឆ្នាំ១៦៩៥ ព្រះរាជាដែលមានព្រះជន្ម៣០ព្រះវស្សា ហើយសោយរាជ្យសម្បត្ដិតាំងពីទ្រង់មានព្រះជន្ម២០ព្រះវស្សាម្ល៉េះ បានដាក់រាជថ្វាយដល់ព្រះភាគិនេយ្យ ព្រះឧទ័យ ដែលមានព្រះជន្ម២២ព្រះវស្សា (43) ។
១៩. ព្រះនរាយរាមាធិបតី-ព្រះឧទ័យ ចៅពញាយ៉ង (១៦៩៥-១៦៩៦)
ព្រះរាជាអង្គនេះទ្រង់បានទទួលការអភិសេកនៅក្នុងឆ្នាំ១៦៩៥ ក្នុងព្រះជន្ម២៣ព្រះវស្សា ក្រោមព្រះនាមថា «ព្រះបាទសម្ដេចស្ដេចព្រះរាជឱង្ការព្រះនរាយរាមាធិបតីព្រះឧទ័យរាជាបរមបពិត្រ» ។ ព្រះអង្គបានយកព្រះមាតុច្ឆាជាបុត្រីរបស់ព្រះបាទសម្ដេចព្រះបរមរាជាធិរាជជាអគ្គមហេសី ។ទ្រង់សោយរាជ្យបាន១០ខែរួចក៏សុគតទៅក្នុងឆ្នាំ១៦៩៦ ។
២០. ព្រះជ័យជេដ្ឋា-រជ្ជកាលទី៣ (១៦៩៦-១៦៩៩)
ព្រះបាទជ័យជេដ្ឋាក្រោយពីបានសាងព្រះផ្នួសជាលើកទី៣អស់រយៈកាល៥ថ្ងៃរួចហើយ ក៏លាចាកសិក្ខាបទ ហើយមកទទួលយកព្រះអគ្គមហេសី រៀបចំព្រះរាជពិធីអភិសេកឡើងគង់លើរាជសម្បត្ដិជាលើកទី២ ដោយមានព្រះនាមខុសពីមុនបន្ដិចបន្ដួច ។
នៅឆ្នាំ១៦៩៩ មានមន្ដ្រីម្នាក់ឈ្មោះថា ឧកញ៉ានរិន្ទឯម ត្រូវជាកូនលោកពញាសេនា ម៉េង បានលើកគម្រោងផែនការក្បត់ មិនមែនគ្រាន់តែដើម្បីទម្លាក់ព្រះរាជាពីរាជបល្ល័ង្កប៉ុណ្ណោះទេគឺប៉ុនប៉ងគាស់រំលើងរាជវង្សទាំងមូលតែម្ដង ។ ជនក្បត់នេះបានធ្វើដំណើរទៅកាន់កូសាំងស៊ីន សុំបានទ័ពអាណ្ណាម២ម៉ឺននាក់ ក៏រៀបចំជា២កង ធ្វើដំណើរឡើងមកតាមដៃទន្លេទាំង២ ។ ព្រះរាជាជ័យជេដ្ឋា ត្រូវបង្ខំព្រះទ័យរត់គេចព្រះអង្គទៅគង់នៅឯខែត្រពោធិ៍សាត់ ដើម្បីកេណ្ឌទ័ព ។ ទ័ពអាណ្ណាមរបស់ឧកញ៉ានរិន្ទឯមបានរៀបចំដេញតាមព្រះរាជា ដែលធ្វើដំណើរយឺតៗមកដល់កំពង់ឆ្នាំង ក៏តាំងដុតបំផ្លាញខ្ទេចខ្ទី ។
ពេលនោះព្រះស្រីធម្មោរាជាជាព្រះរាជបុត្រារបស់ព្រះរាជា និងអ្នកអង្គម្ចាស់ឯមត្រូវជារាជបុត្រារបស់អតីតព្រះឧភយោរាជក្បត់ ដែលទើបតែត្រលប់មកពីអាណ្ណាមពីឆ្នាំមុន បានដឹកនាំទ័ពមួយកងម្នាក់ចេញពីខែត្រពោធិ៍សាត់មកមួយកងមកតាមផ្លូវគោក មួយកងទៀតចុះតាមទន្លេសាបមកចោមវាយទៅលើទ័ពអាណ្ណាមធ្វើឱ្យពួកនោះរត់ចោលឧកញ៉ានរិន្ទឯមដកថយទៅខាងត្បូងសាយហ្គនដល់ខែត្របៀនវ៉ា និងបារាជដែលស្ដេចកូសាំងស៊ីនទើបតែប្រគល់ថ្វាយមកឱ្យព្រះរាជាកម្ពុជាវិញ ។ មុននេះខែត្រទាំង២ស្ថិតនៅក្នុងការគ្រប់គ្រងរបស់ពួកអាណ្ណាម ។
គេអាចនឹងចោទសំណួរបានថាតើព្រះឧភយោរាជអង្គនន់ឬដែលសុគតទៅនៅក្នុងឆ្នាំ១៦៩១ ជាអ្នកបានប្រគល់ខែត្រទាំង២នេះទៅថ្វាយស្ដេចអាណ្ណាម ឬមួយក៏ឧកញ៉ានរិន្ទឯមទេដែលជាអ្នកប្រគល់ខែត្រទាំង២នេះជាថ្នូរនឹងកងទ័ពដែលខ្លួនបានសុំ ។ មានឯកសារខ្លះបាននិយាយថែមទៀតថា ដើម្បីទប់ទល់កុំឱ្យទាហានរត់ចោលកងទ័ព ស្ដេចអាណ្ណាមបានអនុញ្ញាតឱ្យឧត្ដមសេនីយ៍របស់ព្រះអង្គនៅគ្រប់គ្រងខែត្រទាំង២ឱ្យបាន ។ ក៏ប៉ុន្ដែអ្វីដែលប្រាកដនោះ គឺថាកងទ័ពអាណ្ណាមបានសម្លាប់ឧកញ៉ានរិន្ទឯមចោលមុនពេលដែលកងទ័ពនេះចាប់បន្ដដំណើរមកភាគខាងត្បូងបន្ដិច ។
នៅឆ្នាំបន្ទាប់ ទឹកដីខែត្រទាំង២នោះក៏ត្រូវគេបែងចែកជាស្រុកខណ្ឌតូចៗ គ្រប់គ្រងដោយនាម៉ឺនអាណ្ណាមចំណុះឱ្យឧត្ដមសេនីយ៍ដែលដឹកនាំទ័ពមកជួយឧកញ៉ានរិន្ទឯមនោះឯង ។ ពួកឧត្ដមសេនីយ៍ទាំងនោះនៅនឹងបន្ទាយសាយហ្គន ហើយមានអំណាចទាំងខាងស៊ីវិល ទាំងខាងកងទ័ព ។ ទឹកដីខែត្រទាំង២នេះបានក្លាយទៅជារបស់អាណ្ណាមចាប់តាំងតែពីពេលនោះរហូតមក ។
នៅដំណាច់ឆ្នាំ ក្រោយពីទ្រង់សោយរាជ្យជាលើកទី៣បាន៤ឆ្នាំ ព្រះរាជាជ័យជេដ្ឋាបានដាក់រាជសម្បត្ដិថ្វាយអ្នកអង្គម្ចាស់ឯម ដែលព្រះអង្គបានលើកឱ្យឡើងជាព្រះកែវហ្វ៊ាតាំងតែពីពេលត្រលប់ពីអាណ្ណាមមកវិញ ហើយដែលព្រះអង្គបានរៀបអភិសេកបុត្រីរបស់ព្រះអង្គមួយអង្គថ្វាយ ពីព្រោះថាព្រះកែវហ្វ៊ា បានបង្ហាញឱ្យឃើញថ្វីដៃរួចមកហើយក្នុងការប្រយុទ្ធជាមួយទ័ពអាណ្ណាមរបស់ឧកញ៉ានរិន្ទឯម ។
២១. ព្រះកែវហ្វ៊ាបរមបពិត្រអង្គឯម (១៧០០-១៧០១)
អ្នកអង្គម្ចាស់ឯមពេលនោះទ្រង់មានព្រះជន្ម២៥-២៦ព្រះវស្សាហើយ។ ព្រះអង្គត្រូវជាបុត្រារបស់ព្រះឧភយោរាជអង្គនន់ជាមួយស្រីចិនម្នាក់ ។ ព្រះអង្គត្រូវបានលើកឱ្យឡើងជាព្រះបាទសម្ដេចព្រះកែវហ្វ៊ាបរមបពិត្រនៅក្នុងគ្រិស្ដសករាជ១៧០០ ត្រូវនឹងមហាសករាជ១៦២២ ចុល្លសករាជ១០៦២ ។ ព្រះអង្គបានយាងទៅគង់នៅឯខែត្រពោធិ៍សាត់ ។
ចំណែកឯព្រះរាជាដាក់រាជ្យវិញ បានចំណាយពេលវេលារបស់ព្រះអង្គត្រួតពិនិត្យការជួសជុលវត្ដព្រះពោធិមានបុណ្យដែលព្រះចន្ទរាជាបានឱ្យកសាងឡើងកាលពីឆ្នាំ១៥៣៤ក្រោយពីទ្រង់មានជ័យជម្នះលើពួកសៀម ។ ទ្រង់បានចំណាយព្រះរាជទ្រព្យផ្ទាល់នៅក្នុងការជួសជុលនេះ ។ នៅពេលដែលការជួសជុលនេះចប់សព្វគ្រប់រួចហើយ ព្រះអង្គទ្រង់បានយាងចូលសាងព្រះផ្នួសម្ដងទៀត ក៏ប៉ុន្ដែបានតែ៣ថ្ងៃ ព្រះអង្គក៏លះបង់សិក្ខាបទ មកទទួលយករាជសម្បត្ដិវិញជាលើកទី៤ រាជពង្សាវតារនិយាយថា តាមសំណូមពររបស់ព្រះកែវហ្វ៊ា ជាហេតុបង្ហាញឱ្យឃើញថា ទ្រង់ជាស្ដេចដ៏មានអំណាចពិតប្រាកដមែន ។
២២. ព្រះជ័យជេដ្ឋា-រជ្ជកាលទី៤ (១៧០១-១៧០២)
ព្រះបាទជ័យជេដ្ឋា បានឡើងសោយរាជ្យជាលើកទី៤ នៅក្នុងព្រះជន្មាយុ៤៥ព្រះវស្សា ។
ទើបឡើងគ្រងរាជបល្ល័ង្កមិនទាន់បានប៉ុន្មានផង ព្រះអង្គត្រូវប្រយុទ្ធប្រឈមមុខនឹងជនបះបោរម្នាក់ឈ្មោះថា ភីរែនគីម ជាកូនរបស់មន្ដ្រីព្រះរាជវាំងម្នាក់ ។ ជនក្បត់នេះដែលបានទទួលទ័ពជំនួយពីស្ដេចអាណ្ណាម ក៏ដឹកនាំឡើងតាមផ្លូវទឹករហូតមកដល់ត្រឹមឧត្ដុង្គ ។ ពេលទ័ពសត្រូវមកជិតដល់ហើយ ព្រះរាជាក៏នាំព្រះរាជវង្ស និងសេនា មន្ដ្រីទាំងអស់ គេចព្រះអង្គទៅគង់នៅឯខែត្រពោធិ៍សាត់ ។ ភីរែនគីមបានដឹកនាំទ័ពដេញតាម ក៏ប៉ុន្ដែព្រះរាជាទ្រង់មានឱកាសអាចកេណ្ឌបានទ័ពមួយកងតូចទាន់ ហើយបានបើកការវាយប្រហារបកមកលើទ័ពក្បត់វិញ វាយឱ្យពួកនេះបរាជ័យបែកបាក់គ្នាអស់ទៅ ឯភីរែនគីមត្រូវចាប់ខ្លួនបាន ។
ឆ្នាំបន្ទាប់មក ព្រះជ័យជេដ្ឋាបានដាក់រាជសម្បត្ដិម្ដងទៀតក៏ប៉ុន្ដែម្ដងនេះថ្វាយដល់ព្រះរាជបុត្រាច្បងព្រះនាមស្រីធម្មោរាជាដែលមានព្រះជន្ម១២ព្រះវស្សា ។ រួចហើយព្រះអង្គក៏យាងចូលសាងព្រះផ្នួសម្ដងទៀតចំនួន៣ថ្ងៃ ។
២៣. ព្រះធម្មោរាជាទី៤ (១៧០២-១៧០៤)
ដោយព្រះរាជាថ្មីមានព្រះជន្មតិចពេក គេក៏បង្អង់មិនទាន់រៀបចំព្រះរាជពិធីអភិសេកទេ ហើយព្រះបិតានៅបន្ដចាត់ចែងកិច្ចការព្រះរាជាណាចក្រហាក់បីដូចជាទ្រង់មិនដាក់រាជ្យនៅឡើយ ។
នៅក្នុងឆ្នាំបន្ទាប់ មានជនសំរែម្នាក់ ដែលទៅរស់នៅឯស្រុកកូឡា (ភូមា) អស់ពេលប៉ុន្មានឆ្នាំ បានត្រលប់មកវិញ ។ ពួកកុលសម្ព័ន្ធសំរែនេះធ្លាប់មានបុព្វបុរសឡើងធ្វើជាព្រះរាជាកម្ពុជាហើយបង្កើតបានជាសន្ដតិវង្សថ្មីមួយ គឺតាថី ឬតាត្រសក់ផ្អែម ។ ជនសំរែនោះហាក់ដូចជាមិនសូវជាទេ ក៏ប៉ុន្ដែគេមានលក្ខណៈសម្បត្ដិសមល្មមនឹងធ្វើឱ្យប្រជាជនជឿថាគេជាអ្នកមានបុណ្យ ដែលត្រូវមកសោយរាជ្យនៅកម្ពុជានេះ ។ មានប្រជាជនជាច្រើនជឿ ហើយដើរតាមធ្វើឱ្យស្រុកទេសជ្រួលច្របល់ជាខ្លាំង ។ នាម៉ឺនសព្វមុខមន្ដ្រី បានចាត់ទ័ពមួយកងឱ្យចុះមកចាប់ជនសំរែនេះ ក៏ប៉ុន្ដែជននោះបានគេចខ្លួនបាត់ទៅ ហើយព្រះរាជាណាចក្រក៏ត្រលប់មានសណ្ដាប់ធ្នាប់ល្អឡើងវិញ ។
នៅឆ្នាំ១៧០៣ ព្រះរាជធានីដែលផ្ទេរទៅតាំងនៅឯពោធិ៍សាត់តាំងពីឆ្នាំ១៦៩៩មក បានប្ដូរមកតាំងនៅនឹងឧត្ដុង្គវិញ ។
នៅឆ្នាំបន្ទាប់មកទៀត ព្រះស្រីធម្មោរាជាបានដាក់រាជសម្បត្ដិថ្វាយដល់ព្រះបិតាវិញ ក្រោយពីសោយរាជ្យបាន២ឆ្នាំ ។
២៤. ព្រះជ័យជេដ្ឋា-រជ្ជកាលទី៥ (១៧០៤-១៧០៦)
ព្រះជ័យជេដ្ឋាបានឡើងគ្រងរាជបល្ល័ង្កម្ដងទៀត ជាលើកទី៥ ។ ពេលនេះព្រះអង្គមានព្រះជន្ម៤៩ព្រះវស្សាហើយ ។ រាជពង្សាវតារមិនឃើញមាននិយាយថា តើព្រះអង្គឱ្យគេរៀបចំព្រះរាជពិធីអភិសេកថ្វាយដែរ ឬអត់ទេ ។
នៅពេលនោះគឺឆ្នាំ១៧០៥ មានព្រះរាជវង្សានុវង្សលាវជាមួយនឹងប្រជាជន៥ពាន់នាក់ ដែលត្រូវបណ្ដេញចេញពីរាជធានីវៀងចន្ទ បាននាំគ្នារត់មកសុំជ្រកកោន និងសុំដីរស់នៅនៅកម្ពុជា ។ រាជវង្សនេះសោយរាជសម្បត្ដិនៅលើរាជបល្ល័ង្កលាវជាច្រើនឆ្នាំមកហើយ មុនដំបូងសោយរាជ្យនៅហ្លួងប្រាបាង រួចមកនៅឯវៀងចន្ទ ។ ព្រះរាជាលាវដែលលោក ហ្សេរ៉ាវ៉ាន់ វូសូវ បានជួបនៅក្នុងឆ្នាំ១៦៤១ក្រោយពីទ្រង់សោយរាជ្យបាន៣ឆ្នាំហើយ ប៉ុន្ដែមិនបានឱ្យដឹងព្រះនាមទេ គឺព្រះអង្គម្ចាស់សុរិយា ព្រះនាមពេញគឺ ថាវសុរិយាវង្សធម្មិកៈរាជាបរមបពិត្រធិរាជ ។ ព្រះរាជាអង្គនេះបានសុគតទៅនៅក្នុងឆ្នាំ១៥៩៥ដោយបន្សល់ទុកនូវព្រះរាជនត្ដាដែលនៅតូចៗនៅឡើយ ។
មានមន្ដ្រីម្នាក់ក្នុងចំណោមមន្ដ្រីរបស់ព្រះអង្គបានរៀបអាពាហ៍ពិពាហ៍ជាមួយនាងគាម៉ង់ ជាបុត្រីមួយអង្គរបស់ព្រះរាជាសុរិយា បំបែកព្រះរាជនត្ដាតូចៗទាំងនោះចេញពីរាជបល្ល័ង្ក ហើយក៏ឡើងសោយរាជ្យខ្លួនឯង ។ ពេលនោះមានមន្ដ្រីម្នាក់ទៀត អាចជាព្រះឧភយោរាជ ឬក៏ជាពញាសែន បានងើបប្រឆាំង ឡើងវាយដណ្ដើមបានជ័យជម្នះ ហើយបង្ខំឱ្យមន្ដ្រីក្បត់នោះធ្វើអត្ដឃាត រួចក៏ឡើងសោយរាជ្យបន្ដមកទៀត ដោយមានព្រះនាមថា ភ្យានន់អធិរាជ ។
មានព្រះភាគិនេយ្យរបស់ព្រះរាជាសុរិយាមួយអង្គ ជាបុត្រារបស់ព្រះរៀមមួយអង្គទៀត ដែលភៀសព្រះអង្គទៅគង់នៅឯក្រុងវ៉េ បានវិលត្រលប់មកវិញជាមួយនឹងទ័ពមួយកង ហើយប្រកាសសង្គ្រាមជាមួយ ភ្យានន់ ។ ព្រះរាជាភ្យានន់អធិរាជ ដែលប្រហែលជារាជវង្សមួយអង្គរបស់ព្រះរាជាសុរិយាដែរ បានត្រូវសុគតនៅក្នុងការប្រយុទ្ធនោះ ហើយប្រាជ័យអុងវ៉េ ដែលទទួលបានជ័យជម្នះ ក៏ឡើងសោយរាជ្យនៅវៀងចន្ទ រីឯថាវ (ឬចៅ) នង ដែលជាអនុជមួយអង្គ ក៏យាងទៅសោយរាជ្យនៅហ្លួងប្រាបាង ។ ដល់មកឆ្នាំ១៦០៥ មានបុត្រាមួយអង្គរបស់ព្រះរាជាសុរិយា បានមកដេញថាវនងចេញ ហើយឡើងសោយរាជ្យនៅហ្លួងប្រាបាងនោះទៅ ។ ចាប់ពីពេលនោះមក ប្រទេសលាវដែលមានឯកភាពអស់កាលជាយូរណាស់មកហើយ ក៏ត្រូវបែងចែកជារាជាណាចក្រពីរ ដែលមានព្រះរាជាជាបងប្អូនជីដូនមួយនឹងគ្នា គឺជាព្រះភាគិនេយ្យ និងជាបុត្រារបស់ព្រះសុរិយាទាំងអស់គ្នា ហើយត្រូវជាបច្ឆាញាតិរបស់ព្រះរាជាហ្វាងោម ។ តាមមើលទៅ គឺរាជវង្សរបស់ព្រះឧបរាជភ្យាណាកន ដែលបានរត់គេចមកសុំជ្រកកោននៅកម្ពុជា ។
នៅក្នុងឆ្នាំ១៧០៦ ព្រះរាជាជ័យជេដ្ឋា ដែលនឿយណាយនឹងអំណាចក្រោយពីសោយរាជ្យបាន២ឆ្នាំ ក៏ដាក់រាជសម្បត្ដិម្ដងទៀតជាលើកទី៥ ថ្វាយដល់ព្រះស្រីធម្មោរាជាជាព្រះរាជបុត្រា ដែលទ្រង់បានលើកឱ្យសោយរាជ្យម្ដងរួចមកហើយ នៅក្នុងឆ្នាំ១៧០២ តែបានដាក់រាជ្យថ្វាយព្រះបិតាវិញនៅក្នុងឆ្នាំ១៧០៤ ។
២៥. ព្រះធម្មោរាជាទី៤-រជ្ជកាលទី២ (១៧០៦-១៧១០)
ព្រះរាជាអង្គនេះមិនបានទទួលព្រះរាជពិធីអភិសេកទេកាលពីទ្រង់សោយរាជ្យលើកមុន ព្រោះនៅក្មេងពេក គឺទើបតែមានព្រះជន្មាយុ១២ព្រះវស្សាប៉ុណ្ណោះ ។ ទ្រង់បានដាក់រាជសម្បត្ដិនៅក្នុងឆ្នាំ១៧០៤ ។ នៅពេលដែលព្រះអង្គឡើងគ្រងរាជបល្ល័ង្កសាជាថ្មីនេះ ទ្រង់មានព្រះជន្ម១៧ព្រះវស្សាហើយ ហើយបានត្រូវអភិសេកក្រោមព្រះនាមថា «ព្រះស្រីធម្មោរាជាធិរាជរាមាធិបតីបរមបពិត្រ» ជាព្រះរាជាស្នង ឯព្រះបិតារបស់ព្រះអង្គវិញ បានទទួលយកព្រះឋានៈជាព្រះឧភយោរាជ គឺជាឋានៈដែលគេតែងតែប្រគល់ថ្វាយដល់ព្រះរាជា ដែលមិនចង់ទទួលយករាជសម្បត្ដិ ឬក៏ត្រូវគេបំបែកពីរាជសម្បត្ដិ ។
និយាយពីពួកលាវដែលនាំគ្នាមកកម្ពុជាតាមស្ដេចរបស់ខ្លួនវិញ បានត្រូវព្រះរាជាអនុញ្ញាតឱ្យទៅរស់នៅក្នុងខែត្របាទីជាមួយពួកលាវមួយក្រុមមុនដែលកាលពីឆ្នាំ១៥៦១ក្រុមនេះគេឱ្យនៅឯបារាយណ៍ តែបន្ទាប់មក បានឱ្យមករស់នៅទីនេះដែរក្រោយពីមានបះបោរម្ដងរួចមក ។ ភូមិដែលពួកលាវនេះរស់នៅ គេដាក់ឈ្មោះឱ្យថា ភូមិបារាយណ៍ក្បាតជុំ មានន័យថាភូមិពួកអ្នកបះបោរនៅបារាយណ៍ ។ ដោយមានការជួយគាំទ្រពីបណ្ដាជនរួមជាតិគេ ពួកអ្នកមកដល់ថ្មីបានបង្កការលំបាកដល់អាជ្ញាធរមូលដ្ឋានម្ដងនៅក្នុងឆ្នាំ១៧០៨ ។ ព្រះរាជាបានចាត់ឱ្យមន្ដ្រី២នាក់មកនាំពួកនេះទៅរស់នៅឯកោះរាពណ៍វិញ តែពួកនេះមិនព្រម ហើយក៏ប្រមែប្រមូលគ្នាបះបោរជាចំហឡើង ។ ព្រះរាជាក៏ចាត់ឱ្យកងទ័ពចេញមកបង្ក្រាប ជាហេតុធ្វើឱ្យពួកលាវនេះបំបែកគ្នាជា៣កង គឺកងទី១រត់ចូលព្រៃ កងទី២រត់ទៅកូសាំងស៊ីន រីឯកងទី៣រត់ទៅរកព្រះកែវហ្វ៊ាអង្គឯម ដែលត្រូវជាព្រះភាគិនេយ្យរបស់ព្រះជ័ជេដ្ឋាផង និងត្រូវជាបុត្រសុណិសាព្រះអង្គផង ។ ព្រះកែវហ្វ៊ានេះបានដកព្រះកាយឆ្ងាយពីរាជវាំងប្រកបទៅដោយចរិតប្រឆាំង តាំងតែពីពេលដែលទ្រង់បានដាក់រាជសម្បត្ដិថ្វាយព្រះបិតាក្មេកវិញ នៅក្នុងឆ្នាំ១៧០១ ។ គេបារម្ភព្រះកែវហ្វ៊ានេះធ្វើតម្រាប់តាមព្រះបិតាព្រះអង្គដែរ គឺព្រះឧភយោរាជអង្គនន់ ។
តាមពិតទៅព្រះកែវហ្វ៊ាទ្រង់រង់ចាំតែឱកាសនឹងចាប់កាន់អាវុធប្រឆាំងប៉ុណ្ណោះ ។ ព្រឹត្ដិការណ៍បះបោររបស់ពួកលាវនេះជាឱកាសល្អហើយ ទ្រង់ក៏ប្រកាសខ្លួនព្រះអង្គជាអ្នកការពារពួកនោះហើយបានហៅមេធំរបស់ពួកគេឈ្មោះ សុកុណាបាទ ឱ្យត្រលប់មកពីកូសាំងស៊ីនមកវិញ ។ សុកុណាបាទត្រលប់កម្ពុជាជាមួយនឹងទ័ពអាណ្ណាម២ម៉ឺននាក់ដែលគេបានកេណ្ឌជាមួយអាជ្ញាធរមូលដ្ឋានដែលរួមគំនិតជាមួយព្រះកែវហ្វ៊ា ។ ក្នុងពេលជាមួយគ្នានោះ ព្រះកែវហ្វ៊ា កេណ្ឌបានទ័ពកួយ និងសំរែ១ម៉ឺននាក់ដែរ ។ ព្រះកែវហ្វ៊ាដឹកនាំទ័ពធ្វើដំណើរឆ្ពោះទៅកាន់រាជធានីឧត្ដុង្គ រីឯសុកុណាបាទចាប់វាយយកអាណាខែត្រខាងកើត ។ ទ័ពទាំង២ធ្វើសកម្មភាពលឿនរហ័សណាស់ ទាល់តែព្រះរាជា និងព្រះអនុជអង្គទងដែលមានព្រះជន្ម១៨ព្រះវស្សាហើយត្រូវព័ទ្ធជាប់នៅក្នុងបន្ទាយឧត្ដុង្គ ។ ព្រះរាជាទប់ទល់ជាមួយទ័ពសត្រូវអស់ពេល៣ខែ ទ្រាំលែងបានទើបទ្រង់វាយបើកខ្សែត្រៀមរត់គេចចេញនាពេលយប់មួយសំដៅទៅស្រុកសៀម ដោយនាំយកព្រះរាជបុត្រារបស់ព្រះរាជាមួយអង្គ ដែលប្រសូតនៅក្នុងឆ្នាំ១៧០៦ ទៅជាមួយផង ។
២៦. ព្រះកែវហ្វ៊ាអង្គឯម-រជ្ជកាលទី២ (១៧១០-១៧២២)
ព្រះកែវហ្វ៊ាអង្គឯម បានសោយរាជ្យម្ដងនៅក្នុងឆ្នាំ១៧០០ ។ ក្រោយពីបានបណ្ដេញព្រះរាជាស្នងឱ្យរត់គេចព្រះអង្គទៅស្រុកសៀមរួចមក ទ្រង់ក៏ចាប់កាន់កិច្ចការព្រះរាជាណាចក្រ ប៉ុន្ដែមិនទាន់ហ៊ានឱ្យគេអភិសេកព្រះអង្គជាស្ដេចនៅឡើយទេ ។ ព្រះអង្គរង់ចាំអស់ពេល៤ឆ្នាំ គឺរហូតដល់មកឆ្នាំ១៧០៤ ទើបត្រូវបានអភិសេកឱ្យឡើងគ្រងរាជបល្ល័ង្កក្រោមព្រះនាមថា «ព្រះបាទសម្ដេចព្រះកែវហ្វ៊ាបរមបពិត្រ» ដែលទ្រង់ធ្លាប់បានទទួលរួចមក ហើយនៅក្នុងឆ្នាំ១៧០០-១៧០១ ។ ពេលនោះព្រះអង្គមានព្រះជន្ម៣៤ព្រះវស្សាហើយ ។
នៅឆ្នាំបន្ទាប់មក ស្ដេចស្រុកសៀមបានបញ្ជូនទ័ព១ម៉ឺន៥ពាន់នាក់ជាមួយនឹងរាជទូតផងមកកាន់ស្រុកខ្មែរ ដើម្បីសុំឱ្យព្រះកែវហ្វ៊ាជ្រែករាជ្យលះបង់រាជបល្ល័ង្កថ្វាយទៅព្រះស្រីធម្មោរាជាវិញ ។ អតីតព្រះរាជានេះ បានឈប់សំចតនៅក្នុងខែត្របាត់ដំបង ជាមួយនឹងព្រះអនុជអង្គទង និងព្រះបុត្រាអង្គឯម ជាមួយនឹងកងទ័ព ដែលបញ្ជាដោយចៅពញាពលទេព និងចៅពញារាជាសោភាវតី ។ ព្រះរាជាថ្មីកែវហ្វ៊ាអង្គឯមបដិសេធមិន យល់ព្រមទទួលយកសំណើខុសពីធម្មតានេះទេ ហើយក៏មិនព្រមអនុញ្ញាតឱ្យក្សត្រាទាំង៣អង្គស្នាក់នៅក្នុងព្រះរាជាណាចក្រដែរ ព្រោះវត្ដមានរបស់ក្សត្រទាំង៣អង្គអាចនាំឱ្យមានភាពល្អក់កករបាន ។
នៅក្នុងឆ្នាំ១៧១៥ នៅពេលដែលព្រះជ័យជេដ្ឋាឧភយោរាជយាងសាងព្រះផ្នួសជាលើកទី៥ ចំនួនមួយសបា្ដហ៍ ព្រះកែវហ្វ៊ាអង្គឯមបានដាក់រាជសម្បត្ដិថ្វាយព្រះអគ្គមហេសី ជាបុត្រីដែលព្រះជ័យជេដ្ឋាបានលើកថ្វាយ ព្រះអង្គកាលពីពេលដែលទ្រង់យាងត្រលប់ពីអាណ្ណាមមកវិញ ក្រោមព្រះនាមថា ព្រះមហាក្សត្រី រួចទ្រង់ក៏យាងចូលសាងព្រះផ្នួស ។ សាងផ្នួសបាន៣ថ្ងៃ ព្រះកែវហ្វ៊ាអង្គឯមក៏លាចាកសិក្ខាបទ រួចចាប់កាន់អំណាចឡើងវិញ ។
នៅចុងឆ្នាំ១៧១៦ ព្រះអង្គទង ជាព្រះអនុជរបស់ព្រះរាជាស្រីធម្មោរាជាដែលធ្លាក់ពីរាជសម្បត្ដិ បានចេញមុខដឹកនាំអ្នកស្រុកពោធិ៍សាត់ដែលបះបោរឡើងប្រឆាំងនឹងព្រះរាជាព្រះកែវហ្វ៊ា ។ ព្រះកែវហ្វ៊ា ពេលនោះគ្មានកងទ័ពទេ ណាមួយប្រជានុរាស្ដ្រក៏មិនពេញចិត្ដនឹងព្រះអង្គផងដែរ ព្រោះទ្រង់ចូលចិត្ដតែការសប្បាយ ។ បើទោះជាថាប្រទេសកម្ពុជានាសម័យនោះមិនទាន់ធ្លាក់ចុះឱនខ្សោយដូចសព្វថ្ងៃក៏ដោយ ក៏ប៉ុន្ដែគេមិនអាចធ្វើឱ្យប្រជារាស្ដ្រដើរតាមទាំងមិនសប្បាយចិត្ដបានដែរ ។ ម្ល៉ោះហើយ ដោយដឹងច្បាស់ថា ប្រជារាស្ដ្រមិនគាំទ្រព្រះអង្គ ព្រះកែវហ្វ៊ា មិនបានរៀបចំកេណ្ឌទ័ពក្នុងចំណោមប្រជារាស្ដ្រខ្មែរទេ ទ្រង់បែរទៅរកពួកអាណ្ណាម ដែលជាឈ្លើយសឹកនៅក្នុងកម្ពុជាវិញ ។ ទ័ពអាណ្ណាមនេះក្រោយពីបានទទួលការរៀបចំរួចហើយក៏ចេញទៅវាយប្រយុទ្ធប្រឆាំងនឹងព្រះអង្គទង ធ្វើឱ្យព្រះអង្គរងរបួសនៅក្នុងសមរភូមិដំបូង ហើយបង្ខំឱ្យព្រះអង្គវាយដកថយទៅក្រោយវិញ ។ ពួកអ្នកស្រុកពោធិ៍សាត់ដែលអស់សង្ឃឹមក៏បំបែកគ្នា វិលត្រលប់ទៅស្រុកភូមិវិញអស់ដែរ ។
ព្រះអង្គទង ថ្វីបើត្រូវរងរបួស ប៉ុន្ដែព្រះអង្គមិនអស់សង្ឃឹមទេ ។ ទ្រង់បានភៀសព្រះកាយទៅគង់នៅឯឫស្សីសាញ់ ដើម្បីព្យាបាលរបួស ។ ដល់មកឆ្នាំ១៧២២ ស្ដេចសៀមបានឱ្យទ័ព១ម៉ឺននាក់ជូនដំណើរព្រះស្រីធម្មោរាជា យាងឆ្លងកាត់ព្រំដែនចូលមកកម្ពុជាតាមជើងគោកជាមួយនឹងព្រះបុត្រាអង្គឯម និងទ័ព៥ពាន់នាក់ទៀត ឡើងសំពៅតាមជើងទឹកមកចុះនៅពាម (ហាទៀង) ។ ព្រះអង្គទងបានយាងកាត់ទៅរកទ័ពជើងគោករបស់ព្រះរៀមនៅទីនោះ ។
ពាម ឬហាទៀង ដែលជាទីប្រជុំជនរបស់ខែត្រខម ឬមឿងខម ពេលនោះស្ថិតនៅក្រោមការត្រួតត្រាអស់ពេលប៉ុន្មានឆ្នាំរួចមកហើយដោយមេចោរសមុទ្រជាតិចិនម្នាក់ ដែលជាអតីតបក្សពួករបស់សន្ដតិវង្សមិញ ។ ចិននោះមានឈ្មោះថា ម៉ាក់គូ (44) កាលនៅឯភ្នំពេញធ្វើជាមេបនល្បែងស៊ីសង ។ នៅពេលក្លាយជាអ្នកមាន ចិននេះកើតគំនិតចង់ធ្វើឱ្យជីវិតខ្លួនកាន់តែប្រសើរ និងថ្កុំថ្កើងឡើង ក៏ទៅតាំងទីលំនៅឯពាម ប្រមែប្រមូលពួកចោរសមុទ្រ ចិន និងអាណ្ណាមជាច្រើននាក់ ព្រមទាំងពួកអាវាសែផ្សេងៗដែលរង់ចាំតែពេលបម្រើចៅហ្វាយខ្លាំងពូកែម្នាក់ ឱ្យមករស់នៅជាមួយខ្លួន ។ ម៉ាក់គូបានដណ្ដើមយកទីប្រជុំជនធំៗចំនួន៧ដាក់មកក្នុងអំណាចរបស់ខ្លួន ៖ ទី១គឺ ពាម (45) ដែលក្រោយមកមានឈ្មោះថា ហាទៀង កោះភូកុក ដែលខ្មែរហៅថា កោះត្រល់ ស្រែលួងកៃ ដែលខ្មែរហៅថា ស្រែអំបិល នៅក្នុងខែត្រកំពង់សោម វឿងធំ (កំពង់សោម) ក្រមួនស កានវត (កំពត) និងកាម៉ៅ នៅភាគខាងត្បូង ដែលកាលពីមុនមានមានឈ្មោះថា ទឹកខ្មៅ ។
ការប្រមូលបានទីប្រជុំជនទាំង៧ដាក់មកក្នុងអំណាចរបស់ខ្លួន មានន័យថាអតីតមេចោរសមុទ្រនេះបានបង្កើតបានក្សត្រប្រទេសមួយនៅលើទឹកដីកម្ពុជា ។ ដើម្បីធានាអនាគតរបស់ខ្លួន ម៉ាក់គូបានបញ្ជូនទូតទៅចូលគាល់ស្ដេចអាណ្ណាម ទូលថាទឹកដីអាណាខែត្រភាគអាគ្នេយ៍នេះខ្លួនសូមលើកថ្វាយស្ដេចអាណ្ណាម ហើយសុំការអនុញ្ញាតគ្រប់គ្រងជំនួស ។ ស្ដេចអាណ្ណាមបានចាត់តាំងលើកម៉ាក់គូជាអភិបាល ហើយជាឧត្ដមសេនីយ៍លើទឹកដីមាត់ឈូងសមុទ្រសៀមទាំងមូល (១៧១៥) បើទោះបីថាម៉ាក់គូនេះគ្មានសិទ្ធិអ្វីបន្ដិចបន្ដួចលើទឹកដីទាំងអស់នោះក៏ដោយ ព្រោះថា ទ័ពរបស់គេមិនដែលវាយដណ្ដើមបានម្ដងណាទេ ហើយក៏គ្មានការធ្វើសម្បទានឱ្យ ឬក៏មានការប្រទូសរ៉ាយអ្វីដែរ ។
គឺដោយបែបនេះហើយដែលម៉ាក់គូបានក្លាយខ្លួនទៅជាមន្ដ្រីដ៏មហិមាម្នាក់ តែក៏ជាមេចោរសមុទ្រដ៏សាហាវម្នាក់សម្រាប់រាជវាំងអាណ្ណាមក៏ដូចជារាជវាំងកម្ពុជាផងដែរ ។
នៅពេលដែលពួកសៀមចង់ដឹកនាំទ័ពមកចុះនៅហាទៀង ដើម្បីបន្ដដំណើរឡើងទៅវាយអ្នកអង្គឯម ពួកនេះបានមកជួបឧបសគ្គមួយគឺម៉ាក់គូនេះឯង ដែលគាំទ្រស្ដេចកំពុងសោយរាជ្យ ហើយបានកេណ្ឌទ័ពចេញពីពួកមនុស្សយង់ឃ្នងចម្រុះជាតិសាសន៍ ត្រៀមប្រយុទ្ធរួចជាស្រេច ។ ម៉ាក់គូបានវាយទ័ពជើងទឹកសៀម ដែលដឹកនាំដោយពញាកាសា និងតេជោឱ្យបរាជ័យស្ទើរតែទាំងស្រុង ។ តែទ័ពសៀមខាងជើងគោកទទួលបានលទ្ធផលល្អ អាចរុញច្រានទ័ពអាណ្ណាមរបស់ព្រះកែវហ្វ៊ាអង្គឯមឱ្យដកថយមកត្រឹមពោធិ៍សាត់ និងមកដល់ឧត្ដុង្គ ក្រោយពីច្បាំងគ្នាអស់ពេល១ឆ្នាំ ។
ដោយពិនិត្យឃើញថាមិនអាចបន្ដទ្រាំទ្របានទេ ព្រះកែវហ្វ៊ាអង្គឯមបានសាកសួរយោបល់សេនាមន្ដ្រីដែលតាមហែហម រួចក៏ចាត់បញ្ជូនរាជទូតឱ្យទៅចរចាជាមួយឧត្ដមសេនីយ៍សៀម ពញាចក្រី ថាព្រះអង្គយល់ព្រមដាក់កម្ពុជាជាចំណុះសៀម ហើយនឹងលើកសួយសារអាករជាផ្កាមាសផ្កាប្រាក់ទៅថ្វាយរៀងរាល់ឆ្នាំប្រសិនណាបើសៀមទុកឱ្យព្រះអង្គកាន់អំណាចដដែល ហើយនាំយកអ្នកអង្គម្ចាស់ខ្មែរដែលនៅជាមួយទ័ពសៀមទៅអយុធ្យាវិញ ជាពិសេស គឺអតីតព្រះរាជាខ្មែរដែលទ័ពសៀមចង់យកមកឱ្យសោយរាជ្យនៅកម្ពុជាវិញ ។
មេទ័ពសៀមបានយល់ព្រមតាមបណ្ដាល័ក្ខខ័ណ្ឌទាំងអស់នេះ ហើយក៏នាំទ័ពត្រលប់ទៅអយុធ្យាវិញ ដោយនាំយកអ្នកអង្គម្ចាស់ និងអតីតស្ដេចខ្មែរទៅផង ។
ប្រជារាស្ដ្រ និងនាម៉ឺនមួយចំនួនដែលមិនគាំទ្រព្រះកែវហ្វាមានការខឹងសម្បាជាខ្លាំង ហើយតាមការដំណាលតៗគ្នាមកបាននិយាយថា គេនាំគ្នាហៅព្រះកែវហ្វ៊ាអង្គឯមថាជាស្ដេចសៀម ។ ដោយទ្រាំនឹងពាក្យរអារអូមនេះមិនបាន ព្រះកែវហ្វ៊ាក៏ដាក់រាជសម្បត្ដិថ្វាយព្រះរាជបុត្ររបស់ព្រះអង្គគឺ អ្នកអង្គជ័យ ។ នៅពេលនោះព្រះអង្គមានព្រះជន្ម៤២ព្រះវស្សាហើយ ហើយទ្រង់សោយរាជ្យសម្បត្ដិបាន៦ឆ្នាំ ។
២៧. អ្នកអង្គជ័យ-ព្រះសត្ថា (១៧២២-១៧២៩)
អ្នកអង្គជ័យមានព្រះជន្មាយុ២០ព្រះវស្សាហើយ នៅពេលដែលទ្រង់ឡើងសោយរាជ្យ ។ ក្រោយពីព្រះបិតាដាក់រាជសម្បត្ដិថ្វាយបាន២ខែ ព្រះអង្គបានត្រូវអភិសេកនៅឧត្ដុង្គក្រោមព្រះនាមថា «ព្រះសត្ថា» និងមានព្រះឋានៈជាព្រះរាជាស្នង ។ ទ្រង់បានយកព្រះមាតុច្ឆាសម្ដេចព្រះស្រីសុជាតា បុត្រីរបស់ព្រះជ័យជេដ្ឋា ជាព្រះអគ្គមហេសី ។
រជ្ជកាលរបស់ព្រះអង្គ បានចាប់ផ្ដើមឡើងជាមួយនឹងការវាយពួកក្លឹង ឬពួកហិណ្ឌូរបស់នាងភាក់ ឱ្យបរាជ័យ ។
ក្នុងរជ្ជកាលនេះ ព្រះអយ្យកោជ័យជេដ្ឋា ដែលបានសោយរាជ្យ ហើយដាក់រាជ្យជាច្រើនលើកច្រើនគ្រាដើម្បីសាងព្រះផ្នួស មានព្រះជន្ម៦៥ព្រះវស្សា ហើយមានព្រះឋានៈជាព្រះឧភយោរាជ ។ ព្រះអង្គធ្លាក់ព្រះកាយប្រឈួន ហើយសុគតទៅនៅក្នុងឆ្នាំ១៧២៥ ។
នៅឆ្នាំ១៧២៩ មិនដឹងជានឿយណាយនឹងរាជកិច្ច ឬក៏ដោយមានការផ្ដល់យោបល់ពីព្រះបិតាព្រះកែវហ្វ៊ាអង្គឯម ព្រះសត្ថាបានដាក់រាជសម្បត្ដិថ្វាយព្រះបិតាវិញ ក្រោយពីគ្រងរាជបល្ល័ង្កបាន៨ឆ្នាំ ។
២៨. ព្រះកែវហ្វ៊ាបរមបពិត្រ-កែវហ្វ៊ាអង្គឯម រជ្ជកាលទី២ (១៧២៩-១៧៣០)
ព្រះកែវហ្វ៊ាអង្គឯមបានសោយរាជ្យសម្បត្ដិឡើងវិញ ហើយបានទទួលព្រះរាជាភិសេកក្រោមព្រះនាមថា «សម្ដេចស្ដេចព្រះរាជឱង្ការព្រះជ័យជេដ្ឋាធិរាជរាមាសូរកំពូលលោកិយ៍ត្រៃភាវនា» ។ ប៉ុន្ដែ បានតែ៧ខែ ប្រជារាស្ដ្រក៏បះបោរប្រឆាំងនឹងព្រះអង្គ ធ្វើឱ្យព្រះអង្គដាក់រាជសម្បត្ដិថ្វាយព្រះរាជបុត្រព្រះសត្ថាម្ដងទៀត ។
២៩. ព្រះអង្គជ័យ ហៅ ព្រះសត្ថា រជ្ជកាលទី២ (១៧៣០-១៧៣៦)
ព្រះសត្ថា បានត្រូវអភិសេកជាលើកទី២នៅដើមឆ្នាំ១៧៣០ ក្រោមព្រះនាមថា «ព្រះបាទសម្ដេចស្ដេចព្រះរាជឱង្ការព្រះបរម្មោរាជាធិរាជរាមាធិបតី» ។ ពេលនោះទ្រង់មានព្រះជន្ម២៧ព្រះវស្សាហើយ ។ ព្រះបិតារបស់ព្រះអង្គដែលបានដាក់រាជសម្បត្ដិថ្វាយព្រះអង្គ បានទទួលព្រះឋានៈជាព្រះឧភយោរាជ ។
នៅក្នុងឆ្នាំបន្ទាប់ មានជនភៀសខ្លួនលាវម្នាក់ រស់នៅភូមិព្រះសូត្រក្នុងខែត្របាភ្នំ ដែលឡប់សតិ បានប្រកាសខ្លួនថា ជាអ្នកមានបុណ្យ ហើយទទួលភារកិច្ចឱ្យចុះមកសម្លាប់ផ្ដាច់ពូជពួកអាណ្ណាមចេញពីកម្ពុជា ។ មានប្រជាជនជាច្រើនជឿជាក់លើជននេះហើយដើរតាមនៅភាគខាងត្បូងនៃព្រះរាជាណាចក្ររហូតទៅដល់ភាគខាងម្ខាងទៀតនៃទល់ដែន ។ ពួកនេះបាននាំគ្នាឆ្លងចូលទៅក្នុងកូសាំងស៊ីន ហើយចាប់កាប់សម្លាប់រាល់ជនអាណ្ណាមណាដែលគេជួបប្រទះ ។ ពេលនោះឧត្ដមសេនីយ៍ដែលគ្រប់គ្រងនៅសាយហ្គនបានបញ្ជូនទ័ពមួយកងតូចឱ្យមកបង្ក្រាប ពួកនេះហើយដេញតាមរហូតដល់ឆ្លងផុតទល់ដែន ។ ពេលមកដល់ស្រុក ដោយមានជំនឿងប់ងុលលើជនលាវ ពួកនេះក៏ចាប់តាំងធ្វើការកាប់សម្លាប់ជាបន្ដទៀត ។ ព្រះរាជាបានចាត់ស្នងការព្រះរាជាណាចក្រឱ្យទៅបង្ក្រាប ហើយពួកនេះក៏បែកខ្ញែកគ្នាអស់ទៅ ។ ស្ដេចអាណ្ណាមនៅពេលដែលបានជ្រាបអំពីហេតុការណ៍កាប់សម្លាប់រង្គាលនេះ ក៏បញ្ជូនកងទ័ពមកវាយកម្ពុជា ដោយមិនបានគិតថា ព្រះរាជាកម្ពុជាបានធ្វើអន្ដរាគមន៍រួចទៅហើយទេ ។ ដោយមិនអាចទប់ទល់នឹងទ័ពអាណ្ណាមបាន ព្រះសត្ថាក៏ភៀសព្រះកាយទៅគង់នៅឯពាមត្រែង ក្នុងខែត្រសន្ទុក ។ ទ្រង់បានកេណ្ឌទ័ពប្រញិបប្រញាប់រួចដឹកនាំមកកាន់ភ្នំពេញជាទីកន្លែងដែលពួកអាណ្ណាមទើបធ្វើដំណើរមកដល់ ។ ព្រះអង្គបានវាយទ័ពអាណ្ណាមឱ្យបរាជ័យ រត់បែកខ្ញែកគ្នាត្រឡប់ទៅកូសាំងស៊ីនវិញ តាមដៃទន្លេទាំង២ ។
ទទួលបានព័ត៌មានស្ដីពីបរាជ័យនេះ ស្ដេចអាណ្ណាមបានចេញបញ្ជាឱ្យកេណ្ឌទ័ពមួយកងធំជាងមុន ចេញដំណើរមកវាយកម្ពុជាទៀត ។
នៅពេលដែលទ័ពអាណ្ណាមមកដល់ភ្នំពេញ ព្រះរាជាដែលទើបតែយាងត្រលប់ជាមួយរាជវង្សានុវង្សមកគង់នៅឧត្ដុង្គ បានភៀសព្រះអង្គម្ដងទៀត ទៅគង់នៅឯពាមក្របៅ ក្នុងខែត្រសន្ទុក ។ ទ្រង់ជ្រើសរើសទ័ពនៅទីនោះ រួចដឹកនាំមកវាយពួកអាណ្ណាម ធ្វើឱ្យពួកនេះបរាជ័យម្ដងទៀត ហើយបង្ខំឱ្យដកថយទៅខែត្រមីថ និងវិញឡុងអស់ទៅ ។ ខែត្រទាំង២នេះជាទឹកដីរបស់កម្ពុជាទេ ក៏ប៉ុន្ដែពួកអាណ្ណាមកាន់កាប់ ហើយដាក់បញ្ចូលជាផ្លូវការជាមួយខែត្រ៣ទៀតដែលគេវាយយកបានពីមុន ។
នៅពេលនោះ ដោយពិនិត្យឃើញថាឧត្ដុង្គស្ថិតនៅជិតភ្នំពេញពេក ព្រះរាជាក៏សម្រេចព្រះទ័យចាកចោលរាជធានីនេះ ដោយនាំរាជបរិពារទៅគង់នៅឯលង្វែកវិញ ឆ្ងាយទៅខាងជើងបន្ដិច ដែលព្រះរាជាមុនៗបានបោះបង់ចោលកាលពីសតវត្សរ៍មុន ។ ដោយហេតុនេះហើយបានជារាជធានីខ្មែររំកិលខិតទៅខាងជើងទៀត ព្រោះខ្លាចអាណ្ណាម ផ្ទុយខុសពីពេលមុនដែលរំកិលខិតមកខាងត្បូង ដោយខ្លាចសៀម ។
នៅក្នុងឆ្នាំ១៧៣៦ ព្រះរាជាព្រះសត្ថា បានដាក់រាជសម្បត្ដិដើម្បីសាងផ្នួស៣ថ្ងៃ រួចទើបលាចាកសិក្ខាបទមកគង់លើរាជបល្ល័ង្ក កាន់អំណាចឡើងវិញ ។
នៅក្នុងឆ្នាំដដែលនោះ ព្រះរាជាមានមន្ទិលសង្ស័យថាព្រះអគ្គមហេសីស្រីសុជាតា ជាបុត្រីរបស់ព្រះជ័យជេដ្ឋា ក្បត់នឹងព្រះអង្គ ឃុបឃិតជាមួយអ្នកអង្គសូរ ឬសម្ដេចព្រះឧទ័យ អ្នកអង្គស្ងួន ហៅ ព្រះស្រីជ័យជេដ្ឋា និងចៅពញាចន្ទ ហៅបទុមរាជា ជាបុត្រាមួយអង្គរបស់ព្រះអង្គទង និងបុត្រារបស់អតីតព្រះរាជាស្រីបទុមរាជា ដែលសុទ្ធតែត្រូវជាបងប្អូនជីទួតមួយរបស់ព្រះអង្គ ចង់ទម្លាក់ព្រះអង្គពីអំណាច ឬក៏ចង់ធ្វើឃាតព្រះអង្គ ។ នៅឆ្នាំបន្ទាប់មកទៀត ដោយសន្សំព្រះទ័យចង់សងសឹកនឹងពួកនេះ ព្រះរាជាបានយាងមកគង់នៅឯភ្នំពេញ រួចហើយក៏រៀបចំវិធានការចាប់ខ្លួន និងកាប់សម្លាប់ព្រះមហេសី និងបក្សពួកទាំងអស់ ។
ក្សត្រាទាំង៣ព្រះអង្គ ពេលដឹងខ្លួនថាព្រះរាជាប្រុងនឹងធ្វើបាបហើយ ក៏គេចខ្លួនចេញពីរាជធានី ហើយប្រមែប្រមូលកងទ័ពដើម្បីប្រយុទ្ធប្រឆាំងនឹងព្រះរាជាវិញ ។ ការប្រយុទ្ធស៊ីសាច់ហុតឈាមសាហាវខ្លាំងណាស់ អស់រយៈពេលជាច្រើនខែ ។ នៅទីបញ្ចប់ ព្រះរាជាសត្ថា និងព្រះអនុជអ្នកអង្គឯមត្រូវរត់ភៀសព្រះកាយទៅកូសាំងស៊ីន នៅក្នុងឆ្នាំ១៧៣៧ ។ បងប្អូនព្រះស្រីជ័យជេដ្ឋា និងបទុមរាជាបានដេញតាមប្រកិតពីក្រោយ រួចហើយព្រះស្រីជ័យជេដ្ឋាក៏បោះទ័ពនៅនឹងបាភ្នំលើត្រើយខាងកើតទន្លេ ព្រះបទុមរាជាបោះទ័ពនៅលើត្រើយខាងលិច ហើយរៀបចំវិធានការទប់ទល់កុំឱ្យព្រះរាជាព្រះសត្ថាវិលត្រលប់មកវាយយកកម្ពុជាវិញ បើទោះជាព្រះអង្គមានទ័ពអាណ្ណាមជួយក្ដី ។ នៅពេលនោះ អ្នកអង្គម្ចាស់ឯម ដែលព្រះធម្មោរាជាជាបិតាបានប្រទានព្រះនាមរបស់ព្រះអង្គថ្វាយ -នៅសម័យនោះ ការប្រទានព្រះនាមផ្ទាល់ថ្វាយមានន័យថាទ្រង់បានផ្ទេររាល់សិទ្ធិទាំងឡាយថ្វាយ បានវាយចូលលុកលុយខែត្រអង្គរ ជាមួយនឹងកងទ័ពដែលកេណ្ឌបាននៅកូរ៉ាត អស់ពេលច្រើនឆ្នាំមកហើយ ។ ជាមួយគ្នានោះ ស្ដេចសៀមបានប្រគល់ទ័ព២ពាន់នាក់ឱ្យអ្នកអង្គទងជាព្រះបិតុលា ចេញតាមពីក្រោយ ដើម្បីជួយ និងបានឱ្យព្រះធម្មោរាជដឹកនាំទ័ព៣ពាន់នាក់ឡើងទូកមកចុះនៅឯកំពត ។
នៅពេលដែលទ័ពអ្នកអង្គម្ចាស់ឯម និងទ័ពព្រះអង្គទងចុះមកជិតដល់លង្វែកនៅសល់ប្រហែលជា៥០គីឡូម៉ែត្រ ព្រះមហាក្សត្រីស្រីសុជាតាបានកោះប្រជុំរាជវង្សានុវង្ស និងនាម៉ឺនសព្វមុខមន្ដ្រីពិគ្រោះយោបល់ រួចហើយព្រះនាងក៏សម្រេចនាំគ្នាមកជួបក្សត្រទាំង២អង្គនៅឧត្ដុង្គ ។ ក្រោយពីជួបគ្នាបន្ដិចនៅលើទន្លេសាប គេបានសម្រេចថាត្រូវមកជួបជុំគ្នាដោះស្រាយបញ្ហានៅឯភ្នំពេញ ។ ក្សត្រាទាំង២យាងចូលមកក្នុងរាជធានីជាមួយនឹងកងទ័ពទាំងអស់ ហើយគេបានស្រុះស្រួលឯកភាពគ្នាថាលើកព្រះធម្មោរាជាឱ្យគ្រងរាជបល្ល័ង្កឡើងវិញ ។ ប៉ុន្ដែ ព្រះធម្មោរាជាទើបតែបានថ្វាយព្រះនាមរបស់ព្រះអង្គថ្វាយដល់ព្រះរាជបុត្រា ព្រះធម្មោរាជាអង្គឯម ម្ល៉ោះហើយទ្រង់ប្រកែកមិនព្រមទទួលយករាជសម្បត្ដិទេ សូមឱ្យថ្វាយទៅព្រះរាជបុត្រាទៅចុះ ។ ក៏ប៉ុន្ដែរាជវង្សានុវង្សមិនព្រម ពីព្រោះថា មានតែព្រះអង្គទេដែលការចរចាគ្នាអាចទទួលយកបាន ដូច្នេះព្រះអង្គត្រូវតែលះបង់ការផ្ទេរព្រះនាមថ្វាយព្រះរាជបុត្រសិន ។
ដោយមិនសូវសព្វព្រះរាជហឫទ័យប៉ុន្មាន ព្រះធម្មោរាជាបានសម្រេចព្រះទ័យគង់នៅខែត្រទ្រាំង រហូតដល់ឆ្នាំ១៧៣៨ ទាល់តែដល់ពេលដែលមានការចាំបាច់នៅភ្នំពេញ ដែលបានក្លាយជាមជ្ឈមណ្ឌលរបស់ព្រះរាជាណាចក្រ ទើបព្រះរាជវង្សានុវង្សទៅយាងព្រះអង្គឱ្យវិលត្រលប់មកកាន់រាជធានីលង្វែកវិញ (46) ។
៣០. ព្រះធម្មោរាជា-រជ្ជកាលទី៣ (១៧៣៨-១៧៤៧)
ព្រះធម្មោរាជាអង្គសូរទ្រង់មានព្រះជន្ម៤៨ព្រះវស្សានៅពេលដែលទ្រង់ត្រូវបានអភិសេកជាលើកទី៣ ។ ពេលអភិសេកលើកនេះទ្រង់មានព្រះនាមថា «ព្រះបាទសម្ដេចព្រះរាជឱង្ការព្រះជ័យជេដ្ឋាធិរាជរាមាធិបតីបរមបពិត្រ» ។ ទ្រង់ត្រូវជាព្រះរាជបុត្រារបស់ព្រះរាជាជ័យជេដ្ឋា ដែលទ្រង់បានដាក់រាជសម្បត្ដិថ្វាយព្រះអង្គ ។ ទ្រង់សោយរាជ្យម្ដងបានមួយឆ្នាំនៅក្នុងឆ្នាំ១៧០២-១៧០៣ រួចបានដាក់រាជសម្បត្ដិថ្វាយព្រះបិតាវិញ ។ បន្ទាប់មក ក្រោយពីសោយរាជ្យបាន២ឆ្នាំ ព្រះបិតាព្រះអង្គក៏ដាក់រាជសម្បត្ដិថ្វាយព្រះអង្គទៀត ហើយសោយរាជ្យពីឆ្នាំ១៧០៦ ដល់១៧១៤ ក៏ត្រូវព្រះកែវហ្វ៊ាអង្គឯមបណ្ដេញចេញពីរាជបល្ល័ង្ក ។ ឥឡូវនេះ ក្រោយពី២៣ឆ្នាំកន្លងផុតទៅទ្រង់បានឡើងគ្រងរាជបល្ល័ង្កកម្ពុជាជាថ្មីម្ដងទៀត ។
អ្នកអង្គម្ចាស់អង្គទង ត្រូវជាបុត្រារបស់ព្រះឧទ័យ ដែលយាងពីចន្ទតាប៊ុន មកចុះចតនៅកំពត មានព្រះជន្ម៤៧ព្រះវស្សា ហើយបានត្រូវលើកឱ្យឡើងជាទីឧភយោរាជ ។ ព្រះឧទ័យជាបុត្រាបានត្រូវលើកឱ្យឡើងជាព្រះឧបរាជ ។ ព្រះអគ្គមហេសីទ្រង់ទទួលព្រះឋានៈជាសម្ដេចព្រះជាតិក្សត្រី ។ ចំណែកឯព្រះធម្មោរាជាអង្គឯមជាព្រះរាជបុត្រាមួយអង្គទៀតដែលមានព្រះជន្ម២៩ព្រះវស្សាបានទទួលព្រះឋានៈជាព្រះកែវហ្វ៊ា ហើយបានរៀបអាពាហ៍ពិពាហ៍ជាមួយម្ចាស់ក្សត្រីអ្នកអង្គម៉ី ជាបុត្រីរបស់នាងអង្គសូរដែលសុគតទៅនៅពេលប្រសូតបុត្រ ។
រាជពង្សាវតារបានលើកឡើងថា នៅពេលនោះទន្លេមេគង្គមានជំនន់មួយធំខុសប្លែកពីរៀងរាល់ឆ្នាំ ហើយនិងមានការឈ្លោះប្រកែកប្រយុទ្ធគ្នារវាងពួកខ្មែរ និងពួកអាណ្ណាមនៅក្នុងខែត្របាសាក់ (សុកទ្រាំង) ។ ពួកអាណ្ណាម ត្រូវបានវាយឱ្យបរាជ័យ ក៏នាំគ្នាដកថយទៅនៅលើកោះហុងពាមមីសា ក្នុងទន្លេមេគង្គ ហើយបានយកទីនោះរស់នៅរៀបចំហាក់បីដូចជាម្ចាស់កម្មសិទ្ធិតែម្ដង ។
ពីរឆ្នាំក្រោយពីម៉ាក់គូទទួលមរណភាពបាត់ទៅក្នុងអាយុ៧៨ឆ្នាំ ឆ្នាំ១៧៣៨ ព្រះរាជាកម្ពុជាធម្មារាជា បានឆ្លៀតឱកាសដែលមានជម្លោះមួយកើតឡើងរវាងពួកខ្មែរជាមួយនឹងបក្សពួករបស់ម៉ាក់តុង ជាកូនរបស់ម៉ាក់គូ ដែលឡើងកាន់អំណាចតពីឪពុក បានមានបំណងចង់ដណ្ដើមយកហាទៀងមកវិញ ។ ក៏ប៉ុន្ដែហាទៀង មានកម្លាំងការពារយ៉ាងរឹងមាំ និងប៉ិនប្រសប់ ធ្វើឱ្យខាងកម្ពុជាខាតបង់កម្លាំងអស់ជាច្រើន ក៏ដកថយមកវិញ ។
នៅឆ្នាំ១៧៤៧ ព្រះរាជាបានអាពាធ ហើយសុគតទៅនៅក្នុងព្រះជន្ម៥៧ព្រះវស្សា ។ ព្រះអង្គសោយរាជ្យ៣ដង បាន១២ឆ្នាំ ហើយមានរយៈពេលយូរជាងគេនៅក្នុងរជ្ជកាលចុងក្រោយ គឺបាន១០ឆ្នាំ ។
៣១. ព្រះធម្មោរាជាទី៥-អង្គឯម (១៧៤៧)
ព្រះកែវហ្វ៊ាអង្គឯម ដែលព្រះធម្មោរាជាជាព្រះបិតាបានលះបង់ព្រះនាម និងសិទ្ធិទាំងអស់ថ្វាយកាលពីឆ្នាំ១៧៣៣ បានឡើងសោយរាជ្យបន្ដក្នុងព្រះជន្ម៤២ព្រះវស្សា ។ ការដែលព្រះបិតាលះបង់ព្រះនាម និងសិទ្ធិអំណាចថ្វាយកាលពីពេលមុននេះបានធ្វើឱ្យនាម៉ឺនសព្វមុខមន្ដ្រីជ្រើសតាំងព្រះអង្គឡើង ។ ព្រះអនុជរបស់ព្រះអង្គព្រះនាមថា អង្គហ៊ីង ដែលព្រះបិតាបានថ្វាយព្រះនាមថា ស្រីសុរិយោពណ៌ នៅក្នុងឱកាសធ្វើពិធីកោរជុក បានបះបោរឡើងដណ្ដើមរាជសម្បត្ដិ ទាំងព្រះអង្គទើបតែមានព្រះជន្មមិនទាន់គ្រប់១៦ព្រះវស្សាផង (47) ។ ទ្រង់បានធ្វើឃាតព្រះរាជា ហើយចង់ឡើងសោយរាជ្យជំនួស ក៏ប៉ុន្ដែនាម៉ឺនសព្វមុខមន្ដ្រីមិនព្រម ហើយបានលើកព្រះឧភយោរាជអ្នកអង្គតន់ ហៅថា ព្រះអង្គទង ឱ្យឡើងកាន់អំណាចវិញ ។
៣២. រាមាធិបតី-ព្រះអង្គទង (១៧៤៧-១៧៤៩)
ក្សត្រអង្គនេះមានព្រះជន្ម៥៦ព្រះវស្សា និងមានព្រះឋានៈជាព្រះឧភយោរាជអស់កាល១០ឆ្នាំមកហើយ ។ គេបានលើកឱ្យទ្រង់ឡើងកាន់អំណាច ក៏ប៉ុន្ដែមិនមែនលើកឱ្យឡើងគ្រងរាជបល្ល័ង្កទេ គឺទុកឱ្យតែព្រះអង្គចាត់ចែងរាជកិច្ចក្នុងឋានៈជាព្រះឧភយោរាជប៉ុណ្ណោះ ។
នៅឆ្នាំ១៧៤៨ ពួកក្សត្រាដែលភៀសព្រះកាយទៅគង់នៅកូសាំងស៊ីនកាលពី១០ឆ្នាំមុនជាមួយព្រះសត្ថា បានចាប់ដឹកនាំទ័ពអាណ្ណាមចូលលុកលុយកម្ពុជា ។ ពួកគេបានវាយចៅហ្វាយខែត្របាសាក់ លោកឧកញ៉ានរេន្ទគុក ដែលដឹកនាំទ័ពមួយកងតូចដែលកេណ្ឌបានទាំងប្រញិបប្រញាប់ទៅទប់ទល់ ហើយត្រូវបង្ខំឱ្យដកថយមកកាន់កោះហុងពាមមេសវិញ ។ រួចហើយកងទ័ពរបស់ព្រះអង្គបានធ្វើដំណើរឆ្ពោះមកខាងជើង និងមកជិតដល់ឧត្ដុង្គ ។ មកដល់ទីនោះ គេជួបជាមួយទ័ពរបស់លោកនាយករដ្ឋមន្ដ្រី ចៅហ្វ៊ាឯក ក៏វាយទ័ពនោះឱ្យបែកខ្ញែក ខ្ចាត់ខ្ចាយអស់ទៅ ។ ព្រះរាជាអង្គទង ព្រះឧបរាជព្រះឧទ័យជារាជបុត្រាព្រះស្រីជ័យជេដ្ឋា (អ្នកអង្គស្ងួន) ជាបងប្អូនជីដូនមួយ និងត្រូវជាបុត្រារបស់ព្រះស្រីបទុមរាជា និងជាព្រះអនុជរបស់ព្រះធម្មោរាជាដែលព្រះសុរិយោពណ៌បានធ្វើឃាត ក៏នាំគ្នារត់ទៅស្រុកសៀមសុំជំនួយ ។
អតីតព្រះមហាក្សត្របរមរាជា និងព្រះអនុជអ្នកអង្គឯមក៏ឡើងជាម្ចាស់ស្រុក ហើយបានយាងមកគង់នៅឧត្ដុង្គ នៅក្នុងរាជវាំងរបស់ព្រះឧភយោរាជ ដែលស្ថិតនៅពីខាងលិចបឹងប៉ាម៉ា ។ ព្រះអង្គមិនអាចបញ្ជាទៅលើកងទ័ពអាណ្ណាមបានទេ ក៏បណ្ដោយឱ្យពួកនោះដឹកនាំប្រទេស ធ្វើបាបប្រជារាស្ដ្រ នាំឱ្យរាស្ដ្រក្ដៅក្រហាយ ខឹងសម្បាកាន់តែខ្លាំងឡើងៗរាល់ថ្ងៃ ។
លោកក្រឡាហោមអុក និងចៅហ្វាយខែត្រពោធិ៍សាត់លោកឧកញ៉ាសួគ៌ាលោក អ៊ុក ក្រោយពីបានជូនដំណើរព្រះឧភយោរាជឆ្លងកាត់ទល់ដែនរួចហើយ ក៏ត្រលប់មកពោធិ៍សាត់វិញ រៀបចំជ្រើសរើសកងទ័ព ។ ពួកឧត្ដមសេនីយ៍អាណ្ណាមក៏ដឹកនាំទ័ពធ្វើដំណើរសំដៅមកកាន់ខែត្រពោធិ៍សាត់ ។ ក្នុងពេលជាមួយគ្នានោះ ព្រះអង្គហ៊ីងស្រីសុរិយោពណ៌ក៏បានដឹកនាំទ័ពខ្មែរមួយកង តាមជើងទឹកមកដែរ ។ មេដឹកនាំទ័ពក្រោយនេះបានត្រូវស្លាប់នៅពេលក្រោយបន្ដិចមក តែទ័ពអាណ្ណាមបានធ្វើដំណើរមកដល់វាលស្រាបអង្កាម (រលាប្អៀរ) ហើយបោះទីតាំងនៅកន្លែងនោះតែម្ដង ។ ពេលនោះលោកក្រឡាហោមក៏លើកទ័ពមកដល់វាយប្រហារទៅលើទ័ពអាណ្ណាមដែលដឹកនាំដោយអ្នកអង្គអេងឱ្យបរាជ័យទាំងស្រុង ហើយរត់គេចខ្លួនកាត់មុខឧត្ដុង្គមិនហ៊ានចូលក្នុងក្រុងទេ ។ អ្នកអង្គឯម និងអតីតព្រះរាជាធម្មោរាជាក៏រួសរាន់នាំគ្រួសាររត់តាមពួកអាណ្ណាមវិលត្រលប់ទៅកូសាំងស៊ីនវិញដែរ ។ អ្នកអង្គឯម យាងមកដល់កំពង់ឆ្នាំងមិនបានប៉ុន្មានផង ក៏សុគតទៅ (១៧៤៨) ។ ចំណែកឯអតីតព្រះរាជាធម្មោរាជ បានយាងទៅដល់អាណ្ណាម ប៉ុន្ដែដោយនឿយហត់ជាខ្លាំង ក៏សុគតទៅក្នុងឆ្នាំនោះដែរ ក្នុងជន្មាយុ៤៣ព្រះវស្សា ។
លោកក្រឡាហោមអុក និងចៅហ្វាយខែត្រពោធិ៍សាត់ក៏ចាត់ចែងរៀបចំស្រុកទេសឡើងវិញ ផ្លាស់ប្ដូរចៅហ្វាយខែត្រណាដែលគ្មានសមត្ថភាព គេចវេះមិនបានទប់ទល់ជាមួយសត្រូវ រួចបានស្នើសុំស្ដេចសៀមឱ្យបញ្ជូនព្រះស្រីជ័យជេដ្ឋាអង្គស្ងួន ដែលត្រូវជាបុត្រារបស់ព្រះរាជាស្រីបទុមរាជា ដែលអង់អាចក្លាហានជាង ឱ្យមកទួលរាជសម្បត្ដិនៅកម្ពុជា គឺមិនបានសុំឱ្យបញ្ជូនព្រះរាជាអង្គទង ឬព្រះឧភយោរាជឧទ័យ ដែលអស់សេចក្ដីក្លាហានទៅហើយនោះទេ ។ ស្ដេចសៀមបានយល់ព្រមតាមសំណើនេះ ហើយក៏បញ្ជូនព្រះស្រីជ័យជេដ្ឋា ឱ្យវិលត្រលប់មកវិញជាមួយមន្ដ្រីសៀមជាច្រើននាក់ សម្រាប់ធ្វើជាទីប្រឹក្សាជួយព្រះអង្គ ។
៣៣. ព្រះជ័យជេដ្ឋាទី៥ អង្គស្ងួន (១៧៤៩-១៧៥៥)
ព្រះជ័យជេដ្ឋា ពេលនោះមានព្រះជន្ម៤២ព្រះវស្សាហើយ ។ ព្រះអង្គជាព្រះរាជបុត្រារបស់ព្រះបាទធម្មោរាជា ដែលព្រះសុរិយោពណ៌អង្គហ៊ីងបានធ្វើគុត ។ ព្រះអង្គត្រូវបានអភិសេកឱ្យឡើងសោយរាជ្យក្រោមព្រះនាមថា «ព្រះបាទសម្ដេចស្ដេចព្រះរាជឱង្ការព្រះស្រីជ័យជេដ្ឋាធិរាជបរមបពិត្រ» ។
ព្រះអង្គទទួលស្គាល់គុណូបការៈរបស់ចៅហ្វាយខែត្រពោធិ៍សាត់ ដែលបានស៊ូប្ដូរនឹងព្រះអង្គនៅក្នុងពេលមានសង្គ្រាម ម្ល៉ោះហើយព្រះអង្គក៏តែងតាំងឱ្យធ្វើជាចៅហ្វ៊ាគឺនាយករដ្ឋមន្ដ្រី ។ ការលើកតម្កើងចៅហ្វាយខែត្រពោធិ៍សាត់នេះ បានធ្វើឱ្យនាម៉ឺនមន្ដ្រីចាស់ៗកើតការច្រណែន ក៏ឃុបឃិតគ្នាធ្វើយ៉ាងណាបំបែកលោកចៅហ្វ៊ាចេញពីព្រះទ័យព្រះរាជា ។ ពួកមន្ដ្រីទាំងអស់នោះចាក់រុកថាលោកចៅហ្វ៊ាក្បត់មានបំណងចង់ដណ្ដើមយករាជសម្បត្ដិរហូតដល់ព្រះរាជាជឿ ហើយបានចាត់ឱ្យជនម៉ាឡេម្នាក់ឈ្មោះថា ប៉ូឡឺម៉ែនលួចធ្វើឃាតលោកចៅហ្វ៊ាចោល ។ លោកចៅហ្វ៊ាអុកដឹងរឿងនេះក៏គេចខ្លួនទៅនៅឯស្រុកសៀមទៅ ហើយព្រះរាជាក៏លើកឧកញ៉ាចក្រីពូឱ្យឡើងជំនួសវិញ ។
នៅឆ្នាំ១៧៥១ ពួកអ្នកអង្គម្ចាស់ដែលភៀសព្រះកាយទៅគង់នៅឯស្រុកសៀមតាំងពីឆ្នាំ១៧៤៨ បានទទួលការអនុញ្ញាតពីព្រះរាជាសៀមឱ្យវិលត្រលប់មកស្រុកវិញ ហើយបានមកតាំងព្រះរាជដំណាក់នៅពាមចាស់ ក្នុងស្រុកពោធិមេបា ។ ព្រះឧបរាជឧទ័យ ដែលប្រហែលជាមិនគាំទ្រផែនការរបស់ព្រះបិតារបស់ព្រះអង្គក្នុងការទម្លាក់ព្រះរាជាស្រីជ័យជេដ្ឋាពីរាជសម្បត្ដិបានយាងចូលសាងព្រះផ្នួសនៅអង្គរវត្ដ ។ ចំណែកព្រះអង្គទងដែលគេបង្ខំឱ្យទទួលតួនាទីជាព្រះឧភយោរាជ បន្ទាប់ពីការជ្រើសរើសព្រះមហាក្សត្រថ្មីឱ្យគ្រងរាជបល្ល័ង្កហើយនោះ បានយាងទៅគង់នៅក្នុងខែត្រក្រង ស្ថិតនៅតាមមាត់ច្រាំងទន្លេខាងស្ដាំភាគខាងត្បូងបំផុតនៃបឹងទន្លេសាប ។
ក្នុងពេលជាមួយគ្នានោះ មានមន្ដ្រីម្នាក់ឈ្មោះថា ក្សេត្រឯក ដែលភៀសខ្លួនទៅនៅស្រុកសៀម បានរៀបចំផែនការទម្លាក់ព្រះស្រីជ័យជេដ្ឋាចេញពីរាជបល្ល័ង្ក ដើម្បីលើកអ្នកអង្គម្ចាស់តន់ បុត្រារបស់ព្រះឧបរាជ ដែលយាងចូលសាងព្រះផ្នួសនៅអង្គរវត្ដឱ្យឡើងសោយរាជ្យវិញ ។ មន្ដ្រីនោះបានបញ្ជូនកូនប្រុសរបស់ខ្លួនឱ្យទៅកេណ្ឌទ័ពក្នុងចំណោមអ្នកស្រុកដែលរស់នៅឯភ្នំខ្ជោល ។ ទៅដល់ភ្នំខ្ជោល កូនមន្ដ្រីនោះបានជួបជាមួយមនុស្សឡប់សតិម្នាក់ឈ្មោះ សួស ដែលអ្នកស្រុកគោរពស្រលាញ់ ជឿថាជាមនុស្សមានបុណ្យមានកម្លាំងមហិមា ហើយនាំគ្នាហៅថា សីលសួស ។ ផែនការក្បត់នេះបានធ្វើឱ្យរំខានដល់ព្រះឧភយោរាជជាខ្លាំង ព្រះអង្គក៏រៀបចំអន្ទាក់ចាប់ក្សេត្រឯកបាន រួចហើយក៏សម្លាប់ចោលទៅ ។ ពេលនោះសីលសួសមានទ័ព៣ពាន់នាក់ បានប្រកាសខ្លួនឡើងជាព្រះអង្គយ៉ង ជាឈ្មោះអ្នកអង្គម្ចាស់មួយអង្គដែលសុគតយូរណាស់មកហើយ ហើយបានលើកជនខ្វិនខ្វង់ម្នាក់ជាស្ដេច ដាក់ឈ្មោះថា ព្រះបាទអង្គុលីរាជ ។ ព្រះឧភយោរាជបានកេណ្ឌកម្លាំង រួចហើយយាងទៅកាន់ភូមិក្បាលក្របី នៅខាងលិចឧត្ដុង្គ ជាទីកន្លែងដែលកូនរបស់ក្សេត្រឯក និងសីលសួសរស់នៅ ដោយមានព្រះកែវហ្វ៊ា និងព្រះអង្គអាត ទៅជាមួយផង ។ មនុស្សទាំង២នាក់នេះ ត្រូវគេចាប់បាន ហើយសម្លាប់ចោលទៅ ។ បន្ទាប់មក ព្រះឧភយោរាជបាននាំទ័ពទៅវាយស្ដេចអង្គុលីរាជទៀត ។ ទ្រង់បានវាយបំបែកទ័ពរបស់ស្ដេចនេះ រួចចាប់ស្ដេចអង្គុលីរាជយកទៅសម្លាប់ចោលនៅឯកំរែងភ្នំស្រង់ នៅក្នុងខែត្រក្រង ។
ប្រហែលនៅចុងឆ្នាំ១៧៥៣ ព្រះឧភយោរាជបានយាងមកគង់នៅឧត្ដុង្គវិញ ដើម្បីឱ្យបានជិតព្រះរាជា ជាព្រះភាគិនេយ្យ ។ នៅឆ្នាំបន្ទាប់មកទៀត បុត្រារបស់ព្រះអង្គគឺអ្នកអង្គសូរ ហៅព្រះឧបរាជឧទ័យបានសោយទិវង្គតនៅក្នុងវត្ដអង្គរវត្ដ ។ ពេលនោះព្រះអង្គមានព្រះជន្ម៤០ព្រះវស្សា ។ បុត្រារបស់ព្រះអង្គ បានប្រកាន់យកនាមព្រះបិតាថា ព្រះឧទ័យ ដើម្បីជាការបញ្ជាក់ថាព្រះអង្គទ្រង់ឡើងស្នងបន្ដពីព្រះបិតា ។ ប៉ុន្ដែឋានៈជាព្រះឧបរាជបានត្រូវធ្លាក់ទៅលើព្រះអង្គហ៊ីងស្រីសុរិយោពណ៌ ដែលត្រូវជាបុត្រារបស់អតីតព្រះរាជាព្រះជ័យជេដ្ឋា ហើយជាឃាតកព្រះរាជាធម្មោរាជាអង្គឯមនៅឆ្នាំ១៧៤៧ ។
ព្រះរាជាជ័យជេដ្ឋាបានសុគតនៅក្នុងឆ្នាំ១៧៥៥ក្នុងព្រះជន្មាយុ៤៦ព្រះវស្សាក្រោយពីទ្រង់សោយរាជ្យសម្បត្ដិបាន៧ឆ្នាំ ។
៣៤. ព្រះរាមធិបតី-អង្គទង (១៧៥៦-១៧៥៧)
ព្រះឧភយោរាជដែលធ្លាប់សោយរាជ្យបានមួយឆ្នាំម្ដងរួចមកហើយកាលពីឆ្នាំ១៧៤៨-១៧៤៩ បានត្រូវពួកបារគូ និងនាម៉ឺនសព្វមុខមន្ដ្រីលើកឱ្យឡើងសោយរាជ្យម្ដងទៀតនៅដើមឆ្នាំ១៧៥៦ នៅពេលដែលទ្រង់មានព្រះជន្មាយុ៥៧ព្រះវស្សា ។ ព្រះអង្គមានព្រះឋានៈជាអ្នកគ្រងរាជ្យ ឬរាជានុសិទ្ធិ ។
នៅក្នុងឆ្នាំនោះដែរ ក្រោយពីមានជម្លោះតូចតាចមួយ ព្រះឧបរាជសុរិយោពណ៌បានមានបំណងធ្វើឃាតព្រះឧទ័យ (អង្គតន់) ក៏ប៉ុន្ដែព្រះអង្គតន់បានភៀសព្រះកាយទៅដល់ពាម-ហាទៀង ដែលកូនម្នាក់របស់អតីតមេចោរសមុទ្រម៉ាក់គូ គឺ ម៉ាក់តុង (48) កំពុងត្រួតត្រាកន្លែងនោះបម្រើឱ្យផលប្រយោជន៍ស្ដេចអាណ្ណាម ។ ម៉ាក់គូបានព្រួតដៃជាមួយទ័ពខ្មែរមួយកង វាយប្រហារទៅលើទ័ពជើងទឹកសៀមមួយកង ដែលមានបំណងឡើងគោកនៅពាមនេះឱ្យបរាជ័យនៅក្នុងឆ្នាំ១៧២២ ហើយគាត់បានស្លាប់នៅក្នុងឆ្នាំ១៧៣៧ ។ ព្រះអង្គតន់បានព្រមព្រៀងគ្នានឹងម៉ាក់តុង ដើម្បីទម្លាក់ព្រះអង្គទងចេញពីរាជបល្ល័ង្ក ។ នៅពេលដែលម៉ាក់តុង បញ្ជូនបេសកជនទៅបញ្ចុះបញ្ចូលអ្នកស្រុកនៅក្នុងខែត្រទ្រាំង បន្ទាយមាស បាទី និងព្រៃកប្បាស ព្រះអង្គតន់បានយាងទៅកាន់ខែត្រត្រាវិញ ក្នុងចំណោមប្រជាជនដែលស្ថិតនៅក្រោមអំណាចអាជ្ញាធរអាណ្ណាមតាំងពីប៉ុន្មានឆ្នាំមកហើយ ។ ទ្រង់កេណ្ឌទ័ពបានយ៉ាងឆាប់រហ័ស ហើយរៀបចំចេញជា៣កង ដោយដាក់នៅក្រោមបញ្ជាការមន្ដ្រីខ្មែរដែលស្មោះនឹងព្រះអង្គ៣នាក់ រួចឱ្យចេញដំណើរមកកាន់ឧត្ដុង្គតាមផ្លូវផ្សេងៗគ្នា ។ ម៉ាក់តុងដឹកនាំទ័ពជាពួកចោរប្លន់មួយកង ធ្វើដំណើរពីខាងក្រោយទ័ពខ្មែរទាំង៣កង ។ ទ័ពព្រះឧទ័យរាជាទទួលបានទ័ពជំនួយមួយនៅក្រសាំង នៅខាងជើងជិតមាត់ជ្រូក (ចូវដុក) ។ មកដល់ភ្នំពេញ មេទ័ពទាំង៣បានវាយទ័ពព្រះឧបរាជស្រីសុរិយោពណ៌ឱ្យបរាជ័យនៅក្នុងសមរភូមិមួយ ព្រះស្រីសុរិយោពណ៌បានរត់ភៀសព្រះកាយបាត់ទៅ ។ ព្រះឧទ័យបានចាត់កម្លាំងឱ្យដេញតាមចាប់ព្រះស្រីសុរិយោពណ៌បាននៅខែត្រព្រៃក្ដី ក្នុងដីកំពង់ស្វាយ ហើយធ្វើឃាតចោលទៅ ។ ព្រះអនុជរបស់ព្រះឧបរាជ គឺព្រះកែវហ្វ៊ាអង្គដួងដែលយាងចូលសាងព្រះផ្នួសព្រោះមិនចង់មានបញ្ហាជាមួយព្រះឧទ័យបានត្រូវគេបង្ខំឱ្យលាចាកសិក្ខាបទ (49) រួចហើយត្រូវគេធ្វើឃាតដែរ នៅពេលយាងចេញផុតពីបរិវេណវត្ដស្បឹង ។
ក្រោយពីធ្វើឃាតស្ដេចទាំង២អង្គរួច ព្រះឧទ័យបានយាងចូលគាល់ព្រះរាជាអង្គទងជាព្រះអយ្យកោ ដោយឥតអៀនខ្មាស ហើយសុំការអនុញ្ញាតនាំយកព្រះរាជវង្សានុវង្ស និងបរិពារមករស់នៅខាងជើងវត្ដព្រះចេតិយថ្មី ។ ព្រះរាជាទ្រង់បានអនុញ្ញាតតាមសំណើ ដោយមិនអាចធ្វើអ្វីបាន ព្រោះព្រះឧទ័យមានទ័ពរឹងមាំ ។
ពីរខែក្រោយមក នៅពេលដែលពួកទាហានមួយចំនួនធំវិលត្រលប់ទៅស្រុកកំណើតវិញហើយ ព្រះឧទ័យទទួលដំណឹងថា មហេសីមេម៉ាយរបស់ព្រះឧបរាជស្រីសុរិយោពណ៌ បានរៀបចំផែនការប្រឆាំងនឹងព្រះអង្គ ដោយមានមន្ដ្រីធំៗជាច្រើនចូលរួមផង ហើយពួកគេកំពុងប្រុងប្រៀបបើកការវាយប្រហារមកលើព្រះអង្គហើយ ។ ដោយភ័យខ្លាចចំពោះការវាយប្រហារនេះព្រះអង្គបាននាំព្រះរាជវង្ស និងសេនាអាមាត្យយាងចេញពីឧត្ដុង្គ មកគង់នៅឯជ្រោយចង្វា ចំពីមុខភ្នំពេញវិញ រួចហើយបានចាត់តាំងមន្ដ្រី និងមេទ័ពមួយចំនួនឱ្យចេញកេណ្ឌទ័ពសាជាថ្មី ។
ពេលពិនិត្យឃើញថាព្រះឧទ័យធ្វើខ្លួនជាស្ដេច ហើយប្រុងប្រៀបវាយប្រហារទៅលើព្រះមហេសីមេម៉ាយរបស់ព្រះឧបរាជដូច្នេះ ព្រះរាជាអង្គទងក៏មានសេចក្ដីក្លាហានឡើងវិញ ហើយកេណ្ឌទ័ពមួយកងវាយទៅលើពួកបះបោរ ។ ប៉ុន្ដែទ័ពនេះបរាជ័យ ព្រះរាជាក៏គេចខ្លួនចេញពីរាជធានីឧត្ដុង្គ ទៅគង់នៅឯខែត្រពោធិ៍សាត់ ដោយនាំយកក្សត្រាក្សត្រី មានអ្នកអង្គម្ចាស់អង្គទង អង្គនន់ ព្រះរាមា និងសេនាអាមាត្យទាំងអស់ទៅជាមួយ ផង ។ ព្រះអង្គបានសុគតនៅទីនោះ ក្រោយពីយាងទៅដល់បានបន្ដិច ក្នុងព្រះជន្មាយុ៦៥ព្រះវស្សា ។ សរុបទៅ ព្រះអង្គបានសោយរាជ្យសម្បត្ដិ៣ឆ្នាំ ក្នុងចន្លោះពេលមួយដែលមានរយៈ៧០ឆ្នាំ។
មិនយូរប៉ុន្មានក្រោយមក ព្រះឧទ័យបានឱ្យគេធ្វើឃាតព្រះមហេសីមេម៉ាយរបស់ព្រះឧបរាជ និងព្រះបុត្រាច្បងរបស់អង្គទង ដែលព្រះនាងមានជាមួយព្រះធម្មោរាជាជាព្រះស្វាមីមុន ក្រោយពីបាននាំយកពីបវេល ជាភូមិមួយនៅខាងកើតព្រៃឫស្សីសាញ់មកវិញ ។ ទ្រង់បានដកចៅហ្វាយខែត្រកំពង់ស្វាយចេញពីតំណែងដែលទទួលអ្នកអង្គម្ចាស់អង្គនន់រាមា និងអង្គជ័យឱ្យស្នាក់នៅ ហើយដាក់អ្នកជំនិតរបស់ព្រះអង្គដែលចាប់អ្នកអង្គម្ចាស់ទាំង២ ដាក់ក្នុងទ្រុងថ្វាយព្រះអង្គជំនួសវិញ ។ នៅក្នុងពេលកំពុងធ្វើដំណើរ មន្ដ្រីម្នាក់របស់ព្រះឧទ័យ គឺពញាចន្ទ បានកាប់បំបាក់ទ្រុងរំដោះយកព្រះអង្គនន់រាមារត់គេចទៅស្រុកសៀម ។ នៅសល់តែព្រះអង្គជ័យប៉ុណ្ណោះដែលព្រះអង្គទងបានឱ្យគេសម្លាប់ចោលនៅឧត្ដុង្គ ។
ដើម្បីរំងាប់ការតវ៉ារបស់ពួកអាណ្ណាម ដែលចោទថាព្រះអង្គបានចូលទៅក្នុងទឹកដីកូសាំងស៊ីន រហូតដល់ខែត្រវិញឡុង ជ្រើសរើសទ័ពធ្វើសង្គ្រាមប្រឆាំងនឹងព្រះរាជាមុន ព្រះឧទ័យបានប្រគល់ទៅឱ្យអាណ្ណាមនូវទឹកដី២កន្លែង គឺដីតាំផុងឡុងដែលក្រោយមកគឺខែត្រអាងយ៉ាង និងមួយកន្លែងទៀតដែលក្រោយមក គេបង្កើតបានជាស្រុក២ គឺចាន់ដន និងស៊ុយឡាប់ ហើយភ្ជាប់ទៅក្នុងខែត្រវិញឡុង (១៧៥៧) ។
៣៥. ព្រះស្រីសុរិយោពណ៌-ព្រះឧទ័យ (១៧៥៨-១៧៧៥)
ក្រោយពីទ្រង់បានប្រព្រឹត្ដអំពើឧក្រិដ្ឋផ្សេងៗដូចដែលបានរៀបរាប់ខាងលើរួចហើយ អ្នកអង្គតន់ ហៅថា ព្រះឧទ័យជាបុត្រារបស់ព្រះឧបរាជព្រះឧទ័យដែលសុគតទៅនៅអង្គរវត្ដកាលពីឆ្នាំ១៧៥៣ និងត្រូវជាព្រះនត្ដារបស់ព្រះរាជាអង្គទង និងជាកូនចិញ្ចឹមរបស់ម៉ាក់តុង បានឡើងសោយរាជ្យនៅក្នុងព្រះជន្ម២០ព្រះវស្សាក្រោមព្រះនាមថា «ព្រះបាទសម្ដេចស្ដេចព្រះរាជឱង្ការព្រះនរាយណ៍រាជាធិរាជរាមាធិបតីព្រះស្រីសុរិយោពណ៌បរមសុរេន្ទ» ។
ព្រះចៅអាណ្ណាមបានប្រកាសទទួលស្គាល់ស្ដេចកម្ពុជានេះភ្លាម ។ ស្ដេចនេះមិនគ្រាន់តែជាជនឧក្រិដ្ឋចំពោះរាជវង្សានុវង្សប៉ុណ្ណោះទេ ក៏ប៉ុន្ដែបានក្បត់ប្រទេសជាតិថែមទៀត ។ ទ្រង់បានប្រគល់ទឹកដីខែត្រពីរដែលគេហៅសព្វថ្ងៃថា សុកត្រាំង និងត្រាវិញទៅឱ្យពួកអាណ្ណាម ។ គឺដោយបែបនេះហើយដែលរដ្ឋាភិបាលក្រុងវ៉េបានឆ្លៀតយកឱកាសដែលប្រទេសកម្ពុជាជួបប្រទះនឹងការលំបាក ដណ្ដើមយកទឹកដីកូសាំងស៊ីនដាក់បញ្ចូលមកក្នុងការគ្រប់គ្រងរបស់ខ្លួនបន្ដិចម្ដងៗ ។ ហើយពួកអាណ្ណាមនេះលោភលន់មិនចេះស្កប់ស្កល់ទេ ។ រៀបចំខែត្រទាំង២មិនទាន់ទាំងបានស្រួលបួលផង ពួកនេះក៏ចាប់តាំងកសាងបន្ទាយនៅសាដែក (ផ្សារដែក) នៅគូឡាវយាង (កោះតេង) និងនៅចូវដុក (មាត់ជ្រូក) ថែមទៀត ។
ប៉ុន្ដែរាជពង្សាវតារខ្មែរបានលើកឡើងថា ព្រះរាជាឧទ័យជាស្ដេចល្អ មានព្រះទ័យទូលាយ ហើយចូលចិត្ដដាក់ទាន ។ ទ្រង់បានបរិច្ចាគព្រះរាជទ្រព្យជាច្រើនដាក់ទានដល់ស្មូមយាចក និងបូជាថ្វាយព្រះពុទ្ធ និងពុទ្ធសាសនិក ដើម្បីសន្សំបុណ្យជៀសវាងអកុសលកម្មទាំង៥យ៉ាង និងបាបកម្មទាំង១៤បែប ។ មានទុគ៌តជនជាច្រើនកាត់ពីទីឆ្ងាយៗ មកទទួលទានពីព្រះអង្គ ។ នេះគឺជាការវិនិច្ឆ័យអំពីអត្ថប្រយោជន៍ផ្សេងៗដែលគេអាចឆ្លៀតទាញយកបានពីព្រះអង្គ ។
ព្រះអង្គសព្វព្រះទ័យនឹងផ្ដល់ដំបូន្មាន យោបល់ល្អៗដល់នាម៉ឺនមន្ដ្រី និងជំរុញឱ្យពួកនោះធ្វើទាន ជៀសវាងបាបកម្ម ។ ទ្រង់ឈ្វេងយល់ថាព្រះអង្គគឺជាពោធិសត្វមួយអង្គដែលត្រូវចុះមកជួយសង្គ្រោះសត្វលោក ថ្ងៃណាមួយ ព្រះអង្គនឹងនាំអ្នកទាំងអស់នោះជាច្រើនរយពាន់ឡើងជិះលើសំពៅមាសមួយឆ្លងកាត់មហាសមុទ្រ បើទោះជាមានព្យុះបក់បោកយ៉ាងណាក្ដី ។
នៅឆ្នាំ១៧៦៣ ពេលដែលសភាពការណ៍ក្នុងប្រទេសស្ងប់ស្ងាត់ល្អហើយ ព្រះឧទ័យបានប្រគល់ការដឹកនាំប្រទេសឱ្យមន្ដ្រីធំៗទទួល រួចហើយទ្រង់យាងគ្រងស្បង់ពណ៌លឿង សាងព្រះផ្នួស៣ខែ ទើបលាចាកសិក្ខាបទ មកគង់លើរាជបល្ល័ង្កវិញ ។
នៅក្នុងឆ្នាំ១៧៦៥ ព្រះរាជាបានលើកព្រះមហេសីអ្នកម្នាងមាលិន្ទបុប្ផាវតី ឱ្យឡើងជាសម្ដេចព្រះភគវតី រួចហើយបានកែសម្រួលពិធីការដោយឱ្យមន្ដ្រីទាំងឡាយឆ្លើយនឹងព្រះមហាក្សត្រីថា ព្រះករុណាពិសេស ចំណែកឯភរិយាមន្ដ្រីទាំងនោះវិញ ទ្រង់ឱ្យហៅព្រះមហាក្សត្រីថា ព្រះម៉ែ ។
២ឆ្នាំក្រោយមក ស្ដេចភូមា (50) ដែលធ្វើសង្គ្រាមជាមួយស្ដេចសៀមតាំងពីខែមករា ឆ្នាំ១៧៦៥ ក្រោយពីបានដណ្ដើមយកតាវ៉យ មែរគុយ ហើយនិងតេណាស់សេរីមរួចមក បានដណ្ដើមយកអយុធ្យាទៀត ក្រោយពីហ៊ុមព័ទ្ធជាប់អស់រយៈពេល២ខែ រួចដុតកម្ទេចខ្ទេចខ្ទី (ថ្ងៃទី២៨ ខែមេសា ឆ្នាំ១៧៦៧) ។ ពេលនោះមានអ្នកអង្គម្ចាស់សៀមមួយអង្គ ដែលរាជពង្សាវតារខ្មែរហៅថា ព្រះចៅឡេសាង បានរត់គេចទៅឡើងគោកនៅហាទៀង ដោយទទួលការថែទាំពីព្រះសង្ឃកាតូលិកឈ្មោះ ពីញ៉ូ រួចហើយបានមកស្នើសុំជ្រកកោននៅរាជវាំងឧត្ដុង្គ (51) ។
ក្រោយពីរាជធានីសៀមធ្លាក់ចូលក្នុងដៃសត្រូវរួចមក មានកើតជំងឺប៉េស្ដ និងអាសន្នរោគ ព្រមទាំងមានចោរលួចចោរប្លន់ពាសពេញប្រទេស ។ ពេលនោះមានកូនកាត់ចិនក្នុងសហគមន៍ហៃហុងម្នាក់ឈ្មោះថា ភ្យាតាក ឬ ចៅពញាតាក ជាចៅហ្វាយខែត្រមួយនៅទិសខាងជើង ដែលមានទ័ព១ពាន់នាក់ បានវាយពួកភូមាឱ្យបរាជ័យជាច្រើនលើកច្រើនសា ។ ដោយរាជធានីអយុធ្យាបានត្រូវបំផ្លាញខ្ទេចខ្ទីអស់ ហើយព្រះរាជាក៏ត្រូវបានគេធ្វើគុតទៀតធ្វើឱ្យរាជបល្ល័ង្កនៅទំនេរ ភ្យាតាកក៏ប្រកាសខ្លួនឡើងជាព្រះរាជាសៀម នៅឯបាងផ្លាសយ ។ ភ្យាតាក ដែលធ្វើដំណើរមកដល់រយ៉ងបានត្រូវប្រជាជនអបអរទទួលចាត់ទុកថាជាអ្នករំដោះ ហើយនាំគ្នាចូលបម្រើកងទ័ពធ្វើឱ្យចំនួនកើនឡើងដល់២ពាន់នាក់ ។ ពេលនោះចៅហ្វាយខែត្រចន្ទតាប៊ុនមិនព្រមចំណុះ ទទួលស្គាល់អំណាចរបស់ភ្យាតាកទេ ភ្យាតាកក៏វាយលុកដណ្ដើមយកខែត្រចន្ទតាប៊ុន រួចហើយក៏ដឹកនាំទ័ពដែលមានចំនួនកាន់តែច្រើនឡើងទៅវាយពួកភូមាទៀត ។ ភ្យាតាកវាយឈ្នះពួកភូមានៅសមរភូមិជាច្រើន ហើយបានរុញច្រានពួកនេះឱ្យដកថយចេញពីព្រះរាជាណាចក្រទៅ ។ ជ័យជម្នះទាំងអស់នេះ បានធ្វើឱ្យភ្យាតាកក្លាយទៅជាមនុស្សអស្ចារ្យជាងគេនៅក្នុងស្រុកសៀម ប្រជារាស្ដ្រទាំងអស់ទទួលស្គាល់ក្នុងឋានៈជាមេដឹកនាំ ។ ភ្យាតាកបានមកតាំងរាជវាំងនៅបាងកក ប្ដូរឈ្មោះដាក់ថា ចាណាបុរី វិញ ត្រង់កន្លែងដែលព្រះនរាយណ៍បានធ្វើសម្បទានប្រគល់ឱ្យប្រទេសបារាំងពីមុន ដែលនៅជាកម្មសិទ្ធិរបស់ពួកបារាំងនៅឡើយ ថ្វីបើបារាំងមិនបានមកតាំងទីនៅក៏ដោយ ។
ភ្យាតាកចង់ឱ្យព្រះរាជាខ្មែរទទួលស្គាល់អធិរាជភាពរបស់សៀម ហើយចាត់ទុកកម្ពុជាជានគរសាមន្ដរាជមួយ ដូចដែលស្ដេចសៀមមុនៗតែងតែគិតអីចឹងដែរ ក៏ចាត់បញ្ជូនរាជទូតឱ្យនាំសារមកថ្វាយ មានអត្ថន័យថា «សូមឱ្យព្រះរាជាកម្ពុជារក្សាទុកនូវប្រពៃណីដែលធ្លាប់មានតាំងតែពីមុន កុំបីគិតដល់ការផ្លាស់ប្ដូរដែលកើតមានឡើងអាស្រ័យដោយព្រឹត្ដិការណ៍ធំៗប៉ះពាល់ដល់ព្រះរាជាណាចក្រសៀមនោះ» ហើយថាព្រះរាជាកម្ពុជាត្រូវលើកសួយសារអាករទៅថ្វាយ ដូចដែលព្រះរាជាមុនៗធ្លាប់បានអនុវត្ដកន្លងមក ។ រាជពង្សាវតារក៏មាននិយាយ ផងដែរថា ព្រះអង្គបានទាមទារឱ្យខ្មែរបញ្ជូនអ្នកអង្គម្ចាស់សៀមមួយអង្គ ដែលរត់មកជ្រកកោននៅក្នុងរាជវាំង ឧត្ដុង្គទៅវិញទៀតផង ។
ពេលនោះព្រះរាជាកម្ពុជាព្រះឧទ័យសុរិយោពណ៌ដែលធ្លាប់តែជាស្ដេចបះបោរមួយអង្គ ហើយដែលបានឡើងសោយរាជ្យដោយសារតែការចងសម្ព័ន្ធមេត្រីជាមួយអាណ្ណាម រួចបានប្រគល់ខែត្រ២ឱ្យ និងធ្លាប់បានធ្វើឃាតរាជវង្សជាច្រើនអង្គដើម្បីកុំឱ្យមករារាំងការឡើងគ្រងរាជបល្ល័ង្ករបស់ព្រះអង្គ គឺជាសត្រូវនឹងអតីតព្រះរាជាណាចក្រសៀមដែលតែងតែទំនុកបម្រុង ជំរុញឱ្យមានស្ដេចប្រឆាំងនឹងស្រុកខ្មែរឥតដាច់ ទ្រង់មិនទទួលស្គាល់ថា រាស្ដ្រសាមញ្ញម្នាក់អាចឡើងសោយរាជ្យលើរាជបល្ល័ង្កសៀមបានទេ ទោះបីថាជននោះបានជួយសង្គ្រោះរំដោះប្រទេសពីការត្រួតត្រារបស់សត្រូវក៏ដោយ ។ ទ្រង់បានចាត់ទុកភ្យាតាកថាមិនមានឋានៈស្មើនឹងព្រះអង្គទេ ។ ព្រះអង្គបានតបព្រះរាជសារទៅវិញថា «ទ្រង់មិនអាចចរចាស្មើភាពគ្នាជាមួយមនុស្សម្នាក់ដែលកើតចេញពីពាណិជ្ជករចិនម្នាក់ជាមួយនឹងស្រីសៀមសាមញ្ញម្នាក់បានទេបើទោះជាថាជននោះមានសមត្ថភាពផ្ទាល់ខ្លួនដូចម្ដេចក្ដី» ។
ទទួលបានរាជសារនេះ ភ្យាតាកច្រឡោតខឹងយ៉ាងខ្លាំង ហើយបានប្ដេជ្ញាថានឹងទម្លាក់ព្រះរាជាកម្ពុជានេះចេញពីរាជបល្ល័ង្កឱ្យបាន ។ ដើម្បីសម្រេចបំណងនេះ ទ្រង់បានចាប់ផ្ដើមបំផុសបំផុលរកស្ដេចប្រឆាំងមួយអង្គ ហើយបានជ្រើសរើសយកអ្នកអង្គម្ចាស់អង្គនន់រាមា ដែលបានរត់ភៀសព្រះកាយមកគង់នៅស្រុកសៀម ជាមួយមន្ដ្រីម្នាក់ដែលធ្លាប់កាប់បំបាក់ទ្រុងរំដោះព្រះអង្គមក ។ ភ្យាតាកបានឱ្យទ័ពសៀមមួយកងជូនព្រះអង្គនន់រាមាធ្វើដំណើរមកកាន់ឧត្ដុង្គកាត់តាមផ្លូវនគរវត្ដ ដើម្បីស្នើប្រគល់ឱ្យនាម៉ឺនសព្វមុខមន្ដ្រីនៅក្នុងព្រះរាជាណាចក្រ ដែលមិនសូវជាពេញចិត្ដនឹងព្រះឧទ័យស្រីសុរិយោពណ៌ប៉ុន្មាននោះសម្រេច ។ ពេលធ្វើដំណើរមកដល់អង្គរវត្ដ កងទ័ពនេះបោះជំរំសម្រាករង់ចាំការប្រយុទ្ធ ។ ព្រះរាជាកម្ពុជាពេលនោះ បានចាត់ឱ្យកេណ្ឌទ័ពមួយកង ដាក់នៅក្រោមបញ្ជាការរបស់លោកក្រឡាហោមប៉ាង ។ ក្រឡាហោមប៉ាងបានត្រូវគេប្រហារបាននៅក្នុងការប្រយុទ្ធដំបូង ក៏ប៉ុន្ដែកងទ័ពខ្មែរដែលមិនមានការតក់ស្លុតព្រោះបាត់បង់មេកោយនោះ បានបន្ដការប្រយុទ្ធរហូតទាល់តែទទួលបានជ័យជម្នះលើទ័ពសៀម ធ្វើឱ្យពួកនេះបែកបាក់រត់ខ្ចាត់ខ្ចាយទៅស្រុកវិញអស់នៅក្នុងឆ្នាំ១៧៦៩ (52) ។
នៅពេលនោះ ម៉ាក់តុងដែលខ្មែរយើងហៅថា ព្រះសុទត្ដ ចៅហ្វាយខែត្រហាទៀង ដែលទទួលដំណឹងពីការវាយប្រហារនេះពីស្ដេចអាណ្ណាម បានសម្រេចចិត្ដធ្វើអន្ដរាគមន៍ជួយព្រះរាជាកម្ពុជា ។ គាត់បានកេណ្ឌទ័ពខ្មែរមួយកងចេញពីខែត្រទ្រាំង និងបន្ទាយមាសរួចបានដឹកនាំទាំងតាមជើងគោក និងតាមជើងទឹកទៅវាយលុកអាណាខែត្រមាត់សមុទ្ររបស់សៀម ។ នៅពេលមកដល់ចន្ទតាប៊ុន ទ័ពម៉ាក់តុងបានជួបប្រយុទ្ធជាមួយទ័ពសៀមមួយកងដែលកំពុងនៅរង់ចាំ ទ័ពសៀមនោះបានវាយឱ្យម៉ាក់តុងបរាជ័យ រត់ចោលទូកក្ដារ និងសម្ភារមួយចំនួន ចូលទៅហាទៀងវិញ ។
ស្ដេចសៀមបានយាងត្រលប់មកបាងកកវិញហើយបានរៀបចំនាវាមួយកងរួចនាំទ័ពឡើងជិះសំពៅជាមួយព្រះអង្គម្ចាស់អង្គនន់រាមា ចេញដំណើរសំដៅមកហាទៀង វាយដណ្ដើមយកខែត្រនេះបាន និងចាប់ក្រុមគ្រួសារម៉ាក់តុងមួយចំនួនជាចំណាប់ខ្មាំង ឯម៉ាក់តុងបានរត់គេចខ្លួនបាត់ទៅ ។ ក្នុងពេលជាមួយគ្នានោះ កងទ័ពជើងគោកសៀមមួយកង ដែលនៅក្រោមបញ្ជាការរបស់យមរាជសៀមម្នាក់ បានឆ្លងកាត់ព្រំដែនខ្មែរភាគខាងជើងធ្វើ ដំណើរកាត់នគរវត្ដ បាត់ដំបង និងពោធិ៍សាត់សំដៅមករករាជធានីឧត្ដុង្គ ។ ភ្យាតាក និងអ្នកអង្គនន់រាមា ក៏បានមកដល់ភ្នំពេញដែរ ដោយធ្វើដំណើរពីហាទៀងមកមិនដល់៦ថ្ងៃផង ព្រោះគ្មានជួបទ័ពទប់ទល់បន្ដិចណាសោះ ។
ដោយខ្លាចសៀមចាប់បាន ព្រះរាជាកម្ពុជាបាននាំព្រះរាជវង្សានុវង្ស និងបរិពារគេចចេញពីឧត្ដុង្គមកចុះនាវានៅកំពង់ហ្លួង ហើយធ្វើដំណើរទៅកាន់ត្រឡុងខ្លុះបាក់អញ្ចៀន ឱ្យលោកយមរាជដឹកនាំទ័ពនាំមុខ ប្រយុទ្ធយ៉ាងអង់អាចជាមួយទ័ពសៀម ។ ពួកអ្នកស្រុកដែលខ្លាចសៀមក៏រត់តាមព្រះរាជាទៅដែរ អ្នកខ្លះទៅដល់មាត់ក្រសះ និងអន្លង់ឫស្សី ខ្លះទៀតទៅដល់ត្រឡុងខ្លុះបាក់អញ្ចៀនដែរ ។
នៅពេលដែលព្រះរាជាកំពុងតែរត់គេចទៅនោះ ទ័ពភ្យាតាក និងអ្នកអង្គនន់រាមាបានធ្វើដំណើរតាមមាត់ទន្លេច្រាបឈាម ចាប់ស្រីៗ និងយករបស់របរអ្នកស្រុកដែលរត់ទៅមាត់ក្រសះអស់ទៅ ។
នៅពេលនោះហើយដែលពួកអាណ្ណាមចាប់ផ្ដើមធ្វើអន្ដរាគមន៍ (53) ដោយកេណ្ឌទ័ពមួយកងមកជួបគ្នាជាមួយនឹងទ័ពលោកយមរាជនៅពាមបញ្ចូសពាស ។ ទ័ពអាណ្ណាម និងខ្មែរបានទទួលជ័យជម្នះលើទ័ពសៀមរួចបានមកដេញភ្យាតាក និងអ្នកអង្គនន់ ចេញពីភ្នំពេញ ឱ្យធ្វើដំណើរទៅហាទៀងវិញ រួចទ័ពសៀម និងភ្យាតាក ក៏ចុះទូកទៅស្រុកសៀមវិញអស់ទៅ ។ ឯអ្នកអង្គនន់ ទ្រង់គង់នៅនឹងហាទៀងនេះជាមួយទ័ពសៀម៥រយនាក់ ប៉ុន្ដែបន្ទាប់មក បានទៅគង់នៅឯកំពតវិញ ដោយមិនអាចការពារហាទៀងទប់ទល់នឹងម៉ាក់តុងបាន ។ ទៅដល់កំពត ទ្រង់បានបន្ដជ្រើសរើសទ័ពបន្ថែមទៀតពីខែត្រជិតខាង ។
នៅភាគខាងជើង ទ័ពសៀមច្បាំងចេះតែចាញ់ជាញឹកញយ ។ ដល់ទទួលដំណឹងថា ភ្យាតាកចុះទូកជាមួយកងទ័ពចេញពីហាទៀងទៅវិញ ក៏យល់ថាខ្លួនកំពុងតែស្ថិតនៅក្នុងគ្រោះមហន្ដរាយហើយ បានបោះបង់ការប្រយុទ្ធ វិលត្រលប់ទៅស្រុកវិញដែរដោយនាំយកទៅជាមួយនូវឈ្លើយសឹក១ម៉ឺននាក់ដែលគេបានប្រមូលផ្ដុំនៅពោធិ៍សាត់ ។ គេនិយាយថា មានអ្នកស្រុកជាច្រើនត្រូវស្លាប់ដោយអត់អាហារតាមផ្លូវ ។
នៅពេលអស់ទ័ពសៀមហើយ ទ័ពលោកយមរាជក៏បែកចេញពីទ័ពអាណ្ណាម ហើយធ្វើដំណើរទៅរកទ័ពអ្នកអង្គនន់រាមា ជួបគ្នានៅនឹងពាមរកា ក៏វាយឱ្យបរាជ័យទៅ (១៧៧១) ។
នៅចុងឆ្នាំ១៧៧១ ព្រះរាជាបានយាងមកគង់ជាបណ្ដោះអាសន្ននៅមាត់កណ្ដុរ ស្ថិតនៅលើទន្លេសាប ចម្ងាយ១០គីឡូម៉ែត្រពីភ្នំពេញ ។ ទ្រង់បានទទួលយករ៉េស៊ីដង់អាណ្ណាមម្នាក់ហៅ បាវហូ មកនៅនឹងព្រះរាជវាំង ។ ធ្វើយ៉ាងនេះ មានន័យថា ព្រះអង្គបានដាក់ព្រះរាជាណាចក្រនៅក្រោមអាណាព្យាបាលរបស់អាណ្ណាមហើយ ។ បន្ទាប់មកព្រះរាជាបានយាងមកគង់នៅនឹងពាក់ព្រ័ត (54) រួចបានចាត់រាជទូតទៅបាងកក ចរចាសន្ដិភាពជាមួយភ្យាតាក ដោយលែងចាត់ស្ដេចសៀមថ្មីនេះថារាស្ដ្រសាមញ្ញមកជ្រែករាជសម្បត្ដិដូចកាលពីប៉ុន្មានឆ្នាំមុនទៀតហើយ ។ ភ្យាតាកមិនព្រមទទួលរាជទូតទាំងអស់នោះទេ ក៏បានឱ្យគេចាប់ឃុំទុក រួចផ្ញើរាជសារមួយមកថ្វាយព្រះរាជាកម្ពុជា និយាយថាការចរចាអាចនឹងមានទៅបានលុះណាតែទ្រង់បញ្ជូនព្រះមាតា និងរាជវង្សានុវង្សទាំងអស់ឱ្យទៅគង់នៅឯស្រុកសៀមសិន ។ ចំណែកឯម៉ាក់តុងវិញ គេក៏ចាប់ចរចាជាមួយស្ដេចសៀម ហើយហាក់ដូចជាបានបោះបង់ការគាំទ្រស្ដេចខ្មែរដែរ ហើយបានទទួលការអនុញ្ញាតពីភ្យាតាកឱ្យក្រុមគ្រួសារដែលស្ដេចសៀមចាប់ទុកជាចំណាប់ខ្មាំងនៅឯបាងកកនោះវិលត្រលប់ទៅហាទៀងវិញ ។ ដើម្បីជាថ្នូរ ម៉ាក់តុងបានយល់ព្រមប្រគល់អ្នកអង្គម្ចាស់សៀមមួយអង្គដែលភៀសខ្លួនមកគង់នៅរាជវាំងកម្ពុជា ហើយដែលព្រះរាជាកម្ពុជាប្រកែកមិនព្រមប្រគល់ឱ្យទៅភ្យាតាក ។ ភ្យាតាកក៏នាំយកអ្នកអង្គម្ចាស់សៀមនោះទៅបាងកកវិញរួចធ្វើឃាតចោលទៅ ។
នៅក្នុងឆ្នាំ១៧៧៤ ព្រះរាជាកម្ពុជាបានយាងចេញពីរាជដំណាក់ពាក់ព្រ័ត មកគង់នៅឯកោះចិន ជាកោះមួយនៅក្នុងទន្លេសាប ស្ថិតនៅចំពីមុខកំពង់ហ្លួង មិនទាន់ហ៊ានយាងត្រលប់ចូលរាជធានីវិញទេ ដោយខ្លាចព្រះអង្គម្ចាស់អង្គនន់រាមា ដែលកំពុងតែឃោសនារើសទ័ពនៅក្នុងអាណាខែត្រខាងលិច ចាប់ព្រះអង្គបាន ។
អនាធិបតេយ្យមានគ្រប់ទីកន្លែង នគរទាំងមូលវិលត្រលប់មករកភាពព្រៃផ្សៃឡើងវិញ ។ មានខែត្រជាច្រើនដែលមិនគោរពព្រះរាជា តែក៏មិនស្ដាប់បញ្ជារបស់ស្ដេចបះបោរដែរ ។ ចៅហ្វាយខែត្រប្រមូលពន្ធបាន តែមិនបានយកមកបង់ជូនរាជការទេ ឯអ្នកប្រមូលពន្ធត្រូវប្រជារាស្ដ្រដេញមិនឱ្យចូលក្នុងភូមិ ។ នៅកន្លែងខ្លះ ប្រជាជនត្រូវគេបង្ខំឱ្យបង់ពន្ធឱ្យភាគីទាំង២ ។ រាស្ដ្ររងទុក្ខវេទនា ជំងឺអាសន្នរោគរាតត្បាត ហើយជំងឺអុតបានធ្វើឱ្យអ្នកស្រុកស្លាប់អស់ជាច្រើន ។
រាជពង្សាវតារបាននិយាយថា នៅទីបញ្ចប់ ដោយទ្រង់មានមេត្ដាករុណាដល់ប្រជានុរាស្ដ្រខ្លាំងពេក ព្រះរាជាក៏សុខព្រះទ័យលះបង់រាជសម្បត្ដិថ្វាយដល់ព្រះអង្គនន់រាមា ជាគូប្រណាំងប្រជែង និងជាសត្រូវផង នៅក្នុងឆ្នាំ១៧៧៥ ។ ទ្រង់សោយរាជ្យបាន១៧ឆ្នាំ ហើយរជ្ជកាលរបស់ព្រះអង្គមានតែទុក្ខវេទនា ។
៣៦. ព្រះអង្គរាមរាជា-អង្គនន់ (១៧៧៥-១៧៧៩)
ព្រះអង្គរាមរាជាជាព្រះរាជបុត្រារបស់ព្រះស្រីជ័យជេដ្ឋា និងជាព្រះរាជនត្ដារបស់ព្រះធម្មោរាជាទី១ ។ ព្រះអង្គមានព្រះជន្ម៣៦ព្រះវស្សាហើយនៅពេលដែលទ្រង់ទទួលព្រះរាជាភិសេកក្រោមព្រះនាមថា «ព្រះបាទសម្ដេចស្ដេចព្រះរាជឱង្ការព្រះរៀមរាជាធិរាជបរមបពិត្រ» ។ ព្រះរាជាមុនដែលដាក់រាជ្យ បានទួលព្រះឋានៈជាព្រះឧភយោរាជ ឯព្រះអង្គថន ជាព្រះអនុជរបស់ព្រះអង្គរាមរាជា បានទទួលព្រះឋានៈជាព្រះឧបរាជធំ ។
ដោយមានការព្រួយបារម្ភខ្លាចពួកអាណ្ណាមដែលប្រឆាំងនឹងការឡើងសោយរាជ្យរបស់ព្រះអង្គ ធ្វើការវាយប្រហារមកលើ ព្រះរាជាបានចេញព្រះរាជបញ្ជាឱ្យធ្វើកាំភ្លើងធំ កាំភ្លើងតូច រំសេវ គ្រាប់កាំភ្លើងធំ គ្រាប់កាំភ្លើងតូច ហើយបានឱ្យសង់បន្ទាយការពាររឹងមាំ២ មួយនៅភ្នំពេញ មួយទៀតនៅមុខកំពូល ។ ក៏ប៉ុន្ដែចៅហ្វាយក្រុងសាយហ្គន និងស្ដេចយ៉ាឡុង (ង្វៀងភុកធន់) ដែលសោយរាជ្យនៅរាជធានីវ៉េពេលនោះមានការរវល់នឹងរឿងផ្សេងទៅវិញ ។ នោះគឺពួកអ្នកភ្នំខាងកើត ឬតៃសឺននៅនឹងតៃភូបានបះបោរឡើងក្រោមការដឹកនាំរបស់បងប្អូន២នាក់ ឈ្មោះឌុកអុងថាញ់និងឌុកអុងឯម (៥៥) ហើយធ្វើការគំរាមកំហែងមកលើរាជធានីវ៉េក្នុងឆ្នាំ១៧៧៥ ។ ចំណែកនៅកូសាំងស៊ីនខាងក្រោមវិញ មានការបះបោរមួយកើតឡើង ធ្វើឱ្យចៅហ្វាយខែត្រអាណ្ណាមឈ្មោះ ចាសចេ មានការលំបាកនឹងបង្ក្រាបយ៉ាងខ្លាំង ។ ម្ល៉ោះហើយពួកនេះមិនបានបើកការវាយប្រហារមកលើកម្ពុជាទេ ផ្ទុយទៅវិញ គេបានសំណូមពរឱ្យកម្ពុជាជួយទៅវិញ ។ ក៏ប៉ុន្ដែព្រះរាជាកម្ពុជាបានប្រកែក មិនចង់មានទំនាក់ទំនងជាមួយពួកអាណ្ណាម ដែលធ្លាប់តែវាយប្រហារមកលើព្រះអង្គ មុនពេលដែលទ្រង់បានឡើងសោយរាជ្យឡើយ ។
ចៅហ្វាយក្រុងសាយហ្គនមិនបានអង្វរករអ្វីទៀតទេ ប៉ុន្ដែនៅពេលដែលបង្ក្រាបការបះបោររួច គេក៏បែរមករកធ្វើសង្គ្រាមសងសឹកនឹងកម្ពុជាតែម្ដង ។ គាត់បានដឹកនាំទ័ពឡើងតាមទន្លេ រហូតមកដល់ភ្នំពេញ ដោយគ្មានជួបប្រទះការទប់ទល់អ្វីឡើយ ។ ប៉ុន្ដែមកដល់ភ្នំពេញ មានទ័ពខ្មែរមួយកងកំពុងតែរង់ចាំជាស្រេច ។ មានការប្រយុទ្ធគ្នាចំនួន២០លើកនៅជុំវិញរាជធានី ពួកអាណ្ណាមត្រូវបរាជ័យស្ទើរតែរាល់លើក ។ នៅពេលដែលច្បាំងទៅបាត់បង់កម្លាំងអស់ច្រើនពេក ហើយការផ្គត់ផ្គង់ស្បៀងក៏លំបាក ព្រោះអ្នកស្រុកបះបោរប្រឆាំងគ្រប់ទិសទី ជាពិសេសពីខាងក្រោយ ពួកអាណ្ណាមក៏បែរខ្នងរត់ត្រលប់ទៅកូសាំងស៊ីនវិញទៅនៅចុងឆ្នាំ១៧៧៦ ។
ព្រះរាជាបានដឹកនាំទ័ពដេញតាមរហូតដល់ហួសព្រំដែន ដណ្ដើមយកបានខែត្រវិញឡុង និងមីថមកវិញ ។ គេនិយាយថាទ្រង់បានបំផុសបំផុលពួកអ្នកស្រុកកូសាំងស៊ីនដែលមានកំហឹងនឹងពួកអាណ្ណាមស្រាប់ឱ្យកាប់សម្លាប់ពួកអាណ្ណាមឱ្យអស់ពីទឹកដី ក៏ប៉ុន្ដែបានព្រះឧភយោរាជ និងព្រះឧបរាជធំឃាត់ ។
នៅក្នុងឆ្នាំ១៧៧៧ វិបុលរាជស្រី ដែលជាជំនួយការរបស់លោកក្រឡាហោមរដ្ឋមន្ដ្រីខាងទ័ពជើងទឹក ដោយយល់ឃើញថា ព្រះឧបរាជអង្គធំជាមនុស្សតែម្នាក់គត់ដែលអាចទាមទារយករាជបល្ល័ង្កបាន ក៏សុំការអនុញ្ញាតចូលគាល់ហើយថ្វាយយោបល់ឱ្យទ្រង់យល់ព្រមធ្វើគុតព្រះរាជាជាព្រះរៀមដើម្បីដណ្ដើមរាជសម្បត្ដិ ។ ព្រះឧបរាជធំបានច្រានចោលមតិនេះ ក៏ប៉ុន្ដែទ្រង់មិននិយាយស្ដីអ្វីទេ ព្រោះថាតាមពិតទៅទ្រង់ក៏ចង់បានរាជបល្ល័ង្កបន្ដពីព្រះរៀមដែរ ។ វិបុលរាជស្រីភ័យខ្លួន ខ្លាចព្រះឧបរាជធំចោទប្រកាន់ ក៏ទៅចូលគាល់ព្រះរាជាទូលបង្កាច់ថាព្រះឧបរាជធំក្បត់បានចាត់ឱ្យខ្លួនមកធ្វើគុតព្រះរាជា ។ ព្រះរាជាទ្រង់ជឿសម្ដីវិបុលរាជស្រី ហើយបានផ្ទុកផ្ដាក់ឱ្យជននេះធ្វើគុតព្រះឧបរាជវិញ នៅពេលដែលទ្រង់ក្រសាលបាស្កាជាមួយ ហើយញាក់ភ្នែកធ្វើសញ្ញា ។ ព្រះរាជាបានបបួលព្រះឧបរាជធំលេងបាស្កានៅនឹងរានហាលដំណាក់ឧត្ដុង្គ តែទ្រង់មិនបានឱ្យសញ្ញាសោះ ។ ស្អែកឡើង ទ្រង់ក្រសាលទៀត តែនៅតែមិនផ្ដល់សញ្ញាដដែល ធ្វើឱ្យវិបុលរាជស្រីមានការអស់សង្ឃឹមជាខ្លាំង បារម្ភខ្លាចតែព្រះរាជាបានពិភាក្សាសាកសួរព្រះអនុជដឹងរឿងរ៉ាវសព្វគ្រប់ទេដឹង ព្រោះថាព្រះឧបរាជ នឹងធឹងខ្លាំងណាស់ ហាក់ដូចជាគ្មានអារម្មណ៍ច្របូកច្របល់អ្វីបន្ដិចសោះឡើយ ។ វិបុលរាជស្រីបានចូលគាល់ព្រះរាជាម្ដងទៀត ហើយទូលព្រះអង្គអះអាងថាព្រះអនុជបានរៀបចំអាវុធយុទ្ធភណ្ឌទុកនៅក្នុងព្រះរាជដំណាក់ អំពើក្បត់នៅតែពេលនឹងផ្ទុះឡើងប៉ុណ្ណោះ ព្រះរាជាត្រូវចាត់ការឱ្យរហ័សទើបទប់ស្កាត់ទាន់សភាពការណ៍ ។ ព្រះរាជាចាប់មានការភិតភ័យជាខ្លាំង ហើយបានសន្យាថា ទ្រង់នឹងធ្វើសញ្ញាឱ្យនៅក្នុងពេលលេងបាស្កាល្ងាចនេះ ។ ពេលលេងបាស្កាម្ដងទៀត ទ្រង់នៅតែមិនបានឱ្យសញ្ញាដដែល ព្រោះខ្លាចចាញ់បញ្ឆោតវិបុលរាជ ។ ប៉ុន្ដែនៅពេលដែលទ្រង់ងាកព្រះភ័ក្ដ្រមើលទៅវិបុលរាជ ជននេះចាត់ទុកថា នោះជាសញ្ញាដែលព្រះរាជាឱ្យហើយក៏ដកកាំបិតស្នៀតចាក់មកលើចង្កេះឆ្វេងរបស់ព្រះឧបរាជ ធ្វើឱ្យព្រះឧបរាជស្រែកយ៉ាងខ្លាំង ហើយដួលទៅឱបជើងព្រះរាជា ។ ព្រះរាជារំភើបខ្លាំងណាស់ ក៏ឱនចាប់បីព្រះអនុជឡើង បបោសអង្អែល និងព្រះកន្សែងសោកាជាខ្លាំង ធ្វើឱ្យព្រះឧបរាជយល់ថា ព្រះរៀមចាញ់បោកគេហើយ ។ ព្រះឧបរាជក៏រៀបរាប់ថ្វាយព្រះរៀមអំពីរឿងដែលវិបុលរាជស្រីបានទៅបញ្ចុះបញ្ចូលព្រះអង្គ ព្រះអង្គបានប្រកែក ប៉ុន្ដែព្រះអង្គនៅស្ងៀម មិនបានទូលរឿងនេះថ្វាយ ហើយទ្រង់ថាសុំទោសចំពោះការដែលមិនបានរាយការណ៍ថ្វាយនេះ ។ ព្រះរាជាក៏ចេញបញ្ជាភ្លាម ឱ្យគេចាប់វិបុលរាជស្រី ប្រគល់ឱ្យចៅក្រមដាក់ទោសទៅតាមច្បាប់ នៅក្នុងខែធ្នូ ឆ្នាំ១៧៧៧ ។
វិបុលរាជស្រីនេះបានប្រព្រឹត្ដខុសឆ្គងម្ដងរួចមកហើយកាលពីមួយ ឬពីរឆ្នាំមុន ហើយត្រូវបានព្រះរាជាប្រោសប្រណីលើកទោសឱ្យ ។ ជននេះបានស្រលាញ់ស្នំម្នាក់ដែលព្រះរាជាសព្វព្រះទ័យ ទើបតែលើកធ្វើជាស្នំឯកនៅក្នុងព្រះរាជវាំង ។ ដោយត្រូវធ្វើឱ្យភ្ញាក់ផ្អើលពេលទតឃើញវិបុលរាជនេះនៅលើទែនសយនាស្នំឯក នៅពេលដែលទ្រង់ទើបតែយាងចេញបានបន្ដិច ដើម្បីទៅបំពេញកិច្ចការសំខាន់មួយ ជននេះបានស្ទុះទៅកញ្ឆក់យកដាវមួយមកកាន់គំរាមព្រះរាជាដើម្បីបើកផ្លូវរត់ចេញ ។ ពួកអ្នកយាមឃើញដូច្នេះ ស្រឡាំងកាំង មិនដឹងថាមានរឿងហេតុអ្វីកើតឡើងនៅក្នុងព្រះរាជដំណាក់ ក៏បណ្ដោយឱ្យវិបុលរាជរត់ចេញទៅ ។ ប៉ុន្ដែ ដល់ដឹងរឿងរ៉ាវសព្វគ្រប់ពួកអ្នកយាមនោះក៏នាំគ្នាដេញតាម ហើយបាញ់ព្រួញត្រូវវិបុលរាជត្រង់ឆ្អឹងជំនីរ ដួលដេកនឹងដី ។ ប៉ុន្ដែ ព្រះរាជាទ្រង់បានលើកទោសកំហុសឱ្យទៀត ។ វិបុលរាជមកទូលព្រះរាជាបង្ខូចព្រះឧបរាជថា មានបំណងចង់ធ្វើឃាតព្រះរាជា ដោយទូលថាដើម្បីសងគុណព្រះអង្គ ដែលបានលើកលែងទោសឱ្យពីមុននោះឯង ។ ទោសកំហុសលើកនេះជាក់ស្ដែងខ្លាំងណាស់ ក៏ប៉ុន្ដែគេគិតថាព្រះរាជាដែលធ្លាប់លើកទោសកំហុសឱ្យវិបុលរាជម្ដងមកហើយ ទ្រង់សព្វព្រះទ័យនឹងជននេះខ្លាំងណាស់ ណាមួយទ្រង់បានជឿទៅលើសម្ដីបងប្អូនរបស់វិបុលរាជទាំង៤នាក់គឺ តេជោទែន ចៅហ្វាយស្រុកកំពង់ស្វាយ ពាង ចៅហ្វាយស្រុកបារាយណ៍ សូរ ចៅហ្វាយស្រុកព្រៃក្ដី និងមូ ចៅហ្វាយស្រុកទ្រាំង ថាព្រះឧបរាជធំពិតជាបានរៀបផែនការក្បត់ព្រះអង្គមែន ហើយបានស្នើសុំឱ្យព្រះអង្គលើកលែងទោសឱ្យម្ដង ទៀត ។ ព្រះឧភយោរាជ ក្រោយពីបានជ្រាបអំពីឧក្រិដ្ឋកម្មនេះ ហើយ ដោយកំពុងតែប្រឈួន ស្រាប់ ទ្រង់ មានព្រះទ័យរំជើបរំជួលខ្លាំងណាស់ ណាមួយទ្រង់បារម្ភចំពោះខ្លួនព្រះអង្គផង ទើបថ្វាយព្រះយោបល់ដល់ព្រះរាជាថា ត្រូវដាក់ទោសវិបុលរាជស្រីឱ្យធ្ងន់ជាទីបំផុត ។ ប៉ុន្ដែព្រះឧភយោរាជបានសុគតប៉ុន្មានថ្ងៃក្រោយមកក្នុងព្រះជន្ម៣៨ព្រះវស្សា ។ គេនិយាយថាទ្រង់ក៏ត្រូវគេលួចធ្វើឃាតដូចជាព្រះអនុជអីចឹងដែរ ។ ខ្ញុំបានស្គាល់តាចាស់ម្នាក់ ដែលជីតារបស់គាត់មានជាប់ពាក់ព័ន្ធនឹងរឿងនេះ បាននិយាយថា គាត់ធ្លាប់ឮឪពុកគាត់ប្រាប់ថា ព្រះឧភយោរាជត្រូវសុគតដោយគេធ្វើឃាតចាក់នឹងដាវធ្លុះព្រះកាយ ។ ពេលនោះមន្ដ្រីទាំងឡាយមិនបានគិតដល់រឿងអ្វីវែងឆ្ងាយទេ ក៏សម្រេចកាត់ទោសសម្លាប់វិបុលរាជស្រីចោលទៅ ។
ការកាត់ទោសប្រហារវិបុលរាជស្រីនេះ បានធ្វើឱ្យម្ដាយឈ្មោះ ជំទាវឡាង មានកំហឹងជាខ្លាំង ហើយសម្រេចចិត្ដធ្វើការសងសឹកវិញ ប៉ុន្ដែមិនមែនសងសឹកនឹងពួកចៅក្រមទេ គឺសងសឹកនឹងព្រះរាជាតែម្ដង ព្រោះគឺព្រះរាជានេះឯងដែលបានឱ្យសញ្ញាឱ្យសម្លាប់ព្រះឧបរាជក្បត់ ហើយបែរមកចាប់កំហុសអ្នកទទួលរាជបញ្ជាទៅវិញ ។ ជំទាវឡាងបានទៅសុំយកសពវិបុលរាជស្រីមកធ្វើបុណ្យយ៉ាងអធិកអធម រួចហើយបញ្ចុះបញ្ចូលកូនគាត់ទាំង៤នាក់ទៀត ឱ្យនាំគ្នាបះបោរឡើងប្រឆាំងនឹងព្រះរាជា ។ ក៏ប៉ុន្ដែចៅហ្វាយខែត្រទាំងអស់នោះ ថ្វីបើគោរពម្ដាយនឹកអាណិតពេលឃើញទឹកភ្នែកគាត់ហូរធ្លាក់មក និងឃើញគាត់បញ្ចេញកំហឹងទៅលើព្រះរាជាក៏ដោយក៏ពួកគេមិនចង់ធ្វើតាមគាត់ដែរ ។ រឿងរ៉ាវហាក់ដូចជាស្ងប់ទៅវិញ ទទួលពេលបុណ្យភ្ជុំបិណ្ឌចូលមកដល់ ។ ជំទាវឡាងបានអញ្ជើញទៅវត្ដយកចង្ហាន់ទៅប្រគេនលោកឧទ្ទិសកុសលជូនដល់មាតាបិតាជីដូនជីតាដូចធម្មតា រួចហើយគាត់បានហៅកូនទាំង៤ទៅផ្ទះ ដើម្បីបំពេញពិធីក្នុងគ្រួសារបន្ថែមទៀត ។ ទៅដល់ផ្ទះ គាត់យកអដ្ឋិធាតុរបស់វិបុលរាជស្រី ដែលដាក់ក្នុងកោដិមាសមកបង្ហាញ ហើយនិយាយថាធាតុរបស់បងកូនទាំងអស់គ្នានេះកំពុងតែដង្ហោយហៅឱ្យកូនសងសឹកជួស ដូច្នេះកូនត្រូវតែប្រមែប្រមូលមិត្ដភក្ដិ បក្សពួក ញាតិមិត្ដទាំងឡាយ បង្កើតជាទ័ពមួយជាប្រញាប់ដើម្បីសងសឹកនឹងព្រះរាជា ។ ចៅហ្វាយខែត្រទាំង៤ស្រាប់តែច្រឡោតខឹងតាមការញុះញង់របស់លោកជំទាវជាម្ដាយ ក៏សន្យាថានឹងសងសឹកព្រះរាជាវិញ រួចវិលត្រលប់ទៅកាន់ខែត្ររៀងៗខ្លួន ក្នុងចិត្ដនឹកគិតតែអំពីរៀបចំផែនការសងសឹកប៉ុណ្ណោះ ។
នៅឆ្នាំបន្ទាប់ ស្ដេចសៀមភ្យាតាកបានចងសម្ព័ន្ធមេត្រីភាពជាមួយព្រះរាជាកម្ពុជាហើយបានរៀបចំផែនការទៅវាយស្ដេចលាវដែលសោយរាជ្យនៅវៀងចន្ទ ដោយសុំជំនួយពីទ័ពខ្មែរ១ម៉ឺននាក់ ។ សម្ព័ន្ធមេត្រីភាពជាមួយសៀមដើម្បីវាយលាវដែលកម្ពុជាមិនដែលមានផលរមាស់អ្វីបន្ដិចសោះនោះ បានធ្វើឱ្យព្រះរាជាអស់ប្រជាប្រិយភាព ។ នៅក្នុងខែត្រកំពង់ស្វាយដែលទ័ពត្រូវដើរកាត់ គឺមួយកងបានសំដៅទៅរកចំប៉ាសាក់ និងមួយកងទៀតសំដៅទៅរកទន្លេមេគង្គ គេបានកេណ្ឌស្រីៗឱ្យបុកស្រូវដែលប្រមូលបានពីអ្នកស្រុក ធ្វើអង្ករឱ្យកងទ័ព ធ្វើឱ្យអ្នកស្រុកខឹងសម្បាបះបោរឡើង ។ ពេលទៅដល់ស្រុកលាវ មានទាហានមួយចំនួនដែលគេរើសចេញពីខែត្រកំពង់ស្វាយនេះ បានរត់ចោលជួរត្រលប់មកវិញ ហើយពួននៅក្នុងព្រៃ ។ ព្រះរាជាបានបញ្ជូនមនុស្សឱ្យតាមដើររកពួកដែលរត់ចោលជួរទាំងអស់នោះ ដើម្បីចាប់យកមកដាក់ទោស ក៏ប៉ុន្ដែបេសកជនទាំងនោះ បានត្រូវអ្នកស្រុកព្រួតគ្នាចាប់កាប់សម្លាប់ចោលអស់ ។ តេជោទែន ជាស្ដេចត្រាញ់ដែនដីកំពង់ស្វាយ មិនបានរាយការណ៍អំពីសភាពការណ៍នេះថ្វាយព្រះរាជាទេ ចំណែកឯបងប្អូនគាត់២នាក់ទៀត គឺសែនខាងហ្វ៊ាពាង ចៅហ្វាយខែត្របារាយណ៍ និងមន្ដ្រីស្នេហាសូរ ចៅហ្វាយខែត្រព្រៃក្ដី ក៏មិនបានធ្វើអ្វីដែរ ដើម្បីចាប់ចងពួកទាហានរត់ចោលជួរ និងទប់ទល់កុំឱ្យការបះបោររីករាលដាលថែមទៀត ។ ចៅហ្វាយខែត្រទាំង៣នាក់នេះបានត្រូវគេកោះហៅឱ្យមកចូលគាល់ព្រះរាជានៅបន្ទាយពេជ្ររួចហើយកាត់ទោសប្រហារជីវិត ។ ក៏ប៉ុន្ដែទោសរបស់ពាងចៅហ្វាយខែត្របារាយណ៍ បានត្រូវព្រះរាជាសម្រាលមកត្រឹមបញ្ចុះឋានៈ និងវាយ៥០រំពាត់ ឯស្ដេចត្រាញ់ទែនត្រូវដកដំណែងចេញ ។
អតីតស្ដេចត្រាញ់តេជោទែនបានវិលត្រលប់មកក្នុងខែត្ររបស់ខ្លួនវិញជាមួយនឹងប្អូនប្រុសពាង ហើយក៏តាំងប្រកាសបះបោរប្រឆាំងនឹងព្រះរាជាចាប់ពីឆ្នាំបន្ទាប់មក គឺឆ្នាំ១៧៧៩ ។ ដើម្បីឆ្លើយតបទៅនឹងសកម្មភាពទាំងអស់នេះ ព្រះរាជាបានចាត់ឱ្យបងប្រុសរបស់អ្នកទាំង២ គឺឧកញ៉ាមូ ចៅហ្វាយខែត្រទ្រាំង ដែលកាលពីមុនជាស្ដេចត្រាញ់ដែនដីកំពង់ស្វាយ ជាអ្នកចាប់អ្នកអង្គម្ចាស់អង្គនន់រាមា និងអង្គជ័យដាក់ទ្រុងដែកក្នុងឆ្នាំ១៧៥៧ ឱ្យចេញមកបង្ក្រាប ។ ឈ្មោះមូនេះ ជាមនុស្សសកម្ម នឹងនរមិនឆេវឆាវ ក៏ប៉ុន្ដែនៅក្នុងព្រះរាជវាំងមិនសូវមានគេចូលចិត្ដទេ ព្រោះជាមនុស្សលោភលន់ បើចង់បានអ្វីហើយ គាត់ហ៊ានធ្វើអ្វីៗទាំងអស់ឱ្យតែបានដូចបំណង ។
មូដឹកនាំទ័ពមកដល់កំពង់ធំ ជួបទ័ពបះបោររបស់ប្អូនទាំង២ ក៏ឈប់ចរចាគ្នាសិន ។ នៅទីបញ្ចប់ គាត់ក៏ជឿតាមសម្ដីប្អូន ហើយយល់ព្រមចូលដៃជាមួយ ធ្វើសង្គ្រាមប្រឆាំងនឹងព្រះរាជាវិញ ។ ទាំង៣នាក់បងប្អូន មូ ពាង និងទែន ក៏នាំទ័ពមកកាន់បន្ទាយពាមសែន ដែលវិបុលរាជសួសដកចេញទៅបាត់ ។
ជនក្បត់នេះមានបក្សពួកនៅឯខែត្របាសាក់ និងព្រះត្រពាំង (ត្រាវិញ) ដែលពួកអាណ្ណាមទើបតែដណ្ដើមយកដាក់ជាទឹកដីរបស់គេក៏ចាត់តាំងភ្នាក់ងារទៅជ្រើសរើសកងទ័ពក្នុងចំណោមពួកខ្មែរនៅទីនោះឱ្យឡើងមកវាយយកបន្ទាយពេជ្រ ដែលនៅចម្ងាយតែប៉ុន្មានគីឡូម៉ែត្រប៉ុណ្ណោះពីឧត្ដុង្គ ។ ទ័ពបះបោរក៏លើកមកដណ្ដើមយកបន្ទាយនេះបាន ហើយចាប់អ្នកអង្គម្ចាស់អង្គអេង ជាបុត្រារបស់ព្រះឧភយោរាជឧទ័យសុរិយោពណ៌ ដែលសុគតទៅកាលពីខែធ្នូ ឆ្នាំ១៧៧៧ ហើយដែលទើបតែមានព្រះជន្ម៦ព្រះវស្សាប៉ុណ្ណោះ ។ រួចហើយជនក្បត់នេះបានចាប់បុត្រា៤អង្គទៀតរបស់ព្រះរាជានុសិទ្ធិឱ្យគេសម្លាប់ចោល ទើបចាកចេញទៅវិញ ដោយនាំយកព្រះរាជទ្រព្យទាំងអស់ទៅជាមួយផង ក្រោយពីបានបញ្ជាឱ្យដុតព្រះរាជមន្ទីរចោលរួចហើយ ។
អ្នកស្រុកត្រូវរត់ចោលផ្ទះសម្បែង ព្រោះពួកអាណ្ណាមដែលពួកបះបោរបានហៅមក ដេញពីក្រោយតាមធ្វើបាប និងដណ្ដើមយកទ្រព្យសម្បត្ដិ ។ គម្ពីរសាស្ដ្រាក្បួនច្បាប់ផ្សេងៗដែលមាននៅតាមវត្ដអារាម បានត្រូវពួកនេះបោះគ្រវាត់ចោលទៅក្នុងទឹក អណ្ដែតពាសពេញទន្លេ ធ្វើឱ្យប្រជាជនទាំងមូលអស់សង្ឃឹមយ៉ាងខ្លាំង ។ រាជពង្សាវតាររៀបរាប់ថាមាននារីៗជាច្រើននាក់ស្រែកយំនៅពេលដែលឃើញក្បួនច្បាប់ជំនឿសាសនានេះ បានត្រូវគេបំផ្លិចបំផ្លាញឱ្យខូចខាតបាត់បង់យ៉ាងនេះ ។
នៅពេលនោះព្រះរាជាទ្រង់កំពុងតែគង់នៅឯកំពង់ធំ ។ ពេលទ្រង់បានទទួលព័ត៌មានស្ដីពីអំពើឃោរឃៅទាំងនេះ ហើយឃើញវិបុលរាជសួសបង្ហាញខ្លួនក្បែរៗរាជធានី ព្រះអង្គក៏យាងត្រលប់មកវិញ ហើយបានជួបប្រយុទ្ធជាមួយទ័ពពួកបះបោរនៅកំពង់ឆ្នាំង ។ ដោយមិនអាចវាយយកជ័យជម្នះបាននៅព្រែកបូពាង ណាមួយទ្រង់បារម្ភខ្លាចវិបុលរាជ ដែលនៅកំពង់ពេជ្រលើកគ្នាមកព្រួតវាយថែមទៀតនោះ ព្រះអង្គក៏ភៀសព្រះកាយចេញពីសមរភូមិ ថយទៅជ្រកព្រះកាយនៅភ្នំកំរៀង ក្នុងខែត្រក្រង ។
គេនិយាយថា នៅទីនោះ ព្រះរាជាទ្រង់ទាល់ព្រះតម្រិះមិនដឹងថាតើត្រូវធ្វើយ៉ាងណាទេ ស្រាប់តែលេចលោកធុតង្គមួយអង្គឈ្មោះថា សីលមាស ចេញមកទូលសុំអនុញ្ញាតដឹកនាំទ័ពហើយធានាថានឹងដណ្ដើមយកជ័យជម្នះមកថ្វាយ ។ ព្រះរាជាដែលកំពុងតែអស់សង្ឃឹមទៅហើយ ក៏យល់ព្រមតាម ។ ប៉ុន្ដែសីលមាសក៏មិនមានសំណាងល្អជាងព្រះរាជាប៉ុន្មានដែរ គាត់បានចេញប្រយុទ្ធ តែមិនបានជោគជ័យសោះ ។ នៅពេលនោះ មូ បានទទួលព័ត៌មានច្បាស់ថាព្រះរាជាទ្រង់គង់នៅឆ្ងាយពីកងពលរេហ៍ និងមានតែសេនាបន្ដិចបន្ដួចប៉ុណ្ណោះនៅការពារ ហើយដាច់ស្បៀងគ្មានគ្រឿងសាស្ដ្រាវុធផង ក៏នាំទ័ពចូលរហូតមកដល់កន្លែងដែលព្រះអង្គគង់នៅ ចាប់ព្រះអង្គនាំយកទៅដល់បឹងខ្យង (៥៦) នៅខាងត្បូងឧត្ដុង្គ រួចចាប់ជ្រមុជក្នុងទឹកសម្លាប់ព្រះអង្គទៅ នៅក្នុងខែសីហា ឆ្នាំ១៧៧៩ ត្រូវនឹងមហាសករាជ១៧០១ (ចុល្លសករាជ១១៤១) ។
ព្រះអង្គរាមរាជា សោយរាជ្យបាន៤ឆ្នាំ ។ ពេលនោះ ទ្រង់មានព្រះជន្ម៣៩ព្រះវស្សា ។
៣៧. រយៈកាលចន្លោះរាជ្យ (១៧៧៩)
មូ ដណ្ដើមអំណាចបាន រួចបានប្រកាសខ្លួនជាចៅហ្វ៊ា គឺថ្នាក់ជានាយករដ្ឋមន្ដ្រី ។ គាត់បានលើកឧកញ៉ា អធិវង្សាប៉ុក ឪពុកចិញ្ចឹមរបស់អ្នកអង្គម្ចាស់អង្គអេង ឱ្យឡើងធ្វើជាឧកញ៉ាវាំង ឯព្រះអង្គអេងផ្ទាល់ជាព្រះមហាឧបរាជ ។ វិបុលរាជសួសបានឡើងជាឧកញ៉ាក្រឡាហោមគឺរដ្ឋមន្ដ្រីទ័ពជើងទឹក ។ ពាងប្អូនរបស់គាត់គាត់ឱ្យឡើងជាឧកញ៉ាចក្រី គឺរដ្ឋមន្ដ្រីខាងសង្គ្រាម ។ ក៏ប៉ុន្ដែប្រជារាស្ដ្រ និងនាម៉ឺនសព្វមុខមន្ដ្រីចង់ឱ្យមានស្ដេចសោយរាជ្យមួយអង្គ ។
ថ្វីបើមានឧទាហរណ៍ហូរហែមកពីខាងប្រទេសភូមា ដែលអាឡោងផ្រាបានដណ្ដើមយករាជបល្ល័ង្កនៅក្នុងឆ្នាំ១៧៥៣ និងពីប្រទេសសៀមដែលភ្យាតាកបានប្រកាសខ្លួនជាព្រះរាជាក្នុងឆ្នាំ១៧៦៧ក៏ដោយក៏ប៉ុន្ដែចៅហ្វ៊ា មូ មិនបានអនុវត្ដតាម ឬក៏មានមហិច្ឆតាខ្ពស់ដល់ម្លឹងពេកទេ ។ គាត់បានរៀបចំឱ្យធ្វើការជ្រើសរើសរកព្រះរាជាមួយអង្គចេញពីក្នុងព្រះរាជវង្សានុវង្ស ទៅតាមបំណងរបស់ប្រជារាស្ដ្រ និងប្រពៃណីពីបុរាណ ។
៣៦. ព្រះអង្គអេង (១៧៧៩-១៧៩៦)
នាម៉ឺនសព្វមុខមន្ដ្រី និងចៅហ្វ៊ាមូបានឯកភាពគ្នាជ្រើសតាំងអ្នកអង្គម្ចាស់អង្គអេង ដែលត្រូវជាបុត្ររបស់ព្រះឧភយោរាជស្រីសុរិយោពណ៌ (ព្រះឧទ័យ) ដែលសុគតនៅឆ្នាំ១៧៧៧ ឱ្យឡើងគ្រងរាជសម្បត្ដិទាំងព្រះអង្គទើបតែមានព្រះជន្មាយុ៦ព្រះវស្សាប៉ុណ្ណោះ ។ ធ្វើយ៉ាងនេះ ចៅហ្វ៊ាមូ គាត់អាចគេចផុតពីការទិតៀនរបស់សាធារណមតិ ក៏ប៉ុន្ដែគាត់នៅរក្សាអំណាចបានដដែល ។
ជនណាធ្វើការរំខាន ចៅហ្វ៊ាមូបណ្ដេញជននោះចេញ ក្នុងនោះរួមមានទាំងឧកញ៉ាបែន ដែលជាឧកញ៉ាយោមរាជ របស់ព្រះបិតាព្រះរាជាផងដែរ ។ ក្រោយមក ចៅហ្វ៊ាមូបានបញ្ជូនឧកញ៉ាបែនទៅឱ្យស្ដេចសៀមភ្យាតាក តាមរយៈការស្នើសុំរបស់អ្នកអង្គម្ចាស់អង្គកែវឌួង ដើម្បីធ្វើទណ្ឌកម្មតបទៅនឹងការដែលបែនបានប្រយុទ្ធតទល់នឹងព្រះអង្គ ពេលព្រះអង្គដឹកនាំទ័ពចូលមកក្នុងកម្ពុជា ។
ភ្យាតាត នៅពេលដែលពិនិត្យឃើញថាការគ្រប់គ្រងប្រទេសកម្ពុជាចុះទន់ខ្សោយបែបនេះ ក៏គិតថា ខ្លួនអាចដណ្ដើមយកស្រុកនេះបាន ហើយក៏រៀបចំទ័ពជា៣កង មួយកងៗមានគ្នា៧ពាន់នាក់ រួចឱ្យចេញដំណើរមកវាយយកបន្ទាយពេជ្រនៅជិតឧត្ដុង្គ នគរវត្ដ និងកំពង់ស្វាយ ។ ចៅហ្វ៊ាមូមិនព្រងើយកន្ដើយទេ គាត់បានចេញបញ្ជាឱ្យកេណ្ឌទ័ពជាច្រើននៅតាមបណ្ដាខែត្រដែលទទួលការគំរាមកំហែងភ្លាម ។ គាត់ដឹងថាការប្រយុទ្ធនឹងបុកសំដៅមករករាជធានី ដែលជាចំណុចសំខាន់នៃសង្គ្រាម ដូច្នេះត្រូវរៀបចំការពារទីតាំងរបស់រដ្ឋាភិបាលឱ្យបានរឹងមាំទើបគាត់ចេញបញ្ជាប្រមូលកម្លាំងទ័ពទាំងអស់ក្នុងព្រះនគរឱ្យមកឈរជើងនៅជុំវិញឧត្ដុង្គនៅត្រង់កំពង់ហ្លួង ពាមជំនីក និងកំពង់រទេះ ហើយចាត់ឱ្យកសាងបន្ទាយការពារយ៉ាងរឹងមាំនៅទីទាំងនោះ ។ គាត់ប្ដេជ្ញាថានឹងតស៊ូប្រយុទ្ធរហូតដង្ហើមចុងក្រោយបង្អស់ ។ គាត់បានចាត់មនុស្សនាំបញ្ជាទៅឱ្យអ្នកស្រុកក្រចេះ សម្បុក និងសម្បូរ នៅលើទន្លេមេគង្គ ឱ្យប្រមូលទូកយកមកទុកនៅកៀនស្វាយ (៥៧) រង់ចាំទទួលបញ្ជា រួចហើយបានបញ្ជូនតំណាងទៅសុំជំនួយពីកូសាំងស៊ីនភាគខាងក្រោម ។ អាណ្ណាមបានបញ្ជូនទ័ពមួយកងតូច ដឹកនាំដោយឧត្ដមសេនីយ៍ឈ្មោះ អុងជរម៉ា មកបោះទ័ពនៅនឹងជ្រោយចង្វា ចំពីមុខភ្នំពេញ ។
ចំណែកយុវក្សត្រព្រះអង្គអេង ត្រូវគេយកមកដាក់នៅជ្រោយចង្វា ឱ្យឆ្ងាយផុតពីការលបវាយឆ្មក់ ដែលអាចនឹងកើតមានឡើង ហើយផ្ទុកផ្ដាក់ឱ្យក្រឡាហោមសួស អតីតវិបុលរាជនៅការពារ ។
ទ័ពខ្មែរដែលដឹកនាំដោយពញាតេជោទែនបានត្រូវទ័ពសៀមវាយឱ្យបរាជ័យនៅកំពង់ស្វាយ ។ ទ័ពសៀមដែលឈ្នះនោះបានបន្ដធ្វើដំណើរមកកាន់រាជធានីឧត្ដុង្គ ទទួលលេចឮដំណឹងថាស្ដេចសៀមភ្យាតាកធ្លាក់ខ្លួនឆ្កួត ហើយត្រូវពួកអ្នកប្រឆាំងដែលដឹកនាំដោយពញាសានចាប់បាន ក្រោយពីការប្រយុទ្ធអស់៣ម៉ោង ដែលមានការគាំទ្រពីពួកកាន់សាសនាកាតូលិកផង រួចបានត្រូវគេបំបួសជាព្រះសង្ឃតាមសំណូមពរ និងឱ្យគង់នៅក្នុងវត្ដមួយ ដោយមានទាហានយាមការពារយ៉ាងហ្មត់ចត់ ។
មេទ័ពសៀម២នាក់ក្នុងចំណោមមេទ័ពទាំង៣នាក់ដែលជាមេបញ្ជាការប្រយុទ្ធនៅកម្ពុជា ពេលបានទទួលព័ត៌មានខាងលើពីចៅហ្វាយខែត្រកូរ៉ាត ក៏ស្រុះស្រួលគ្នាហើយយល់ព្រមបោះបង់សង្គ្រាម ហើយដឹកនាំទ័ពប្រញិបប្រញាប់វិលត្រលប់ទៅបាងកកវិញភ្លាម ។ ពេលទៅដល់រាជធានីដែលមានប្រជារាស្ដ្រកំពុងតែបះបោរ ធ្វើបដិវត្ដន៍ ពួកមេទ័ពទាំងនោះក៏ដណ្ដើមយកអំណាច ប៉ុន្ដែមិនមែនធ្វើតាមរបៀបចៅហ្វ៊ាមូទេ គឺធ្វើតាមភ្យាតាក និងអាឡោងផ្រា ៖ ពញាមហាក្រសាសែក នាយករដ្ឋមន្ដ្រី ដែលតាំងខ្លួនជាព្រះមហាក្សត្រសៀម (ព្រះចៅវាំងហ្លួង) តែម្ដង ។ សាសី ប្អូនប្រុសរបស់ក្រសាសែក ដែលមានឋានៈត្រឹមតែជាឧត្ដមសេនីយ៍ បានឡើងជាឧបរាជ (ព្រះចៅវាំងណា) ។ ឯក្មួយប្រុសរបស់គាត់ឈ្មោះ ម៉ាឡាក់ ត្រូវបានឱ្យឡើងជាកែវហ្វ៊ា ។ ចំណែកពួកអ្នកធ្វើបដិវត្ដន៍ផ្សេងទៀតរួមទាំងពញាសានផងគេកាប់សម្លាប់ចោលដោយលាក់លៀមនៅខែមីនា ឆ្នាំ១៧៨២ ។ មួយខែក្រោយមក ព្រះរាជាថ្មីបានបញ្ជាឱ្យយកភ្យាតាកចេញពីវត្ដ មកធ្វើឃាតជាមួយនឹងបុត្រទាំងអស់ នៅថ្ងៃទី៧ ខែមេសា ឆ្នាំ១៧៨២ ដោយយកលេសថា ភ្យាតាកអាចនឹងបំផុសការបះបោរឡើងវិញបាន ។
នៅពេលដែលហេតុការណ៍ទាំងអស់នេះកើតមានឡើងនៅឯស្រុកសៀម នៅស្រុកអាណ្ណាមឯណោះវិញ ក៏កើតមានព្រឹត្ដិការណ៍ដែលមិនជាស្រាលប៉ុន្មានដែរទេ ។ ពួកតៃសឺនដែលយើងបានឃើញពីខាងលើរួចមកហើយថាបានងើបបះបោរនៅកូសាំងស៊ីន បានលបលួចចូលមកក្នុងទឹកដីកម្ពុជា ដើម្បីរៀបចំកម្លាំងឡើងវិញ ។ ស្ដេចអាណ្ណាមឈ្មោះ យ៉ាឡុង (58) (ង្វៀងភុកអាញ់) ដែលគង់នៅសាយហ្គនតាំងពីឆ្នាំ១៧៧៧មក បានផ្ដល់ដំណឹងនេះឱ្យរដ្ឋាភិបាលខ្មែរ ដោយសុំឱ្យជួយបណ្ដេញពួកនេះចេញទៅវិញ ។ មេដឹកនាំកម្ពុជា គឺចៅហ្វ៊ាមូ និងសួស បានចាត់ឱ្យក្រឡាហោមពោធិដឹកនាំទ័ពមួយកងតូចទៅវាយពួកតៃសឺន នៅវាលពោធិយ៉ងបណ្ដេញចេញពីកម្ពុជា ។ ប៉ុន្ដែ លោកក្រឡាហោមបរាជ័យ ត្រូវពួកបះបោរអាណ្ណាមសម្លាប់បាន ឯកងទ័ពក៏រត់បែកខ្ញែកគ្នាអស់ ។ ពួកតៃសឺន បានវិលត្រលប់ចូលទៅក្នុងកូសាំងស៊ីនវិញ ដណ្ដើមយកសាយហ្គនបាននៅក្នុងខែកុម្ភៈ ឆ្នាំ១៧៨១ ធ្វើឱ្យស្ដេចយ៉ាឡុង រត់ភៀសព្រះកាយទៅជ្រកកោននៅឯស្រុកសៀម សុំការការពារពីព្រះយុវៈចូឡាលោក (59) ។
មិនយូរប៉ុន្មានក្រោយមក មេទ័ពអាណ្ណាមឈ្មោះ អុងជូរម៉ា បានស្នើសុំការអនុញ្ញាតពីរដ្ឋាភិបាលកម្ពុជា ធ្វើដំណើរឆ្លងកាត់ទៅស្រុកសៀមជាមួយមន្ដ្រីមួយចំនួន ដើម្បីនាំយកស្ដេចយ៉ាឡុងមកវិញ ។ ចៅហ្វ៊ាមូ និងសួស បានឯកភាពផ្ដល់ការអនុញ្ញាតឱ្យ ហើយថែមទាំងបានផ្ដល់កម្លាំងការពារជូនទៅទៀតផង ។ ក៏ប៉ុន្ដែនៅពេលធ្វើដំណើរមកដល់ខែត្របាត់ដំបង ពួកកម្លាំងការពារបានសម្លាប់អុងជូរម៉ា និងបក្សពួកចោល រួចចែករបស់របរគ្នា វិលត្រលប់មកស្រុកវិញអស់ទៅ ។ ឧក្រិដ្ឋកម្មនេះមិនត្រូវបានគេរកខុសរកត្រូវដាក់ទណ្ឌកម្មទេ ។ នៅកូសាំងស៊ីន គេគិតថា គឺរដ្ឋាភិបាលកម្ពុជាដែលបញ្ជាឱ្យពួកកងការពារប្រព្រឹត្ដបទល្មើសនេះ បើពុំនោះទេ គឺពួកនេះត្រូវរ៉ូវជាមួយពួកតៃសឺន ។ តែរឿងនេះបានបញ្ចប់បែបនោះទៅ ។
ទ័ពសៀមបានវិលត្រលប់ទៅបាងកកវិញហើយ ឯទ័ពអាណ្ណាមក៏បានឆ្លងព្រំដែនទៅវិញដែរ ព្រះរាជាក្មេងក៏យាងត្រលប់ចូលមកក្នុងរាជធានីឧត្ដុង្គវិញនៅក្នុងឆ្នាំដដែលនោះ ។ ទ័ពដែលគេបានកេណ្ឌបានយ៉ាងច្រើនក៏ត្រូវរំសាយឱ្យវិលត្រលប់ទៅស្រុកវិញ មិនទាន់បានប៉ុន្មានផង ស្រាប់តែចៅហ្វ៊ាមូ និងឧកញ៉ាសួស កើតមានទំនាស់នឹងគ្នា គឺនៅក្នុងខែមិថុនា ឆ្នាំ១៧៨២ ។ មុនដំបូង សួស មិនសប្បាយចិត្ដទាល់តែសោះ បានចាប់នឹកគិតសោកស្ដាយចំពោះអំពើចូលដៃចូលជើងជាមួយនឹងចៅហ្វ៊ាមូក៏សរសេរលិខិតមួយផ្ញើទៅឱ្យបែនដែលនៅជាប់ជាឈ្លើយរបស់សៀមដោយបបួលឱ្យវិលត្រលប់មកកម្ពុជាវិញ ។ គេមិនដឹងថាបែនធ្វើយ៉ាងណាទេទើបបានជាសៀមយល់ព្រមដោះលែងឱ្យវិលមកវិញ ពេលធ្វើដំណើរមកដល់បាត់ដំបងបានជួបជាមួយសួសដែលរង់ចាំនៅទីនោះ ។ អ្នកទាំងពីរបានបំផុសអ្នកស្រុកខែត្របាត់ដំបងឱ្យបះបោរឡើង ជ្រើសរើសបានទ័ពមួយកងធំ រួចនាំគ្នាមកវាយយករាជធានីឧត្ដុង្គបាន ។ ចៅហ្វ៊ាមូត្រូវគេបាញ់ព្រួញចំត្រង់ចំហៀងខ្លួនខាងស្ដាំហើយបានត្រូវខ្មែរមកពីសុកត្រាំងដែលមានតៃសឺនជាមេកោយវាយបន្ថែមសម្លាប់ចោលតែម្ដង ។ ចក្រីពាងប្អូនរបស់ចៅហ្វ៊ាមូក៏ត្រូវគេសម្លាប់ដែរ ។
នៅពេលទទួលដំណឹងថាកូនទាំង២ចុងក្រោយរបស់គាត់គឺចៅហ្វ៊ាមូ និងចក្រីពាងត្រូវគេសម្លាប់អស់ហើយ លោកជំទាវឡាង ជាម្ដាយ បានប្រកូកប្រកាសហៅរកមិត្ដភក្ដិទាំងអស់របស់កូនគាត់ រួមទាំងអ្នកដែលធ្លាប់បានទទួលផលពីខ្លួនគាត់ផង ឱ្យចូលរួមជួយគាត់ធ្វើការឃោសនាប្រឆាំងឡើង ។ គាត់ជិះដំរីដឹកនាំទ័ពប្រយុទ្ធយ៉ាងអង់អាចក្លាហាន លើសពីមនុស្សប្រុសទៅទៀត ។ ក៏ប៉ុន្ដែជំទាវឡាងត្រូវគេចាប់ខ្លួនបានជាមួយនឹងមេទ័ពមួយចំនួន នៅក្នុងការប្រយុទ្ធស៊ីសាច់ហុតឈាមមួយនៅឧត្ដុង្គ ។ ពេលនោះបែនបានឡើងជាអ្នកដឹកនាំប្រទេស ហើយគាត់គ្មានការសន្ដោសប្រណីទាល់តែសោះចំពោះពួកអ្នកប្រឆាំងនឹងគាត់ ។ បែនបានឱ្យគេខ្លុះច្រមុះជំទាវឡាង និងបក្សពួករួចធ្វើទារុណកម្មពួកនេះចាត់ទុកដូចជាសត្វក្របី គឺឱ្យវារនឹងជង្គង់រាល់ថ្ងៃទៅកាន់ទីវាលណាដែលនៅជិតហើយ ធ្វើហាក់ដូចជាស៊ីស្មៅអីចឹង ។ គេឱ្យចំណីជាបាយតែមួយពំនូតប៉ុណ្ណោះ ហើយនៅពេលណាដែលពួកនេះស្គម វារលែងរួច ទើបគេកាត់ក្បាលសម្លាប់ចោល ។
ក្រោយពេលដណ្ដើមយកអំណាចបានហើយ បែនបានប្រកាសខ្លួនជាចៅហ្វ៊ា គឺនាយករដ្ឋមន្ដ្រី រួចហើយក៏បែរមកប្រឆាំងនឹងសួសជាដៃគូក្បត់របស់គាត់វិញ ហើយឱ្យគេសម្លាប់ចោលទៅនៅពេលដែលសួសត្រូវរ៉ូវគ្នាជាមួយលោកអរជូន (60) ចៅហ្វាយខែត្រត្បូងឃ្មុំ ប្រុងកេណ្ឌទ័ពប្រឆាំងនឹងគាត់ នៅក្នុងឆ្នាំ១៧៩០ ។ អ្នកដែលសម្លាប់សួស គឺកូនប្រសារបស់គាត់ មាសកៃសឺន (៦១) ដែលគាត់បានសម្លាប់ឪពុកកាលពីមុន រួចហើយបានលើកកូនស្រីឱ្យដើម្បីកុំឱ្យចងចិត្ដខឹងនឹងគាត់ ។ សម្លាប់ឪពុកក្មេករួចហើយ មាសសម្លាប់ប្រពន្ធដែលបានស្ដីបន្ទោសឱ្យខ្លួនចោលទៀត ដោយនិយាយថា ដើម្បីសងសឹកជួសឪពុក ។
ពេលដឹងថាសួសត្រូវគេសម្លាប់ហើយ លោកអរជូនក៏ដឹកនាំទ័ពដែលមានចាមមួយចំនួនធំ ធ្វើដំណើរមកកាន់ភ្នំពេញ ហើយចាត់ឱ្យជនម៉ាឡេឈ្មោះ ទួនសេត ដែលកាន់ទ័ពស្រួច ចេញវាយប្រហារទៅលើចៅហ្វ៊ាបែន ។ ចៅហ្វ៊ាបែន និងឧកញ៉ាក្រឡាហោមប៉ុកបានរត់គេចខ្លួនទៅកាន់ខែត្របាត់ដំបង រួចទៅស្រុកសៀម ដោយនាំយកយុវក្សត្រព្រះអង្គអេង ព្រះមាតុច្ឆា២អង្គ និងព្រះរៀមក្សត្រី៣អង្គទៅជាមួយផង ។ ស្ដេចសៀមទទួលសាទរក្រុមអ្នកភៀសខ្លួនខ្មែរ ហើយព្រះឧបរាជ ឬចៅវាំងណាក៏ទទួលយកព្រះក្សត្រីទាំង៣អង្គ ជាព្រះជាយាតែម្ដង ។ ស្ដេចសៀមបានលើកចៅហ្វ៊ាបែនជាហួមឿង (ចៅហ្វាយខែត្រ) បាត់ដំបង នៅក្នុងឆ្នាំ១៧៩១ មានងារជាចៅពញាអភ័យធីបែសវិសេសសង្គ្រាមរាម ។ល ។ ដែលជាងាររបស់ស្ដេចត្រាញ់ខែត្របាត់ដំបង កាលនៅជាទឹកដីកម្ពុជានៅឡើយ ។
នៅក្នុងឆ្នាំ១៧៩៤ ចៅហ្វ៊ាបែន បានរៀបចំពិធីអភិសេកព្រះរាជាអង្គអេង ដែលមានព្រះជន្ម២០ព្រះវស្សាហើយនៅបាងកក ដោយថ្វាយព្រះនាមថា «ព្រះបាទសម្ដេចស្ដេចព្រះរាជឱង្ការព្រះនរាយណ៍រាជាធិរាជ» ។ ការដែលរៀបចំអភិសេកព្រះរាជាកម្ពុជានៅឯរាជធានីបាងកករបស់សៀម ដោយស្ដេចសៀមដូច្នេះ ជាការបញ្ជាក់ថា កម្ពុជាទទួលស្គាល់ថាខ្លួនជានគរចំណុះ ហើយទទួលការគ្រប់គ្រងរបស់សៀម ។ គឺក្នុងនាមជាអ្នកការពារនេះឯង ដែលពេលក្រោយមកស្ដេចសៀមបានរៀបចំឱ្យទ័ពសៀមមួយកងមានចៅហ្វ៊ាបែនជាមេបញ្ជាការ ជូនដំណើរព្រះរាជាមកកាន់ឧត្ដុង្គ ។
ពេលទទួលបានដំណឹងថាចៅហ្វ៊ាបែនធ្វើដំណើរមកដល់ខែត្របាត់ដំបងហើយ លោកយមរាជកុយ បានដឹកនាំទ័ពមួយកងតូចទៅទប់ទល់ តែត្រូវបរាជ័យហើយស្លាប់នៅក្នុងការប្រយុទ្ធនោះទៅ ។ ឃើញផ្លូវចូលទៅឧត្ដុង្គស្រឡះហើយ ចៅហ្វ៊ាបែនក៏ប្រញាប់រួសរាន់ដឹកនាំទ័ពចូលទៅជួបជាមួយទ័ពអាណ្ណាមពួកតៃសឺន ដែលឡើងមកជួយពួកខ្មែរតាមការស្នើសុំ មានអុងជូរម៉ា និងអុងធុងប៊ិញជាមេបញ្ជាការ ។ ចៅហ្វ៊ាបែនបានវាយទ័ពអាណ្ណាមនោះ បង្ខំឱ្យដកថយចេញទៅកូសាំងស៊ីនវិញ ។ ពេលនោះមាននៅសល់តែមេទ័ពអាណ្ណាមម្នាក់ប៉ុណ្ណោះនៅកម្ពុជា ចំណែកនៅបាសាក់-សុកត្រាំង គឺអុងចុកស៊ីម ។
ក្រោយពីដណ្ដើមបានជ័យជម្នះលើពួកខ្មែរដែលជាសត្រូវ និងសម្ព័ន្ធមិត្រអាណ្ណាមរួចហើយ ចៅហ្វ៊ាបែនបានចាត់ឱ្យលោកចក្រីកែប និងលោកយមរាជកាន ដែលតែងតាំងថ្មី ដឹកនាំទ័ពជើងទឹកទៅមាត់ជ្រូក (ចូវដុក) វាយដណ្ដើមយកទឹកដីមួយចំនួនមកវិញ ។ ចក្រីកែបបានជួបប្រយុទ្ធជាមួយទ័ពរបស់ អុងចុកស៊ីម នៅព្រែកធ្លាង ហើយវាយបង្ខំឱ្យអុងចុកស៊ីមរត់ចូលទៅសាយហ្គន តាមមេទ័ព២នាក់មុនទៅ ។
ពេលនោះពួកតៃសឺននៅកូសាំងស៊ីនមិនទាន់មានលទ្ធភាពធ្វើការសងសឹកមកលើកម្ពុជាបាននៅឡើយទេ ព្រោះពួកគេទើបតែប្រយុទ្ធស៊ីសាច់ហុតឈាមជាមួយស្ដេចយ៉ាឡុង ដណ្ដើមយកបានរាជធានីវ៉េ ស្រុកនៅរំជើបរំជួលនៅឡើយ គេនៅត្រូវប្រយុទ្ធជាមួយទ័ពព្រះរាជាដែលនៅសេសសល់ ហើយត្រូវបន្ដបង្ក្រាបភូមិស្រុកដែលមិនព្រមចំណុះថែមទៀត ។ ចំណែកស្ដេចយ៉ាឡុងវិញ បានរត់ទៅស្រុកសៀមសុំជំនួយ ហើយត្រូវភៀសព្រះកាយពីក្រុងបាងកកមកគង់នៅឯកោះត្រល់ (កោះភូកុក) នៅក្នុងឈូងសមុទ្រសៀមនៅទន្ទឹមនឹងហាទៀង និងកំពត ។ ពេលជ្រើសរើសបានទ័ពថ្មី និងប្រមូលបានបក្សពួកជាច្រើន ទ្រង់ចាប់ផ្ដើមលុកលុយយកខែត្រទឹកខ្មៅ (កាម៉ៅ) និងត្រានយ៉ាង (រ៉ាចយ៉ា) ដាក់មកក្នុងអំណាចព្រះអង្គ ។ ប្រតិបត្ដិការនេះបានធ្វើឱ្យព្រះអង្គស្ដារបាននូវព្រះកិត្ដិនាមឡើងវិញ ទ្រង់ក៏យាងមកកាន់រាជធានីឧត្ដុង្គសុំជំនួយពីចៅហ្វ៊ាបែន ដើម្បីបណ្ដេញពួកតៃសឺនចេញពីសាយហ្គន ធ្វើឱ្យព្រះអង្គបានត្រួតត្រាលើកូសាំងស៊ីនភាគខាងត្បូងទាំងមូល ។
ចៅហ្វ៊ាបែនបានរៀបចំទ័ពមួយកងតូច ដាក់ភ្ជាប់ជាមួយទ័ពអាណ្ណាមរបស់ស្ដេចយ៉ាឡុង ហើយចេញដំណើរទៅសាយហ្គន ជាមួយលោកចក្រី និងលោកយមរាជ ។ ទ័ពសម្ព័ន្ធមិត្របានវាយពួកតៃសឺនឱ្យបរាជ័យ ហើយមេរបស់គេគឺអុងចុកស៊ីមក៏ត្រូវសម្លាប់បាន ។ ស្ដេចយ៉ាឡុង បានយាងត្រលប់ទៅរាជធានីវ៉េវិញ ឯទ័ពកម្ពុជាក៏ត្រលប់មកកាន់រាជធានីឧត្ដុង្គឮជ័យវិញដែរ នៅក្នុងឆ្នាំ១៧៩២ ។
នៅពេលទ័ពខ្មែរត្រលប់មកពីសង្គ្រាមនៅកូសាំងស៊ីនបានបន្ដិច ស្ដេចសៀម ក្នុងនាមជាស្ដេចមានអធិរាជភាពលើកម្ពុជា បានសុំឱ្យចៅហ្វ៊ាបែនប្រគល់កម្លាំង១ម៉ឺននាក់ទៅជួយជីកព្រែកស្រះកេតនៅឯបាងកក នៅក្នុងសង្កាត់សមសែន មានន័យថា គ្រួសារ១សែន ។ ចៅហ្វ៊ាបែនគោរពតាមបញ្ជានេះ ហើយបានធ្វើឱ្យគាត់មានសត្រូវជាច្រើននៅកម្ពុជា ។
គឺនៅពេលនោះឯងដែលស្ដេចសៀមបញ្ជូនព្រះអង្គអេង ដែលគេបានរៀបចំពិធីអភិសេកថ្វាយនៅឯបាងកក ឱ្យមកឧត្ដុង្គវិញ គឺរង់ចាំរហូតដល់ពេលនេះទើបគេឱ្យទ្រង់មានសិទ្ធិគ្រប់គ្រងព្រះរាជាណាចក្រ ។ ព្រះរាជកាយវិការដំបូងរបស់ព្រះអង្គគឺការលើកលោកក្រឡាហោមឱ្យឡើងជាចៅហ៊្វាទឡ្ហៈ និងការប្រគល់ត្រាទៅឱ្យមន្ដ្រីដែលចៅហ្វ៊ាបែនបានតែងតាំង ស្របទៅតាមទំនៀមទម្លាប់ពីបុរាណ ។ រួចហើយទ្រង់បានជម្រាបទៅចៅហ្វ៊ាបែនថា ព្រះរាជាសៀមចង់ឱ្យគាត់ទៅនៅចាត់ចែងគ្រប់គ្រងខែត្របាត់ដំបងរបស់គាត់វិញ ។ ការលើកព្រះអង្គអេង ដែលមានព្រះជន្ម២១ព្រះវស្សា ឱ្យឡើងគ្រងរាជសម្បត្ដិវិញដូច្នេះ វាសមស្របទៅនឹងបំណងរបស់ប្រជារាស្ដ្រឧត្ដុង្គដែលនឿយណាយនឹងការខ្វះស្ដេចសោយរាជ្យយូរមកហើយ ព្រោះលោកអរជូន ស្ដេចត្រាញ់ដីត្បូងឃ្មុំ មិនអាចធ្វើឱ្យគេគោរពបាន មិនចេះដឹកនាំចាត់ចែងការងារ ។ ចៅហ្វ៊ាបែន ក្រោយពីបានទទួលការអនុញ្ញាតពីព្រះរាជារួចហើយ ក៏ដឹកនាំទ័ពសៀមត្រលប់ទៅបាត់ដំបងវិញ ជាទីដែលយើងបានឃើញរួចមកហើយថា គាត់បានទទួលការតែងតាំងពីស្ដេចសៀមជាចៅហ្វាយខែត្រ ។ ចាប់តាំងពីពេលនោះរហូតមកដល់ឆ្នាំ១៩០៧ ដីនោះ រួមទាំងខែត្រអង្គរផង ដែលគេបានភ្ជាប់ទៅនឹងបាត់ដំបង នៅក្រោមការត្រួតត្រារបស់ចៅហ្វ៊ាបែន ដែលចំណុះហើយទទួលបញ្ជាពីស្ដេចសៀម បានក្លាយទៅជាទឹកដីរបស់លោកម្ចាស់ គឺចៅហ្វ៊ាបែននេះឯង គ្មានទំនាក់ទំនងរដ្ឋបាលអ្វីជាមួយនឹងព្រះរាជាកម្ពុជាទេ ។ ចំណែកឯបណ្ដាខែត្រដែលស្ថិតនៅពីខាងជើងបាត់ដំបងវិញ មានមង្គលបុរី សិរីសោភ័ណ និងកូរ៉ាត គេមិនចាំបាច់សង្ស័យអ្វីឡើយ ពួកសៀមបានយកដាក់ធ្វើជាទឹកដីរបស់គេយ៉ាងស្ងៀមស្ងាត់ នៅក្នុងឆ្នាំ១៧៩៥ ។
គេអាចនឹងងាយយល់អំពីសកម្មភាពរបស់សៀម ហើយទទួលស្គាល់វិធីសាស្ដ្រដែលគេបានប្រើណាស់ ដើម្បីធ្វើឱ្យទឹកដីដ៏ធំ និងមានសារសំខាន់ជាយុទ្ធសាស្ដ្រខាងផ្នែកយោធានេះ បានត្រូវផ្ដាច់ចេញពីកម្ពុជា ដោយមិនដឹងខ្លួន ។ ចៅហ្វ៊ាបែនជាមនុស្សក្បត់ប្រាកដណាស់ព្រោះបានដឹងហើយថាខ្លួនមានតួនាទីខ្ពង់ខ្ពស់មួយតែបែរជាកាត់យកទឹកដីមួយចំណែកធំចេញពីព្រះរាជាណាចក្រយកមកគ្រប់គ្រង ក្រោមគោរមងារសៀមជា ហួមឿង ប្រៀបបានទៅនឹងព្រះរាជាណាចក្រតូចមួយស្ថិតនៅចន្លោះកម្ពុជានឹងសៀមទៅវិញ ។ ក្រោយពីបានរៀបចំឱ្យមានព្រះរាជាគង់លើរាជបល្ល័ង្កវិញរួចហើយ គាត់បានរក្សាទ័ពដែលបានជួយគាំទ្រដល់ការងារនេះទុកនៅក្នុងខែត្ររបស់គាត់សិន ដោយគាត់ថាដើម្បីបង្ការសម្រាប់ជួយព្រះរាជាបើសិនណាជាព្រះអង្គទទួលការគំរាមកំហែង ។ ដោយទ័ពនោះជាទ័ពបរទេស តែមានគាត់ជាមេបញ្ជាការ ត្រង់នេះមានន័យច្បាស់ណាស់ថាគាត់គឺជាចៅហ្វាយខែត្រខ្មែរ ប៉ុន្ដែគាត់ស្ថិតនៅក្រោមបញ្ជាការរបស់ស្ដេចសៀម ឯទឹកដីដែលគាត់រស់នៅជាទឹកដីខ្មែរ ។ ប៉ុន្ដែអ្វីៗនៅស្ងៀមស្ងាត់ គ្មាននរណាបានគិតដល់ទេ ។ នៅពេលក្រោយៗមក ចៅហ្វ៊ាបែនគោរពតាមតែបញ្ជាមកពីបាងកក មិនទទួលបញ្ជាពីឧត្ដុង្គទេ និងឡើងចុះចេញចូលរាជវាំងទាំង២ ក៏ប៉ុន្ដែលើកតង្វាយទៅថ្វាយតែស្ដេចសៀម មិនមែនក្នុងនាមជាចៅហ្វាយខែត្រទេ គឺក្នុងនាមជាមេទ័ពសៀម ។ ចំណែកចំណូលផ្សេងៗនៅក្នុងខែត្រ គាត់រក្សាទុកដើម្បីចិញ្ចឹមទាហានដែលនៅជាមួយគាត់ ក៏ប៉ុន្ដែបានថ្វាយជំនូនទៅស្ដេចសៀមដដែល ដែលរឹតតែបញ្ជាក់ឱ្យឃើញអំពីភាពចំណុះរបស់គាត់ ។ កូនៗរបស់គាត់បានបន្ដដំណែងពីគាត់ ហើយក៏បានបន្ដនយោបាយនេះរហូតមក ។ ការកាត់យកទឹកដីកម្ពុជាដាក់ជាចំណុះសៀម បានប្រព្រឹត្ដទៅបែបនេះបន្ដិចម្ដងៗទៅតាមកាលៈទេសៈ ដោយគ្មានអ្នកណាចាប់អារម្មណ៍ទាល់តែសោះ ដំបូងឡើយដឹកនាំដោយអ្នកដែលមានបំណងច្បាស់លាស់រួចបន្ដដោយកូនចៅរបស់គាត់ ។ ហេតុការណ៍នេះបានស្ថិតស្ថេរគង់វង្សនៅរហូតមកដល់សព្វថ្ងៃនេះដោយគ្មានការចុះអនុសញ្ញាអ្វីមួយជាលាយលក្ខណ៍អក្សរ ឬជាពាក្យសម្ដីសោះទេ មានតែការចងចាំតៗគ្នាមកប៉ុណ្ណោះ ។ តាមពិតទៅ កម្ពុជានៅក្នុងសតវត្សរ៍ទី១៩គ្មានកម្លាំងអ្វីនឹងធ្វើការទាមទារយកទឹកដីមកវិញឡើយ តែការកាត់យកទឹកដីទៅដោយពួកសៀមនេះបានត្រូវគេទទួលស្គាល់ក្នុងចិត្ដគំនិតទៅហើយ តាំងតែពីមុនពេលដែលមានសន្ធិសញ្ញាបារាំងសៀមនៅក្នុងឆ្នាំ១៨៦៧ ទៅទៀត ។ សន្ធិសញ្ញានេះគ្មានតម្លៃអ្វីសោះ ព្រោះគេនាំគ្នាចុះហត្ថលេខាដោយមិនបានសួរយោបល់ព្រះរាជាកម្ពុជាផងទេ ព្រះអង្គក៏បានប្រកែកមិនទទួលស្គាល់ថែមទៀត ។ ក៏ប៉ុន្ដែវានៅតែមានតម្លៃរហូត ដោយមកពីប្រទេសបារាំងដែលគ្មានព័ត៌មានច្បាស់លាស់ បានចុះហត្ថលេខា ។
នៅឆ្នាំបន្ទាប់មកទៀត ក្នុងពេលដែលគេកំពុងតែរវល់កសាងរាជវាំងដើម្បីព្រះរាជាថ្មីនៅពីខាងកើតវត្ដវាំងក្ដារ ព្រះបាទអង្គអេងបានបញ្ជូនសំណើទៅស្នើសុំស្ដេចសៀម សូមឱ្យបញ្ជូនព្រះមាតុច្ឆាមួយអង្គក្នុងចំណោមព្រះមាតុច្ឆាទាំង២អង្គ គឺសម្ដេចព្រះភគវតី មហេសីទាំង៣អង្គ និងរាជបុត្រទាំង៤អង្គ ព្រមទាំងសេនាភីលៀងផង មកកម្ពុជាវិញ ។ ព្រះរាជាសៀមបានបញ្ជូនអ្នកទាំងអស់នោះមក នៅក្នុងរវាងខែឧសភា ឆ្នាំ១៧៩៥ ។
ព្រះបាទអង្គអេង បានចេញព្រះរាជបញ្ជាជាច្រើន ដែលគួរតែលើកយកមករៀបរាប់ ។ ព្រះរាជបញ្ជាមួយនោះទាក់ទងទៅនឹងពួកមហាតលិក មហាទេព និងមហាមន្ដ្រី ដែលមានត្រារំលេចទៅដោយភ្ញីផ្កាមួយរង្វង់ ត្រូវបាំងក្លស់២ជាន់ធ្វើអំពីសូត្រពណ៌ក្រហមពាក់អាវផាយពណ៌ផ្កាកូលាប និងមានកាន់ថង់រងផង (62) ពេលចូលមកក្នុងព្រះរាជវាំង ។ មន្ដ្រីដែលមានសក្ដិ ៨-៩ហ៊ូពាន់ (63) អាចពាក់អាវផាយពណ៌បៃតង ហើយបាំងក្លស់សូត្រមួយជាន់ពណ៌បៃតងដែរ ។ អ្នកដែលមានសក្ដិ៦-៧ហ៊ូពាន់មានអាវផាយ និងក្លស់ពណ៌ស្វាយ ។ ឯអ្នកមានសក្ដិ៤-៥ហ៊ូពាន់វិញ អាចមានត្រឹមតែអាវផាយពណ៌ខៀវប៉ុណ្ណោះ ។ ព្រះរាជបញ្ជានោះក៏បានបញ្ជាក់ផងដែរថា ភរិយារបស់មន្ដ្រីមានសក្ដិ ៩-១០ហ៊ូពាន់ ត្រូវមានឋានៈជា ឃុនណាង (64) ។
នៅឆ្នាំបន្ទាប់មក ព្រះរាជាអង្គអេងទ្រង់ប្រឈួនរួចសុគតទៅនៅក្នុងព្រះជន្ម២៦ព្រះវស្សា ។ ទ្រង់សោយរាជ្យសរុបទាំងអស់បាន២០ឆ្នាំចែកចេញជា២រជ្ជកាល ដែលចន្លោះពីគ្នា៣ឆ្នាំ ។ រាជពង្សាវតារក៏ដូចជាការនិទានតៗគ្នា មិនបានកត់សម្គាល់ឃើញមានអ្វីដែលជាស្នាដៃពិសេសរបស់ព្រះរាជាអង្គនេះទេ និងគ្មានការសាងសង់អ្វីជាផលប្រយោជន៍ដល់សាសនាដែរ ។ ទ្រង់មិនបានធ្វើអ្វីជាដុំកំភួនទេ ព្រោះពេញមួយជីវិតរបស់ព្រះអង្គត្រូវដឹកនាំដោយជនបរទេស ឬក៏មន្ដ្រីដែលព្រះអង្គមិនបានតែងតាំងឡើង តែគេបានដាក់មកឱ្យព្រះអង្គទទួលយក ។ គេអាចនិយាយបានថា ព្រះអង្គក្បត់ជាតិ ព្រោះវាហាក់ដូចជាទ្រង់បានដោះដូររាជសម្បត្ដិជាមួយនឹងទឹកដីបាត់ដំបង និងអង្គរ ។
៣៩. រយៈកាលចន្លោះរាជ្យ ១០ឆ្នាំ (១៧៩៦-១៨០៦)
ចៅហ្វ៊ាប៉ុក នាយករដ្ឋមន្ដ្រី បានដឹកនាំកិច្ចការព្រះរាជាណាចក្រដោយមិនបានខិតខំប្រឹងប្រែងជ្រើសរើសព្រះរាជាថ្មីមួយអង្គណាទេ ។ ព្រះរាជវង្សានុវង្សពេលនោះស្ទើរតែរលត់បាត់ផុតពូជអស់ទៅហើយនៅសល់តែរាជបុត្រារបស់ព្រះអង្គអេង ដែលនៅតូចៗនៅឡើយ ។ ចៅហ្វ៊ាបែនដែលសុខស្រួលទៅហើយនៅក្នុងដីរបស់គាត់ ក៏នៅស្ងៀមមិនបានខ្វល់ខ្វាយនឹងអ្វីបន្ដិចសោះ ។ ចំណែកស្ដេចសៀមដែលតែងតែប្រកាសខ្លួនថា ជាអ្នកការពាររជ្ជទាយាទ និងនាម៉ឺនសព្វមុខមន្ដ្រី ដែលហាក់ដូចជាមានការភ័យខ្លាចចំពោះការទិតៀនអំពីការគ្រប់គ្រងគួរឱ្យអៀនខ្មាសនេះ ម្ល៉ោះហើយក៏នៅស្ងៀមដែរទៅ ។ រីឯប្រជាជនទៀតសោត ក៏ហាក់ដូចជាបាត់បង់អស់នូវសេចក្ដីក្លាហាន មិនចង់ធ្វើសង្គ្រាម ចង់បានសន្ដិភាពវិញម្ដង សមនឹងពេលដែលគេទុកឱ្យរស់ទៅតាមតែសម្មាអាជីវោ ។ ពួកចៅហ្វាយខែត្រកាន់តែឯករាជ្យឡើងៗ ដោយមកពីគ្មានការដឹកនាំ ហើយពេញចិត្ដណាស់នឹងសភាពការណ៍បែបនេះ ប្រមូលពន្ធបានរក្សាទុកបង់មកឱ្យនាយករដ្ឋមន្ដ្រីតែអ្វីដែលខ្លួនចង់បង់ ជួនកាលមិនទាំងបង់ឱ្យទៀតក៏មាន ។ និយាយដោយខ្លីគឺ ព្រះរាជាណាចក្រពេលនោះកំពុងតែរលួយពុកផុយ បាត់បង់ទៅៗដោយខ្សោះអស់កម្លាំង អ្នកណាចង់ធ្វើយ៉ាងណាក៏បាន ។ ប្រសិនបើកម្ពុជាមិនត្រូវអាណ្ណាមចូលមកកាន់កាប់លុកលុយរាតត្បាត វាយដណ្ដើមយក រួចកាត់យកដីកូសាំងស៊ីនដាក់ជារបស់គេទេ ពោលគឺថា បើសិនណាជាស្រុកខ្មែរគ្មានពួកអ្នកឈ្លានពានមកពីទិសខាងត្បូង មានតែសត្រូវសៀមតែមួយគត់នោះ ប្រហែលជាសៀមកាត់យកប្រទេសទាំងមូលដាក់ទៅក្នុងស្រុកគេបាត់ទៅហើយ នៅចុងសតវត្សរ៍ទី១៨ ហើយវាសនាកម្ពុជាក៏ដូចជាវាសនាប្រជាជនខ្មែរទាំងមូលក៏ត្រូវចប់បាត់ទៅហើយដែរ ។ ក៏ប៉ុន្ដែ អាចនិយាយថាយើងមានសំណាងដែរ ដែលមានសត្រូវ២នាក់នៅសងខាងដែលស្រេកឃ្លានសង្គ្រឺតចង់បានទឹកដីយើងដូចគ្នា ម្ល៉ោះហើយ ក៏តាមដានត្រួតពិនិត្យគ្នាទៅវិញទៅមក ។ សត្រូវទាំង២នេះខ្លាចរអាគ្នាទៅវិញទៅមក ចំណែកចំណីដែលស្ថិតនៅកណ្ដាលវិញ ភ័យញ័រចំប្រប់ រង់ចាំតែឱ្យអ្នកណាដែលមកមុនហើយលេបបាត់ ។ ប៉ុន្ដែសត្រូវម្នាក់ៗស្ទាក់ស្ទើរមិនទាន់ហ៊ានលូកដៃមកប៉ះចំណីនោះទេ ដោយខ្លាចធ្វើឱ្យម្ខាងទៀតភ្ញាក់ដឹងខ្លួន ។ ស្ថានភាពបែបនេះបានរក្សាកម្ពុជារហូតដល់ពេលដែលពួកបារាំងមកដល់ ជួយប្រទេសនេះកុំឱ្យស្លាប់ មិនតែប៉ុណ្ណោះ បានជួយដាស់ប្រជាជនឱ្យភ្ញាក់ក្រោកឡើងវិញធានាបាននូវឯករាជ្យជាតិជួយការពារព្រះរាជាជួយផ្ដល់កម្លាំងឱ្យប្រទេសទាំងមូលផ្ដល់សុភមង្គលដោយការធានាបាននូវសុខសន្ដិភាព ពាណិជ្ជកម្ម រួចបន្ទាប់មក ផ្ដល់ឱ្យនូវរាជរដ្ឋាភិបាលអចិន្ដ្រៃយ៍មួយ សុចរិត មាននាម៉ឺនមន្ដ្រីធ្វើការទទួលបាននូវប្រាក់បៀវត្សទៀងទាត់ ម្ល៉ោះហើយមិនបានទិញមុខតំណែងរបស់ខ្លួនទេ ។
ពួកបារាំងទើបតែបានប្រគល់មកឱ្យប្រជាជនខ្មែរវិញនូវទឹកដីដែលសៀមបានកាត់យក តាំងពីមាត់សមុទ្រ រហូតទៅដល់ភ្នំដងរែក ទឹកដីទាំងនោះសៀមមិនដែលបានសន្យាថានឹងប្រគល់មកឱ្យខ្មែរវិញម្ដងណាទេ តែបានយល់ព្រមប្រគល់ឱ្យបារាំង ។ ដោយហេតុនេះ អតីតកម្ពុជានៃសតវត្សរ៍ទី១៧ អាចរស់រានមានជីវិតឡើងវិញ មានស្ដេចសោយរាជ្យ ដោយមានអ្នកចាំជួយការពារខ្លាំងក្លាដែលមិនដែលនឹកគិតចង់លុបបំបាត់ព្រះរាជាណាចក្រនេះទេ ផ្ទុយទៅវិញ មានតែចង់ឱ្យប្រជារាស្ដ្រខ្មែររស់នៅមានសេរីភាព នៅក្នុងស្រុកមួយដែលមានការគ្រប់គ្រងល្អ មានអារ្យធម៌ ហើយគ្មានសង្គ្រាមមករំខាន ។
ព្រះរាជាសៀមបានទាមទារឱ្យគេយកសពព្រះអង្គអេងទៅបូជានៅអយុធ្យា ។ ក៏ប៉ុន្ដែនៅពេលដែលគេដឹកព្រះសពមកដល់ខែត្រមង្គលបុរី ស្រាប់តែមានបញ្ជាមកថាត្រូវដឹកព្រះសពយកទៅឧត្ដុង្គវិញ (65) ហើយឆាប់បញ្ជូនទ័ពទៅជួយវាយពួកភូមា ដែលចូលមកលុកលុយស្រុកសៀម ។ លោកចក្រីកែប បានដឹកនាំទ័ព៥ពាន់នាក់ចេញទៅភ្លាម ហើយគេនិយាយថា ទ័ពខ្មែរនេះពូកែអស្ចារ្យ បានវាយពួកភូមាឱ្យបរាជ័យ រួចទើបវិលត្រលប់មកកម្ពុជាវិញ ពោរពេញទៅដោយជ័យជម្នះ ។
ទ័ពនេះមកដល់មិនទាន់រំសាយចេញទេ ស្រាប់តែព្រះរាជាអយុធ្យាផ្ញើបញ្ជាមកចៅហ្វ៊ាប៉ុក ឱ្យបញ្ជូនទៅជួយស្ដេចយ៉ាឡុង ដែលបានស្រែកសុំជំនួយ ។ ទ័ពនោះក៏ចេញដំណើរទៅ ក្រោមបញ្ជាការរបស់ឧកញ៉ាវាំងឡាង ។ ក៏ប៉ុន្ដែការដែលរដ្ឋាភិបាលមួយគោរពស្ដាប់តាមបញ្ជារបស់ស្ដេចបរទេសប្រៀបបានទៅនឹងហ្វូងទាសករបែបនេះ បានធ្វើឱ្យកើតការក្ដៅក្រហាយ និងអាម៉ាស់ជាខ្លាំងក្នុងចំណោមប្រជាជន ។ ម្ល៉ោះហើយកងទ័ពនោះមិនបានទៅណាឆ្ងាយ គឺបានធ្វើដំណើរមកដល់ត្រឹមរំដួល ក៏បែកខ្ញែកគ្នាអស់ទៅ ព្រោះទាហានម្នាក់ៗវិលត្រលប់ទៅរកគ្រួសាររបស់គេ ។ ចៅហ្វ៊ាប៉ុកបានចេញបញ្ជាឱ្យគេតាមចាប់ទាហានដែលរត់ចោលជួរទាំងអស់នោះយកមកវិញ ហើយធ្វើទោសសម្លាប់ចោល ។ មានទាហានជាច្រើនដែលត្រូវគេអារកសម្លាប់ សេសសល់ប៉ុន្មានគេបញ្ជូនទៅរាជធានីវ៉េ ។ ប្រជាជនរឹតតែមានទោមនស្សខ្លាំងឡើងៗ ។ នៅទីបញ្ចប់ ស្ដេចយ៉ាឡុង ទទួលបានជ័យជម្នះលើពួកតៃសឺន ដណ្ដើមយកអំណាចបានមកវិញ រួចហើយបានបញ្ជូនកាំភ្លើងធំ២ដើម មានរំលេចដោយរូបមករមកកម្ពុជា កាំភ្លើងនេះបានត្រូវមេទ័ពអាណ្ណាមអុងហ៊ូយកទៅ ក្រោយពីគាត់បានធ្វើឃាតព្រះរាមរាជារួច ។
កងទ័ពខ្មែរដែលទៅច្បាំងនៅអាណ្ណាមនោះល្បីល្បាញខ្លាំងណាស់ រហូតទាល់តែមេទ័ពគឺឧកញ៉ាក្រឡាហោមព្រហ្ម ទៅជាក្រអឺតក្រទម គិតថាខ្លួនបានជួយស្ដេចយ៉ាឡុងឱ្យឡើងគ្រងរាជបល្ល័ង្កវ៉េវិញបាន ហើយក៏ចាប់មើលងាយមើលថោកចៅហ្វ៊ាប៉ុក មិនមកចូលរួមប្រជុំគណៈរដ្ឋមន្ដ្រីទេ ។ ចៅហ្វ៊ាប៉ុកបានឱ្យគេចាប់ខ្លួនក្រឡាហោមព្រហ្ម បញ្ជូនទៅថ្វាយស្ដេចសៀមដើម្បីដាក់ទោសទណ្ឌ ។ ព្រះរាជាបាងកករក្សាព្រហ្មទុក រួចបានឱ្យហ្លួងពេជ្រណាពិចិត្រមឿងមកជំនួសវិញ ហើយបានទាំងបញ្ជូនអ្នកអង្គម្ចាស់អង្គចន្ទមកដែរ ដើម្បីគ្រប់គ្រងប្រទេសជាតិ ។
នៅឆ្នាំ១៨០៥ ក្រោយពីស្ដេចអាណ្ណាមបានបញ្ជូននក្រណាត់សូត្រ៦៨ដុំមកថ្វាយ ព្រះអង្គចន្ទ បានយាងនាំយកកំណាត់ទាំងអស់នោះមកបាងកកជាមួយចៅហ្វ៊ាប៉ុក ដើម្បីចូលគាល់ស្ដេចសៀម ។ ចៅហ្វ៊ាប៉ុក ក៏ស្លាប់នៅឯបាងកកនោះទៅ ក្នុងអាយុ៦៥ឆ្នាំ ។ គាត់បានថែរក្សារាជបុត្ររបស់ព្រះអង្គអេង និងជារាជានុសិទ្ធិ ព្រះរាជាណាចក្រកម្ពុជាអស់ពេល១១ឆ្នាំ ។
៤០. ព្រះអង្គចន្ទ (១៨០៦-១៨៣៤)
នៅឆ្នាំ១៨០៦ ព្រះអង្គចន្ទជារាជបុត្រាច្បងរបស់ព្រះអង្គអេងមានព្រះជន្ម១៥ព្រះវស្សាហើយ ។ ស្ដេចសៀមបានសម្រេចអភិសេកព្រះអង្គឱ្យឡើងគ្រងរាជ្យដោយថ្វាយព្រះនាមថា «ព្រះបាទសម្ដេចព្រះរាជឱង្ការព្រះឧទ័យរាជាធិរាជរាមាធិបតីព្រះស្រីសុរិយោពណ៌» ។ នេះគឺជាលើកទី២ហើយដែលស្ដេចសៀមបង្ហាញឱ្យឃើញអំពីអធិរាជភាពរបស់គេមកលើកម្ពុជា ។
ព្រះរាជាណាចក្រកម្ពុជាពេលនោះរងនូវការបាក់បែកប្រេះស្រាំខ្លាំងណាស់ មិនប្រកែកប្រណាំងអ្វីទេ យល់ព្រមទទួលព្រះរាជាតាមតែហេតុការណ៍វិវឌ្ឍ ។ ពេលនោះចៅហ្វ៊ាបែនបានធ្វើកិច្ចការមួយដែលនាំគាត់ឱ្យអាចវិលត្រលប់មកកាន់កម្ពុជាវិញបាន ។ គឺគាត់បាននាំយកបុត្រីរបស់គាត់ម្នាក់មកថ្វាយព្រះរាជាអង្គចន្ទ ។ ព្រះរាជាប្រហែលជាមិនហ៊ានប្រកែកទេ ទើបទ្រង់យល់ព្រមទទួលយកធ្វើជាមហេសីទៅ ។
នៅពេលនោះ ស្ដេចអាណ្ណាមក៏ចាប់ប្រឆាំងជំទាស់ ហើយបានបញ្ជូនទ័ពមួយកងមកកាន់ភ្នំពេញ ។ ស្ដេចអាណ្ណាមទទួលយល់ព្រមថាឱ្យសៀមរៀបចំពិធីអភិសេកព្រះរាជាកម្ពុជានៅឯបាងកកចុះ ក៏ប៉ុន្ដែបើព្រះរាជាកម្ពុជាយល់ព្រមចំណុះស្ដេចសៀម ព្រះអង្គក៏ត្រូវចំណុះស្ដេចអាណ្ណាមដែរ ហើយត្រូវលើកសួយសារអាករទៅថ្វាយជាទៀងទាត់ ក្នុងនោះមានដំរីឈ្មោលកម្ពស់៥ហត្ថ២ក្បាល ចែរមាស២ ភ្លុកដំរី៣គូ ក្រវាញ ក្រមួន ម្រ័ក្សណ៍ ។ល ។
ពេលនោះពួកនាម៉ឺនសព្វមុខមន្ដ្រីរបស់ព្រះរាជាមិនហ៊ានប្រកែកនឹងសំណើដ៏ប្រមាថនេះទេ មិនដឹងថាតើកម្ពុជាគួរចំណុះសៀមផង និងចំណុះអាណ្ណាមផង ឬក៏យ៉ាងណា គឺមានអធិរាជ២ដែលនឹងប្រកាប់ប្រចាក់គ្នាដើម្បីមូលហេតុនគរចំណុះ វាល្អជាជាងមានអធិរាជតែមួយ ដែលនឹងលេបត្របាក់យកទឹកដីអស់តែម្ដង ។ ម្ល៉ោះហើយពួកគេក៏យល់ព្រមតាម ធ្វើឱ្យទ័ពអាណ្ណាមវិលត្រលប់ទៅសាយហ្គនវិញទៅ តែបានទុកមេទ័ព២នាក់ឱ្យនៅការពារភ្នំពេញ ។ តាមរយៈសន្ធិសញ្ញានេះ ពួកសៀម និងអាណ្ណាមបានមកប្រឈមជួបមុខគ្នានៅកម្ពុជា ហើយនេះមិនមែនដោយសារកាលៈទេសៈចៃដន្យអ្វីទេ គឺដោយមានគោលការណ៍ច្បាស់លាស់ប្រឆាំងគ្នាតែទទួលស្គាល់ទាំងអស់គ្នា ។ សង្គ្រាមនឹងកើតមានយូរអង្វែង ប៉ុន្ដែគឺដើម្បីឱ្យព្រះរាជាណាចក្ររស់រានមានជីវិត ។
ការដែលព្រះរាជាអង្គចន្ទទទួលស្គាល់អធិរាជភាពរបស់អាណ្ណាម មិនបានធ្វើឱ្យរាជវាំងបាងកកសប្បាយចិត្ដប៉ុន្មានទេ ហើយចាប់ពីពេលនោះមកទំនាក់ទំនងល្អដែលធ្លាប់តែមានរវាងស្ដេចសៀមជាមួយព្រះរាជាឧត្ដុង្គក៏ចាប់ផ្ដើមប្រេះឆាដែរ ។
និយាយពីស្ដេចយ៉ាឡុងវិញ ដើម្បីបញ្ជាក់ឱ្យរឹតតែឃើញច្បាស់អំពីអធិរាជភាពរបស់ព្រះអង្គ ទ្រង់បានស្រមើស្រមៃឃើញរហូតដល់ឱ្យធ្វើត្រារាងបួនជ្រុងស្មើមួយអំពីមាសយ៉ាងធ្ងន់ ផ្ញើមកថ្វាយព្រះអង្គចន្ទ (តាមធម្មតាត្រាខ្មែរមានរាងមូល) ។ ព្រះរាជាកម្ពុជាបានទទួលយកត្រានោះ ហើយពោលសរសើរថាសព្វព្រះរាជហឫទ័យខ្លាំងណាស់ ក៏ប៉ុន្ដែទ្រង់មិនដែលបានប្រើវាម្ដងណាឡើយ ។
មរណភាពរបស់ចៅហ្វ៊ាបែនស្ដេចត្រាញ់ដែនដីបាត់ដំបង រួចបន្ដមកទៀតមរណភាពរបស់ស្ដេចសៀមនៅក្នុងឆ្នាំ១៨១១ ហើយនិងការលើកបុត្រាព្រះនាមថា ភេនឌិនខ្លាង ឱ្យឡើងសោយរាជ្យបន្ដ មិនបានធ្វើឱ្យស្ថានការណ៍ធូរស្បើយទេ ។ សៀមមិនយល់ព្រមឱ្យកម្ពុជាមានអធិរាជ២ដូច្នេះទេ កម្ពុជាត្រូវចំណុះតែសៀមមួយគត់ ព្រោះថាមានតែសៀមទេដែលបានអភិសេកស្ដេចខ្មែរ ។ ការបញ្ជូនអ្នកអង្គម្ចាស់ស្ងួន និងអ្នកអង្គម្ចាស់ឯម ជាព្រះអនុជរបស់ព្រះរាជាទៅរាជវាំងសៀមជាមួយនឹងក្រឡាហោមមឿងដែលជាជនជាតិសៀមស្រាប់ហើយនិងចក្រីបេនផង ដើម្បីទៅចូលរួមក្នុងព្រះរាជពិធីឈាបនកិច្ចស្ដេចសៀម នៅក្នុងខែមេសា ឆ្នាំ១៨១០ គឺជាការសម្ដែងឱ្យឃើញអំពីការគោរពក្នុងនាមជានគរចំណុះ បានធ្វើឱ្យកំហឹងរបស់សៀមធូរស្បើយបន្ដិច ក៏ប៉ុន្ដែមិនបានធ្វើឱ្យវារលត់បាត់ទេ ។ ដើម្បីបង្ហាញឱ្យឃើញនូវសិទ្ធិអធិរាជរបស់ខ្លួនក្នុងការតែងតាំងព្រះរាជា និងរាជវង្សានុវង្ស ស្ដេចសៀមបានប្រកាសតែងតាំងយ៉ាងឱឡារិកឱ្យអ្នកអង្គម្ចាស់ទាំង២អង្គ ឡើងជាទីឧភយោរាជ និងជាឧបរាជ ដោយមិនបានសាកសួរយោបល់ព្រះរាជាកម្ពុជាផងទេ ។
នៅសម័យនោះ តេជោមឿង ចៅហ្វាយខែត្រដីកំពង់ស្វាយ មានបំណងចង់បំផុសអ្នកស្រុកក្នុងខែត្រឱ្យបះបោរប្រឆាំងនឹងព្រះរាជាឡើង ។ នៅបាត់ដំបងឯណោះវិញ ចៅហ្វាយខែត្រថ្មីដែលបានយកឈ្មោះថា បែន ដូចជាឪពុកខ្លួនដែរបានចាប់ផ្ដើមកសាងកំពែងការពារទីក្រុង ។ និយាយពីក្រឡាហោមមឿង និងឧកញ៉ាចក្រីបែន នៅពេលវិលត្រលប់មកដល់រាជធានីឧត្ដុង្គវិញក៏ត្រូវថ្កោលទោសថាជាភ្នាក់ងាររបស់សៀម និងបានឃុបឃិតឱ្យសៀមតែងតាំងអ្នកអង្គម្ចាស់ទាំង២អង្គ ។ សភាពការណ៍ពេលនោះបានបង្ហាញថាពិតជាមានការរួមគំនិតក្បត់មែន ហើយគំរាមកំហែងមកលើព្រះរាជា ។ ប៉ុន្ដែព្រះបាទអង្គចន្ទមិនបានប្រហែសបន្ដិចណាទេ ទ្រង់បានចេញព្រះរាជបញ្ជាឱ្យឃាត់ខ្លួនលោកក្រឡាហោម និងលោកចក្រី ដែលស្ថិតនៅក្នុងដៃព្រះអង្គស្រាប់ រួចឱ្យគេសម្លាប់ចោល ។ បន្ទាប់មក ទ្រង់បានតែងតាំងឧកញ៉ាវង្សាអគ្គរាជឱ្យឡើងធ្វើជាចៅហ្វាយខែត្រកំពង់ស្វាយ រួចបញ្ជូនទៅកាន់ទីនោះ ហើយឱ្យចាប់តេជោមឿង ។ ប៉ុន្ដែមន្ដ្រីម្នាក់នេះឆ្លាតនៅពេលបានដឹងថា បក្សពួករបស់ខ្លួនទាំង២នាក់ បានត្រូវគេធ្វើឃាតទៅហើយ និងបំផុសបំផុលប្រជាជនក្នុងខែត្រឱ្យបះបោរមិនបានសម្រេច គាត់ក៏គេចខ្លួនរត់ទៅជ្រកកោននៅឯស្រុកសៀមទៅ ។ នៅបាត់ដំបងឯណោះវិញ ចៅហ្វាយខែត្រថ្មីរឹតតែខិតខំពង្រឹងការការពារបន្ទាយថែមទៀត ។
ស្ដេចសៀមកាន់ជើងពួកបះបោរ ហើយបានបញ្ជូនទ័ពមួយកងមកបាត់ដំបង ។ ការដែលសៀមធ្វើដូច្នេះ នាំឱ្យគេមានជំនឿថា ការរួមគំនិតក្បត់បានចាប់ផ្ដើមឡើងនៅឯបាងកកមែន ដោយមានការគាំទ្រពីស្ដេចសៀមផង ។ ព្រះរាជាកម្ពុជាបានកេណ្ឌទ័ពជាប្រញាប់ រួចបានចាត់ឱ្យយកមួយកងទៅបោះទីតាំងនៅនឹងពាមសែន ត្រង់មាត់ពាមស្ទឹងកំពង់ធំ និងកំពង់ស្វាយ ។ ទ័ពមួយកងទៀត ទ្រង់ឱ្យទៅនៅកំពង់ឆ្នាំង ឯកងទី៣ ទ្រង់ឱ្យទៅបោះទីតាំងនៅស្ទឹងពាក់កន្ដិល ។ ក្នុងពេលជាមួយគ្នានោះ ព្រះអង្គចន្ទទ្រង់បានចាត់មន្ដ្រី២នាក់ ឱ្យទៅសុំជំនួយពីស្ដេចអាណ្ណាម ។
ស្ដេចយ៉ាឡុង ត្រេកអរណាស់នឹងបានចូលមកធ្វើអន្ដរាគមន៍ម្ដងទៀតនៅកម្ពុជា ហើយបានចាត់បញ្ជូនទ័ពអាណ្ណាមមួយកងពីសាយហ្គនមក ដែលដឹកនាំដោយឧត្ដមសេនីយ៍៥នាក់ ។ ទ័ពអាណ្ណាមនេះធ្វើដំណើរតាមទន្លេ ឡើងមកយ៉ាងរួសរាន់ មកដល់ភ្នំពេញមិនបានឈប់ទេ ក៏បន្ដដំណើរទៅបោះទីតាំងចាប់ពីត្រឹមព្រែកមានលាភ (ពីមុនហៅថា ព្រែកពាក់ព្រ័ត្រ) នៅលើកោះជ្រោយចង្វា រហូតដល់កោះចិន ចំពីមុខកំពង់ហ្លួង រួចហើយក៏នាំគ្នាសម្រាកដោយស្ងៀមស្ងាត់ រង់ចាំតែបញ្ជានឹងអាលចេញប្រយុទ្ធ តែមិនសូវជាចង់ប៉ុន្មានទេ ។ គ្មានទ័ពណាបានមកវាយទៅលើទ័ពអាណ្ណាមនេះទេ រហូតដល់ពេលដែលទ័ពសៀមត្រូវបានគេវាយឱ្យបរាជ័យ ហើយរត់ទៅកាន់ស្រុកសៀមវិញអស់ទៅ ទ័ពជំនួយរបស់អាណ្ណាមនេះក៏ដកថយចេញទៅវិញដែរ ដោយគ្មានបានបាញ់កាំភ្លើងមួយគ្រាប់ណាសោះទេ ។
ដោយសព្វព្រះទ័យខ្លាំងណាស់នឹងជ័យជម្នះលើកនេះ ព្រះអង្គចន្ទ និងព្រះអនុជទាំង៣អង្គ បានយាងចូលសាងព្រះផ្នួសនៅវត្ដភ្នំព្រះរាជទ្រព្យ នៅជិតឧត្ដុង្គ បានប៉ុន្មានសប្ដាហ៍ ទ្រង់ក៏លាព្រះផ្នួសចាកសិក្ខាបទមកវិញ ។
រាជពង្សាវតារបានរៀបរាប់ថានៅសម័យនោះនាវាព័រទុយហ្គាល់មានបង្គោលក្ដោង៣បានមកចូលចតនៅនឹងកំពង់ពោធិតូច (កំពង់ហ្លួង) ហើយមន្ដ្រីម្នាក់ដែលកាន់សាសនាកាតូលិកបានទិញរបស់របរមកពីអឺរ៉ុប ពីនាយកប៉ាល់យកទៅថ្វាយព្រះរាជា ដោយដោះដូរជាមួយផលិតផលរបស់កម្ពុជា (ខែមេសា ឆ្នាំ១៨១១) ។
រាជពង្សាវតារក៏បានកត់សម្គាល់អំពីព្រឹត្ដិការណ៍មួយចំនួនទៀតផងដែរ មានការបះបោររបស់មនុស្សម្នាក់មានឈ្មោះថា សីលជ័យ ដែលត្រូវគេដាក់ទោសសម្លាប់បង់ ការបកប្រែសៀវភៅដកស្រង់អត្ថបទគម្ពីរព្រះត្រៃបិដកមកជាភាសាសាមញ្ញដោយគណៈកម្មការចៅអធិការវត្ដ ដែលប្រមូលផ្ដុំគ្នាធ្វើការនៅវត្ដភ្នំព្រះរាជទ្រព្យ ការចូលទិវង្គតរបស់អ្នកអង្គម្ចាស់ព្រះអង្គកែវឌួង ដែលមានព្រះជន្ម៨២ព្រះវស្សា ហើយនិងការឃើញមានផ្កាយដុះកន្ទុយលេចចេញនៅទិសខាងលិច (66) ។
ខ្យល់ព្យុះដែលប្រមូលផ្ដុំគ្នាបន្ដិចម្ដងៗមកនៅពីលើស្រុកខ្មែរ បានផ្ទុះខ្លាំងឡើងនៅពេលដែលព្រះរាជាអង្គចន្ទប្រព្រឹត្ដកំហុសឆ្គងមួយ ។ បញ្ហាបានកើតឡើងរវាងព្រះអង្គជាមួយនឹងព្រះអង្គស្ងួន ដែលស្ដេចសៀមថ្មីបានតែងតាំងជាទីឧភយោរាជ ។ ដោយមានការភ័យខ្លាច ព្រះអង្គស្ងួនបានរត់ភៀសព្រះកាយទៅគង់នៅពោធិ៍សាត់ ជាមួយព្រះរាជវង្សានុវង្ស និងភីលៀងសេនាទាំងអស់ដែលនៅចម្ងាយតែ៥០គីឡូម៉ែត្រប៉ុណ្ណោះពីដីបាត់ដំបង ។ ព្រះរាជាបានបញ្ជូនព្រះសង្ឃ២អង្គ រួចមន្ដ្រី៤នាក់ទៀត ឱ្យទៅយាងព្រះអង្គត្រលប់មកបន្ទាយពេជ្រវិញ ប៉ុន្ដែព្រះអង្គស្ងួនមិនយល់ព្រមត្រលប់ទៅវិញទេ ។ មិនតែប៉ុណ្ណោះ ទ្រង់បានចាប់មន្ដ្រីទាំង៤នាក់នោះទុកធ្វើជាចំណាប់ខ្មាំងថែមទៀត រួចចាប់ប្រមែប្រមូលទ័ព និងអាវុធយុទ្ធភណ្ឌ ទាមទារឱ្យព្រះរាជាប្រគល់បណ្ដាខេត្ដក្រង ក្រគរ និងខ្លុងថ្វាយ ។
ព្រះរាជាអង្គចន្ទមានព្រះតម្រិះថា ព្រះឧភយោរាជបានត្រូវស្ដេចសៀមតែងតាំងឡើង ស្ដេចសៀមនឹងគាំទ្រព្រះឧភយោរាជ រួមទាំងប្រជារាស្ដ្រខែត្រពោធិ៍សាត់ ដែលធ្លាប់អបអរស្វាគមន៍ព្រះអង្គផង ។ ឆ្លើយតបទៅនឹងសភាពការណ៍នេះ ព្រះអង្គចន្ទបានស្នើសុំជំនួយពីស្ដេចយ៉ាឡុង ។ ឧត្ដមសេនីយ៍អាណា្ណមឈ្មោះ អុងជរអ៊ឹង ឌិញលឿង ដែលបញ្ជានៅសាយហ្គន ហើយជាតំណាងស្ដេចយ៉ាឡុងប្រចាំនៅកូសាំងស៊ីនបានបញ្ជូនទ័ព៥រយនាក់ ឱ្យមកឈរជើងនៅនឹងកោះចិន នៅក្នុងទន្លេសាប ទល់មុខនឹងកំពង់ហ្លួង ។ កម្លាំងទ័ពប៉ុននេះមិនគ្រប់គ្រាន់ទេ អាចប្រៀបបានត្រឹមកងនគរបាលដែលគេប្រើសម្រាប់តែទប់ទល់កុំឱ្យមានការលួចពង្រត់ព្រះរាជាប៉ុណ្ណោះ ។ ក៏ប៉ុន្ដែ បើទោះជាយ៉ាងនេះក្ដី ក៏ព្រះរាជាកម្ពុជាបានរៀបចំទទួលស្វាគមន៍ទ័ពនេះយ៉ាងសមរម្យ បង្ហាញឱ្យឃើញថា នៅពេលដែលមានការគំរាមកំហែងពីពួកបះបោរ ព្រះអង្គសព្វព្រះទ័យនឹងហៅរកព្រះរាជាអាណ្ណាមឱ្យមកជួយ ជាជាងរត់ទៅរកស្ដេចសៀម ហើយទ្រង់ទុកចិត្ដអាណ្ណាមជាងទុកចិត្ដសៀម ។
ស្ដេចសៀមបានសម្រេចចិត្ដធ្វើអន្ដរាគមន៍ម្ដង ។ ទ្រង់បានបញ្ជូនទ័ព២កង មួយកងៗមានគ្នា៥ពាន់នាក់ ដែលមួយកងដឹកនាំដោយលោកយមរាជ មួយកងទៀតដឹកនាំដោយពុហុល្លាទេព ។ ព្រះរាជាកម្ពុជាបានបញ្ចេញទ័ព២កងតូចទប់ទល់ មួយកងៗមានគ្នា១ពាន់នាក់ ហើយនិងទ័ពជើងទឹកមួយកងដែលដឹកនាំដោយស្ដេចត្រាញ់ខែត្របាភ្នំ ។ ក៏ប៉ុន្ដែទ័ពតូចៗទាំងអស់នេះមិនអាចទប់ទល់ជាមួយនឹងទ័ពសត្រូវដែលច្រើនជាង៥ដងបានឡើយ ម្ល៉ោះហើយក៏នាំគ្នាដកថយមិនហ៊ានប្រយុទ្ធទេ ។ នៅពេលដែលព្រះរាជាទទួលបានដំណឹងថាព្រះឧភយោរាជកំពុងដឹកនាំទ័ពខ្មែរ៣ពាន់នាក់ និងទ័ពសៀម២ពាន់នាក់ ធ្វើដំណើរមកកាន់រាជធានីឧត្ដុង្គ ទ្រង់ក៏ភៀសព្រះកាយចេញពីរាជធានីទៅជាមួយនឹងព្រះរាជវង្សានុវង្ស ក្រោមកិច្ចការពាររបស់ទ័ពអាណ្ណាម ទៅគង់នៅឯកោះដីនៅក្នុងទន្លេមេគង្គ នៅខាងក្រោមភ្នំពេញបន្ដិច ។
នៅពេលដែលព្រះរាជាកំពុងតែយាងចុះតាមទន្លេ ទ័ពរបស់ព្រះអង្គបានបើកការវាយប្រហារទៅលើទ័ពសៀមនៅកំពង់ឆ្នាំង តែត្រូវបរាជ័យ ក៏រត់ចុះទៅទិសខាងត្បូង ដោយនាំប្រជាជនយកទៅផង ដើម្បីកុំឱ្យសៀមកៀរ ។ ពេលទទួលបាននូវព័ត៌មានស្ដីអំពីបរាជ័យនេះ ព្រះឧបរាជអង្គឯម និងអ្នកអង្គម្ចាស់អង្គឌួងបាននាំគ្នាបោះបង់ព្រះរាជាជាព្រះរៀម ហើយរត់ត្រលប់ក្រោយមកកាន់ឧត្ដុង្គវិញដែលទ័ពសៀមកំពុងតែកាន់កាប់ ។ ការបោះបង់ចោលដោយព្រះអនុជទាំង២ បានធ្វើឱ្យព្រះរាជាអង្គចន្ទអស់សង្ឃឹមជាខ្លាំង ទើបបណ្ដោយខ្លួនព្រះអង្គតាមតែពួកអាណ្ណាម ដែលបន្ទាប់មកបាននាំព្រះអង្គទៅកាន់សាយហ្គន ។
ពេលនេះ ព្រះរាជាណាចក្រត្រូវគ្មានអ្នកដឹកនាំម្ដងទៀតហើយ ព្រោះព្រះរាជាគង់នៅឯស្រុកអាណ្ណាម ចំណែកឯអ្នកអង្គម្ចាស់បះបោរមួយអង្គគឺព្រះឧភយោរាជ ក៏មិនទាន់ហ៊ានចាប់កាន់អំណាចនៅឡើយដែរ ហើយគង់នៅឯពោធិ៍សាត់ឯណោះ ។ ព្រះឧបរាជអង្គឯម និងព្រះអង្គឌួងក៏រៀបចំរដ្ឋាភិបាលបណ្ដោះអាសន្នមួយឡើង ដែលមានពាក់កណ្ដាលជាខ្មែរ និងពាក់កណ្ដាលទៀតជាសៀម រួចហើយបាននាំគ្នាយាងទៅបាងកកនៅក្នុងខែកក្កដា ឆ្នាំ១៨១១ ដើម្បីសុំយោបល់ឯកភាពពីស្ដេចសៀម ។
បន្ដិចក្រោយមកព្រះរាជាអង្គចន្ទមានសេចក្ដីក្លាហានឡើងវិញ បានដឹកនាំទ័ព២ម៉ឺននាក់ចូលមកក្នុងរាជធានីឧត្ដុង្គ ក្នុងនោះមានទ័ពអាណ្ណាម៥ពាន់នាក់ និងទ័ពខ្មែរដែលគាំទ្រតាមដង្ហែព្រះអង្គ ។ ប្រជារាស្ដ្រទាំងអស់ ស្វាគមន៍អបអរទទួលព្រះអង្គហើយព្រះរាជាបានយាងចូលក្នុងព្រះរាជវាំងនៅថ្ងៃទី១៤ ខែឧសភា ឆ្នាំ១៨១៣ ។ ទ័ពសៀមមានការភ្ញាក់ផ្អើលជាខ្លាំងនឹងការយាងត្រលប់មកវិញយ៉ាងរហ័សរបស់ព្រះរាជាបែបនេះ ណាមួយបានឮសំឡេងប្រជាជនទះដៃអបអរសាទរអឺងកងផង អ្នកស្រុកស្រែចម្ការក៏ដកដៃចេញពីខ្លួនអស់ទៅផង ឯនាម៉ឺនសព្វមុខមន្ដ្រីក៏បាននាំគ្នាធ្វើដំណើរទៅកាន់រាជធានីឧត្ដុង្គ ដើម្បីចូលគាល់ព្រះរាជាផង ទ័ពសៀមទាំងនោះគិតថា នគរទាំងមូលនឹងបះបោរប្រឆាំងនឹងខ្លួនជាមិនខាន ម្ល៉ោះហើយក៏ប្រញិបប្រញាប់ឆាប់នាំគ្នាធ្វើដំណើរទៅកាន់ព្រំដែនជាបន្ទាន់ ។ ប៉ុន្មានខែក្រោយមក ព្រះឧភយោរាជអង្គស្ងួនសុគតនៅបាងកកនោះ ។ សៀមបានបញ្ជូនព្រះអដ្ឋិធាតុរបស់ព្រះអង្គមកថ្វាយព្រះអង្គចន្ទនៅក្នុងឆ្នាំ១៨២៤ ។
ការដែលពួកអាណ្ណាមបានជួយលើកព្រះអង្គចន្ទ ឱ្យយាងមកគង់លើរាជសម្បត្ដិវិញនៅពេលនេះហាក់ដូចជាបានប្រព្រឹត្ដទៅដោយគ្មានការបង្ហូរឈាមសោះឡើយ អ្វីៗហាក់ដូចជាវិលត្រលប់មករកភាពស្ងប់ស្ងាត់វិញ ហើយស្រាប់តែចៅហ្វាយខែត្រកំពង់ស្វាយឈ្មោះ ម៉េង ដែលជាអ្នកចូលរួមសមគំនិតជាមួយនឹងព្រះអង្គឯម និងព្រះអង្គឌួង បានចាប់ផ្ដើមបំផុសបំផុលអ្នកស្រុកឱ្យបះបោរឡើង ដើម្បីទាក់ទាញឱ្យមានអន្ដរាគមន៍ពីសៀមសាជាថ្មី និងឱ្យគាត់ទទួលបានសិទ្ធិអំណាចដូចមិត្ដចាស់របស់គាត់នៅឯបាត់ដំបង គឺបែនកាលពីមុនអីចឹង ។ ម៉េងបានបញ្ចុះបញ្ចូលប្អូនគាត់ដែលជាចៅហ្វាយខែត្របារាយណ៍ឱ្យដើរតាមគាត់ រួចចាប់ផ្ដើមជ្រើសរើសទ័ព ស្រាប់តែព្រះរាជាបានចាត់ទ័ពមួយកងតូចឱ្យទៅកំពង់ស្វាយ ដើម្បីទប់កុំឱ្យការបះបោររីករាលដាល ។ ម៉េង និងប្អូនប្រុស មិនអាចទប់ទល់នឹងទ័ពព្រះរាជា ព្រោះមិនទាន់រើសទ័ពបាន ក៏នាំគ្នារត់ទៅជ្រកកោននៅក្នុងខែត្រទន្លេរពៅ (67) ។ បន្ដិចក្រោយមក ដោយភ័យខ្លាចអ្នកស្រុកចាប់យកមកប្រគល់ឱ្យព្រះរាជា អ្នកទាំង២បាននាំគ្នារត់ឆ្លងទៅនៅឯខោនវិញ ។ ទឹកដីខោននេះ ខ្មែរមិនដែលប្រគល់ឱ្យទៅលាវម្ដងណាទេ ក៏ប៉ុន្ដែបានគោរពស្ដាប់បញ្ជារបស់ចៅនៅបាសាក់ (៦៨) តាំងតែពី៧៥ឆ្នាំមុនមកម្ល៉េះ ។
ម៉េងបានចេញដំណើរបន្ដពីនោះទៅកាន់បាងកក ហើយបានញុះញង់ឱ្យស្ដេចសៀមដណ្ដើមយកដីកំពង់ស្វាយ ។ សៀមបានរៀបចំប្រតិបត្ដិការមួយ វាយដណ្ដើមយកកំពង់ស្វាយ និងបន្ទាយការពារ ដែលចៅហ្វាយខែត្របានបោះបង់ដោយកំសាក ក៏ប៉ុន្ដែពួកសៀមត្រូវបង្ខំចិត្ដបោះបង់ចោលទៅវិញ ក្រោយពីមានការខូចខាតច្រើនពេក ។
នៅក្នុងឆ្នាំ១៨១៤ ទ័ពសៀមបានលេចមុខនៅកូរ៉ាត រួចហើយបានដណ្ដើមយកទឹកដីទាំងអស់ ដែលស្ថិតនៅចន្លោះខែត្រព្រហ្មទេព និងភ្នំដងរែក ហើយក៏បានយកខែត្រម្លូព្រៃ និងទន្លេរពៅផងដែរ ដែលស្ថិតនៅក្នុងដីកំពង់ស្វាយ ក៏ប៉ុន្ដែនៅឆ្ងាយពីរាជធានីឧត្ដុង្គខ្លាំងពេក ជាហេតុធ្វើឱ្យព្រះរាជាមិនសូវបានយកព្រះទ័យទុកដាក់ ។ ដណ្ដើមយកទឹកដីទាំងអស់នោះបានដោយស្រួលរួចហើយ ទ័ពសៀមបានឆ្លងទន្លេទៅដណ្ដើមយកស្ទឹងត្រែង ដាក់បញ្ចូលទៅក្នុងព្រះរាជាណាចក្រសៀមថែមទៀត (៦៩) ។ គឺនៅស្ទឹងត្រែងនេះឯងដែលព្រះរាជាលង្វែកមួយអង្គបានរត់មកជ្រកកោននៅចុងសតវត្សរ៍ទី១៦ ក្រោយពីសៀមចូលលុកលុយ ។
ព្រះរាជាកម្ពុជាពេលនោះមិនបានប្រកែកតវ៉ាប្រឆាំងអ្វីទេ បណ្ដោយឱ្យសៀមធ្វើតាមតែចិត្ដចង់ ម្ល៉ោះហើយ កម្ពុជាក៏ត្រូវកាត់ផ្ដាច់លែងមានព្រំប្រទល់ដែនជាប់ជាមួយប្រទេសលាវទៀតហើយ ព្រោះមានទឹកដីដែលក្លាយទៅជារបស់សៀមនៅចន្លោះកណ្ដាល ។ នៅក្នុងឆ្នាំ១៨១៥ កម្ពុជា និងសៀមបានចុះសន្ធិសញ្ញាសន្ដិភាពមួយ ក៏ប៉ុន្ដែគេមិនបាននិយាយអំពីទឹកដីដែលសៀមទើបតែយកទៅនេះទេ ។ ទឹកដីនេះបានក្លាយទៅជារបស់សៀម ក៏ប៉ុន្ដែបើគេគិតតាមផ្លូវទូតវិញ គ្មានលក្ខណៈអ្វីឱ្យច្បាស់លាស់ទេ ដូចតែដីបាត់ដំបង និងអង្គរ ដែលយើងបានឃើញពីខាងលើរួចមកហើយ ។
គឺនៅសម័យនោះឯង ដែលគេបានជីកព្រែកជីកវិញតេ រាជពង្សាវតារកម្ពុជានិយាយថានៅក្នុងឆ្នាំ១៨១៥ រាជពង្សាវតារអាណ្ណាមនិយាយថាក្នុងឆ្នាំ១៨១៦ តែសៀវភៅមួយមានឈ្មោះថា «យ៉ាឌិញអុងជី»=ប្រវត្ដិដីកូសាំងស៊ីនថា នៅក្នុងឆ្នាំ១៨២០ (70) ។ ព្រែកនេះគេជីកចេញពីស្ទឹងវិញតេ តម្រង់ទៅរកដៃសមុទ្រហាទៀង ។ កម្លាំងចូលរួមមានទាំងអស់១ម៉ឺននាក់ គឺអាណ្ណាម៥ពាន់នាក់ និងខ្មែរ៥ពាន់នាក់ ជីកព្រែកប្រវែងទាំងអស់៥៣គីឡូម៉ែត្រ ទទឹង៣៣ម៉ែត្រ ជម្រៅ២ម៉ែត្រ៦០ ។ ពលករម្នាក់ៗទទួលបានប្រាក់៧ហ្វ្រង់ និងអង្ករ៣០គីឡូក្រាម ក្នុង១ខែៗ ។ មានវិស្វករអាណ្ណាម៣នាក់ដឹកនាំការងារនេះ ក៏ប៉ុន្ដែពួកពលករមានមេកោយផ្ទាល់ ជាជាតិសាសន៍រៀងៗខ្លួន ។ ស្ដេចនគរទាំង២ គឺស្ដេចយ៉ាឡុង និងព្រះបាទអង្គចន្ទ បានឯកភាពគ្នាឱ្យគេជីកព្រែកនេះឡើង ដែលតភ្ជាប់ទន្លេមេគង្គទៅនឹងឈូងសមុទ្រសៀម ក៏ប៉ុន្ដែប្រជាជនខ្មែរបានចាត់ទុកកំណែននេះថា ជាការជិះជាន់មួយ ហើយនិងជាការអន់ខ្សោយរបស់ព្រះរាជាកម្ពុជានៅចំពោះមុខស្ដេចអាណ្ណាម ព្រោះជីកព្រែកនៅក្នុងទឹកដីខ្មែរ ។ អ្នកស្រុកនៅក្នុងខែត្រពាមបន្ទាយមាស ទ្រាំង និងព្រៃកប្បាស នៅចងចាំអំពីកំណែននេះនៅឡើយបើទោះបីថា កម្រៃដែលគេបានទទួលនៅពេលនោះសមរម្យហើយក៏ដោយ ០,២៣ហ្វ្រង់ (សម្រាប់អង្ករ១ថ្ងៃ) ។ នៅពេលដែលអាជ្ញាធរបារាំងស្នើសុំពលករឱ្យចូលរួមជួយលើកផ្លូវជាតិ ដោយបើកកម្រៃឱ្យច្រើនជាង៤ដង គេតែងតែឮអ្នកស្រុកត្អូញត្អែរពីសម័យជីកព្រែកនោះ ដែលត្រូវគេបង្ខំឱ្យធ្វើការពេញមួយរដូវ «ជីកព្រែកឱ្យយួន» ។
អ្វីដែលធ្វើឱ្យខ្មែររឹតតែខឹងខ្លាំងឡើងថែមទៀតនោះ គឺនៅក្រោយពេលជីកព្រែកនេះរួច ពួកអាណ្ណាមបានកាត់យកដីទាំងអស់ដែលស្ថិតនៅខាងត្បូងព្រែក ចាត់ទុកព្រែកនោះថាជាព្រំដែននគរទាំង២ ។ មិនតែប៉ុណ្ណោះ អាណ្ណាមបានបង្កើតប៉ុស្ដិ៍គយនៅលើត្រើយខាងស្ដាំទន្លេមេគង្គ ត្រង់កន្លែងច្រកចូលទៅក្នុងព្រែក នៅកោះក្ដាក និងនៅពាមជរថែមទៀត ។
នៅពេលដែលខ្មែរ និងអាណ្ណាមកំពុងតែព្រួតដៃគ្នាជីកព្រែកវិញតេ ខាងនិរតីប្រទេស នៅខាងជើងប្រទេសឯណោះវិញ មានពួកបះបោរ១ក្រុមបានលេចមុខឡើងនៅក្នុងខែត្រកំពង់ស្វាយ ។
ឧកញ៉ាតេជោចៅហ្វាយខែត្រកំពង់ស្វាយបានរួសរាន់កេណ្ឌទ័ពបានមួយកងតូច ដើម្បីទប់ទល់នឹងពួកបះបោរ ក៏ប៉ុន្ដែមិនអាចទប់បាន ក៏វាយដកថយមកវិញ ក្រោយពីជំនួយការរបស់ចៅហ្វាយខែត្រត្រូវសត្រូវសម្លាប់បាន ។ ឧកញ៉ាតេជោបានដឹកនាំទ័ពគេចទៅកំពង់លែង នៅក្នុងខែមីនា ឆ្នាំ១៨១៦ ជាមួយនឹងចៅហ្វាយខែត្រព្រៃក្ដី ជាខែត្រតូចមួយនៅលើស្ទឹងសែន ។ ព្រះរាជាខ្ញាល់ជាខ្លាំងនឹងឧកញ៉ាតេជោ ដែលមិនបំពេញភារកិច្ចឱ្យបានត្រឹមត្រូវ ទ្រង់ក៏ដាក់ឧកញ៉ានរិន្ទសេនាម៉ាជំនួសវិញ ។ ឧកញ៉ានរិន្ទសេនាបានកេណ្ឌទ័ពមួយកងភ្លាម ហើយបានវាយទៅលើពួកបះបោរ ធ្វើឱ្យពួកនោះបរាជ័យនៅក្នុងខែឧសភា ឆ្នាំ១៨១៦ ។
ព្រះរាជាកម្ពុជាពេលនោះទ្រង់ហាក់ដូចជាបានខិតខំថ្លឹងថ្លែង ធ្វើយ៉ាងណាឱ្យមានភាពស្មើគ្នារវាងប្រទេសជាអ្នកការពារទាំង២ ។ យ៉ាងណាមិញ ទ្រង់បានចាត់បញ្ជូនឱ្យទៅតាមកំពត និងតាមសំពៅ នូវសាច់ប្រាក់ចំនួន២០០ឆ្នាំង ទៅថ្វាយស្ដេចសៀម ហើយក៏បានចាត់មន្ដ្រី២រូបឱ្យនាំក្រមួន២ហាប ក្រវាញ១ហាប ម្រ័ក្សណ៍១ហាប ស្ពាន់ធ័រ១ហាប ដង្កោ១ហាប ភ្លុកដំរី២ហាប និងស្នែងខ្ចី២គូ ទៅថ្វាយស្ដេចអាណ្ណាមដែរ ។
នៅក្នុងអំឡុងឆ្នាំ១៨១៦នោះដែរ មានរឿងធំមួយកើតឡើង គឺកូនចៅម្នាក់របស់ពួកព័រទុយហ្គាល់ ដែលមករស់នៅកម្ពុជាកាលពីប៉ុន្មានសតវត្សរ៍មុនបានទទួលការប្រោសប្រណីពីព្រះរាជាដែលតែងតាំងឱ្យឡើងជាឧកញ៉ាក្រឡាហោម គឺរដ្ឋមន្ដ្រីទ័ពជើងទឹក ។ ជននោះមាននាមត្រកូលថា ម៉ុងតេរ៉ូ ហើយមានឈ្មោះផ្ទាល់ខ្លួនថា បែន និងមានឋានៈជាព្រះរាជពិភេក គឺគ្រូពេទ្យសម្រាប់ព្រះរាជា ។ ជននេះជាកូនកាត់ទេ ក៏ប៉ុន្ដែគេចាត់ទុកគាត់ថា ជាជនអឺរ៉ុប ។ ព្រះរាជាបានចាត់ទុកគាត់ថាជាអ្នកបម្រើស្មោះត្រង់ម្នាក់ ក៏ប៉ុន្ដែពួកសហសេវិកទាំងឡាយស្អប់គាត់ដោយព្រោះតែគាត់ជាប់ខ្សែស្រឡាយអឺរ៉ុប ហើយគាត់ឆ្លាតវាងវៃជាងគេ ម្ល៉ោះហើយក៏រករឿងចោទប្រកាន់គាត់ថា គៃបន្លំ សាហាវ មានបទឧក្រិដ្ឋ១០យ៉ាង ។ ព្រះរាជាបានសម្រេចឱ្យគេនាំយកគាត់ទៅតុលាការ ។ តុលាការបានរកទៅឃើញថា គាត់មានកំហុសដោយសារគាត់បានយកប្រាក់ពីអ្នកដែលគាត់បានរកបុណ្យសក្ដិឱ្យ បានលាក់ខ្ញុំរបស់គេដែលរត់មកជ្រកកោននឹងគាត់ ផ្ទុយទៅនឹងច្បាប់ព្រះនគរដែលកំណត់ថា ត្រូវតែប្រគល់ទៅឱ្យម្ចាស់ដើមវិញបើពុំនោះទេម្ចាស់ថ្មីត្រូវទិញខ្ញុំនោះពីម្ចាស់ដើម បានប្រព្រឹត្ដកាមគុណជាមួយប្រពន្ធ ឬសហាយរបស់អ្នកដទៃ ដែលគាត់បានទាក់ទាញឱ្យមកផ្ទះគាត់ ជួនកាលគាត់យករហូតតែម្ដង និងកាត់សេចក្ដីទៅតាមតែលាភសក្ការៈដែលបានទទួល ។ បែនម៉ុងតេរ៉ូ បានសារភាពទទួលស្គាល់កំហុសរបស់ខ្លួន ក៏ប៉ុន្ដែដល់ស្អែកឡើង គាត់គេចខ្លួនបាត់ ។ គេបានតាមចាប់គាត់មកវិញ ហើយព្រះរាជាបានសម្រេចកាត់ទោសគាត់ឱ្យគេសម្លាប់ដោយកាត់ក្បាល ។ ចំណែកកូនប្រុសរបស់គាត់ដែលបានរៀបចំការរត់គេចរបស់គាត់ ព្រះរាជាបានលើកលែងទោសកំហុសឱ្យ ដោយទ្រង់គិតថាគ្នាប្រព្រឹត្ដដូច្នេះក៏ដោយសារតែដើម្បីតបស្នងសងគុណឪពុកប៉ុណ្ណោះ ។
ព្រះអង្គចន្ទមានព្រះរាជបំណងចង់ឱ្យការផ្ដល់យុត្ដិធម៌របស់ព្រះអង្គត្រូវបានអនុវត្ដពេញលេញ ម្ល៉ោះហើយទ្រង់បានដាក់ទណ្ឌកម្មលើអ្នកដែលបានចូលដៃចូលជើងជាមួយបែនម៉ុងតេរ៉ូ ទាំងអស់ ទោះបីជាអ្នកទាំងអស់នោះជាអ្នកនៅក្រោមបញ្ជារបស់បែនក៏ដោយ ។ ក្រឡាបញ្ជីរ័ត្ន និងក្រឡាបញ្ជីនូត្រូវវាយ៥០រំពាត់ រួចហើយត្រូវចាត់ទុកជាខ្ញុំរាជការដូចជាពួកអ្នកថែទាំសេះអីចឹង ។ អ្នករួមគំនិតឯទៀតៗត្រូវដាក់ទណ្ឌកម្មផ្សេងៗ រួមទាំងមន្ដ្រីអ្នកយាមគុកផងដែលបានធ្វើឱ្យអ្នកទោសរត់រួច ។ ពួករាជការណាដែលបានទិញបុណ្យសក្ដិត្រូវបញ្ចុះឋានៈ ទម្លាក់ឱ្យមកជារាស្ដ្រសាមញ្ញ ហើយទ្រព្យសម្បត្ដិទាំងអស់ត្រូវរឹបអូស (71) ។
នៅក្នុងឆ្នាំ១៨១៧ រាជការបានកំណត់យកពន្ធស្រូវ៥ថាំងលើស្រូវ៥០ថាំងដំបូង រួចបានសម្រេចថា តទៅអនាគតពន្ធនេះនឹងត្រូវគិតរហូតដល់ចំនួនកូនចៅ និងខ្ញុំកំដរដែលស្ថិតនៅក្នុងបន្ទុកគ្រួសារថែមទៀត ។ ម្ល៉ោះហើយ ព្រះរាជាបានចេញព្រះរាជបញ្ជាឱ្យគេធ្វើសម្រង់ចំនួនប្រជាជន មានរៀបរាប់អំពីឈ្មោះមេគ្រួសារ ប្រពន្ធ កូន ចៅ និងខ្ញុំកំដរ ដោយបញ្ជាក់ច្បាស់អំពីភេទ និងអាយុផងដែរ ។
នៅក្នុងឆ្នាំនោះ ក្រោយពីមានភាពរាំងស្ងួតខ្លាំងរួចមក មានទឹកជំនន់មួយយ៉ាងធំប្លែកពីសព្វដង ធ្វើឱ្យផលស្រូវថយចុះម្យ៉ាងដោយសារប្រជាជនមិនអាចភ្ជួររាស់ដីបានទាន់ពេល ម្យ៉ាងទៀតដោយសារសំណាបសន្ទូងត្រូវទឹកលិចបាត់អស់ ។ ផ្ទះជាច្រើនត្រូវទឹកជំនន់ហូរនាំយកទៅបាត់ សត្វពាហណៈក៏លង់ទឹកស្លាប់ច្រើន សត្វធាតុរត់ទៅជ្រកនៅឯដីខ្ពង់រាបខ្ពស់ៗអស់ ។ អ្នកស្រុកត្រូវនាំគ្រួសារ និងគោក្របីទៅរកទីខ្ពស់ដែរ ។ ពេលនោះមានការចាប់ជំរត់មនុស្ស និងលួចគោក្របីជាច្រើន ។ បន្ទាយល្វាឯម ដែលពួកអាណ្ណាមបានសាងសង់ឡើង ត្រូវបំផ្លាញខ្ទេចអស់ ហើយទឹកលិចព្រះរាជវាំងកម្ពស់២ហត្ថកន្លះ ។ ទុរ្ភិក្សរាលដាលពាសពេញនគរ ព្រោះស្រូវលិចទឹកខូចគ្មានសល់ ស្រូវ១ថាំងតម្លៃ៥បាត គឺប្រហែលជា៤៧ក្រាមប្រាក់សុទ្ធ ស្មើនឹង១០ហ្វ្រង់ ។ មានកើតចោរដើរកាប់សម្លាប់លួចប្លន់ជាច្រើន ណាមួយមានអាសន្នរោគ ជំងឺសត្វ និងអុត ពាសពេញប្រទេសទៀតផង ។
នៅដំណាច់ឆ្នាំ មេទ័ពអាណ្ណាមត្រូវផ្លាស់ចេញ ព្រះរាជាបានជូនដំណើររហូតទៅដល់សាយហ្គន ដើម្បីបានចូលសម្ដែងការគួរសមចំពោះលោកសេនាប្រមុខដែលឈរជើងនៅទីនោះផង ។ ប៉ុន្មានខែក្រោយមកបន្ទាប់ពីបានសម្ដែងការគោរពក្នុងឋានៈជានគរចំណុះដល់អាណ្ណាមរួចហើយព្រះរាជាបានចាត់មន្ដ្រីជាន់ខ្ពស់២នាក់ឱ្យចុះសំពៅតាមកំពតទៅចូលរួមព្រះរាជពិធីបូជាសពព្រះឧបរាជសៀម ។ នេះជាការសម្ដែងឱ្យឃើញនូវការទទួលស្គាល់ភាព ជាចំណុះស្ដេចបាងកក ។
នៅឆ្នាំ១៨១៨អ្នកកាន់សីលម្នាក់នៅបាភ្នំឈ្មោះថា កែ កើតជំងឺឡប់សតិហើយប្រកាសថាខ្លួនជាអ្នកមានបុណ្យ បានកេណ្ឌទ័ពសម្លាប់ឧកញ៉ាតេជោម៉ុនជាចៅហ្វាយខែត្រចោល ហើយទាក់ទាញមន្ដ្រី៣នាក់ ដែលមិនសប្បាយចិត្ដឱ្យចូលដៃជាមួយ ចាប់ផ្ដើមកាប់សម្លាប់ពួកអាណ្ណាមយ៉ាងរង្គាល ។ ដើម្បីការពារជនរួមជាតិរបស់គេ មេទ័ពអាណ្ណាម២នាក់គឺ អុងតាក្វាន (ឡេវ៉ាន់យៀត) និងអុងចាន់ដូវ បានដឹកនាំទ័ព៥ពាន់នាក់ មកបោះទីតាំងនៅកោះសូទិន ក្នុងខែត្រកំពង់ចាម ។ ពេលនោះព្រះរាជាកម្ពុជាបានបញ្ជូនចៅហ្វ៊ាទួនផា ឱ្យដឹកនាំទ័ព២ពាន់នាក់ទៅវាយពួកបះបោរដែរ ។ ទ័ពទាំង២កងបានបើកការវាយប្រហារទៅលើទ័ពបះបោរដែលមានចំនួនតិចជាង មិនអាចទប់ទល់បាន ហើយឡោមព័ទ្ធចាប់ កែ សម្លាប់ចោលទៅ ។ ពួកមន្ដ្រី៣រូបដែលមិនសប្បាយចិត្ដ ហើយចូលដៃចូលជើងជាមួយពួកក្បត់ ត្រូវចាប់បានជាឈ្លើយ ហើយបញ្ជូនទៅឱ្យមេទ័ពអាណ្ណាមនៅឯបេនញែ (សាយហ្គន) ។ ក្រោយពីសាកសួរចម្លើយរួច មេទ័ពអាណ្ណាមក៏បញ្ជូនអ្នកទាំង៣នាក់មកថ្វាយព្រះរាជាកម្ពុជាវិញ ។ ព្រះអង្គបានចេញព្រះរាជបញ្ជាឱ្យសម្លាប់ចោលទៅ ។
ដប់ឆ្នាំក្រោយមក គឺនៅក្នុងឆ្នាំ១៨២៩ ស្ដេចសៀមបានបញ្ជូនចៅឃុនបឌិន (៧២) ឱ្យទៅធ្វើសង្គ្រាមជាមួយស្ដេចលាវ ដណ្ដើមយករាជធានីវៀងចន្ទបាន ។ ចៅឃុនបឌិនចាប់ស្ដេចលាវបានជាឈ្លើយ ហើយនាំយកមកបាងកកដាក់ឱ្យប្រជាជនស្ដីជេររួចធ្វើឃាតចោលទៅ ។ សៀមដុតបំផ្លាញរាជធានីវៀងចន្ទខ្ទេចខ្ទី ហើយបានកៀរអ្នកស្រុកយកមកដាក់នៅលើត្រើយទន្លេមេគង្គខាងស្ដាំ រួចបែងចែកឱ្យទៅរស់នៅតាមខែត្រផ្សេងៗ ។ គេត្រូវរង់ចាំរហូតដល់ពេលដែលពួកបារាំងបានមកត្រួតត្រាលើប្រទេសលាវ ទើបរាជធានីនេះត្រូវបានគេកែលម្អ កាប់ព្រៃឈើចេញ យកធ្វើជារាជធានីរបស់លាវឡើងវិញ ។ សព្វថ្ងៃនេះមានរ៉េស៊ីដង់ធំបារាំងម្នាក់រស់នៅទីនោះ ។
ក្រោយពីបានធ្វើសង្គ្រាមបំផ្លិចបំផ្លាញលាវ គម្ពីរក្បួនច្បាប់ និងអារ្យធម៌របស់ប្រជាជនលាវ ឱ្យវិលធ្លាក់ចូលទៅក្នុងសភាពព្រៃផ្សៃដូចកាលពី៦-៧សតវត្សមុនរួចមក ព្រះរាជាបាងកកបានចូលមកលុកលុយកម្ពុជា តាមសំណើរបស់ចៅហ្វាយខែត្រពោធិ៍សាត់ ដែលទើបតែនាំអ្នកស្រុករបស់ខ្លួនចំនួន២ភាគ៣ ទៅរស់នៅឯស្រុកសៀម ដោយមិនទាំងបានប្រកាសសង្គ្រាមផងទេ ។ សៀមធ្វើយ៉ាងនេះ គឺដើម្បីកុំឱ្យអាណ្ណាមមានអធិរាជភាពមកលើកម្ពុជាខ្លាំងពេក ។
ការពើបប្រយុទ្ធដំបូងបានផ្ទុះឡើងនៅកំពង់ឆ្នាំង ពេលដែលពួកសៀមបានទៅដល់ក្រោយពីឆ្លងកាត់បាត់ដំបង និងពោធិ៍សាត់រួច ។ ពេលនោះព្រះរាជាកម្ពុជាមិនទាន់កេណ្ឌទ័ពបាននៅឡើយ ។ ទ័ពខ្មែរត្រូវបរាជ័យ ហើយមេទ័ពលោកឧកញ៉ាចក្រីភិតភ័យជាខ្លាំង រត់រហូតទៅដល់ខែត្រព្រៃកប្បាស នៅខាងត្បូងឯណោះ ។
ព្រះរាជាដែលគង់នៅភ្នំពេញ បាននាំព្រះរាជវង្សានុវង្សរត់គេចព្រះអង្គទៅនៅឯលង់ហោ (វិញឡុង) ។ មួយថ្ងៃបន្ទាប់ពីព្រះរាជាយាងចេញដំណើរផុត ទ័ពសៀម៤កងចូលមកដល់ឧត្ដុង្គ រួចបន្ដដំណើរមកដល់ភ្នំពេញ ប៉ុន្មានថ្ងៃក្រោយមកជាមួយនឹងព្រះអនុជរបស់ព្រះរាជាទាំង២អង្គគឺព្រះឧបរាជអង្គឯម និងព្រះអង្គឌួង ។ ទ័ពទាំង៤កងនេះបញ្ជាដោយអគ្គបញ្ជាការចៅឃុនបឌិន ជាវីរបុរសដែលទើបតែបានវាយកម្ទេចរាជធានីវៀងចន្ទ និងអតីតចៅហ្វាយខែត្រពោធិ៍សាត់ឈ្មោះ កា ។ មកដល់ភ្នំពេញបានប៉ុន្មានថ្ងៃ ពួកនេះបានបន្ដដំណើរទៅវាយយកចូវដុក នៅនឹងមាត់ពាមព្រែកវិញតេ ដើម្បីធានារក្សាឱ្យបានទំនាក់ទំនងជាមួយឈូងសមុទ្រសៀម ដែលមានទ័ពមួយកងត្រូវចេញដំណើរមក ។ ទ័ពជើងទឹកនេះបានមកចុះចតនៅហាទៀង វាយដណ្ដើមយកទីក្រុងនេះបានដោយគ្មានការប្រយុទ្ធ ហើយទុកទ័ពមួយកងឱ្យនៅថែរក្សា រួចក៏បន្ដដំណើរទៅជួបជាមួយបឌិននៅឯចូវដុក ។ ចៅឃុនបឌិនក៏សម្រេចធ្វើដំណើរចុះទៅវិញឡុងដែលព្រះរាជាគង់នៅ ហើយវាយយកបាននៅក្នុងខែធ្នូ ឆ្នាំ១៨៣១ ។
នៅពេលនោះនៅតាមបណ្ដាខែត្រភាគខាងកើតវិញ លោកចក្រីឡុង និងលោកយមរាជហ៊ូបានរៀបចំទ័ព បំពាក់អាវុធយ៉ាងរហ័ស រួចវាយកងទ័ពសៀមមួយកងឱ្យបរាជ័យនៅក្នុងខែត្រព្រៃវែង ។ ក្រុមអ្នកក្លាហានខ្មែរផ្សេងៗទៀត បានប្រមែប្រមូលគ្នីគ្នា រៀបចំជាកងទ័ពដែរ ហើយវាយឆ្មក់មកលើទ័ពសៀមដែលដើរពាសពេញប្រទេសរាល់ថ្ងៃ ។ មេទ័ពសៀមទទួលបានដំណឹងនេះជាហូរហែ ក៏សម្រេចចិត្ដធ្វើការប្រយុទ្ធដោយគ្មានអែអង់ ។ ការដណ្ដើមយកវិញឡុងបានជាជ័យជម្នះដ៏អស្ចារ្យមួយ ធ្វើឱ្យអ្នកស្រុកខ្លាចរអាលែងហ៊ានបះបោរប្រឆាំង និងទទួលស្គាល់សៀមថា ជាអ្នកមករំដោះទៅវិញ ។ ក៏ប៉ុន្ដែជាគ្រោះចង្រៃ ទ័ពជើងទឹករបស់បឌិនបានត្រូវវាយឱ្យបរាជ័យ ហើយបំផ្លិចអស់ទាំងស្រុង រហូតដល់មេទ័ពសៀមនេះគ្មានសល់កម្លាំងនឹងបន្ដការប្រយុទ្ធទប់ទល់ពួកអាណ្ណាមដែលមកដល់តាមជើងគោកផង និងជើងទឹកផង ហើយខ្លាំងក្លាព្រោះមានវិន័យ និងរៀបចំដោយនាយទាហានបារាំងដែលទើបតែចូលបម្រើស្ដេចយ៉ាឡុង មានជាអាទិលោកវរសេនីយ៍ទោ ឡូរ៉ង់បារីស៊ី ។ ចៅឃុនបឌិនបានវិលត្រលប់ចូលទៅស្រុកសៀមវិញ ក្រោយពីបានដុតកម្ទេចភ្នំពេញចោល ព្រោះអ្នកស្រុកមិនព្រមទៅតាម ។ ចំណែកទ័ពដែលសេសសល់បាននាំគ្នាទៅចុះសំពៅនៅហាទៀង កំពត រួចត្រលប់ទៅបាងកកតាមសមុទ្រអស់ទៅ ។
ព្រះឧបរាជអង្គឯម និងអ្នកអង្គម្ចាស់អង្គឌួង ដែលគង់នៅឯភ្នំពេញ ក៏យាងចុះទូកចេញដំណើរទៅតាមទ័ពសៀមដែរ ហើយមិនបានឈប់សម្រាកនៅនឹងឧត្ដុង្គទេ ព្រោះអ្នកស្រុកមិនអបអរស្វាគមន៍ ដូច្នេះទ្រង់ក៏ធ្វើដំណើររហូតមកដល់បាត់ដំបង ។ តាមផ្លូវទ្រង់បានចាប់បង្ខំទូកទាំងអស់ដែលបានជួប និងអ្នកស្រុកដែលរស់នៅតាមមាត់ច្រាំងទន្លេ ឱ្យចូលរួមដំណើរទៅជាមួយ ។ ក៏ប៉ុន្ដែនៅពេលពួកអ្នកស្រុកមានចំនួនកាន់តែច្រើនឡើងៗ ពួកនោះក៏នាំគ្នាបះបោរឡើង រើបម្រះវិលត្រលប់មកភូមិស្រុកវិញអស់ ។
ពេលអស់ទ័ពសៀម អាណ្ណាមបានក្លាយជាម្ចាស់កម្ពុជាម្ដងទៀត ។ ស្ដេចអាណ្ណាមបានបញ្ជូនទ័ព១ម៉ឺន៥ពាន់នាក់មកកម្ពុជា ហើយដើម្បីបង្ហាញឱ្យឃើញពីឆន្ទៈយុត្ដិធម៌របស់ព្រះអង្គ ព្រះអង្គបានយកប្រាក់ចំនួន១៤១ណែនមកថ្វាយព្រះរាជាកម្ពុជា ជាសំណងថ្លៃដំរីចំនួន៨៨ក្បាលដែលមេទ័ពអាណ្ណាមម្នាក់បានចាប់យកទៅ ដោយមិនមានព្រះរាជបញ្ជាផងទេ ។ តាមពិតទៅតម្លៃសំណងនេះមិនជាច្រើនប៉ុន្មានទេគឺតែ១៣០ហ្វ្រង់សម្រាប់ដំរីមួយក្បាលប៉ុណ្ណោះ ។ ក៏ប៉ុន្ដែស្ដេចអាណ្ណាមធ្វើយ៉ាងនេះគឺចង់បង្ហាញឱ្យឃើញថា ទ្រង់មិនរំលោភបំពានទេ ហើយជានយោបាយផងដែរ ។ បន្ទាប់មកស្ដេចអាណ្ណាមបានធ្វើត្រាប់តាមព្រះចៅអធិរាជចិន និងពួកម៉ុងហ្គោល ដោយទ្រង់បានផ្ញើសម្លៀកបំពាក់បែបអាណ្ណាម មានរួមទាំងមួកផង មកថ្វាយព្រះរាជាកម្ពុជាជាជំនូន ។ ថ្ងៃស្អែកឡើង ព្រះរាជាកម្ពុជាបានគ្រងព្រះពស្ដ្រានេះយាងចូលមកភ្នំពេញ ធ្វើឱ្យនាម៉ឺនសព្វមុខមន្ដ្រីមួយចំនួនមានការអាម៉ាសជាខ្លាំង ។ ក៏ប៉ុន្ដែក៏នៅមាននាម៉ឺនខ្លះដែលស្លៀកពាក់តាមព្រះអង្គដែរដើម្បីអែបអបផង និងដោយភ័យខ្លាចផង ព្រោះពួកគេក៏បានទទួលសម្លៀកបំពាក់នេះពីស្ដេចអាណ្ណាមដូចគ្នា ។ ម្ដងនេះ គេឃើញច្បាស់ថាពួកអាណ្ណាមមានប្រៀបខ្លាំងជាងពួកសៀមប្រាកដណាស់ ។
ក្រោយពីបានលើកព្រះរាជាកម្ពុជាឱ្យឡើងគ្រងរាជបល្ល័ង្កវិញរួចហើយ ពួកអាណ្ណាមក៏នាំគ្នាដកថយចេញទៅកូសាំងស៊ីនវិញអស់ទៅ ដោយមានជំនឿជឿជាក់ថា ម្ដងនេះពួកសៀមលែងហ៊ានមកតវ៉ាដណ្ដើមសិទ្ធិត្រួតត្រាលើស្រុកខ្មែរទៀតហើយ ព្រោះថាពួកគេបានវាយសៀមឱ្យបរាជ័យ និងបានលើកព្រះរាជាដែលសៀមទម្លាក់ពីរាជសម្បត្ដិឱ្យឡើងសោយរាជ្យវិញ ។
ក៏ប៉ុន្ដែមានមូលហេតុមួយផ្សេងទៀតដែលបង្ខំស្ដេចអាណ្ណាមមិញម៉ាងឱ្យហៅទ័ពត្រលប់ទៅកូសាំងស៊ីនវិញ គឺដើម្បីវាយបង្ក្រាបពួកបះបោរដែលចង់បំបែកកូសាំងស៊ីនចេញពីអាណ្ណាម ។ ពួកនោះបានគ្រប់គ្រងលើសាយហ្គន ហើយថែមទាំងបានស្រែកហៅរកជំនួយពីសៀមទៀតផង ។ ទ័ពសៀមបានចូលលុកលុយកម្ពុជា ហើយបង្ខំឱ្យព្រះរាជាគេចព្រះអង្គទៅគង់នៅឯវិញឡុងម្ដងទៀត ។
ពេលនោះស្ដេចអាណ្ណាមបានកោះហៅមេទ័ពដែលនៅប្រចាំការនៅភ្នំពេញឈ្មោះ អុងបាវហូ ដែលទ្រង់សង្ស័យថាបានចូលដៃចូលជើងជាមួយមេរបស់ពួកបះបោរឈ្មោះ អុងគាម៉ា ឱ្យវិលត្រលប់ទៅរាជធានីវ៉េវិញ ។ ក៏ប៉ុន្ដែអុងបាវហូមិនបានគោរពតាមព្រះរាជបញ្ជានេះទេ បែរជារត់គេចខ្លួនទៅស្រុកសៀមទៅវិញ ។ ស្ដេចអាណ្ណាមបានផ្លាស់ អុងថួយ ឱ្យមកជំនួស អុងបាវហូ ។
ទ័ពស្ដេចអាណ្ណាមបានវាយដណ្ដើមយកសាយហ្គនបានមកវិញ ក្រោយពីបានឡោមព័ទ្ធអស់ពេល៤ខែ និងធ្វើការប្រយុទ្ធជាច្រើនលើកច្រើនសា ។ ចៅហ្វាយក្រុងឈ្មោះ អុងផូវេខូយ ត្រូវគេសម្លាប់បាន ធ្វើឱ្យគ្នាគាត់ឈ្មោះ អុងដុងជុក (ចៅហ្វាយស្រុកមាត់ជ្រូកចូវដុក) រត់គេចចូលមកក្នុងកម្ពុជា ។ ព្រះរាជាបានឱ្យគាត់ទៅពួននៅឯពាមជីកង នៅត្រើយទន្លេធំខាងឆ្វេង ក្រោមកំពង់ចាមបន្ដិច ។
នៅឆ្នាំបន្ទាប់ ពេលដែលព្រះរាជាអង្គចន្ទសុគតដោយរោគរាកមួលនៅលើព្រះទីនាំងនាវា ដែលចតនៅកោះពោធិព្រះបាទ ពួកអាណ្ណាមគិតឃើញថា ព្រះរាជាណាចក្រកម្ពុជាពេលនេះច្បាស់ជាត្រូវធ្លាក់ក្នុងដៃស្ដេចមិញម៉ាង (៧៣) ដែលបានឡើងសោយរាជ្យបន្ដពីស្ដេចយ៉ាឡុងតាំងតែពីឆ្នាំ១៨១១មកមែនទែនហើយ ។ គោរពតាមបញ្ជារបស់ស្ដេចមិញម៉ាង អុងខាំម៉ាងបានកោះប្រជុំនាម៉ឺនសព្វមុខមន្ដ្រី រដ្ឋមន្ដ្រី ព្រះសង្ឃរាជ និងពួកបារគូផង ដើម្បីធ្វើការជ្រើសរើសព្រះរាជាថ្មីមួយព្រះអង្គ ។ ការជ្រើសរើសព្រះរាជាថ្មីនេះ គេមិនបានឱ្យដំណឹងទៅស្ដេចសៀមជ្រាបផងទេ ។
ព្រះបាទអង្គចន្ទ គ្មានព្រះរាជបុត្រាទេ បុត្រាមួយព្រះអង្គដែលប្រសូតនៅឯឧត្ដុង្គបានសុគតទៅតែប៉ុន្មានម៉ោងប៉ុណ្ណោះក្រោយពីប្រសូតរួច ។ និយាយអំពីព្រះអនុជរបស់ព្រះអង្គ មានព្រះឧបរាជអង្គឯម អ្នកអង្គម្ចាស់អង្គឌួង និងអង្គស្ងួនវិញ ពួកអាណ្ណាមមិនយល់ព្រមឱ្យឡើងសោយរាជ្យទេ ព្រោះអ្នកទាំង២ខាងដើម បានប្រយុទ្ធប្រឆាំងនឹងព្រះរាជា ចូលដៃជាមួយសៀម និងទៅរស់នៅស្រុកសៀម ។ ដូច្នេះគ្មានអ្នកស្នងរាជ្យជាបុរសទេ ។ ក្រុមប្រឹក្សាមិនយល់ព្រមប្រគល់ព្រះរាជបល្ល័ង្កទៅឱ្យព្រះរាជបុត្រីច្បងរបស់ព្រះអង្គចន្ទព្រះនាម បែន ឡើយ ព្រោះព្រះនាងត្រូវជាចៅរបស់ចៅហ្វ៊ាបែន ដែលបានលើកកូនស្រីថ្វាយព្រះរាជា ក្រោយពីបានប្រគល់ដីបាត់ដំបងឱ្យទៅសៀមរួច ណាមួយព្រះនាងប្រឆាំងនឹងអាណ្ណាមខ្លាំងណាស់ទៀត ។ គេបានឯកភាពគ្នាលើកព្រះអង្គម្ចាស់ក្សត្រីអង្គ ម៉ី ឱ្យឡើងសោយរាជ្យវិញ ។
៤១-ព្រះក្សត្រីអង្គម៉ី (១៨៣៤-១៨៤១)
ព្រះក្សត្រីអង្គម៉ី (៧៤) ជាបុត្រីរបស់ព្រះរាជាអង្គចន្ទជាមួយព្រះជាយាលំដាប់ទី៣មានឈ្មោះថា អ្នកម្នាងក្រចាន់ ពេលនោះទ្រង់មានព្រះជន្ម២១ព្រះវស្សាហើយ ។ ព្រះអនុជក្សត្រីរបស់ព្រះនាងព្រះនាមថា ព្រះអង្គម្ចាស់ពៅ ត្រូវបានលើកឱ្យឡើងធ្វើជាព្រះឧបរាជ ដែលតាំងតែពីពេលណាមកមិនដែលមាននារីទទួលនូវឋានៈនេះទេ ។ ព្រះក្សត្រីស្ងួន ដែលតូចជាងគេ បានគង់នៅជាមួយព្រះរៀមទាំង២អង្គ ហើយទទួលឋានៈជាព្រះកែវហ្វ៊ា ។
ប្រជាជនហាក់ដូចជាមិនមានការភ្ញាក់ផ្អើលអ្វីទេចំពោះការដែលគេជ្រើសរើសព្រះក្សត្រីមួយអង្គ ឱ្យឡើងគង់លើរាជបល្ល័ង្កដូច្នេះពីព្រោះថាថ្វីបើកន្លងមកគេមិនដែលឃើញមានព្រះមហាក្សត្រីសោយរាជ្យសម្បត្ដិក៏ដោយក៏ប៉ុន្ដែគេធ្លាប់ប្រទះឃើញព្រះរាជាដាក់រាជសម្បត្ដិថ្វាយព្រះអគ្គមហេសី ឬព្រះមាតាជាញឹកញយដែរ ដើម្បីទ្រង់អាចយាងចូលសាងព្រះផ្នួសបាន ។ ម្ល៉ោះហើយប្រជាជនហាក់ដូចជាត្រូវបង្វឹកបង្ហាត់ឱ្យចេះទទួលយកសភាពការណ៍នេះជាបណ្ដើរៗមកហើយ ។ ក៏ប៉ុន្ដែមានអ្នកខ្លះបានអះអាងប្រកបទៅដោយមូលហេតុត្រឹមត្រូវថា ការជ្រើសរើសយកក្សត្រីមួយអង្គឱ្យឡើងសោយរាជ្យដូច្នេះត្រូវចាត់ទុកជាមោឃៈ ពីព្រោះថា បើតាមទំនៀមពីបុរាណដែលកន្លងមកគ្មាននរណាម្នាក់ចាប់អារម្មណ៍ដល់ គឺថាប្រសិនណាបើគ្មានរជ្ជទាយាទជាបុរសដើម្បីបន្ដវេនពីព្រះរាជាទេ រដ្ឋមន្ដ្រី និងអ្នកមុខអ្នកការទាំងអស់ត្រូវជ្រើសរើសព្រះរាជាចេញពីក្នុងចំណោមមេក្រុមបារគូ ។ អ្នកខ្លះទៀតនិយាយថា ទំនៀមពីបុរាណនោះមិនមែននិយាយថា «គ្មានរជ្ជទាយាទបុរស» នោះទេ តែថា «ក្នុងករណីដែលគ្មានរាជវង្សានុវង្សបន្ដវេន» តែម្ដង ។ ឥឡូវនេះគេនៅមានសល់អ្នកអង្គម្ចាស់ក្នុងរាជវង្សានុវង្សនៅឡើយ ដូច្នេះមិនអាចនិយាយថាគ្មានរាជវង្សានុវង្សបន្ដវេនបានទេ ។ ពួកមន្ដ្រីធំៗមួយចំនួនបានប្រជុំគ្នាជាសម្ងាត់នៅលើកំពូលភ្នំព្រះរាជទ្រព្យពិភាក្សារឿងនេះ ហើយមានមន្ដ្រីម្នាក់ហ៊ានរហូតដល់និយាយថា «បើគេរើសក្សត្រាមួយអង្គមិនបានទេ ការជ្រើសតាំងនេះត្រូវចាត់ទុកជាមោឃៈ ។ បើសិនជារើសបានក្សត្រាមួយអង្គក៏ប៉ុន្ដែប្រជារាស្ដ្រ និងព្រះរាជាសៀមមិនទទួលស្គាល់នោះ យើងនឹងមានសង្គ្រាម ។ ប៉ុន្ដែបើសិនណាជាគេរើសបានក្សត្រីមួយអង្គ ហើយបើសិនជាស្ដេចសៀមមិនធ្វើអន្ដរាគមន៍ទេ នោះវាសនាស្រុកខ្មែរនឹងត្រូវចប់ ព្រោះច្បាស់ជាអាណ្ណាមកាត់បញ្ចូលធ្វើជាទឹកដីរបស់គេជាសម្រេចតែម្ដង» ។ ព្រះសង្ឃមួយអង្គបានស្នើឡើងថា យើងគួរនាំគ្នាធ្វើដំណើរទៅស្រុកសៀម ។ ក៏ប៉ុន្ដែអ្នកដែលមានគំនិតទាំងអស់នេះ មិនបានត្រូវគេអញ្ជើញឱ្យចូលរួមក្នុងការជ្រើសរើសព្រះរាជាផងទេ ។ ចំណែកឯប្រជាជនវិញ គេអស់កម្លាំងនឿយណាយនឹងសង្គ្រាម និងចង់បានសន្ដិភាពណាស់ តែមិនបានគិតដល់ថា ព្រះមហាក្សត្រីនឹងគ្មានឥទ្ធិពល ហើយក៏មិនបានដឹងថាមេទ័ពអាណ្ណាម អុងទួនគុន ដែលនៅពីខាងក្រោយព្រះនាងមានអំណាចខ្លាំងណាស់អាចនឹងបញ្ជាលើរាល់រដ្ឋមន្ដ្រីបាន ។ ដោយពិនិត្យឃើញថាព្រះមហាក្សត្រីទន់ខ្សោយ ហើយចំណុះអាណ្ណាមខ្លាំងពេក មានពាក្យចចាមអារ៉ាមលេចឡើងក្នុងចំណោមបក្សពួកអ្នកអង្គម្ចាស់ និងសៀម សាយភាយទៅដល់ក្នុងស្រទាប់ប្រជាជនថា ព្រះនាងបានសហាយជាមួយមេទ័ពអាណ្ណាម ។ រឿងនេះមិនពិតទេ ក៏ប៉ុន្ដែការនិយាយបង្ខូចព្រះកិត្ដិនាមបានរីករាលសាយភាយទប់លែងបាន រហូតទាល់តែព្រះមហាក្សត្រីធ្លាក់ខ្លួនទៅជាមនុស្សឆ្កួត (៧៥) ។
ឥឡូវនេះអ្វីៗបានសម្ដែងចេញឱ្យឃើញច្បាស់ណាស់ថា អាណ្ណាមប្រុងប្រៀបនឹងយកកម្ពុជាធ្វើជាទឹកដីរបស់គេមែនទែនហើយ ហើយការដែលគេរៀបចំព្រះមហាក្សត្រីអង្គម៉ីឱ្យឡើងគ្រងរាជបល្ល័ង្កនេះ គឺគ្រាន់តែដើម្បីទម្លាប់ប្រជាជនឱ្យស៊ាំនឹងភាពគ្មានស្ដេចសោយរាជ្យ ឱ្យបំភ្លេចព្រះរាជវង្សានុវង្សចោលប៉ុណ្ណោះ បើទោះជាថា កន្លងមកប្រជារាស្ដ្រធ្លាប់បានធ្វើពលីកម្មជាច្រើនដើម្បីរាជបល្ល័ង្កក៏ដោយ ។
តាមព្រះរាជក្រឹត្យមួយរបស់ស្ដេចអាណ្ណាម ព្រះរាជាណាចក្រកម្ពុជាត្រូវគ្រប់គ្រងដោយមន្ដ្រីអាណ្ណាម៣នាក់គឺទ្រឿងមិញយ៉ាង ផាមវ៉ាន់ឌាន និងត្រាន់វ៉ាន់ណាង ដែលមកនៅដឹកនាំប្រទេសដោយមានជំនួយពីរដ្ឋមន្ដ្រី និងចៅហ្វាយខែត្រខ្មែរជាច្រើននាក់ ។
រាជធានីភ្នំពេញពេលនោះគេដូរឱ្យហៅថា ត្រានតាយ ឬត្រានណាំយ៉ាងវិញ (ភ្នំ=ណាំ ពេញ=យ៉ាង) ។
រ៉េស៊ីដង់អាណ្ណាមពេលនោះនឹកគិតថា គេមានអំណាចខ្លាំងណាស់ ហើយបានបង្ខំឱ្យមន្ដ្រីទាំងអស់ស្លៀកសម្លៀកបំពាក់តាមរបៀបអាណ្ណាម (76) ឱ្យបួងសក់ និងផ្ដល់ឋានៈឱ្យតាមរបៀបអាណ្ណាម ហើយបានដាក់មេអាណ្ណាមម្នាក់នៅជាប់នឹងចៅហ្វាយខែត្រកម្ពុជា ដើម្បីត្រួតពិនិត្យលើរាល់សកម្មភាពផង និងដឹកនាំការងាររដ្ឋបាលផង ។
មិនតែប៉ុណ្ណោះ អាណ្ណាមមានបំណងចង់ធ្វើឱ្យព្រះរាជាណាចក្រខ្មែរបាត់បង់អស់នូវធាតុដើមរបស់ខ្លួន ដោយបានប្ដូរឈ្មោះស្រុកទេសទាំងអស់ថែមទៀត ។ យោងតាមសំណើរបស់ពួកអ្នកដែលនៅជាប់នឹងចៅហ្វាយខែត្រខ្មែរ ព្រះរាជាអាណ្ណាមបានសម្រេចប្ដូរឈ្មោះខែត្រ ដោយបន្ថយចំនួនពី៥៦មកនៅត្រឹម៣៣វិញ ហើយបានបង្កើតស្រុក២សម្រាប់ទឹកដីដែលមានពួកអ្នកស្រុកព្រៃរស់នៅ រួចឱ្យហៅតាមឈ្មោះអាណ្ណាមទាំងអស់ ។
ឈ្មោះខែត្រទាំង៣៣នោះមាន ណាមយ៉ាង ឬត្រានតាយ សម្រាប់ភ្នំពេញ ក្រៅពីនេះជាឈ្មោះខែត្រថ្មីដែលគេបានបង្រួមឱ្យតិច ដែលខ្ញុំមិនដឹងថាឈ្មោះណាត្រូវនឹងខែត្រចាស់ណាមួយទេ ៖ ថានធូ តាំដន ទុយឡាប់ បាណាម (បាក់ណាម) បាឡាយ (បារាយណ៍) ប៊ិញធាន (កោះអញ្ចៀន) ខាបាត ឡាវេន (ព្រៃវែង) ហៃដុង គិមទ្រឿង ចាវជុង កាអាវ វ៉ាងវ៉ាន ហាប៊ិញ ជុងឡយ សានភូ (ប្រហែលគឺសម្បូរ) សានបុក (សម្បុក) តាំវូ ខាយបៀន ហៃតាយ ខាស៊ុម (កោះសូទិន) ថេឡាប់ តាំកាយ ឡូវៀត (លង្វែក) ឡុងទន (សំរោងទង) ក្វាងបៀន ហួយី ចានតាយ អ៊ីយី ចានថាញ់ ម៉ាត់លួត អ៊មអាន ។ ឯស្រុកសម្រាប់អ្នកស្រុកព្រៃ២នោះគឺ កាញ់ចេ (ក្រចេះ) និងកាន់យ៉ើ (កញ្ជរ) ។
មានមន្ដ្រីទាំងអស់១០៧រូបដែលទទួលបន្ទុកការងាររដ្ឋបាលស៊ីវិល និងខាងកងទ័ព ។ គឺមាន ៖ ទួងក្វាន ឬ សេនាប្រមុខ១រូប ថាមតាន់ ឬអ្នកមានភារៈចាត់ចែង និងថែរក្សាទ្រព្យកងទ័ព១រូប ដេដុក ឬអគ្គមេបញ្ជាការ១រូប ហ៊ាបតាន់ ឬវរសេនីយ៍ឯក១រូប ឡាញ់ប៊ិញ ឬវរសេនីយ៍ត្រី២រូប ផឡាញ់ប៊ិញ ឬជំនួយការវរសេនីយ៍ត្រី២រូប ប៊ិញប៊ីដាវ ឬឆ្មាំកងទ័ព១រូប លឿងប៊ីដាវ ឬឆ្មាំខាងភស្ដុភារ១រូប វៀនង៉យឡាង ឬនាយការិយាល័យក្រសួង២រូប ជូស៊ូ ឬនាយរងការិយាល័យក្រសួង៣រូប បាតវូ ឬផ្នែកខាងរបៀប៤រូប បាតផាម ឬលេខាធិការ ថ្នាក់ទី៨ចំនួន៨រូប គួនផាម ឬលេខាថ្នាក់ទី៩ចំនួន៨រូប ថឡាយ ឬនាយទោផ្គត់ផ្គង់ស្បៀង៦០រូប ហួនដាវ ឬ សាស្ដ្រាចារ្យ១២រូប ហើយនិងយ៉ាវថ ឬគ្រូបង្រៀន ។
ទ្រឿងមិនយ៉ាងបានទទួលការចាត់តាំងឱ្យធ្វើជាទួងក្វាននៅភ្នំពេញ ឯឡេដៃគឿង គឺជាថាមតាន់ ។ មាន ជានភូស៊ូ ម្នាក់ស្ថិតនៅក្រោមការត្រួតត្រារបស់អ្នកទាំង២ មានភារកិច្ចត្រួតពិនិត្យសេវាស៊ីវិល និងយោធានៅក្នុងភូ (ខែត្រ) ៣ គឺហាយតាយ ហាយដុង និងសានទិញ ។
ទ័ពអាណ្ណាមនៅកម្ពុជាក៏បានត្រូវគេរៀបចំឡើងវិញដែរ ដោយបែងចែកជា២៥កងពល និងមានកងពលពិសេសមួយ ទទួលបន្ទុកថែរក្សាពង្រាប និងបង្ហាត់ដំរីចម្បាំង ។
យើងនឹងវិលត្រលប់មកមើលការរៀបចំនេះនៅពេលក្រោយ ។ កម្ពុជាទាំងមូលបានត្រូវអាណ្ណាមបែងចែកចេញជា៨ភូ (ខែត្រ) មានទាំងអស់១៨ហ្វៀន (មណ្ឌលរដ្ឋបាល) គឺ ៖
- ភូត្រាន់តាយ ភ្នំពេញ មានហ្វៀន២គឺ ថៃអាន និងលូអាន
- ភូញាហ្វា មានហ្វៀន២ដែរគឺ ធឿងផុង និងផុងញួង
- ភូណាមនិញ មានហ្វៀន៣គឺ ណាមធិញ ណាមថៃ និងភូណាម
- ភូវ៉ូកុង មានហ្វៀន៣ដែរគឺ ប៊ិញជុង គីតូ និងជុងធុយ
ភូទាំង៤នេះ ត្រួតត្រាដោយ ទួងក្វាន និង ថាមតាន់ ។
- ភូហាយតាយ មានហ្វៀន២គឺ ហាយប៊ិញ និងថានជុង
- ភូហាប៊ិញ មានហ្វៀន២ដែរគឺ ជុងហា និងភូឡាយ
ភូទាំង២នេះ ត្រួតត្រាដោយ ជានភូស៊ូ ។
- ភូសានទិញ មានហ្វៀន២គឺ ក្វេឡាំ និងសានដុង
- ភូមីឡាម មានហ្វៀន២ដែរគឺ មីឡាម និងដាវឡាម
ភូទាំង២នេះ ត្រួតត្រាដោយ ជានភូស៊ូ នៅសានទិញ ។
ចំណែកឯកងពលទាហានទាំង៥ មួយៗមាន៥កងវរសេនាធំ ដោយមិនមានគិតដល់កងអនុសេនាធំកម្ពុជាផងទេ មាន ៖ កងពលកណ្ដាល មាន២៦៩៦នាក់ កងពលបើកផ្លូវ មាន២១១៦នាក់ កងពលស្លាបខាងឆ្វេង មាន២៥៣០នាក់ កងពលស្លាបខាងស្ដាំ មាន២២០០នាក់ និងកងពលបិទគូទមាន២២៥៥នាក់ សរុបទាំងអស់ត្រូវជា១១.៧៩៦នាក់ ។
រៀបចំដូច្នេះរួចហើយ ស្ដេចអាណ្ណាមបានចាត់តាំង ឡេវ៉ាន់ឌុក ឱ្យធ្វើជាធិញលុករាជអធិការរបស់ព្រះរាជាប្រចាំកម្ពុជា ។
ពួកអាណ្ណាមបានហៅព្រះក្សត្រីអង្គម៉ី ថា ង៉ុកវ៉ាន ហើយថ្វាយព្រះឋានៈជាភាសាអាណ្ណាមថា មីឡាមក្វានជួ (ព្រះមហាក្សត្រីនៃភូមីឡាម) ។ ព្រះរៀមរបស់ព្រះនាងព្រះក្សត្រីបែន ទទួលឋានៈថា លូអានក្វាន (ក្សត្រីទី២នៃលូអាន) ព្រះអនុជក្សត្រីមួយអង្គទទួលឋានៈជា ថាវជុងក្វានក្វាន និងមួយអង្គទៀតជា តាប់និញក្វានក្វាន ។
មានការងារមួយដែលមានប្រយោជន៍ ក៏ប៉ុន្ដែបានធ្វើឱ្យអ្នកស្រុកខឹងសម្បាជាខ្លាំង គឺកំណែនឱ្យធ្វើផ្លូវយុទ្ធសាស្ដ្រមួយដោយគ្មានផ្ដល់កម្រៃ តភ្ជាប់ពីភ្នំពេញទៅស្ពានយមរាជ បច្ចុប្បន្ននៅលើផ្លូវទៅកំពត (ប្រហែលជា៤គីឡូម៉ែត្រពីភ្នំពេញ) រួចបន្ដទៅទ្រាំង និងបន្ទាយមាស និងការបង្កើតឱ្យមានក្រុមរត់សំបុត្របន្ដគ្នាប្រចាំតាមសាលានីមួយៗ ដែលមានគ្នា៣០នាក់ផ្លាស់ប្ដូរវេនគ្នា ជ្រើសរើសចេញពីអ្នកស្រុករស់នៅក្នុងភូមិជិតៗ ។ ផ្លូវនេះដែលក្រោយមកគឺផ្លូវពីភ្នំពេញទៅកំពត ខ្មែរហៅថា ផ្លូវអាណ្ណាម (77) ។
នៅសម័យនោះ គឺក្នុងឆ្នាំ១៨៣៥ នៅឯកំពង់សោម មានបងប្អូន២នាក់ដែលមានឋានៈជាឧកញ៉ាគឺ ឧកញ៉ាជ័យ និងឧកញ៉ាជូ បានប្រកែកមិនព្រមគោរពតាមបញ្ជារបស់អាណ្ណាមទេ ហើយចាប់ផ្ដើមកាន់អាវុធប្រឆាំងឡើង ។ ទាំង២នាក់បងប្អូនធ្វើការប្រយុទ្ធអស់កាលយ៉ាងយូរ តែមិនអាចបង្ក្រាបទ័ពចម្រុះអាណ្ណាម-ខ្មែរបាន ហៀបតែនឹងត្រូវគេចាប់បានទៅហើយ ក៏នាំគ្នារត់គេចឆ្លងព្រំដែនទៅជ្រកកោននៅឯបាងកកបាត់ទៅ ។
នៅឆ្នាំ១៨៣៦ នៅខែត្រកំពង់ស្វាយឯណោះវិញ តេជោរាមដែលបះបោរប្រឆាំងនឹងរបបថ្មីបានត្រូវគេចាប់យកមកភ្នំពេញ ហើយអុងទួងគុនចេញបញ្ជាឱ្យគេសម្លាប់ចោលទៅ ។ គេបានលើកស្នងអីជំនួយការរបស់តេជោរាម ឱ្យឡើងកាន់អំណាចបន្ដពីគាត់ ។ មុនដំបូងស្នងអីបានបំពេញការងារល្អណាស់ ក៏ប៉ុន្ដែដល់មកឆ្នាំ១៨៣៧ ស្រាប់តែឈ្មោះនេះបានចាប់រ៉េស៊ីដង់អាណ្ណាមសម្លាប់ចោល ហើយចាប់កេណ្ឌទ័ព ។ ស្នងអីធ្វើសកម្មភាពបានប៉ុន្មានសប្ដាហ៍ ក៏រត់គេចខ្លួនដោយនាំយកអ្នកស្រុកស្ទោង និងជីក្រែងមួយចំនួនធំផង ទៅនៅឯទន្លេរពៅ ដែលស្ថិតនៅក្រោមការត្រួតត្រារបស់សៀមនៅឡើយ ។ ពួកអាណ្ណាមបានសម្លាប់ប្រជាជនខែត្រកំពង់ស្វាយអស់ជាច្រើន ដែលគេចោទថាបានគាំទ្រស្នងអី ។ អ្នកស្រុកមួយចំនួនទៀត គេនាំយកទៅអាណ្ណាម ។
ព្រឹត្ដិការណ៍ទាំងអស់នេះ រួមទាំងការបះបោរ និងការប្រឆាំងអាណ្ណាមផង បានធ្វើឱ្យប្រជាជនកម្ពុជាមានការព្រួយបារម្ភជាខ្លាំង ។ គេក៏ចាប់តាំងនាំគ្នាងាកបែរទៅរកខែត្របាត់ដំបង ដីខ្មែរពីមុន តែឥឡូវបានក្លាយទៅជារបស់សៀមហើយ ដែលមានរាជវង្ស២អង្គកំពុងរស់នៅ គឺព្រះអង្គឯម និងព្រះអង្គឌួង (78) ។ ស្ដេចសៀមបានអនុញ្ញាតឱ្យព្រះអង្គឯមគង់នៅនឹងបាត់ដំបង ឯព្រះអង្គឌួងឱ្យគង់នៅមង្គលបុរី ។ ក្សត្រទាំង២អង្គបានឃ្លាតឆ្ងាយពីរាជបល្ល័ង្កហើយ ដោយត្រូវអាណ្ណាមបំបែក បណ្ដេញកាត់កាលចោល និងនៅជាមួយសៀម ក៏ស្ដេចសៀមមិនបានផ្គត់ផ្គង់ឱ្យល្អណាស់ណាដែរ ព្រោះមានគេច្រណែននិន្ទា ។ ក៏ប៉ុន្ដែព្រះអង្គនៅតែជាសេចក្ដីសង្ឃឹមចុងក្រោយរបស់ប្រទេសជាតិដដែល ។ ទម្លាប់ជាប្រពៃណីមួយបាននិទានតៗគ្នាថា «កាលណាទឹកហូរចុះពីខាងជើងមកខាងត្បូង កាត់ពីមុខកំពង់ហ្លួង ទឹកនោះបានប្រាប់អ្នកស្រុកថា ព្រះអង្គម្ចាស់ទាំងឡាយមានព្រះកាយពលល្អទេ ព្រះមហេសីទាំងអស់របស់ព្រះអង្គបានប្រសូតព្រះរាជបុត្រាថ្វាយព្រះអង្គ ហើយអ្នកស្រុកនិយាយថា ព្រះអាទិត្យនៅតែរះឯជើងមេឃរៀងរាល់ថ្ងៃ មិនទាន់រលត់បាត់នៅឡើយ» ។
នៅពេលដែលហៀបនឹងរលត់ទៅហើយ ប្រជាជនខ្មែរដ៏កម្សត់នៅតែនឹកដល់ព្រះរាជវង្សានុវង្សនៅឡើយ បើទោះបីថារាជវង្សានុវង្សនោះបានដឹកនាំគេអស់កាលជាច្រើនសតវត្ស ឱ្យធ្វើសង្គ្រាមកាប់សម្លាប់តែគ្នាឯង ឬប្រឆាំងនឹងបរទេសឱ្យគាំទ្រសមាជិករាជវង្សដណ្ដើមអំណាច ដណ្ដើមរាជបល្ល័ង្កគ្នា កាត់យកខែត្រផ្សេងៗទៅកាន់កាប់ ក៏ប៉ុន្ដែមិនចេះគ្រប់គ្រង ហើយមិនដែលបាននឹកគិតដល់សុខទុក្ខរបស់ប្រជាជនដ៏កម្សត់បន្ដិចណាក៏ដោយ ។ ទោះជាយ៉ាងណាក្ដី ប្រជាជននៅមានសេចក្ដីសង្ឃឹមតែលើរាជវង្សមួយនេះប៉ុណ្ណោះ ព្រោះថាគ្មានអ្នកមានបុណ្យណាម្នាក់ចេញមុខមកជួយ ដូចជានៅស្រុកចិន អាណ្ណាម ភូមា សៀម ដើម្បីបំផុសអ្នកស្រុកឱ្យនាំគ្នាបះបោរឡើងវាយប្រហារទៅលើពួកសត្រូវរបស់ព្រះរាជាណាចក្រ ហើយបណ្ដេញចេញ ដណ្ដើមយករាជបល្ល័ង្កមកវិញ រួចឡើងអង្គុយលើរាជបល្ល័ង្កនោះ ក្រោមស្នូរទះដៃអបអរសាទរពីប្រជាជនទាល់តែសោះ ។ ចៅហ្វ៊ាបែន និងចៅហ្វ៊ាមូប្រហែលជាអាចបំពេញនូវតួនាទីជាវីរជននេះបាន ក៏ប៉ុន្ដែ អ្នកទាំង២នាក់នេះមិនមែនជាអ្នកមានបុណ្យទេ ហើយក៏គ្មានឆន្ទៈខ្ពស់នឹងបំពេញភារកិច្ចនេះដែរ មិនតែប៉ុណ្ណោះ ថែមទាំងបានក្បត់ជាតិជាបន្ដបន្ទាប់ទៅទៀត កាត់ផ្ដាច់យកទឹកដីមាតុភូមិទៅឱ្យសៀមទៅវិញ ។ ម្ល៉ោះហើយ ប្រជាជនដែលហាក់បីដូចជាត្រូវសណ្ដំទៅហើយ បានភ្លេចអ្នកទាំងអស់នោះសូន្យឈឹង ទើបបានជានាំគ្នាបែរមករករាជវង្សស្ដេចដែលសោយរាជ្យលើពួកគេ ហើយសម្លឹងមើលទៅបាត់ដំបង ដែលមានក្សត្រាទាំង២អង្គគង់នៅ ។
មេទ័ពអាណ្ណាមអុងទួងគុន បានយល់ច្បាស់ណាស់ថាកម្ពុជានៅមានថាមពលដែលកំពុងតែក្រាបសម្ងំ ហើយអាចនឹងងើបក្រោកឡើងបះបោរប្រឆាំងនឹងការត្រួតត្រារបស់យួន លើរាជវង្សានុវង្សនេះឯង ។ គាត់បានប្ដេជ្ញាថានឹងកម្ចាត់កម្ចាយក្សត្រទាំង២អង្គនេះចេញ ដោយធ្វើយ៉ាងណាបំបែកបំបាក់ពីគ្នាសិន ព្រោះកន្លងមក ក្សត្រទាំង២អង្គសាមគ្គីគ្នាស្អិតល្មួតណាស់ រួចសឹមឆ្លៀតយកឱកាសដែលលេចចេញពីព្រឹត្ដិការណ៍នេះដើម្បីបំផ្លិចបំផ្លាញចោលតែម្ដង ។
អុងទួងគុនបានចាត់ឱ្យជនអាណ្ណាមម្នាក់ក្លែងខ្លួនធ្វើជាខ្មែរ ដោយដាក់ឈ្មោះថា ភគវា នាំលិខិតមួយទៅថ្វាយព្រះឧបរាជអង្គឯមទូលថាអាណ្ណាមមកកម្ពុជានេះក្នុងគោលបំណងដើម្បីជួយធ្វើឱ្យមានសន្ដិភាព ។ ការដែលលើកព្រះមហាក្សត្រីអង្គម៉ីឱ្យឡើងសោយរាជ្យនេះ ក៏ព្រោះតែថាព្រះនាងគ្រាន់តែជាព្រះមហាក្សត្រីបណ្ដោះអាសន្នប៉ុណ្ណោះ រង់ចាំតែពេលដែលមានក្សត្រាខ្មែរមួយអង្គចង់វិលត្រលប់មកសោយរាជ្យវិញ អាណ្ណាមនឹងជួយជ្រោមជ្រែង ។ ក៏ប៉ុន្ដែព្រះឧបរាជមានគូប្រជែងមួយ គឺព្រះអង្គឌួង ជាអនុជរបស់ព្រះអង្គ ដែលរៀបចំផែនការក្បត់នឹងព្រះអង្គរួចទៅហើយ ។
ព្រះឧបរាជគិតថាភ័ព្វសំណាងព្រះអង្គបានមកដល់ហើយៗ ជឿសម្ដីអាណ្ណាមថា ព្រះអនុជជាគូប្រជែងរបស់ព្រះអង្គ ទ្រង់ក៏បានចារព្រះសារលិខិតមួយច្បាប់ទៅថ្វាយស្ដេចសៀមថា ព្រះអនុជកំពុងតែធ្វើចលនាប្រឆាំងនឹងផលប្រយោជន៍សៀមនៅស្រុកខ្មែរ ។ ស្ដេចសៀមបានចាត់មន្ដ្រី២នាក់ឱ្យមកយាងព្រះអង្គឌួងទៅបាងកកភ្លាម ហើយហាមផ្ដាច់មិនឱ្យយាងមកមង្គលបុរីវិញទេ ។
ដោយកម្ចាត់ព្រះអនុជឱ្យបាត់ពីមុខពីមាត់រួចហើយ ព្រះឧបរាជបានយាងទៅគង់នៅពោធិ៍សាត់ជាមួយព្រះរាជវង្ស ព្រះរាជបុត្រាបុត្រីរបស់ព្រះអង្គឌួង ដែលទ្រង់រក្សាទុកជាចំណាប់ខ្មាំង និងមន្ដ្រីខ្មែរជាច្រើនទៀតនៅបាត់ដំបងដែលទ្រង់មិនអាចទុកចោលបាន ។ មេទ័ពអាណ្ណាមដែលបញ្ជានៅទីនោះបានចាប់ខ្លួនអ្នកទាំងអស់នោះ ហើយបញ្ជូនមកភ្នំពេញ ។ ព្រះឧបរាជអង្គឯមមិនយល់ថាហេតុអ្វីក៏មានរឿងដូច្នេះទេ តែចំពោះខ្លួនព្រះអង្គ មេទ័ពអាណ្ណាមទទួលរាក់ទាក់បំផុត ម្ល៉ោះហើយទ្រង់ក៏យាងមកភ្នំពេញជាមួយនឹងគេឯង មានកងការពារជូនដំណើរហាក់បីដូចជាមានកិត្ដិយសណាស់ ។ ពេលយាងមកដល់ភ្នំពេញ អុងទួងគុនបានទទួលស្វាគមន៍ព្រះអង្គគគ្រឹកគគ្រេងទាំងប្រជាជនក៏ទះដៃអបអរសាទរព្រោះមើលឃើញថាព្រះអង្គនេះហើយជាអ្នកមករំដោះគេ ។ ការដែលប្រជាជនអបអរសាទរទទួលព្រះឧបរាជខ្លាំងហួសហេតុពេកបានធ្វើឱ្យអុងទួងគុនអន់ចិត្ដ ដល់យប់ឡើងក៏ចាប់ព្រះអង្គដាក់ក្នុងទ្រុងដែក ហើយបញ្ជូនទៅកាន់រាជធានីវ៉េនៅថ្ងៃស្អែកឡើង (១៨៤០) ។
ចំពោះមន្ដ្រីមកពីខែត្របាត់ដំបង មានមួយចំនួនធំត្រូវគេសម្លាប់ចោលភ្លាមដោយមិនចាំបាច់កាត់ទោស នៅសល់ខ្លះគេបញ្ជូនទៅវ៉េដែរហើយឃុំទុកនៅទីនោះ ។
ចំណែកនៅបាងកកឯណោះវិញ ព្រះអង្គឌួងដែលព្រះរៀមចោទប្រកាន់ថាក្បត់ បានត្រូវសៀមឃាត់ខ្លួន ដាក់ច្រវាក់ទុកនៅក្នុងព្រះបរមរាជវាំងដែរ ។
នៅពេលដែលស្ថានការណ៍នៅកម្ពុជាកំពុងតែអាក្រក់ទៅៗ រ៉េស៊ីដង់អាណ្ណាមក៏មិនចេះស្កប់ស្កល់នឹងចំណង់របស់គេដែរ ។ គេចង់ឱ្យខ្មែរប្ដូរសាសនាកាន់តាមគេវិញ ម្ល៉ោះហើយគេបណ្ដេញលោកសង្ឃចេញពីវត្ដអារាម បញ្ជាឱ្យកាប់ដើមពោធិគាស់រំលើងព្រះពុទ្ធបដិមា និងឱ្យវាយកម្ទេចចេតិយចោល ។ លើសពីនោះទៅទៀត គេចង់ឱ្យស្រុកនេះគ្មានអ្វីជាតំណាង ដោយបានឱ្យរដ្ឋមន្ដ្រីរបស់ព្រះមហាក្សត្រីធ្វើដំណើរទៅសាយហ្គន តែបានភរថាឱ្យទៅវ៉េ ក្នុងនោះមានលោកចៅហ្វ៊ាឡុងសម្ដេចចៅពញាហ៊ូ និងលោកក្រឡាហោមគិញដោយយកលេសថាស្ដេចអាណ្ណាមចង់ជួបរួមគ្នាជាមួយនឹងព្រះឧបរាជដែលទើបតែយាងទៅដល់ ។ ប៉ុន្មានថ្ងៃបន្ទាប់មក គេបានបញ្ជូនព្រះមហាក្សត្រី ព្រះអនុជអង្គពៅជាព្រះឧបរាជ និងព្រះអនុជអង្គស្ងួន ទៅសាយហ្គនទៀត ។ ព្រះរៀមក្សត្រីអង្គបែន ជាចៅរបស់ចៅហ្វ៊ាបែន ដែលបានប្រគល់ខែត្របាត់ដំបងទៅឱ្យសៀមកាលពីមុន ពេលនេះទ្រង់មានព្រះជន្ម៣២ព្រះវស្សាហើយ (១៨៤១) បានត្រូវគេនាំយកទៅលង់ហោ (វិញឡុង) ។ គេបាននិយាយថាព្រះក្សត្រីអង្គនេះនឹងត្រូវដោះស្រាយខុសពីព្រះអនុជទាំងអស់ ព្រោះទ្រង់មានព្រះមាតាជាបុត្រីរបស់ចៅហ្វ៊ាបែន ដែលបានគេចព្រះអង្គទៅនៅឯបាត់ដំបង ហើយទ្រង់មានព្រះបិតុលាម្នាក់ជាសត្រូវស្លាប់រស់របស់អាណ្ណាម ។ ទៅដល់វិញឡុង គេឃុំព្រះនាងទុកសិន បន្ទាប់មក គេយកព្រះនាងចេញពីទីឃុំឃាំងទៅជ្រមុជទឹកទន្លេសម្លាប់ចោលដោយមិនដឹងជាមានរឿងអ្វី (១៨៤២) ។
ការដែលអាណ្ណាមធ្វើទាំងប៉ុន្មាននេះ ប្រជាជនបានឃើញ និងដឹងឮទាំងអស់ ធ្វើឱ្យគាត់អាចកាត់ស្មានបានថា បើព្រះរាជវាំងអាណ្ណាមបន្ដធ្វើអ្វីតទៅទៀតនោះគឺមិនយូរមិនឆាប់គេនឹងយកព្រះរាជាណាចក្រកម្ពុជាដាក់បញ្ចូលទៅក្នុងទឹកដីកូសាំងស៊ីនជាមិនខាន ។ អាណ្ណាមបានរៀបចំអនុវត្ដវិធានការ២ ដែលមានសារសំខាន់គ្រាន់បើដែរ ហើយដែលរាល់ប្រជាជនស៊ីវីល័យតែងតែធ្វើគឺការធ្វើសម្រង់ស្ថិតិប្រជាជន និងការចុះបញ្ជីសុរិយោដីអចលនទ្រព្យ ដូចដែលគេបានធ្វើរួចហើយនៅអាណ្ណាម ។ ក៏ប៉ុន្ដែប្រជាជនយល់ថា នេះគឺជាសកម្មភាពដំបូងនៃការកាត់យកទឹកដីហើយៗមានកំហឹងកាន់តែខ្លាំងឡើងៗ ។ ពេលនោះពួកអ្នកដែលស្រលាញ់សៀម គឺបក្សពួករបស់ព្រះឧបរាជអង្គឯម និងអ្នកអង្គម្ចាស់អង្គឌួង បានលួចចុះទៅបំផុសប្រជាជនតាមស្រុកស្រែចម្ការឱ្យបះបោរឡើង ហើយចាប់ផ្ដើមកាប់សម្លាប់ជនអាណ្ណាមឥតរើសមុខ ។ ការកាប់សម្លាប់នេះ បានរីករាលដាលរហូតមកដល់ភ្នំពេញ ដែលទ័ពអាណ្ណាមបាននាំគ្នារត់មកជ្រកនៅទាំងកងៗ តែក៏ត្រូវគេលួចសម្លាប់នៅពេលយប់ដែរ ។ ក្នុងរយៈពេលតែ៨ថ្ងៃប៉ុណ្ណោះ កម្ពុជាទាំងមូលសឹងតែគ្មានវត្ដមានអាណ្ណាមតទៅទៀត លើកលែងតែនៅតាមទីប្រជុំជនធំៗ ដែលគេមិននឹកស្មានថាប្រជាជនខ្មែរពេលនោះអាចធ្វើដូច្នេះបានសោះ ។
ប្រជាជនបានបះបោរជាទូទៅ ហើយពួកមន្ដ្រីធំៗបានលួចប្រជុំគ្នាជាសម្ងាត់ និងបានសម្រេចថា ត្រូវហៅរកសៀមឱ្យមកជួយកម្ពុជាម្ដងទៀត ។ គេនាំគ្នាបង្កើតគណៈកម្មការរដ្ឋាភិបាលបណ្ដោះអាសន្នមួយ រួចបានចាត់តាំងមន្ដ្រីធំ២រូបគឺឧកញ៉ាវិបុលឡុង ជាអនុរដ្ឋមន្ដ្រីខាងទ័ពជើងទឹក និងឧកញ៉ាសួគ៌ាលោក មួក ចៅហ្វាយខែត្រពោធិ៍សាត់ ឱ្យនាំយកញត្ដិមួយទៅបាងកក សុំអន្ដរាគមន៍របស់សៀម និងការលើកព្រះអង្គឌួងឱ្យឡើងសោយរាជ្យលើរាជបល្ល័ង្កកម្ពុជា តាមចំណង់ចំណូលចិត្ដរបស់ប្រជារាស្ដ្រ ។
ស្ដេចសៀមបានឯកភាពតាមការស្នើសុំទាំង២ រួចបានចាត់តាំងចៅឃុនបឌិនឱ្យកេណ្ឌទ័ពមករៀបចំ លើករាជវង្សកម្ពុជាឱ្យសោយរាជ្យឡើងវិញ ។
ប៉ុន្មានសប្ដាហ៍ក្រោយមក មេទ័ពអាណ្ណាមទាំង៣នាក់ដែលឈរជើងនៅពោធិ៍សាត់បានត្រូវវាយឱ្យបរាជ័យ ហើយបាននាំគ្នារើសម្ភារដកថយចេញ ដោយបោះបង់បន្ទាយពោធិ៍សាត់ទុកឱ្យទ័ពសៀម ។ ចៅឃុនបឌិនបានដឹកនាំទ័ពបន្ដដំណើរចូលមកក្នុងផ្ទៃប្រទេស ក្រោមស្នូរទះដៃអបអរសាទរពីប្រជាជនដែលបាននាំគ្នាងើបក្រោកឈរឡើងជួយគាំទ្រវាយប្រហារទៅលើកងទ័ពសត្រូវដែលរត់គេចពាសពេញប្រទេស ។
ពេលនោះព្រះចៅអធិរាជអាណ្ណាមបានបញ្ជូនទ័ពជំនួយមួយកងមកជាមួយព្រះឧបរាជអង្គឯម រាជបុត្រារបស់ព្រះអង្គព្រះនាមថា អង្គភឹម និងព្រះក្សត្រីទាំង៣អង្គដែលជាបុត្រីរបស់ស្ដេចអង្គចន្ទដោយសង្ឃឹមថា នឹងធ្វើឱ្យមានការបែកបាក់គ្នារវាងខ្មែរ និងខ្មែរ ។ ក៏ប៉ុន្ដែក្រោយពីមានអាវុធកាន់នៅក្នុងដៃ ក្រុមនេះបានបែរទៅប្រឆាំងនឹងពួកអាណ្ណាមដែលជិះជាន់ពួកគេអស់ពេល៧ឆ្នាំមកហើយ រួចក៏នាំគ្នារត់ទៅចុះចូលជាមួយទ័ពសៀមវិញ ភ្លេចអស់អំពើឃោរឃៅរបស់សៀមកាលពីពេលមុន ។
ទ័ពសៀមវាយរុញច្រានទ័ពអាណ្ណាម ដែលដកថយទៅជាក្រុមតូចៗ ដោយដេញតាមរហូតទៅជិតដល់ចូវដុក ។ នៅទីនោះ មានមេទ័ពអាណ្ណាមជាច្រើន ក្នុងនោះរួមមានទាំងមេទ័ពប្រចាំខែត្រពោធិ៍សាត់ទាំង៣នាក់ផង បាននាំគ្នាផឹកថ្នាំសម្លាប់ខ្លួន ដើម្បីជៀសវាងការទទួលទណ្ឌកម្មពីព្រះចៅអធិរាជ ។
៤២. ព្រះអង្គឌួង (១៨៤១-១៨៥៩)
នៅពេលនោះ នៅរាជធានីឧត្ដុង្គឯណោះវិញ ប្រជាជនកំពុងតែនាំគ្នារាក់ទាក់ស្វាគមន៍មេទ័ពសៀម ចៅឃុនបឌិន និងព្រះអង្គឌួង ដែលបានចាប់ផ្ដើមដឹកនាំកិច្ចការប្រទេសជាតិហើយ ។ ព្រះអង្គបានចេញព្រះរាជបញ្ជាទៅគ្រប់ខែត្រខណ្ឌ តែងតាំងចៅហ្វាយខែត្រ ឬទទួលស្គាល់អំណាចរបស់ពួកមេដឹកនាំបះបោរ រួចបានយាងមកគង់នៅក្នុងព្រះរាជវាំងមួយធ្វើអំពីឈើនៅឃ្លាំងស្លឹកជិតពញាឮ ដែលប្រជារាស្ដ្របាននាំគ្នាសង់ថ្វាយក្នុងពេលតែប៉ុន្មានសប្ដាហ៍ប៉ុណ្ណោះ ។
ចំណែកពួកអាណ្ណាមវិញ បានប្រមូលកម្លាំងទ័ព និងភស្ដុភារជាច្រើននៅក្នុងព្រែកជីកហាទៀង ធ្វើឱ្យចៅឃុនបឌិនមានការព្រួយបារម្ភជាខ្លាំង ព្រោះបានរំសាយទ័ពទៅវិញខ្លះទៅហើយ ហើយបើនៅទាំងអស់ ក៏ទ័ពនោះតិចមិនអាចប្រៀបទៅនឹងទ័ពអាណ្ណាមបានទេ ។ ស្រាប់តែលេចកប៉ាល់ទឹកសៀមមួយកងមកចុះចតនៅនឹងកំពត ដោយមានដឹកទ័ពជំនួយមានសៀមខ្មែរម៉ាឡេ និងពួកអឺរ៉ុបមកផង ។ ចៅឃុនបឌិនប្រុងថានឹងចេញទ័ពទៅតភ្ជាប់ជាមួយទ័ពជំនួយនោះ ទទួលមានដំណឹងលេចឮថាពួកនោះត្រូវអាណ្ណាមវាយប្រហារ ហើយបាននាំគ្នាចុះទូកចេញទៅស្រុកសៀមវិញទៅហើយ ។ បរាជ័យនេះបានធ្វើឱ្យចៅឃុនបឌិនរឹតតែមានការលំបាកថែមទៀត ព្រោះទើបតែបរាជ័យនៅក្នុងការប្រយុទ្ធតាមជើងទឹកមួយនៅលើចូវដុកដែរ ក្រោយការប៉ះប្រយុទ្ធគ្នាអស់ពេល២ថ្ងៃ ។
ពេលនោះព្រះអង្គឌួងបានយាងមកគង់នៅឯខែត្រទ្រាំងវិញជាមួយទ័ពខ្មែរមួយកង ។ ទ័ពអាណ្ណាមដែលទើបតែវាយប្រហារទៅលើទ័ពសៀម ហើយបង្ខំឱ្យចុះទូកចេញទៅស្រុកវិញ បានបែរមកវាយទ័ពព្រះអង្គម្ដង ដោយជួបប្រយុទ្ធគ្នាស៊ីសាច់ហុតឈាមនៅជើងកញ្ចុំ (១៨៤១) ។
ព្រះអង្គឌួងបានយាងត្រលប់មកឧត្ដុង្គវិញ ទាំងក្ដីអស់សង្ឃឹម ។ ក៏ប៉ុន្ដែបឌិនបានប្ដេជ្ញានៅតតាំង ហើយបានចាត់ឱ្យគេសង់របាំងការពារនៅទន្លេធំ លើដៃទន្លេចូវដុក និងដៃទន្លេតូចៗ១០កន្លែងទៀត សម្រាប់ទប់បង្អាក់ដំណើររុលទៅមុខរបស់ពួកអាណ្ណាម ថ្វីបើរបាំងខ្លះតូចក៏ដោយ ។
ទ័ពសត្រូវទាំងសងខាងបានបោះទីតាំងនៅលើទឹកដីដែលគេដណ្ដើមយកបាន ហើយលួចចេញវាយគ្នាមួយដងមួយកាល ជួនកាលនៅពេលយប់ ធ្វើឱ្យមានការខូចខាតហិនហោចជាខ្លាំង ។ សៀម និងអាណ្ណាមច្បាំងគ្នានៅលើទឹកដីកម្ពុជា ម្ល៉ោះហើយគេមិនប្រញាប់ប្រញាល់នឹងដណ្ដើមយកជ័យជម្នះពីគ្នាទៅវិញទៅមកទេ ។ ម្នាក់ៗគិតតែដណ្ដើមយកអាណាខែត្រកម្ពុជាមួយចំនួនដាក់ចូលទៅក្នុងទឹកដីរបស់ខ្លួន បែងទឹកដីខ្មែរចែកគ្នា ម្ល៉ោះហើយខិតខំធ្វើម៉េចកាន់កាប់ទឹកដីឱ្យបានច្រើន តាមតែអាចធ្វើទៅបាន ។ អ្នកទាំង២មានកង្វល់តែមួយដូចគ្នា គឺកាន់កាប់ភ្នំពេញចតុម្មុខឱ្យបានព្រោះជាបេះដូង និងជាចំណុចយុទ្ធសាស្ដ្ររបស់ប្រទេស ។ បើសិនជាមិនគិតពីចតុម្មុខនេះទេ គេប្រហែលជាបានចុះសន្ធិសញ្ញាសន្ដិភាពរួចបាត់ទៅហើយ ហើយកម្ពុជាទាំងមូលក៏នឹងត្រូវបែងចែករវាងសៀម និងអាណ្ណាមអស់ទៅហើយដែរ ។
ដូច្នេះភ្នំពេញដែល២០ឆ្នាំក្រោយមកជារាជធានីរបស់កម្ពុជាក្រោមកិច្ចការពាររបស់បារាំងគឺជាឧបសគ្គមួយដែលបើដើរជំពប់ទៅនឹងមានកើតសង្គ្រាម ឬមួយសន្ដិភាព ។ ទ័ពអាណ្ណាមយល់អំពីបញ្ហានេះច្បាស់ណាស់ ក៏ប៉ុន្ដែដោយប្រជាជនទូទាំងប្រទេសបានងើបប្រឆាំងហើយ ហើយរដ្ឋាភិបាលអាចនឹងត្រូវគេដណ្ដើមយក អុងទួងគុនបានសម្រេចចិត្ដដកស្នាក់ការពីភ្នំពេញទៅដាក់នៅឯចូវដុកវិញ ។ ចៅឃុនបឌិនបានឱកាសក៏ចូលមកកាន់កាប់រាជធានីដែលអាណ្ណាមបោះបង់ចោល រួចបានបញ្ជាឱ្យគេសង់វាំងមួយនៅកំពង់វៀងភ័ក្ដ្រ ត្រង់កន្លែងដែលមានសាលាឃុំតាំងពីឆ្នាំ១៨៨៥មក សព្វថ្ងៃជាទីតាំងរោងចក្រទឹកកកនៅខាងជើងវត្ដឧណ្ណាលោម ។
ពេលនោះពួកអាណ្ណាមបានដោះលែងព្រះអង្គឯមឱ្យមានសេរីភាព និងចាត់ទុកព្រះអង្គជាស្ដេចមួយអង្គឡើងវិញ ហើយនាំព្រះអង្គមកភ្នំពេញ រួចនាំទៅចូវដុកជាមួយនៅពេលដែលពួកគេដកថយទៅ ក្នុងក្ដីសង្ឃឹមថា នឹងឱ្យព្រះអង្គប្រឆាំងនឹងព្រះអង្គឌួងដែលរាស្ដ្រស្រលាញ់ចូលចិត្ដ និងឱ្យព្រះអង្គ និងអ្នកដែលគាំទ្រព្រះអង្គបន្ដធ្វើសង្គ្រាមជាមួយនឹងសៀមតទៅទៀត ។ ដើម្បីលាក់បាំងគោលបំណងអាក្រក់របស់ខ្លួនកុំឱ្យប្រជាជនមើលឃើញ ពួកអាណ្ណាមបានរៀបអាពាហ៍ពិពាហ៍ព្រះឧបរាជអង្គឯមជាមួយអ្នកអង្គពៅ ដែលគេបានលើកឱ្យធ្វើជាឧបរាជដែរ រួចហើយរៀបអាពាហ៍ពិពាហ៍អ្នកអង្គម្ចាស់អង្គភឹម បុត្រារបស់ព្រះអង្គឯម ជាមួយព្រះក្សត្រីអង្គស្ងួន ដែលក្រោយមកបានក្លាយទៅជាមហេសីមួយអង្គរបស់ព្រះអង្គឌួង ក្រោយពីព្រះអង្គភឹមសុគតទៅ ។ ការរៀបចំទុកដាក់នេះល្អណាស់ ក៏ប៉ុន្ដែមិនបានប៉ុន្មានផង ព្រះឧបរាជអង្គឯម (79) ដែលប្រជាជនមិនដែលចូលចិត្ដបន្ដិចណាសោះ តាំងតែពីយូរណាស់មកហើយបានសុគតទៅនៅក្នុងឆ្នាំ១៨១៣ ហើយអ្វីៗក៏ត្រូវបញ្ចប់ទៅដែរទុកឱ្យព្រះអង្គឌួងនៅទាមទារព្រះរាជបល្ល័ង្កតែមួយព្រះអង្គឯង ។
អត់ពីព្រះអង្គឯមទៅ ពួកអាណ្ណាមគិតថាត្រូវតែបង្ខំសភាពការណ៍ឱ្យបានឆាប់រហ័ស បើពុំនោះទេត្រូវធ្វើការចរចា ។ ពួកគេចាប់វាយបន្ទាយពាមមានជ័យ (បាណាម) (80) ដណ្ដើមយកបាននៅក្នុងខែសីហា រួចហើយបានឡើងតាមទន្លេតូចមកវាយទៅលើបន្ទាយដែក ដែលព្រះរាជាកំពុងតែគង់នៅដោយគ្មានដឹងថា ពាមមានជ័យត្រូវអាណ្ណាមដណ្ដើមយកបានទៅវិញទេ ។ ប្រយុទ្ធគ្នាអស់ពេល៣ថ្ងៃ ព្រះរាជាបានវាយដកថយជាមួយចៅឃុនបឌិនទៅភ្នំពេញវិញ ជាមួយនឹងទ័ពសៀមដែលសេសសល់ រួចគេចបន្ដទៅកាន់ឧត្ដុង្គ ដោយបោះបង់ចោលទឹកដីមួយចំណែកធំ រួមទាំងចតុម្មុខផង ឱ្យទៅសត្រូវ ។
ឧត្ដុង្គត្រូវបានរៀបចំកំផែងការពារ ក៏ប៉ុន្ដែគេហាក់ដូចជាអស់សង្ឃឹមថានឹងអាចឈ្នះបានទៀតហើយ ណាមួយចៅឃុនបឌិន ដែលធ្លាប់តែមានឈ្មោះល្បីល្បាញដោយសារតែធ្លាប់ដុតបំផ្លាញរាជធានីវៀងចន្ទខ្ទេចខ្ទី ក៏លែងមានទំនុកចិត្ដលើអ្វីៗទៀតដែរ ។ ជាថ្មីម្ដងទៀតនេះ ប្រជាជនលែងមានសង្ឃឹមលើនរណាម្នាក់ទៀតហើយ ស្រាប់តែលេចដំណឹងថាទ័ពរប៉ាត់រប៉ាយដែលដឹកនាំដោយពួកអ្នកស្រុកដណ្ដើមបានជ័យជម្នះទៅលើទ័ពអាណ្ណាមមួយកងធំនៅជិតលង្វែក ដោយសម្លាប់មេទ័ពសត្រូវបាន ហើយធ្វើឱ្យទ័ពសត្រូវនេះបាក់បែកខ្ចាត់ខ្ចាយ ។ មេទ័ពសត្រូវម្នាក់ទៀតត្រូវចាប់បាន ឯទ័ពដែលរត់ខ្ចាត់ខ្ចាយនោះត្រូវអ្នកស្រុកនាំគ្នាដេញចាប់កាប់សម្លាប់យ៉ាងរង្គាល ។
ពេលនោះបរិយាកាសសប្បាយរីករាយកើតមានពាសពេញព្រះរាជាណាចក្រ អ្នកដែលបាក់ស្មារតីក៏ចាប់មានសេចក្ដីក្លាហានឡើងវិញ ។ គេនាំគ្នាចាប់កាន់អាវុធម្ដងទៀត ហើយនៅទីណាដែលគេប្រទះឃើញកងទ័ពអាណ្ណាមកំពុងតែរត់បែកខ្ញែក ប្រជាជនក៏ប្រមូលគ្នាលើកនរណាម្នាក់ឱ្យធ្វើជាមេ រួចតាមវាយពួកអាណ្ណាមដោយឥតញញើតដៃ ។ ក៏ប៉ុន្ដែក្នុងចំណោមមេទ័ពដែលប្រជាជនបានលើកឱ្យធ្វើជាមេ ដោយមិនបានព្រាងទុកជាមុននេះ មានខ្លះជាមេចោរ ដែលបានជ្រើសរើសគ្នីគ្នាគេក្នុងបំណងធ្វើការឆក់ប្លន់ផងដែរ ។ ព្រះអង្គឌួងបានចេញបញ្ជាឱ្យចាប់មេទ័ពបែបនេះ២នាក់ ដែលមិនព្រមចូលខ្លួនមកបង្ហាញមុខនៅក្នុងព្រះបរមរាជវាំង ម្នាក់មានរហ្សនាមថា ចក្រីនង ម្នាក់ទៀតគេហៅថា ក្រឡាហោមមួក ។ ព្រះអង្គបានកាត់ទោសឱ្យគេសម្លាប់ចក្រីនងចោលទៅ ក៏ប៉ុន្ដែទ្រង់បានលើកលែងទោសឱ្យក្រឡាហោមមួក ហើយបានចាត់តាំងឱ្យទៅនៅការពារខែត្របាភ្នំ និងបន្ទាយពាមក្បាល (១៨៤៤) ។ រួចហើយព្រះរាជាបានយាងត្រលប់ចូលមកភ្នំពេញវិញ ។
នៅក្នុងឆ្នាំបន្ទាប់ ព្រះអង្គឌួងបានទទួលដំណឹងថាមន្ដ្រីរបស់ព្រះអង្គម្នាក់គឺចក្រីម៉ី (ឬមឿន) បានដឹកនាំចលនាក្បត់មួយប្រឆាំងនឹងព្រះអង្គ ។ ទ្រង់បានចេញព្រះរាជបញ្ជាឱ្យចាប់មេក្បត់ធំៗ៧នាក់សម្លាប់ចោល អ្នកឯទៀតៗដែលនាំគ្នារត់គេចភៀសខ្លួនទៅចូវដុកទៅជ្រកកោនជាមួយពួកអាណ្ណាមហើយទ្រង់បានឱ្យរឹបអូសយកទ្រព្យសម្បត្ដិទាំងអស់ ។
ក្នុងរយៈពេលដែលអាណ្ណាមត្រួតត្រាកម្ពុជាជាង៧ឆ្នាំនេះ គេបានសង់បន្ទាយរឹងមាំ ប៉មច្រើនជាង៥០កន្លែង គឺមានតាំងពីសម្បូររហូតដល់កូសាំងស៊ីន ពីស្រែអំបិលកំពង់សោមដែលគេបានសង់ប៉មមួយនៅលើភ្នំវត្ដផុង រហូតទៅដល់ហាទៀង ដោយកាត់តាមកំពតដែលសព្វថ្ងៃមានសេសសល់បង្គោលទូរគមនាគមន៍មួយ និងស្លាកែត នៅតាមផ្លូវទៅហាទៀង ដែលគេអាចមើលឃើញលេណដ្ឋានមួយនៅឡើយ ។ បន្ទាយទាំងអស់នេះសុទ្ធតែត្រូវពួកអ្នកស្រុកវាយទៅលើ ធ្វើឱ្យទ័ពអាណ្ណាមដែលនៅខាងក្នុងភ័យញាប់ញ័ររត់គេចចេញអស់ ។
ពេលនោះព្រះអង្គឌួង និងចៅឃុនបឌិន ដោយពិនិត្យឃើញថាគ្មានអ្វីនឹងបន្ដធ្វើសង្គ្រាមតទៅទៀតហើយ ដោយទ្រង់បាក់ទឹកចិត្ដអស់កម្លាំងផង ក៏បានស្នើសុំចរចាសន្ដិភាពជាមួយអាណ្ណាម ដែលមានអគ្គបញ្ជាការដ្ឋាននៅកំពង់ហ្លួង ។ មេទ័ពអាណ្ណាមមិនព្រមទទួលសំបុត្រដែលផ្ញើទៅឱ្យទេហើយបានដឹកនាំទ័ពធ្វើដំណើរមកកាន់ឧត្ដុង្គ ។ ទ័ពខ្មែរ និងសៀមពេលនោះ បានពង្រឹងការទប់ទល់យ៉ាងស្វិតស្វាញ រហូតទាល់តែអាចបំផ្លាញរាល់ការវាយប្រហាររបស់ពួកអាណ្ណាមបាន ។ នៅពេលវាយប្រហារទៅពិនិត្យឃើញថាមិនអាចដណ្ដើមយកជ័យជម្នះលើពួកខ្មែរដែលមានថាមពល និងយុទ្ធវិធីខ្ពង់ខ្ពស់បាន ពួកអាណ្ណាមដែលទើបតែប្រកែកមិនយល់ព្រមចរចាសន្ដិភាពបានចាប់ផ្ដើមស្នើសុំចរចាខ្លួនឯងម្ដង ។ ព្រះរាជាអង្គឌួង និងចៅឃុនបឌិនបានបញ្ជូនសារលិខិតរបស់អាណ្ណាមទៅវិញ ដោយមិនមានឆ្លើយតបទេ ។ មេទ័ពអាណ្ណាមបានទទូចសុំចរចាទៀត ។ ព្រះអង្គឌួងបានឆ្លើយតបថា ព្រះអង្គនឹងជឿថាអាណ្ណាមមានបំណងចង់ចរចាពិតប្រាកដមែន តែលុះណាអាណ្ណាមយល់ព្រមបញ្ជូនព្រះរាជវង្សានុវង្សទាំងអស់ ព្រមទាំងនាម៉ឺនមន្ដ្រីហើយនិងប្រជាជនខ្មែរណាដែលអាណ្ណាមចាប់ទុកនៅសាយហ្គន ឬនៅឯរាជធានីវ៉េ ត្រឡប់មកវិញ ។ ក៏ប៉ុន្ដែមេទ័ពអាណ្ណាមបានទូលតបមកព្រះអង្គថា ខ្លួនគ្មានអំណាចអ្វីគ្រប់គ្រាន់នឹងសម្រេចលើកិច្ចការទាំងអស់នោះបានទេ ខ្លួនគ្រាន់តែជាមេទ័ពម្នាក់ប៉ុណ្ណោះ ។ ព្រះរាជាបានយល់ព្រមធ្វើការចរចាសន្ធិសញ្ញាសន្ដិភាពជាមួយមេទ័ពអាណ្ណាម ហើយបានណាត់ជួបគ្នានៅក្នុងភូមិពពៃ បើសិនជាបន្ទាប់ពីនោះទៅស្ដេចអាណ្ណាមយល់ព្រមតាមសន្ធិសញ្ញានោះដែរ ។
កិច្ចប្រជុំនោះបានប្រព្រឹត្ដទៅនៅក្នុងខែធ្នូ ឆ្នាំ១៨៤៥ ដោយមានការចូលរួមអំពីចៅឃុនបឌិន និងឧត្ដមសេនីយ៍អាណ្ណាមផង ។ ការចរចាបានឯកភាពគ្នាថា នឹងលើកព្រះអង្គឌួងឱ្យឡើងសោយរាជ្យជាព្រះរាជាកម្ពុជា ដោយមានការយល់ព្រមពីរដ្ឋាភិបាលសៀម និងអាណ្ណាមទាំងអស់គ្នា រួចហើយអាណ្ណាមនឹងបញ្ជូនព្រះរាជវង្សានុវង្សខ្មែរ ដែលគេបានឃាត់ទុកឱ្យវិលត្រលប់មកវិញ ជាថ្នូរនឹងឈ្លើយសឹកអាណ្ណាមទាំងនាយទាហាន និងកូនទាហាន ដែលខ្មែរចាប់បាន ។ រួចហើយគេក៏បំបែកគ្នាទៅ ។
ប៉ុន្មានសប្ដាហ៍ក្រោយមក សន្ធិសញ្ញានេះបានទទួលសច្ចាប័នពីរដ្ឋាភិបាលសៀម និងអាណ្ណាម ហើយគេបានធ្វើការផ្លាស់ប្ដូរឈ្លើយសឹកគ្នាទៅវិញទៅមកនៅក្នុងខែមិថុនា ឆ្នាំ១៨៤៦ ។ អាណ្ណាមបានបង្វិលព្រះខ័នរាជ្យមកភ្នំពេញថ្វាយទៅព្រះអង្គឌួង ដែលបានយកទៅរក្សាទុកនៅក្នុងដំណាក់ពិសេសមួយនៅឧត្ដុង្គ ។
សិលាចារឹកមួយនៅក្នុងវត្ដបារាយណ៍បាននិយាយថា «ព្រះបាទអង្គឌួងមិនបានដេញតាមកម្ចាត់កម្ចាយសត្រូវរបស់ព្រះអង្គឱ្យរលត់រលាយទាំងអស់ទេ ហើយក៏មិនយកគុណធម៌អំណាចវិទ្យាសាស្ដ្រ និងភាពល្អឥតខ្ចោះរបស់ព្រះអង្គមកគ្របសង្កត់លើពួកនេះដែរ» ។ ព្រះអង្គបានទទួលព្រះរាជាភិសេកនៅចុងឆ្នាំ១៨៤៧ នៅចំពោះមុខតំណាងម្នាក់ពីរាជវាំងវ៉េ គឺអុងខាំម៉ាង និងតំណាង២នាក់របស់ស្ដេចសៀម គឺចៅភ្យាពេជ្រពិជ័យ និងបារគូម្នាក់មកពីបាងកក ។
មានចំណុចមួយចំនួនដែលគួរតែលើកយកមកនិយាយដើម្បីឱ្យឃើញនូវរហស្សូបាយដែលនគរទាំងពីរបានប្រើសម្រាប់ព្រឹត្ដិការណ៍ដ៏ឱឡារិកនេះដែរ ។ ស្ដេចអាណ្ណាមបានផ្ញើជាជំនូនសម្រាប់ការលើកឱ្យសោយរាជ្យនេះនូវត្រារាង៤ជ្រុងមួយធ្វើអំពីមាស និងព្រះឋានៈថា កាវមេនក្វួកវឿង (មានន័យថាព្រះរាជាកម្ពុជា) ។ ស្ដេចសៀមបានបញ្ជូនមកឱ្យវិញនូវគ្រឿងឥស្សរិយយសសម្រាប់រាជបល្ល័ង្កកម្ពុជាដែលគេបានយកទៅបាងកកកាលពីមុន រួចហើយបានសុំឱ្យព្រះអង្គឌួងអនុម័តយល់ព្រមតាមរយៈសន្ធិសញ្ញាសម្ងាត់មួយដែលចៅហ្វាយខែត្រកំពង់ស្វាយបានថ្វាយ គឺប្រគល់ទឹកដីម្លូព្រៃ ទន្លេរពៅ និងទឹកដីឯទៀតៗដែលខ្មែរបានយកតាំងតែពី៣០ឆ្នាំមុនមកម្ល៉េះ ។ ព្រះរាជាបានមានព្រះបន្ទូលថា «យើងមិនយល់ព្រមប្រគល់ដីសូម្បីតែបន្ដិចទៅឱ្យពួកសៀមទេ ។ ក៏ប៉ុន្ដែដោយពួកគេខ្លាំងជាង ឱ្យគេរក្សាទុកដីដែលគេបានយករួចទៅហើយមួយរយៈទៀតសិនចុះ»។ ចៅហ្វាយខែត្រកំពង់ស្វាយបាននាំពាក្យទៅប្រាប់ស្ដេចសៀមវិញ ហើយបានចេញលិខិតមួយច្បាប់ ចុះហត្ថលេខា និងបោះត្រាខ្លួនឯងបញ្ជាក់ថាបានយល់ព្រមប្រគល់ដីដែលសៀមស្នើសុំក្នុងនាមព្រះរាជាកម្ពុជា ។ ខែត្រទាំង២នេះ ស្ដេចសៀមបានយល់ព្រមបង្វិលមកឱ្យបារាំងតាមរយៈសន្ធិសញ្ញារវាងរដ្ឋាភិបាលបារាំង និងសៀមឆ្នាំ១៩០៤ រួចហើយបានដាក់បញ្ចូលមកក្នុងព្រះរាជាណាចក្រកម្ពុជាវិញនៅក្នុងឆ្នាំបន្ទាប់ ។
នៅទីបញ្ចប់ សង្គ្រាមអស់រយៈពេល៨ឆ្នាំដែលធ្វើឱ្យប្រជារាស្ដ្ររងទុក្ខខ្លោចផ្សាជាខ្លាំង បានធ្វើឱ្យសៀមទទួលបានត្រលប់មកវិញនូវសិទ្ធិអធិរាជភាពមកលើកម្ពុជាដែលគេបានបាត់បង់ទៅកាលពីឆ្នាំ១៨៣៣ និងបានធ្វើឱ្យកម្ពុជាដែលមានអធិរាជត្រួតត្រាតែមួយអស់ពេលប៉ុន្មានឆ្នាំមកហើយ ហើយស្ទើរតែត្រូវអាណ្ណាមស្រូបយកបាត់ទៅ ត្រលប់មកមានអធិរាជត្រួតត្រា២សាជាថ្មីឡើងវិញ ដូចដែលមានកាលពីមុនកាលបរិច្ឆេទនេះ (81) ។
ក្រោយពីមានសន្ធិសញ្ញាសន្ដិភាពរួចហើយ គេបានវាយកម្ទេចកំពែងការពារភ្នំពេញចោល ចំណែកដុំឥដ្ឋ និងសម្ភារផ្សេងៗដែលសេសសល់ពីកំពែងនេះ ត្រូវបានយកទៅធ្វើការសាងសង់នៅឧត្ដុង្គ រួមមានវត្ដវាំងចាស់ ព្រះពុទ្ធនិព្វាន ព្រះវិហារសមណៈ ប្រាង្គក្រាំងពន្លៃ សាលាគោ ជាដើម ។ គេបាននាំគ្នាលើកព្រះពុទ្ធរូប ដែលពួកអាណ្ណាមបានរុញផ្ដួលទៅដី និងតុបតែងលម្អឡើងវិញ ។
ព្រះរាជាបានចេញព្រះរាជបញ្ជាឱ្យគេសាងសង់ព្រះរាជវាំងមួយថ្វាយព្រះអង្គនៅឧត្ដុង្គ ។
គឺចាប់ពីមានសន្ធិសញ្ញានោះឯង ដែលប្រជាជនកម្ពុជាចាប់ផ្ដើមធ្វើដំណើរចាកចេញពីបណ្ដាអាណាខែត្រនៅកូសាំងស៊ីនដែលពួកយួនបានដណ្ដើមយកពីមុនដោយបោះបង់ដីស្រែចម្ការទុកឱ្យពួកអាណ្ណាមពីព្រោះពួកនេះ ចេះតែចាក់រុករករឿងឈ្លោះ យប់ឡើងចេញដើរលួចឆក់ បង្កការលំបាកមិនឱ្យខ្មែររស់នៅបានសុខស្រួល ។ គ្មានយុត្ដិធម៌ចំពោះម្ចាស់ដីទេ ៖ តុលាការទទួលស្គាល់រាល់ការបំពានដណ្ដើមយកដីដោយជនអាណ្ណាមម្នាក់កាលណាជននោះបង្ហាញឱ្យឃើញថាគេជាអ្នកសាបព្រោះលើដីនៅពេលចុងក្រោយនេះ ដោយមិនគិតទេថាតើគេបានជួលដីនោះ ឬមួយក៏គេបានលួចសាបព្រោះមិនឱ្យម្ចាស់ដឹង បើទោះជាថាម្ចាស់ដីជាខ្មែរនោះបានភ្ជួរដីរួចហើយ យួនមកលួចសាបក៏ដោយ ។ ដីដែលគេទុកទំនេរកាលបើមានជនអាណ្ណាមណាម្នាក់មកកាន់កាប់ តុលាការសម្រេចថាម្ចាស់ដើមបានបោះបង់ចោលហើយ ។ ភាពអយុត្ដិធម៌នេះបានបណ្ដាលឱ្យមានការសងសឹកគួរឱ្យភ័យខ្លាចកើតមានឡើង ។ មានការលួចដុត ការកាប់សម្លាប់ ការកាយភ្លឺស្រែទម្លាយ ការលែងសត្វពាហណៈឱ្យស៊ីបំផ្លាញភោគផលជាដើម ដែលបន្ទាប់មកបានត្រូវចៅក្រមអាណ្ណាមដាក់ទណ្ឌកម្មជាទម្ងន់ ។ បើសិនជាគេរកជនប្រព្រឹត្ដល្មើសមិនឃើញទេ គេប្រគល់ឱ្យភូមិទាំងមូលទទួលខុសត្រូវ ។ គេចាប់មេភូមិចាប់ចាស់ទុំ និងកសិករសាមញ្ញឱ្យសងសំណងយ៉ាងធ្ងន់ធ្ងរ ឬវាយនឹងដំបងផ្ដៅសួរចម្លើយរហូតដល់ស្លាប់ ។ ជួនកាលទៀតមានកើតជាការប្រយុទ្ធរវាងពួកយួនជាមួយពួកខ្មែរទាំងហ្វូងៗ ជាហេតុធ្វើឱ្យខ្មែរមិនអាចទ្រាំបាន ក៏នាំគ្នារត់បោះបង់ដីចោលទុកឱ្យយួន ហើយមករកជ្រកកោននៅឯកម្ពុជាវិញ ។ ពួកអាណ្ណាមបានប្ដូរឈ្មោះភូមិស្រុកដែលពួកគេបានមកតាំងនៅ រហូតទាល់តែគេភ្លេចឈ្មោះដើមជាខ្មែររបស់ភូមិស្រុកនោះអស់ ។ បើសិនជាឈ្មោះនោះមានអត្ថន័យអាចឱ្យគេបកប្រែបាន គេនឹងបកប្រែឈ្មោះ កម្ពុជានោះ ជាហេតុធ្វើឱ្យបាត់ឈ្មោះនោះរហូតតែម្ដង ។
ខែត្រព្រៃនគរគេដូរឈ្មោះទៅជាខែត្រយ៉ាឌិញ ។ កំពាបស្រកាត្រីដូរទៅជា បៀនវ៉ា បារិយា ទៅជា បារាជ (82) ផ្សារដែកទៅជា អានយ៉ាងរួចជាសាដែក ពោធិលើទៅជាបាក់លីវ ទឹកខ្មៅទៅជាកាម៉ៅ បាយឆៅ ទៅជាបាយសាវ ពាមមានជ័យ ទៅជា មីថាង ស្រុកទ្រាំង ទៅជា សុកត្រាង ពាមមេសែន ទៅជា ដុងណាយ ង៉ាយ ក្រមួនស ទៅជា រ៉ាជយ៉ា ព្រែកឫស្សីទៅជា កាន់ថឺ អូរមរ ទៅជា អូម៉ូន នៅក្នុងខែត្រកាន់ថឺ កំពូលមាស ទៅជា ប៊ិញធុយ មាត់ជ្រូក ទៅជា ចូវដុក ហើយភ្នំស្វាម ទៅជា នូយសាម បារាជ ទៅជា ឡុងស្វៀង ឯភ្នំបាធី ទៅជា នូយបាធី ។ ខែត្រមួញខាំទៅជាហាទៀង ហើយពាមដែលគេហៅថា មួញខាំដែរក៏ទៅជាហាទៀងដែរ ។ ព្រះត្រពាំងទៅជាត្រាវិញ កំពង់ឫស្សីទៅជា បេនត្រែ លង់ហោទៅជាវិញឡុង មេសរទៅជាមីថ កោះកុង ទៅជាហ្គូកុង កំពង់គោទៅជាទ្រឿងអាញ់ សព្វថ្ងៃគឺតាន់អាន បានលិចទៅជាបេនលុក រោងដំរីទៅជាតៃនិញ ឯភ្នំរោងដំរីដែលគេហៅពីមុនថាភ្នំជើងមេដែងទៅជាភ្នំតៃនិញ កោះត្រឡាចទៅជាកោះពូឡូកុងឌ័រ កោះត្រល់ ទៅជាភូគ្វួក ភ្នំយួកទៅជានូយកាវុយ ពាមជើងកញ្ជើទៅជាកាន់យ៉ើ (ជ្រោយសាំងហ្សាក់),ឈើទាលមួយដើម ទៅជាធូដូម៉ូត បន្ទាយជីឫស្សីទៅជាហុងង្វៀង កំពង់កោះក្របីទៅជាបេនងែ (សាយហ្គន) ផ្សារធំទៅជា ចឺឡឺង តាមពាក្យចិនដែលមានន័យដូចគ្នាដែរ កង្វារដាក់ពាង ទៅជា បៀនវ៉ា ដូងណាយ ទៅជា តុងថាញ់ និងដុងណាយ កនកាវ ទៅជា បាថាក់ គឺជាស្រុកមួយនៅលើត្រើយទន្លេមេគង្គខាងលិច ។
នៅពេលនោះ ពួកអាណ្ណាមក៏ដូចជាពួកសៀម មិនបានបោះបង់ចោលគំនិតដែលចង់បានទឹកដីកម្ពុជាទេ ក៏ប៉ុន្ដែព្រះបាទអង្គឌួង ដែលប្រកបទៅដោយប្រាជ្ញាឈ្លាសវៃ បានព្យាយាមធ្វើយ៉ាងណាមិនឱ្យពួកនោះមានឱកាសល្អឡើយ ។ ព្រះអង្គមានព្រះទ័យបារម្ភនឹងពួកសៀមតិចជាងពួកអាណ្ណាម ព្រោះទ្រង់ធ្លាប់បានស្គាល់ចិត្ដសាស្ដ្រ និងគម្រោងការរបស់សៀមរួចមកហើយ ឯពួកអាណ្ណាមវិញទ្រង់មិនទាន់យល់អំពីការគិតគូររបស់គេនៅឡើយ ម្ល៉ោះហើយទ្រង់បានខិតខំថ្លឹងថ្លែងអធិរាជទាំង២ ធ្វើយ៉ាងណាមិនឱ្យមានលម្អៀងនឹងគ្នាទេ ។ ពួកអាណ្ណាមបានចាត់គ្នីគ្នាគេឱ្យតាមដានព្រះអង្គជាប់ ព្រោះគេយល់ច្បាស់ណាស់ថា នៅកម្ពុជាបើគេមិនស្រលាញ់សៀមទេ គេក៏ស្អប់អាណ្ណាមណាស់ដែរ ។
នៅក្នុងឆ្នាំ១៨៤៨ ព្រះរាជាបានបញ្ជូនអ្នកអង្គម្ចាស់ច្រឡឹង (83) និងអង្គភឹម (84) ដែលទើបតែកោរជុករួចកាលពីឆ្នាំមុន ហើយបានសាងផ្នួសប៉ុន្មានខែនៅក្នុងវត្ដក្រាំងពន្លៃទៅកាន់បាងកក ។ ហេតុការណ៍នេះបានធ្វើឱ្យស្ដេចអាណ្ណាមខឹងជាខ្លាំង ។ កំហឹងនេះបានស្ដែងចេញឱ្យគេឃើញតាមរយៈការលំបាកដែលពួកអាណ្ណាមបានបង្កឡើងចំពោះទូកខ្មែរ នៅពេលធ្វើដំណើរចុះឡើងតាមទន្លេ ចេញចូលកម្ពុជា ដែលត្រូវឆ្លងកាត់គយ និងការត្រួតពិនិត្យពីមន្ដ្រីអាណ្ណាមច្រើនអន្លើ ហើយក៏មានការលំបាកដែលបង្កឡើងដោយពួកពាណិជ្ជករអាណ្ណាមផងដែរ ។ នេះសឱ្យឃើញនូវឆន្ទៈរបស់ស្ដេចអាណ្ណាម ដែលចង់បិទខ្មែរមិនឱ្យចេញទៅសមុទ្ររួច ហើយធ្វើឱ្យកម្ពុជាទៅជាឯកោពីពិភពលោក ។
ព្រះបាទអង្គឌួងទ្រង់គោរពបូជាសាសនាណាស់ ហើយមានចំណេះដឹងខ្ពង់ខ្ពស់លើសគេឯងនៅក្នុងព្រះរាជាណាចក្រ ។ ទ្រង់មានសុភនិច្ឆ័យល្អ ហើយជាមិត្ដរបស់កវីបណ្ឌិតទាំងឡាយ ។ ព្រះអង្គមានគំនិតរីកចម្រើន ហើយមានគម្រោងការល្អៗ ក៏ប៉ុន្ដែព្រះរាជាណាចក្រពេលនោះចុះក្រខ្លាំងពេកណាស់ទៅហើយ ប្រជាជនក៏នៅសេសសល់តិចតួច មិនអាចឱ្យទ្រង់ធ្វើអ្វីកើតក្រៅតែអំពីស្រោចស្រង់សេវកាមាត្យជាព្រះរាជបរិពារ ព្រះរាជវាំង និងព្រះរាជវង្សានុវង្សឱ្យនៅស្ថិតស្ថេរតទៅប៉ុណ្ណោះ ។ អ្នកដែលនៅបម្រើព្រះអង្គតាំងពីស្រីស្នំក្រមការរហូតដល់អ្នកអង្គម្ចាស់ក្សត្រី និងមហាក្សត្រីផង ទទួលបាននូវរង្វាន់ និងប្រាក់បៀវត្សយ៉ាងតិចតួចបំផុត ។ នៅពេលដែលព្រះវររាជមាតាសុគតទៅ ប្រាក់កាសដែលព្រះអង្គបានសន្សំសំចៃ មាននៅសល់ត្រឹមតែប្រាក់៦ណែន ស្មើនឹង៤៨០ហ្វ្រង់ (សព្វថ្ងៃគឺនៅតែ ២៣៥ហ្វ្រង់) ប៉ុណ្ណោះ ។
ព្រះរាជាបានប្រគល់ភារកិច្ចទារយកភាស៊ីទៅឱ្យពួកចិនដែលតែងតែកេងកិប ក៏ប៉ុន្ដែមិនសូវជាសង្កត់សង្កិនប្រជារាស្ដ្រណាស់ណាទេ ។ ប្រាកដណាស់ថា ប្រជារាស្ដ្រក្រជាងពួកមេភាស៊ីទាំងនោះ ។
ពាណិជ្ជកម្មប្រព្រឹត្ដទៅតែតាមការដោះដូរ ។ ពួកចិនយកទំនិញពីស្រុកចិន ឬពីសិង្ហបុរី មកដូរយកស្រូវ ឬស្បែកសត្វ ស្នែង ម្រ័ក្សណ៍ និងផលិតផលព្រៃឈើផ្សេងទៀត ហើយចំណេញ៥ដង ។ មនុស្សជាច្រើនបានស្លាប់ទៅដោយមិនដែលមានប្រាក់មួយកាក់សោះក្នុងហោប៉ៅ ធ្លាប់ស្គាល់តែប្រាក់កាក់ធ្វើពីស័ង្កសី (85) ដែលគេបោះនៅអាណ្ណាម មានរន្ធ៤ជ្រុងនៅកណ្ដាល និងមានអក្សរចិននៅពីលើ ។ មាសដែលមានតែបន្ដិចបន្ដួច គេយកទៅធ្វើជាគ្រឿងអលង្ការសម្រាប់ពួកមន្ដ្រី និងភរិយា និងធ្វើប្រអប់ស្លាដែលជាសញ្ញាបញ្ជាក់អំពីអំណាចអស់ទៅហើយ ។ គេលែងយកសន្លឹកមាសដែលពួកចិនកិនឱ្យសំប៉ែតរួចកាត់ជារាងការ៉េមានជ្រុងប្រវែងប្រហែល៣សង់ទីម៉ែត្រ ហើយលក់ថ្លៃណាស់មកស្រោបព្រះពុទ្ធបដិមាទៀតហើយ ។ កាលពីមុនគេធ្លាប់ឃើញមន្ដ្រីធំម្នាក់ ឬស្ដ្រីដែលគោរពបូជាព្រះពុទ្ធសាសនា ចំណាយថវិកាផ្ទាល់ខ្លួនទិញមាសសន្លឹកនោះយកមកស្រោបព្រះពុទ្ធបដិមាធំៗ ។ ឥឡូវនេះគ្មានអ្នកណាមានសមត្ថភាពធ្វើដូច្នេះបានទេលើកលែងតែព្រះរាជា ។ អ្នកដែលគោរពបូជាព្រះពុទ្ធសាសនាខ្លាំង គេអាចធ្វើបានត្រឹមតែយកសន្លឹកមាសតូចៗមកស្រោបពីលើទ្រូងព្រះពុទ្ធរូប ហើយដល់យូរៗទៅទើបព្រះពុទ្ធរូបនោះអាចត្រូវបានស្រោបជុំជិត ដោយមានអ្នកឯទៀតៗ ចេះតែយកសន្លឹកមាសមកស្រោបតៗគ្នា ។ កម្ពុជាលែងជាប្រទេសមួយសម្បូរសប្បាយ មានកេរ្ដិ៍ឈ្មោះល្បីសុះសាយរហូតទៅដល់ស្រុកចិនដូចពីមុនទៀតហើយ ។ សង្គ្រាមជាមួយបរទេស ជាពិសេស គឺសង្គ្រាមរវាងគ្នាឯងនឹងគ្នាឯង បានធ្វើឱ្យប្រទេសហិនហោចទៅៗ ៖ គេបាននាំយកភោគផលទាំងអស់របស់កម្ពុជា យកមាសប្រាក់ទាំងអស់ ព្រមទាំងប្រជាជនផង ទៅកូសាំងស៊ីន ទៅស្រុកសៀម បន្សល់ទុកនៅតែអ្នកស្រុកស្គាំងស្គម ទីទ័លក្រនៅលើដីដែលខ្សោះអ្វីៗអស់ទៅហើយ អ្នកទាំងអស់នោះភ័យខ្លាចតែពួកសៀម ឬអាណ្ណាមលេចខ្លួនមកទៀត កាប់សម្លាប់ប្រជាជន រំលោភនារី មេម៉ាយ និងកុមារី (86) ដុតបំផ្លាញវត្ដអារាម ផ្ទះសម្បែង កាប់ដើមឈើស៊ីផ្លែ និងដើមត្នោតចោល រួចដុតភូមិទាំងមូល មុននឹងកៀរអ្នកស្រុកយកទៅជាឈ្លើយទាំងពាន់ៗនាក់ ។
ព្រះបាទអង្គឌួងនៅពេលដែលអស់រតនសម្បត្ដិហើយនៅសល់តែពន្ធអាករដែលប្រមូលបានពីពួកខ្ញុំ ទ្រង់ស្ទើរតែមិនអាចស្ដារព្រះរាជាណាចក្រ និងប្រជារាស្ដ្រឱ្យងើបក្រោកឈរឡើងវិញបានទេ ។ ដោយពួកអាណ្ណាមដែលកាន់កាប់ទឹកដីកូសាំងស៊ីននៅលើទន្លេមេគង្គខាងក្រោម កាត់ផ្ដាច់រារាំងមិនឱ្យកម្ពុជាធ្វើដំណើរចុះទៅសមុទ្របាន ទ្រង់ក៏សម្រេចព្រះរាជហឫទ័យបើកច្រកមួយចេញទៅខាងឈូងសមុទ្រសៀមវិញដើម្បីអាចដឹកផលិតផលដែលបានមកពីពន្ធអាករជាវត្ថុយកទៅក្រៅបាន ហើយរក្សាបាននូវទំនាក់ទំនងជាមួយពិភពលោក ។ ព្រះអង្គបានជ្រើសរើសយកកំពង់ផែកំពត រួចហើយទ្រង់បានឱ្យគេធ្វើសំពៅសមុទ្រធំមួយប្រគល់ឱ្យជនជាតិម៉ាឡេម្នាក់ ដែលជាអ្នកដើរសមុទ្រដ៏ពូកែ ស្គាល់សិង្ហបុរី ស្គាល់កំពង់ផែទាំងឡាយនៅទៀបកោះម៉ាឡាកា និងសៀមច្បាស់ ។ រួចហើយ ដើម្បីតភ្ជាប់កំពង់ផែនេះនឹងរាជធានីឧត្ដុង្គ ទ្រង់បានឱ្យគេសង់ផ្លូវវែងមួយចម្ងាយ១៤០គីឡូម៉ែត្រ មានស្ពានធ្វើអំពីឈើ និងសាលាសំណាក់សង់នៅក្បែរត្រពាំងមួយ និងដាក់បង្គោលគីឡូម៉ែត្ររួចទ្រង់ប្រគល់ឱ្យភូមិដែលនៅក្បែរៗផ្លូវនោះមើលថែរក្សាឱ្យបានល្អ និងឱ្យផ្លាស់វេនគ្នាយាមសាលាសំណាក់ដើម្បីបម្រើអ្នកធ្វើដំណើរ ។ ព្រះអង្គក៏បានចំណាយថវិកាឱ្យគេលើកដីសង់ផ្លូវពីរាជវាំងឧត្ដុង្គមកកាន់កំពង់ហ្លួងផងដែរ ។
ក៏ប៉ុន្ដែគួរឱ្យស្ដាយណាស់ ពីព្រោះប្រភពធនធានរបស់ព្រះអង្គពេលនោះមានកំណត់ ។ នៅតាមបណ្ដាខែត្រជាច្រើនគេមិនដែលបានធ្វើកំណែនប្រជាជនឱ្យធ្វើពលកម្មដោយទៀងទាត់អស់ជាច្រើនឆ្នាំច្រើនសតវត្សមកហើយ ម្ល៉ោះហើយនៅពេលដែលមានកំណែនម្ដងៗ អ្នកស្រុកមិនចង់ចូលរួមទេ ហើយអាជ្ញាធរក៏មិនសូវហ៊ានបង្ខិតបង្ខំប៉ុន្មានដែរ ។ ការមិនចូលរួមរបស់ប្រជាជននេះបានធ្វើឱ្យរាំងស្ទះដល់គម្រោងការរបស់ព្រះរាជា បង្ខំឱ្យទ្រង់កាត់បន្ថយគម្រោងផែនការសាងសង់ផ្លូវ ស្ពាន ដែលព្រះអង្គបានសន្យាថានឹងធ្វើដើម្បីទុកជាកេរ្ដិ៍ដំណែលជូនប្រជាជនពេលអត់ពីព្រះអង្គទៅ ។
ដោយទ្រង់មិនអាចកសាងអ្វីបានដោយសារខ្វះថវិកា ព្រះអង្គក៏មិនអាចរៀបចំអំណាចរាជាធិបតេយ្យឡើងវិញបានដែរ ពីព្រោះថាកម្ពុជាពេលនោះបាក់បែកខ្ទេចខ្ទាំខ្លាំងណាស់ ព្រះអង្គបានបែរទៅធ្វើកំណែទម្រង់ផ្សេងៗវិញ ។ មុនដំបូងទ្រង់បានសើរើពិនិត្យច្បាប់ឡើងវិញ កែសម្រួលជាច្រើន ហើយបានចេញព្រះរាជក្រឹត្យបំពេញបន្ថែម ។ ព្រះអង្គបានបង្កើតសាលាឧទ្ធរណ៍តាំងពីឆ្នាំ១៨៤៧ ដែលព្រះអង្គបានយាងទៅចូលរួមផ្ទាល់ព្រះអង្គផង បើសិនជាចាំបាច់ ។ ទ្រង់បានទទួលការយល់ព្រមពីព្រះសង្ឃក្នុងការរៀបចំកម្មវិធីសិក្សាឱ្យបានល្អប្រសើរជាងមុន ហើយវត្ដនីមួយៗមានសិស្សយ៉ាងច្រើនមកសិក្សា ។ ព្រះអង្គបានដកអ្នកល្ងង់ខ្លៅ និងអ្នកគ្មានសមត្ថភាពចេញពីកិច្ចការរាជការ ហើយបានបដិសេធជំនូនផ្សេងៗដែលពួកចៅហ្វាយខែត្រតែងតែថ្វាយព្រះរាជានៅពេលដែលទ្រង់ប្រទានត្រា ។ ទ្រង់ម៉ឺងម៉ាត់ណាស់ចំពោះអ្នកណាដែលបំពានច្បាប់ ហើយបានដាក់ទោសធ្ងន់ៗដល់មន្ដ្រីធំណាដែលមិនព្រមគោរពព្រះរាជបញ្ជា ។ ក៏ប៉ុន្ដែព្រះអង្គប្រកបទៅដោយយុត្ដិធម៌ មានព្រះទ័យល្អចំពោះអ្នកក្រីក្រ ទ្រង់មានអំណត់អត់ធន់ចំពោះអ្នកទាំងនោះ លើកលែងតែការប្ដឹងផ្ដល់ដែលធ្វើឡើងមិនត្រឹមត្រូវ សរសេរមិនត្រូវតាមក្បួនខ្នាតនោះព្រះអង្គមិនអត់ឱនឱ្យទេ ពីព្រោះព្រះអង្គមិនចង់ឱ្យសរសេរចម្លងតាមតែគ្នា មិនច្បាស់លាស់ ចង់ប្ដឹងផ្ដល់ត្រូវរត់ទៅរកអ្នកចេះដឹងឱ្យគេសរសេរពាក្យឱ្យ ។
ព្រះអង្គបានហាមប្រាមមន្ដ្រីរាជការមិនឱ្យផឹកសុរា អ្នកណាជក់អាភៀនត្រូវបណ្ដេញចោល ទ្រង់តឹងតែងត្រង់ចំណុចនេះរហូតទាល់តែគ្មានមន្ដ្រីណាម្នាក់ជក់អាភៀនទេនៅក្នុងរជ្ជកាលរបស់ព្រះអង្គ ។ ទ្រង់បានហាមមិនឱ្យធ្វើធ្នស់បិទជិតស្ទឹងទេ ដើម្បីឱ្យមានត្រីមួយចំនួនរួចផុតពីអ្នកនេសាទ និងដើម្បីឱ្យត្រីអាចធ្វើចរាចរទៅមកបានផង ។ តាមស្មារតីគោរពព្រះពុទ្ធសាសនា ទ្រង់ក៏បានហាមប្រាមការបរបាញ់សត្វផងដែរ ។
នៅក្នុងឆ្នាំ១៨៤៨ ទ្រង់បានសម្រេចប្ដូរពិធីការឱ្យគេហៅព្រះរាជាថា «ព្រះករុណាពិសេស» និង «អង្គម្ចាស់ជីវិតលើត្បូង» វិញ ។ ព្រះរាជមាតាទទួលព្រះឋានៈថាព្រះវររាជជននី ហើយទ្រង់មានត្រាមួយមានរូបកិន្នរីផង ។ ព្រះរាជបុត្រីច្បង ព្រះអង្គថ្វាយព្រះឋានៈថាសម្ដេចព្រះរាជធីតា ព្រះជាយារបស់ព្រះអង្គ អ្នកម្នាងប៉ែន ដែលជាមាតារបស់ព្រះរាជបុត្រាច្បងទ្រង់បានលើកឱ្យឡើងជាព្រះជាតិក្សត្រី ។ អ្នកម្នាងពៅមាតារបស់ព្រះរាជបុត្រាបន្ទាប់ ទ្រង់លើកឱ្យឡើងជាព្រះអច្ឆរាអក្សរ ។ រួចហើយទ្រង់បានរៀបចំព្រះរាជសង្ហារសម្គាល់អ្នកទាំងអស់នោះ ព្រមទាំងពាក្យពេចន៍ដែលត្រូវប្រើផង គឺឆ្លើយថាព្រះបាទម្ចាស់ចំពោះបុរសៗ និងព្រះម៉ែចំពោះនារីៗ ។ ទ្រង់ក៏បានរៀបចំឋានៈស្ដ្រីៗនៅក្នុងព្រះបរមរាជវាំងផងដែរ ហើយបានសម្រេចឱ្យហៅភរិយារបស់មន្ដ្រីសក្ដិ៤ ដល់សក្ដិ១០ថា ជំទាវ ហើយបានអនុញ្ញាតឱ្យអ្នកទាំងនោះបង់កន្សែងពណ៌ពាក់រយ៉ាមាសដោតផ្កាលើសក់ ហើយមានប្រអប់ស្លាដូចរបស់ប្ដីដែរនៅពេលចូលមកក្នុងវាំង ។
ព្រះអង្គបានឱ្យកាត់បន្ថយក្បួនដង្ហែមន្ដ្រីធំៗ ហើយចេញបញ្ជាឱ្យពួកមន្ដ្រីទាំងនោះត្រូវស្លៀកខោវែងធំទូលាយមានជរមាស ឬស្លៀកសំពត់សូត្រ នៅក្នុងពេលមានពិធីផ្សេងៗ ពាក់អាវពណ៌ ក្រវាត់ក្រណាត់ប៉ាក់ឌិនពណ៌មាស ក្រវាត់ដាវនៅចង្កេះ ទៅណាមកណាជិះគ្រែស្នែង បាំងក្លស់ពណ៌ក្រហម១ជាន់ ។
ការកែទម្រង់នេះមើលទៅដូចជារឿងកំប៉ិកកំប៉ុកទេ ក៏ប៉ុន្ដែត្រូវបានគេអបអរសាទរណាស់ ព្រោះវាបានជួយរៀបចំឱ្យព្រះរាជវាំងរបស់ព្រះរាជាកម្ពុជាមានរបៀបរបបឡើងវិញ និងជួយស្ដារកិត្ដិនាមដែលបានបាត់បង់អស់កាលជាយូរណាស់មកហើយនៅចំពោះមុខប្រជារាស្ដ្រ ។
នៅក្នុងឆ្នាំ១៨៤៩ ជំងឺប៉េស្ដបានកើតរាលដាលយ៉ាងខ្លាំងក្នុង១ថ្ងៃៗមានមនុស្សនៅជុំវិញរាជធានីឧត្ដុង្គស្លាប់រហូតដល់ទៅ៥រយនាក់ ។ ជំងឺនេះរាតត្បាតអស់ពេល៣ខែ បន្ទាប់មកក៏រលាយបាត់ទៅវិញនៅក្នុងរដូវវស្សា ។
ក្នុងឆ្នាំនោះដែរ ដោយមានមេត្ដាធម៌ដល់ប្រជារាស្ដ្ររបស់ព្រះអង្គ ទ្រង់បានបញ្ជាឱ្យគេសង់សាលាឆទានដើម្បីទ្រង់បានយាងទៅចែកបាយសម្ល និងក្រមាដល់អ្នកបួស និងទុគ៌តជន ។
ព្រះអង្គបានរៀបចំខែត្រសាជាថ្មី ខែត្រណាធំទ្រង់ឱ្យចែកជា២ ឬ៣ ឬ៤ស្រុក ។ រួចហើយទ្រង់បានដាក់ឱ្យស្ថិតនៅក្រោមឱវាទមន្ដ្រីធំៗត្រួតត្រា ។
ព្រះអង្គបានកំណត់កាលបរិច្ឆេទព្រះរាជពិធីទ្វារទសមាសទាំង១៧ ហើយបានឱ្យយកចិត្ដទុកដាក់គោរពថ្ងៃសីល និងសិក្ខាបទ ។
នៅក្នុងឆ្នាំ១៨៥៣ ព្រះរាជាមានបំណងផ្លាស់ប្រាក់បាតថៃដែលចេះតែក្រទៅៗចេញ ហើយបានឱ្យបោះពុម្ពកាក់សំប៉ែតជាប្រាក់សុទ្ធ៣ប្រភេទ ដែលមានតម្លៃនៅពេលនោះស្មើនឹង៤ហ្វ្រង់ ១ហ្វ្រង់ និង៥កាក់ ។ នៅលើមុខម្ខាងមានរូបហង្សកវែងដូចរូបហង្សដែលគេតែងតែដាក់នៅលើចុងដងទង់ខាងមុខព្រះវិហារ ។ នៅលើមុខម្ខាងទៀត មានរូបប្រាសាទបុរាណកំពូល៣ ដែលតំណាងអង្គរវត្ដ ។
បើតាមសម្ដីមន្ដ្រីចាស់ម្នាក់ដែលព្រះរាជាឧស្សាហ៍ពិគ្រោះយោបល់បាននិយាយប្រាប់ខ្ញុំថា មើលពីខាងក្រៅគេឃើញព្រះរាជា ដូចជាសប្បាយរីករាយណាស់ ក៏ប៉ុន្ដែក្នុងព្រះហឫទ័យរបស់ព្រះអង្គវិញ ទ្រង់ដូចជាគ្មានទំនុកចិត្ដចំពោះអនាគតកាលសោះ ម្យ៉ាងទ្រង់ខ្លាចពួកសៀមដែលព្រះអង្គចាត់ទុកដូចជាសត្រូវ (87) ស្ទើរតែដូចពួកអាណ្ណាម ដែលព្រះអង្គស្អប់ខ្លាំងណាស់អីចឹងដែរ ។ ពួកអាណ្ណាមនេះមានទំនៀមទម្លាប់ សាសនា សម្លៀកបំពាក់ សក់បួង និងទម្លាប់ផ្សេងៗ ដែលព្រះអង្គមិនចូលចិត្ដសោះ ណាមួយពួកនេះឈ្លានពានអាណាខែត្រភាគខាងត្បូងឥតឈប់ឈរផង ។ ព្រះអង្គជាអ្នកគាំទ្រសន្ដិភាព មិនចូលចិត្ដសង្គ្រាម ព្រោះទ្រង់ឈ្វេងយល់ថាសង្គ្រាមមិនអាចដណ្ដើមយកខែត្រដែលបាត់បង់ទៅនោះមកវិញបានទេ ។ ក៏ប៉ុន្ដែដើម្បីរារាំងសត្រូវកុំឱ្យចូលមករុកគួនព្រះរាជាណាចក្រ ទ្រង់បានបញ្ជាឱ្យគេសង់បន្ទាយការពារជាច្រើន ។ ព្រះអង្គបានមានព្រះបន្ទូលថា «មិនត្រូវគិតពីរឿងដណ្ដើមយកអ្វីដែលបាត់បង់ទៅហើយមកវិញទេ ប៉ុន្ដែត្រូវការពារអ្វីដែលនៅសល់ឱ្យបាន» ។ ព្រះអង្គបារម្ភណាស់ចំពោះអនាគត ហើយបានពិភាល់ថាកម្ពុជានឹងត្រូវបែងចែកគ្នារវាងសៀម និងអាណ្ណាម ។ ពួកសៀមនឹងយកទឹកដីពោធិ៍សាត់ កំពង់ស្វាយ ឧត្ដុង្គ សម្បូរ ក្រចេះ ត្បូងឃ្មុំ ឯអាណ្ណាមវិញនឹងយកអាណាខែត្រខាងត្បូងទាំងអស់រួមមាន បាភ្នំ ទ្រាំង ភ្នំពេញ ផង ។ បើសិនជាមានសង្គ្រាមមួយផ្ទុះឡើង ទោះជាជាមួយសៀម ឬជាមួយកូសាំងស៊ីនក៏ដោយ ក៏សង្គ្រាមនោះនឹងធ្វើឱ្យការបែងចែកទឹកដីគ្នានេះកើតមានកាន់តែឆាប់ ម្ល៉ោះហើយព្រះអង្គមិនចង់ឱ្យកើតមានសង្គ្រាមជាមួយនរណាម្នាក់ទេ ។
គំនិតដែលគិតថាថ្ងៃណាមួយជាពិសេសកាលណាអត់ពីព្រះអង្គទៅកម្ពុជាអាចនឹងត្រូវបាត់បង់នៅដិតជាប់នឹងព្រះទ័យរបស់ព្រះអង្គជានិច្ច ហើយបានធ្វើឱ្យព្រះអង្គគិតងាកទៅរកសុំជំនួយការពារពីប្រទេសអឺរ៉ុបណាមួយ ដើម្បីផ្ញើវាសនាស្រុកខ្មែរ និងសន្ដតិវង្សព្រះរាជាវិញម្ដង ។ គំនិតសុំជំនួយរបស់ព្រះអង្គពេលនោះ មិនមែនជាការសុំអាណាព្យាបាលក្នុងន័យដូចដែលយើងយល់សព្វថ្ងៃនេះទេ គឺសុំឱ្យការពារព្រះរាជាណាចក្រកុំឱ្យនគរផ្សេងដណ្ដើមយកបាន ទោះជានៅក្នុងអាស៊ី ឬក៏នៅអឺរ៉ុបក្ដី ។
ទ្រង់បាននឹកគិតទៅដល់ប្រទេសបារាំង ដែលមិនទាន់មានដែនដីជាកម្មសិទ្ធិនៅចុងបូព៌ានៅឡើយ ហើយដែលព្រះអង្គធ្លាប់បានឮល្បីកិត្ដិនាមកាលពីពេលដែលព្រះអង្គគង់នៅឯរាជធានីបាងកក ។ ដល់មកខែវិច្ឆិកា ឆ្នាំ១៨៥៣ ក្រោយពីបានពិចារណាល្អិនល្អន់រួចហើយ ព្រះបាទអង្គឌួងបានចាត់បច្ឆាញាតិ២រូបរបស់ពួកព័រទុយហ្គាល់ ដែលកាន់សាសនាកាតូលិកគឺចៅពញាកុយ និងចៅពញាប៉ែន ឱ្យធ្វើដំណើរជាសម្ងាត់ទៅសិង្ហបុរីនាំយកសារលិខិតសរសេរជាភាសាបារាំងដោយព្រះសង្ឃកាតូលិក (អេវ៉ែក) នៅកម្ពុជាឈ្មោះ មីស្ហ តាមសម្ដីរបស់ព្រះអង្គ ទៅប្រគល់ជូនកុងស៊ុលបារាំងនៅទីនោះ ឱ្យផ្ញើបញ្ជូនបន្ដទៅថ្វាយព្រះចៅអធិរាជណាប៉ូឡេអុងទី៣ «ដើម្បីសម្ដែងមិត្ដភាព និងការគោរពដ៏ជ្រាលជ្រៅពីព្រះអង្គ» ។ ជាប់ជាមួយនឹងសារលិខិតនេះមានវត្ថុអនុស្សាវរីយ៍ជាច្រើនហិប រួមមានភ្លុកដំរីធំៗ៤ កុយរមាស២ ជ័ររង្គ៧បាវទម្ងន់៣០០គីឡូក្រាម ស្កសរ៧បាវទម្ងន់ ៣០០គីឡូក្រាម និងម្រេច៧បាវទម្ងន់៣០០គីឡូក្រាមផងដែរ ។ កុងស៊ុលបារាំងប្រចាំសិង្ហបុរីបានទទួលយកព្រះសារលិខិត និងអំណោយទាំងអស់ពីទូតទាំង២ រួចបានផ្ញើសារឆ្លើយតបមកព្រះបាទអង្គឌួងវិញថាខ្លួននឹងផ្ញើព្រះរាជសារ និងអំណោយទាំងអស់ទៅប្រទេសបារាំងតាមនាវាចម្បាំងក្ដោង៣ឈ្មោះ ឡាកាព្រីស៊ីយ៉ឺ មានវរសេនីយ៍ត្រី រ៉ូកឺម៉ូរ៉ែល ជាមេបញ្ជាការ ដែលនឹងនាំរបស់ទាំងអស់នេះទៅសាលាខែត្រទូឡុង ភ្លាមនៅពេលដែលកប៉ាល់ទៅដល់ ដើម្បីឱ្យបញ្ជូនបន្ដទៅថ្វាយព្រះចៅអធិរាជ (១៨៥៤) ។
នៅឆ្នាំបន្ទាប់មក លោកដឺម៉ុងទីញី បេសកជនរបស់បារាំងប្រចាំស្រុកសៀម និងស្រុកចិនបានទទួលបញ្ជាឱ្យមកចុះសន្ធិសញ្ញាមេត្រីភាព និងពាណិជ្ជកម្មមួយជាមួយព្រះរាជាកម្ពុជាតាមបំណងប្រាថ្នារបស់ព្រះបាទអង្គឌួង ។ ឯកអគ្គរាជទូតនេះទើបតែបានចុះសន្ធិសញ្ញាពាណិជ្ជកម្មមួយជាមួយស្ដេចសៀម ព្រះមហាមង្គត ដែលថ្វាយដំណឹងតាមរយៈអេវ៉ែកមីស្ហ តាំងពីខែឧសភា ថានឹងមកកម្ពុជាឆាប់ៗនេះ តែបានប្រហែសនិយាយប្រាប់គេឯងនៅបាងកកឱ្យដឹងពីគម្រោងការថានឹងមកចុះសន្ធិសញ្ញាជាមួយព្រះបាទអង្គឌួង ។ ដំណឹងនេះបានលេចឮទៅដល់ស្ដេចសៀមៗមិនយល់ព្រមឱ្យកម្ពុជាដែលទ្រង់ចាត់ទុកជានគរសាមន្ដរាជមួយ អាចចុះសន្ធិសញ្ញាណាមួយបានដោយគ្មានការឯកភាពពីព្រះអង្គទេ ។ ស្ដេចសៀមបានចាត់មន្ដ្រីម្នាក់ឱ្យចុះកប៉ាល់ជាមួយ លោកដឺម៉ុងទីញី ជាសម្ងាត់ ដើម្បីត្រួតពិនិត្យមើលសកម្មភាពរបស់រាជទូតបារាំងនេះផង និងដើម្បីនាំសារណែនាំមួយមកថ្វាយព្រះរាជាកម្ពុជាផង ដែលអ្នកខ្លះនិយាយថាគឺជារាជសារហាមឃាត់មិនឱ្យព្រះអង្គធ្វើអ្វីជាមួយបារាំង ។ លោក ដឺម៉ុងទីញី បានឡើងកប៉ាល់មកចុះនៅកំពតនៅក្នុងខែសីហា ឆ្នាំ១៨៥៦ ។ រាជសាររបស់ស្ដេចសៀមពោរពេញទៅដោយពាក្យគំរាមកំហែង ដែលធ្វើឱ្យព្រះបាទអង្គឌួងវិតក្កយ៉ាងខ្លាំង ។ ទ្រង់មានបំណងចង់ចុះសន្ធិសញ្ញាជាមួយបារាំងជាសម្ងាត់សិន កាលណាបានសច្ចានុមតិរួចហើយសឹមផ្សព្វផ្សាយឱ្យគេដឹងឮ នៅពេលនោះទ្រង់នឹងគ្មានបារម្ភអំពីសៀម ឬអាណ្ណាមទៀតទេ ព្រោះបានទទួលការការពារពីប្រទេសអឺរ៉ុបមួយរួចហើយ ។ ក៏ប៉ុន្ដែឥឡូវ ព្រះរាជបំណងនេះបានត្រូវគេដឹងមុនអស់ទៅហើយនៅបាងកកតាំងពីមុនពេលដែលរាជទូតបារាំងចេញដំណើរមកម្ល៉េះ ។ ឯកអគ្គរាជទូតបារាំងអាចនឹងកាត់បន្ថយប្រសិទ្ធភាពនៃការគំរាមកំហែងរបស់ស្ដេចសៀមមកលើព្រះរាជាកម្ពុជា ហើយជួយរំងាប់ការព្រួយបារម្ភរបស់ព្រះបាទអង្គឌួងបាន ដោយធ្វើដំណើររហូតមកដល់ឧត្ដុង្គ រួចហើយរាយការណ៍ថ្វាយអំពីអំណាចដ៏ខ្លាំងក្លារបស់បារាំង ។ ក៏ប៉ុន្ដែផ្ទុយទៅវិញ លោក ដឺម៉ុងទីញី ដែលមិនបានយល់ច្បាស់អំពីល្បិចកលរបស់សៀមមកលើព្រះរាជាកម្ពុជាមានការប្រហែស បែរទៅជាមិនចង់ធ្វើដំណើរលើផ្លូវដ៏ឆ្ងាយចម្ងាយជាង១៤០គីឡូម៉ែត្រ កាត់ទីរហោឋានតាមដែលគាត់ឮគេនិយាយប្រាប់ទេ ។ គាត់ឈប់នៅនឹងកំពត ហើយបានចាត់ព្រះសង្ឃកាតូលិក (អាបេ) ហេស្ដ្រិស ដែលអេវ៉ែកមីស្ហ ទើបនឹងតែងតាំងមកឈរជើងនៅទីនេះ ឱ្យនាំយកសន្ធិសញ្ញាពាណិជ្ជកម្មមួយចម្លងតាមសន្ធិសញ្ញា ដែលបានចុះជាមួយសៀម មកថ្វាយព្រះបាទអង្គឌួងឡាយព្រះហស្ដលេខា ។ សន្ធិសញ្ញានោះ គ្មានអត្ថន័យគ្រប់គ្រាន់សមតាមបំណងរបស់ព្រះបាទអង្គឌួងទេ ព្រោះមិនមែនជាសន្ធិសញ្ញាមេត្រីភាពដែលទ្រង់ចង់បាន ហើយក៏មិនបានធានាអត្ថិភាពរបស់កម្ពុជាក្រោមអាណាព្យាបាលភាពរបស់ប្រទេសបារាំងដែរ បើទោះជាថា មានតែក្នុងពាក្យសម្ដីក៏ដោយចុះ ។ ព្រះបាទអង្គឌួងបានឱ្យគេសង់ផ្ទះសំណាក់មួយសម្រាប់ទទួលលោក ដឺម៉ុងទីញី នៅកំពត ហើយទ្រង់រង់ចាំទទួលគាត់នៅឧត្ដុង្គ ។ ព្រះអង្គខកព្រះទ័យជាខ្លាំងនៅពេលឃើញកូនសង្ឃកាតូលិកតូចមួយមកចូលគាល់ព្រះអង្គទៅវិញ ជាជាងបានឃើញឯកអគ្គរាជទូតដែលព្រះអង្គកំពុងតែរង់ចាំទាំងអេវ៉ែកមីស្ហ ក៏មិនយល់ស្របតាមដែរ ម្ល៉ោះហើយទ្រង់បានប្រកែកមិនយល់ព្រមចុះហត្ថលេខាលើសន្ធិសញ្ញាដែលគ្មានកិច្ចធានាអ្វីបន្ដិចសោះនោះទេ មិនតែប៉ុណ្ណោះថែមទាំងធ្វើឱ្យព្រះអង្គមានការប៉ះទង្គិចយ៉ាងខ្លាំងជាមួយពួកសៀមទៀតផង ។
ភាពខ្វះការប៉ិនប្រសប់ និងការធ្វេសប្រហែសរបស់ឯកអគ្គរាជទូតនៃព្រះចៅអធិរាជបារាំងបានធ្វើឱ្យព្រះរាជាកម្ពុជាជួបប្រទះនឹងការលំបាកយ៉ាងខ្លាំងដែលព្រះអង្គកំពុងតែខ្លាចរអាផង ហើយក៏ធ្វើឱ្យបារាំងបាត់បង់ឱកាសក្នុងការដាក់អាណាព្យាបាលមកលើកម្ពុជាតាំងពីឆ្នាំ១៨៥៦ គឺនៅមុនសង្គ្រាមឥណ្ឌូចិនជាច្រើនឆ្នាំ ។ ប្រសិនបើបារាំងបានដាក់អាណាព្យាបាលមកលើកម្ពុជាតាំងតែពីពេលនោះមក បារាំងអាចប្រើកម្ពុជាធ្វើជាមូលដ្ឋានសម្រាប់ប្រតិបត្ដិការ ដែលនឹងផ្ដល់ការងាយស្រួលជាច្រើនដល់សង្គ្រាមនោះ ។ ហើយបើសិនណាជាបារាំងបានមកឈរជើងនៅកម្ពុជា ហើយធ្វើសកម្មភាពដោយមានការគាំទ្រពីព្រះរាជាកម្ពុជាផងនោះ ម្ល៉េះសមបារាំងអាចដណ្ដើមយកកូសាំងស៊ីនទាំងមូលបានក្នុងពេលតែមួយជាមួយគ្នាទៅហើយ ។
ពេលនោះមានការបះបោរមួយរបស់អ្នកស្រុកនៅរលាប្អៀរ និងបរិបូណ៌ ដឹកនាំដោយមេបះបោរឈ្មោះ អាសុខ និងអាជ្រុម ។ ព្រះបាទអង្គឌួងបានចេញបញ្ជាឱ្យគេចាប់ពួកមេបះបោរនោះជាមួយបក្សពួកមួយចំនួនសម្លាប់ចោល ។
មានការបះបោរមួយទៀតកើតឡើងនៅរវាងឆ្នាំ១៨៥៧ ដោយពួកខ្មែររស់នៅក្នុងខែត្រតៃនិញ នៅកូសាំងស៊ីន ដែលបានទទួលការគាំទ្រពីខ្មែរជាច្រើននាក់មកពីកម្ពុជា ។ ហេតុការណ៍នេះបានធ្វើឱ្យព្រះរាជាមានព្រះទ័យព្រួយបារម្ភជាខ្លាំង ខ្លាចតែពួកអាណ្ណាមឆ្លៀតឱកាសគាំទ្រជនជាតិគេហើយតាមវាយពួកបះបោរចូលមកដល់ព្រះរាជាណាចក្រ ។ ព្រះអង្គបានចាត់ឱ្យសង់បន្ទាយការពារនៅតាមព្រំដែនខាងត្បូង ហើយបានហាមប្រាមប្រជារាស្ដ្រនៅកម្ពុជាលើមិនឱ្យផ្ដល់ជំនួយទៅពួកខ្មែរនៅកូសាំងស៊ីនដែលទ្រង់ចាត់ទុកថា ជាប្រជារាស្ដ្ររបស់ព្រះអង្គដែរ បើទោះជាថាពួកនោះធ្លាប់បានជួយវាយពួកអាណ្ណាមឱ្យបរាជ័យ ដោយជិះតែលើក្របី ហើយមានអាវុធមិនគ្រប់គ្រាន់ក៏ដោយ ។ នៅពេលនោះ ការចាកចោលស្រុកមួយលើកទៀតបានកើតមានឡើងនៅកូសាំងស៊ីន ។ ប្រជាជនខ្មែរដ៏កម្សត់ជាច្រើននាក់ដែលងើបបះបោរឡើងប្រឆាំងនឹងការគាបសង្កត់ពីពួកអាជ្ញាធរអាណ្ណាម និងញាតិជិតខាងយួនដែលលួចឆក់សម្បត្ដិទ្រព្យ វាយដំធ្វើបាបបំបែកបំបាក់ឥតមានលស់ពេល បាននាំគ្នារត់កាត់ព្រំដែនឆ្លងមកជ្រកកោននៅកម្ពុជាវិញ ។
នៅក្នុងឆ្នាំបន្ទាប់មកទៀត ពួកចាមនៅខែត្រត្បូងឃ្មុំ ដែលធ្លាប់បានបះបោរ២លើករួចមកហើយប្រឆាំងនឹងព្រះរាជាកម្ពុជាម្ដងនៅក្នុងឆ្នាំ១៥៩៩ និងម្ដងទៀតនៅក្នុងឆ្នាំ១៦៦០ បាននាំគ្នាចាប់កាន់អាវុធប្រឆាំងនឹងចៅហ្វាយខែត្រដែលមិនយល់ព្រមអនុញ្ញាតឱ្យពួកនេះបង្កើតរដ្ឋតូចមួយនៅក្នុងរង្វង់ទឹកដីខែត្ររបស់គាត់ ។ ពួកនេះស្ដាប់តែបញ្ជារបស់មេគេប៉ុណ្ណោះ (88) ។ ព្រះរាជាបានបញ្ជូនលោកយោធាសង្គ្រាមឱ្យទៅបង្ក្រាបពួកនេះ តែត្រូវពួកនេះសម្លាប់បាន ព្រោះគាត់មានកងការពារតែប៉ុន្មាននាក់ប៉ុណ្ណោះ ។ ព្រះរាជាបានកេណ្ឌទ័ពមួយកងភ្លាម រួចដឹកនាំចេញទៅត្បូងឃ្មុំដោយផ្ទាល់ព្រះអង្គ ។ ពួកចាមដែលជួនកាលត្រូវទ័ពព្រះរាជាវាយប្រហារឱ្យបរាជ័យ ជួនកាលទៀតទទួលបានជ័យជម្នះវិញ ប៉ុន្ដែនៅទីបញ្ចប់ក៏ត្រូវបរាជ័យ បែកខ្ញែកគ្នា រួចបង្ខំឱ្យគេចទៅជ្រកកោននៅឯចូវដុក បង្កើតបានជាភូមិចាម៥ ដែលគេប្រទះឃើញមានរហូតដល់សព្វថ្ងៃនេះ ។ ពួកចាមដែលមិនអាចគេចខ្លួនបានត្រូវគេប្រមូលចាប់យកទៅទុកនៅពោធិ៍សាត់ នៅលង្វែក នៅកំពង់ត្រឡាច និងនៅកំពង់ហ្លួង ។ អ្វីៗហាក់ដូចជាបានចប់ទៅហើយ ស្រាប់តែពួកចាមដែលរត់ភៀសខ្លួនទៅរស់នៅឯចូវដុកនោះ បាននាំគ្នាឡើងមកតាមទន្លេយ៉ាងរហ័ស ការពារដោយកម្លាំងថ្មើរជើងមួយកងឆ្លងកាត់ភ្នំពេញ រហូតទៅដល់ជំរំដែលគេដាក់ពួកចាមនាំមកពីត្បូងឃ្មុំ ជម្លៀសពួកនោះយកទៅអស់ ។ ប្រតិបត្ដិការនេះត្រូវបានគេត្រៀមអស់ពេលជាយូរមកហើយៗទទួលពួកចាមនៅកម្ពុជាប្រុងតែលួចរត់គេចផង ម្ល៉ោះហើយក៏ប្រព្រឹត្ដទៅយ៉ាងលឿន រហូតទាល់តែព្រះរាជាកម្ពុជាមិនអាចចាត់វិធានការអ្វីទប់ទល់ទាន់ ធ្វើឱ្យពួកអ្នកកាន់សាសនាមហាម៉ាត់នាំគ្នារត់ឆ្លងចូលទៅកូសាំងស៊ីនអស់ទៅ ។ ចាស់ៗបាននិយាយថា ហេតុការណ៍នេះអាចកើតឡើងបាន មកពីភាគច្រើននៃពួកចាមដែលព្រះរាជាបានចាប់ជាឈ្លើយនោះច្រើនតែជាស្ដ្រី កុមារ និងមនុស្សចាស់ ពួកបុរសៗបានរត់គេចទៅកូសាំងស៊ីនអស់ទៅហើយៗការដែលព្រះអង្គធ្វើដូច្នេះ ព្រោះមិនចង់ឱ្យពួកគេចាកចោលព្រះរាជាណាចក្រ ។
ឯកសារមួយនិយាយថា ព្រះរាជាខ្ញាល់ខ្លាំងណាស់ ណាមួយខ្មាស់នឹងល្បិចពួកចាមផង ទ្រង់បានព្រមានឱ្យអាណ្ណាមដែលគ្រប់គ្រងចូវដុកបញ្ជូនពួកបះបោរនោះមកថ្វាយព្រះអង្គវិញ ។ ចៅហ្វាយខែត្រអាណ្ណាមនោះប្រកែកមិនព្រមធ្វើតាមសំណើរបស់ព្រះអង្គទេ ព្រះបាទអង្គឌួងក៏បញ្ជូនទ័ពមួយកងតូច ដឹកនាំដោយស្ដេចត្រាញ់ដែនដីទ្រាំង ឈ្មោះ កែប ដើម្បីទៅនាំយកពួកចាមទាំងនោះមកវិញ ។ ពួកចាមនោះបានព្រួតដៃគ្នាជាមួយទ័ពអាណ្ណាមដែលគេបញ្ជូនឱ្យមកជួយច្បាំងជាមួយទ័ពខ្មែរតែមិនអាចទប់ទល់មិនឱ្យទ័ពខ្មែរឆ្លងចូលទៅឆ្ងាយពីព្រំដែនបានទេ ។ ដូច្នេះសង្គ្រាមបានកើតមានឡើងម្ដងទៀតជាមួយអាណ្ណាម ដែលនឹងធ្វើឱ្យមានអន្ដរាគមន៍ពីសៀមដោយចៀសមិនរួច ប្រសិនបើគ្មានវត្ដមានរបស់បារាំងនៅកូសាំងស៊ីនទេ (89) ។
នៅពេលនោះ ពួកអាណ្ណាមគ្មានលទ្ធភាពទប់ទល់ជាមួយនឹងទ័ពខ្មែរទេ ។ ក្រោយពីត្រូវរ៉ូវគ្នាជាមួយពួកអង់គ្លេស និងចាប់បង្ខំព្រះចៅអធិរាជចិនឱ្យចុះសន្ធិសញ្ញារួចហើយ ពួកបារាំងបានវិលត្រលប់ពីស្រុកចិនមកវិញ ហើយដើម្បីជាការសងសឹកឱ្យពួកសាសនទូតរបស់បារាំង និងពួកអាណ្ណាមកាន់សាសនាកាតូលិក ដែលត្រូវពួកមន្ដ្រីដេញចេញពីស្រុក និងបង្ខំឱ្យអាណ្ណាមអនុវត្ដតាមកិច្ចសន្យាកាលពីមុនផងនោះ ពួកបារាំងបានទម្លាក់គ្រាប់បែកទៅលើទីក្រុងទួរ៉ាននៅថ្ងៃទី១ ខែកញ្ញា ឆ្នាំ១៨៥៨ ចូលកាន់កាប់សាយហ្គននៅថ្ងៃទី១៧ ខែកុម្ភៈ ឆ្នាំ១៨៥៩ ហើយកំញើញថា នឹងដណ្ដើមយកកូសាំងស៊ីនទាំងមូលថែមទៀត ។
ព្រះបាទអង្គឌួងមានការភ្ញាក់ផ្អើលជាខ្លាំងនៅពេលទទួលបានដំណឹងនេះ ហើយទ្រង់ដូចជាមានការព្រួយបារម្ភ មិនដឹងថាតើហេតុការណ៍នោះនឹងនាំមកនូវផលល្អ ឬផលអាក្រក់ចំពោះកម្ពុជា ម្ល៉ោះហើយទ្រង់មានការប្រុងប្រយ័ត្នយ៉ាងខ្លាំង ។ ព្រះអង្គចង់ដឹងអំពីគោលបំណងរបស់ពួកបារាំង ថាតើគេធ្វើនេះគ្រាន់តែដើម្បីសងសឹកទៅនឹងការប្រមាថមើលងាយរបស់អាណ្ណាម រួចកាន់កាប់ចំណុចណាមួយនៅតាមឆ្នេរសមុទ្រ ឬក៏គេចង់ដណ្ដើមយកកូសាំងស៊ីនផ្នែកខាងក្រោមទាំងអស់ ។ បើដូច្នោះមែន បារាំងនឹងក្លាយទៅជាអ្នកមានព្រំដែនជាប់នឹងកម្ពុជា ហើយដើរតួជំនួសអាណ្ណាមក្នុងការទាមទារសិទ្ធិអធិរាជភាពមកលើកម្ពុជាទេដឹង ? តាមពិតទៅ សកម្មភាពរបស់បារាំងនៅពេលនោះគ្មានអ្វីជាក់លាក់ទេ ហើយកំហុសរបស់លោក ដឺម៉ុងទីញី បានធ្វើឱ្យព្រះបាទអង្គឌួងទីទើ ណាមួយបារាំងក៏មិនបានបញ្ជូនតំណាងឱ្យមករាយការណ៍ថ្វាយដើម្បីឱ្យទ្រង់អស់សង្ស័យផងដែរ ។ បើទោះជាយ៉ាងណាក្ដី ការដែលបារាំងវាយដណ្ដើមយកសាយហ្គនបានៗធ្វើឱ្យព្រះអង្គមានសេចក្ដីក្លាហានឡើងវិញ ។ ហើយនៅពេលឃើញថាទ័ពបារាំងមិនបានឈរជើងនៅទីនោះ គឺវិលត្រលប់មកទួរ៉ានវិញ ប៉ុន្ដែបានធ្វើការវាយប្រហារទៅលើអតីតសត្រូវរបស់ព្រះអង្គគ្រប់ទីកន្លែង ព្រះអង្គក៏សម្រេចចិត្ដចាប់វាយមកលើអាណ្ណាមនៅចូវដុក ចូលមកក្នុងកូសាំងស៊ីនរបៀបជាកងជំនួយឱ្យពួកបារាំងដោយគ្មានការចរចាឯកភាពគ្នាជាមុនទេ ។ គេនិយាយថា នោះហើយជាការសម្ងាត់នៃសង្គ្រាមដែលហាក់ដូចជាផ្ទុយទៅនឹងនយោបាយរបស់ព្រះអង្គដែលមានពីមុន ។
បន្ដិចក្រោយមក ព្រះរាជាបានយាងទៅកំពតដើម្បីទៅទតមើលសំពៅពាណិជ្ជកម្មមួយ ដែលទ្រង់បានឱ្យគេធ្វើឡើងរួចប្រគល់ឱ្យជនម៉ាឡេម្នាក់នៅត្រីកាកាន់កាប់ ។ នៅទីនោះព្រះអង្គបានជួបជាមួយអ្នកស្រាវជ្រាវ មូហូត ជជែកជាមួយបានបន្ដិច ទ្រង់ក៏បញ្ជាឱ្យគេផ្ដល់មធ្យោបាយសម្រាប់គាត់ធ្វើដំណើរមកឧត្ដុង្គទៀត ។
នៅពេលយាងត្រលប់មកកាន់រាជធានីវិញ ក្រោយពេលដែលលោក មូហូត ចូលគាល់ព្រះអង្គនៅនឹងព្រះរាជដំណាក់ធ្វើពីឈើបានបន្ដិច ព្រះបាទអង្គឌួងក៏ធ្លាក់ព្រះកាយប្រឈួន ហើយបានសុគតទៅនៅឆ្នាំ១៨៦០ នៃគ្រិស្ដសករាជ ត្រូវនឹងមហាសករាជ១៧៨២ ចុល្លសករាជ១២២២ (ក្នុងខែកត្ដិក ថ្ងៃ៥កើត ចុងខែវិច្ឆិកា) ។
ការចូលទិវង្គតរបស់ព្រះរាជាបានធ្វើឱ្យចលនារបស់ខ្មែរនៅចូវដុកត្រូវបញ្ចប់ ហើយឧកញ៉ាកែបក៏នាំទ័ពវិលត្រលប់ចូលមកកម្ពុជាវិញ ។
៤៣. ព្រះបាទនរោត្ដម (១៨៦០-១៩០៤)
ព្រះបាទអង្គឌួងមានរាជបុត្រា៣ព្រះអង្គគឺ អ្នកអង្គម្ចាស់អង្គវតី (ច្រឡឹង) ជាព្រះរាជបុត្រាច្បង ពេលនោះមានព្រះជន្ម២៦ព្រះវស្សាហើយ អ្នកអង្គម្ចាស់អង្គស (អួ) (90) ជាព្រះរាជបុត្រាបន្ទាប់ មានព្រះជន្ម២០ព្រះវស្សា និងអ្នកអង្គម្ចាស់វត្ថា (ស៊ីវត្ថា-អង្គភឹម) ជារាជបុត្រាទី៣ មានព្រះជន្ម១៩ព្រះវស្សា ទាំង៣ព្រះអង្គនេះមានព្រះមាតាផ្សេងៗគ្នា ។
ព្រះវររាជមាតារបស់ព្រះបាទអង្គឌួង ដែលត្រូវជាព្រះអយ្យកាខាងព្រះបិតារបស់អ្នកអង្គម្ចាស់ទាំង៣អង្គ បានកោះប្រជុំក្រុមប្រឹក្សាមន្ដ្រីធំៗ ហើយបានជ្រើសតាំងអ្នកអង្គម្ចាស់អង្គវតីជាព្រះរៀម និងជាព្រះឧបរាជផងឱ្យឡើងសោយរាជ្យបន្ដ តាមបណ្ដាំរបស់ព្រះបាទអង្គឌួង ។
នៅថ្ងៃរៀបចំព្រះរាជាពិធីរាជាភិសេក ព្រះរាជាថ្មីបានប្រកាន់យកព្រះនាមថា «នរោត្ដម» ដែលស្ដេចសៀមបានដាក់ថ្វាយនៅពេលព្រះអង្គបានឡើងជាព្រះឧបរាជនៅក្នុងឆ្នាំ១៨៥៦ ។ នៅពេលដែលបានទទួលដំណឹងពីការជ្រើសតាំងព្រះរាជាថ្មីនេះភ្លាម ស្ដេចសៀមបានបញ្ជូននូវការយល់ព្រមរបស់ព្រះអង្គមកភ្លាម ហើយបានសន្យាមិនច្បាស់លាស់ថា ទ្រង់នឹងយាងមកចូលរួមជាអធិបតីដោយផ្ទាល់ព្រះអង្គឯង ។ ក៏ប៉ុន្ដែព្រមជាមួយគ្នានោះ ស្ដេចសៀមដែលដឹងច្បាស់អំពីការច្រណែនរបស់អ្នកអង្គម្ចាស់វត្ថាចំពោះព្រះរៀម បានអនុញ្ញាតឱ្យព្រះអង្គយាងត្រលប់ចូលមកកម្ពុជាវិញផងដែរ ។
នៅពេលឡើងគង់លើរាជបល្ល័ង្កភ្លាម ព្រះបាទនរោត្ដមបានបញ្ជាឱ្យគេសង់ព្រះរាជវាំងសម្រាប់ព្រះអង្គនៅឧត្ដុង្គ នៅពីខាងលិចស្រះស្រង់ រួមទាំងដំណាក់សម្រាប់មហេសី និងស្រីស្នំក្រមការ សាលរបាំសម្រាប់ការសម្ដែងល្ខោន និងព្រះរាជបណ្ណាល័យមួយផងដែលមានជញ្ជាំងធ្វើពីបាយអដំបូលប្រក់ស្បូវ ។ ព្រះអង្គបានយាងចូលគង់នៅក្នុងព្រះរាជវាំងថ្មីនេះនៅក្នុងខែសីហា ឆ្នាំ១៨៦០ ។
ព្រះរាជាទ្រង់ស្រលាញ់អ្នកអង្គម្ចាស់វត្ថាណាស់ ចាត់ទុកដូចជាព្រះអនុជរួមព្រះមាតា ។ ព្រះអង្គបានប្រទានប្រាក់១០០ណែន (៨ពាន់ហ្វ្រង់) ចិញ្ចៀនមាស និងគ្រឿងអលង្ការផ្សេងៗថែមទៀត រួចបានសន្យាថា នឹងរៀបអាពាហ៍ពិពាហ៍ព្រះអង្គជាមួយព្រះក្សត្រីសិរីវង្ស ដែលត្រូវជាព្រះអនុជរួមព្រះបិតាទាំងអស់គ្នាទៀតផង ។ ក៏ប៉ុន្ដែ អ្នកអង្គម្ចាស់វត្ថា ដែលរំពឹងគិតថាក្រុមប្រឹក្សាមហាមន្ដ្រីចូលចិត្ដព្រះអង្គច្រើនជាងព្រះរៀមទាំង២ បែរជាចាប់ផ្ដើមប្រើកលឧបាយប្រឆាំងនឹងព្រះរាជា ប្រឆាំងនឹងរដ្ឋមន្ដ្រីរបស់ព្រះអង្គ ប្រឆាំងនឹងចៅហ្វ៊ាមាស ជាមន្ដ្រីមានវ័យចំណាស់ជាងគេហើយក៏ជាមេគេដែរ ដែលអ្វីៗអាស្រ័យលើការសម្រេចចិត្ដរបស់គាត់ ។ អ្នកអង្គម្ចាស់វត្ថាមានបំណងចង់ធ្វើឃាតចៅហ្វ៊ាមាសនេះចោលដើម្បីជាការដាក់ទោស ព្រោះគឺគាត់នេះហើយដែលបានជ្រើសរើសព្រះរៀមឱ្យឡើងគ្រងរាជបល្ល័ង្ក ហើយបានប្រើឥទ្ធិពលការពារព្រះរៀមទៀត ។ ចៅហ្វ៊ាមាសបានយាងអ្នកអង្គម្ចាស់វត្ថាឱ្យទៅផ្ទះគាត់ ដើម្បីអប់រំណែនាំព្រះអង្គ ធ្វើឱ្យព្រះអង្គមានការភ័យខ្លាច រួចនៅស្ងៀមបាន១ឆ្នាំដែរ ។ ប៉ុន្ដែបន្ទាប់មក ទ្រង់ក៏ចាប់ផ្ដើមប្រើកលឧបាយឡើងវិញ ។
អ្នកអង្គម្ចាស់វត្ថាពេលនោះជាយុវជនសង្ហាម្នាក់ ប៉ិនប្រសប់ក្នុងការនិយាយស្ដីទៅកាន់មនុស្សម្នា ហើយត្រូវបាននារីៗ និងប្រជារាស្ដ្រស្រលាញ់ចូលចិត្ដច្រើន ។ ទ្រង់មានប្រាជ្ញាឈ្លាសវៃ មានការចេះដឹងខ្ពស់ និយាយខ្មែរបានល្អជាងព្រះបាទនរោត្ដម ដែលចូលចិត្ដប្រើតែភាសាសៀម ក៏ប៉ុន្ដែទ្រង់មានការច្រណែនច្រើន ។ ទ្រង់ប៉ិនប្រសប់ក្នុងការថ្លែងសុន្ទរកថាបានល្អណាស់ ពូកែនិយាយថែមថយបញ្ឆិតបញ្ឆៀងលើព្រឹត្ដិការណ៍ប្រចាំថ្ងៃ ឌឺដងឱ្យព្រះរាជាជាព្រះរៀម លើកអំពីទម្លាប់ធូររលុងរបស់ព្រះអង្គ អំពីសេចក្ដីស្នេហារបស់ព្រះអង្គជាមួយបងប្អូនស្រីៗ និងជាមួយជាយារបស់ព្រះបិតា ជាដើម ។ ទ្រង់មានមហិច្ឆតាខ្ពស់ ហើយមិនចេះគិតខ្លាចរអែងអ្វីឡើយ អាចនឹងបំផ្លិចបំផ្លាញព្រះរាជាណាចក្របាន ដោយហេតុតែចង់ដណ្ដើមយកអំណាចនេះ ។
ក្នុងចំណោមបក្សពួករបស់អ្នកអង្គម្ចាស់វត្ថាមានញាតិខាងព្រះមាតាម្នាក់ គឺស្នងសូរ ដែលបានដើរបំផុសបំផុលប្រជារាស្ដ្រនៅដីបាភ្នំ ស្វះស្វែងជ្រើសរើសគ្នីគ្នា ។ ព្រះរាជាបានចេញបញ្ជាឱ្យស្នងសូរចូលខ្លួនមកឧត្ដុង្គ ដើម្បីប្រគល់ឱ្យចៅហ្វ៊ាមាសកាត់ទោស ។ ស្នងសូរមិនព្រមចូលខ្លួនតាមព្រះរាជបញ្ជាទេ ហើយបានរត់ទៅជ្រកកោននៅក្នុងដំណាក់របស់អ្នកអង្គម្ចាស់វត្ថា ដែលឈប់ចូលគាល់ព្រះរាជាដែរ ។ ម្យ៉ាងទៀត មានលេចឮពាក្យចចាមអារ៉ាមនិយាយថា ស្ដេចសៀមបានបញ្ជូនអ្នកអង្គម្ចាស់វត្ថាមកកម្ពុជា ដើម្បីត្រួតពិនិត្យតាមដានមើលរាជវង្ស និងមន្ដ្រីរាជការទាំងអស់ តើមានអ្នកណាមិនស្មោះត្រង់នឹងពួកសៀមដែរឬទេ ?
បន្ដិចក្រោយមកដោយអ្នកអង្គម្ចាស់វត្ថា និងព្រះជាយាមិនបានទៅចូលរួមព្រះរាជពិធីមួយដែលគេរៀបចំថ្វាយសពព្រះបាទអង្គឌួង ព្រះបាទនរោត្ដមបានបញ្ជាឱ្យព្រះអនុជនេះយាងចេញពីព្រះរាជាណាចក្រ ធ្វើដំណើរជាមួយមិត្ដភក្ដិទាំងអស់ទៅបាងកក ជាមួយទូតដែលស្ដេចសៀមឱ្យនាំយកកោដ្ឋមាសមួយមកថ្វាយព្រះរាជា ដើម្បីដាក់ធាតុព្រះបិតា ។ អ្នកអង្គម្ចាស់វត្ថា និងព្រះជាយាបានប្រកែកមិនព្រមគោរពតាមទេធ្វើឱ្យព្រះរាជាខ្ញាល់ជាខ្លាំង អត់ទ្រាំមិនបានក៏បញ្ជាឱ្យពួកមន្ដ្រីចាប់ខ្លួនព្រះអង្គ ។ ពួកមន្ដ្រីទាំងនោះទីទើមិនដឹងថាត្រូវគោរពតាមនរណា មួយគឺព្រះបាទនរោត្ដមដែលជាព្រះរាជាគង់លើរាជបល្ល័ង្ក មួយទៀតគឺអ្នកអង្គម្ចាស់វត្ថា ដែលប្រជារាស្ដ្រស្រលាញ់ចូលចិត្ដ ។ ទាល់តែគេបង្កើតកងកម្លាំងមួយដែលមានសុទ្ធតែពួកអ្នកកាន់សាសនាកាតូលិកជាបច្ឆាញាតិរបស់ពួកព័រទុយហ្គាល់ ទើបពួកនេះសម្រេចចិត្ដដាច់ខាតចាប់ខ្លួនព្រះអង្គ ។ អ្នកអង្គម្ចាស់វត្ថាបានតតាំងតបវិញ ក៏ប៉ុន្ដែត្រូវគេឡោមជុំជិត ទ្រង់ក៏លោតឡើងលើសេះបំបោលកាត់ខ្សែត្រៀម ហើយរត់គេចខ្លួនព្រះអង្គចេញទៅជាមួយនឹងស្រីក្មេងម្នាក់ ដែលព្រះអង្គបានចាប់ពង្រត់ចេញពីព្រះរាជវាំង ជាហេតុធ្វើឱ្យគេកាត់ស្មានថា នោះហើយជាមូលហេតុអាថ៌កំបាំងនៃទំនាស់រវាងបងប្អូនទាំង២ព្រះអង្គ ។ គេបានចាប់ព្រះមាតារបស់អ្នកអង្គម្ចាស់វត្ថាឃុំទុកក្នុងព្រះរាជវាំង ដោយចោទថា ព្រះនាងបានឃុបឃិតជាមួយព្រះរាជបុត្រា ។
សង្គ្រាមបានផ្ទុះឡើងរវាងបងប្អូនទាំង២ព្រះអង្គ ហើយជាថ្មីម្ដងទៀត ការបែកបាក់គ្នាដើម្បីដណ្ដើមអំណាចរវាងសមាជិក២អង្គរបស់ព្រះរាជវង្សានុវង្សនៃព្រះរាជាណាចក្រកម្ពុជា បានកើតមានសាជាថ្មី ដោយគ្មានគិតថា ព្រះរាជាណាចក្រកំពុងតែជួបប្រទះគ្រោះវិនាសហិនហោចអ្វីទេ ។ មុនដំបូងទ័ពរបស់ចៅហ្វាយខែត្របាភ្នំខាងព្រះរាជាត្រូវទ័ពរបស់ស្នងសូរ និងរាមាយោធា (91) វាយឱ្យបរាជ័យតែបន្ទាប់មកក៏ទទួលជ័យជម្នះតិចតួចមកវិញ ដែលមិនសូវជាធំដុំប៉ុន្មានទេ ធ្វើឱ្យព្រះបាទនរោត្ដមអស់សង្ឃឹមជាខ្លាំង ណាមួយប្រជារាស្ដ្រក៏ឈរមើលការធ្វើសង្គ្រាមនេះដោយមិនកាន់ជើងខាងណាជាងខាងណាដែរ ទ្រង់ក៏ចុះទូកចេញដំណើរតាមទន្លេ និងបឹងទន្លេសាប ទៅកាន់ខែត្របាត់ដំបងបាត់ទៅដោយបាននាំយកកេតនភណ្ឌព្រះរាជាណាចក្រទៅជាមួយផង (ខែសីហា ឆ្នាំ១៨៦១) ។
ដំណើរយាងចាកចោលរាជធានីនេះបានធ្វើឱ្យសត្រូវរបស់ព្រះរាជាទទួលបានជ័យជម្នះ ។ រាមាយោធា ដែលជាវីរបុរសតែម្នាក់គត់នៅក្នុងសង្គ្រាមបង្ហូរតែឈាមគ្នាឯងនេះ ហើយដែលបង្ហាញឱ្យឃើញនូវថាមពល និងល្បិចខ្លះៗ បានវាយដណ្ដើមយកឧត្ដុង្គបាន ក៏ប៉ុន្ដែបន្ទាប់មកមិនដឹងថាត្រូវធ្វើអ្វីតទៅទៀតដើម្បីបន្ដវាតអំណាចទៅលើព្រះនគរទាំងមូល ចាប់បង្ខំឱ្យចៅហ្វាយខែត្រទាំងអស់ទទួលស្គាល់គោរពខ្លួនផងទេ ។ គាត់ជាអ្នកពូកែខាងធ្វើចម្បាំង ក៏ប៉ុន្ដែមិនដឹងមិនយល់អំពីការគ្រប់គ្រងប្រទេស និងអំពីនយោបាយបន្ដិចទាល់តែសោះ ។ ពេលនោះស្រាប់តែពួកចាម និងម៉ាឡេនៅត្បូងឃ្មុំដែលធ្លាប់បានបះបោររួចមកហើយកាលក្នុងរជ្ជកាលព្រះបាទអង្គឌួង ដល់ច្បាំងចាញ់បានរត់គេចទៅនៅឯចូវដុកនោះ បានស្រុះស្រួលត្រូវរ៉ូវគ្នាជាមួយពួកអ្នកកាន់សាសនានៅលង្វែក និងកំពង់ហ្លួង ដែលទើបតែប្រកែកមិនព្រមផ្ដល់ការគាំទ្រដល់ព្រះរាជា បានសំណូមពរឱ្យព្រះមហាក្សត្រិយានីជាព្រះអយ្យកា ដែលគង់នៅឧត្ដុង្គជាមួយនឹងរាជវង្សានុវង្សមួយចំនួន និងស្រីស្នំក្រមការទាំងអស់ជួយគាំទ្រព្រះរាជា ។ គេបានបង្វិលទ្រព្យរបស់ដែលគេបានរឹបអូសយកឋានៈតួនាទី មុខតំណែងពីមុនទៅឱ្យពួកនោះវិញ រួចហើយពួកគេក៏ចាប់ចេញធ្វើសកម្មភាព ។ ព្រះមហាក្សត្រិយានីបានកោះហៅរាមាយោធាឱ្យចូលគាល់ រួចបានស្ដីបន្ទោសចំពោះអំពើក្បត់របស់ខ្លួន ហើយបានបញ្ជាឱ្យដកថយចេញពីឧត្ដុង្គជាបន្ទាន់ ។ រាមាយោធាក៏នាំទ័ពរបស់ខ្លួនចេញមកកាន់ភ្នំពេញវិញ ។
មកដល់ភ្នំពេញ រាមាយោធាបានជួបជាមួយនាវាចម្បាំងតូចមួយដែលទើបតែឡើងមកពីកូសាំងស៊ីន ដើម្បីផ្ដល់កិច្ចការពារដល់បេសកកម្មកាតូលិករបស់បារាំង ហើយដោយភ័យខ្លាំងណាស់ គាត់បានសន្យាសុខចិត្ដជួសជុលការខូចខាតទាំងអស់ ដែលបណ្ដាលមកអំពីការដុតពញាឮក្នុងពេលវាយគ្នាកាលពីប៉ុន្មានសប្ដាហ៍មុន ។ រាមាយោធាបានប្រគល់សំណងជាប្រាក់៤ពាន់ហ្វ្រង់ជូនទៅ អេវ៉ែកមីស្ហ ភ្លាម ហើយបានសន្យាថានឹងជូន១ម៉ឺន២ពាន់ទៀតនៅខែក្រោយ ។ តាមពិតទៅនាវាចម្បាំងតូចនេះត្រូវបានបញ្ជូនឱ្យមកភ្នំពេញដើម្បីគ្រាន់តែការពារពួកសាសនទូតកាតូលិកជាតិបារាំងប៉ុណ្ណោះ ក៏ប៉ុន្ដែពួកបះបោរមើលឃើញថា ជាអន្ដរាគមន៍ជួយព្រះបាទនរោត្ដមទៅវិញ ។ ក៏ប៉ុន្ដែនោះហើយជាអ្វីដែលគេចង់បាន ណាមួយពួកកាតូលិកក៏ទទួលបញ្ជាពីអេវ៉ែករបស់គេ ឱ្យធ្វើការប្រយុទ្ធជួយព្រះរាជាផងដែរ នៅពេលដែលព្រះរាជាបានចេញព្រះរាជបញ្ជាឱ្យចាប់ខ្លួនអ្នកអង្គម្ចាស់វត្ថា និងព្រះជាយាសិរីវង្ស ។
នៅពេលនោះសង្គ្រាមបានចាប់ផ្ដើមឡើងនៅភាគខាងត្បូងតាមបណ្ដោយព្រំដែន ហើយបានបន្ដទៅយ៉ាងយូរ ដោយគ្មានបានផលអ្វីប៉ុន្មានទេ ។ ចៅហ្វាយខែត្រដីបាភ្នំបានចេញធ្វើការប្រយុទ្ធយ៉ាងអង់អាចក្លាហាន ជួនក៏ត្រូវរាមាយោធាវាយឱ្យបរាជ័យជួនក៏ទទួលបាននូវជ័យជម្នះខ្លះវិញ ។ ពេលនោះមានទាហានបារាំង៥នាក់បានទទួលច្បាប់ឱ្យឈប់សម្រាកនៅកូសាំងស៊ីន មុនដំបូងអ្នកទាំង៥បានចូលបម្រើពួកបះបោរ ។ ក៏ប៉ុន្ដែលុះដល់បានទទួលព័ត៌មានច្បាស់លាស់ពីសភាពការណ៍ពិតពីអេវ៉ែកមីស្ហ ក៏ត្រលប់មកជួយខាងឧត្ដុង្គវិញ ។ ពេលនោះប្រជាជនខ្មែររីករាយត្រេកអរខ្លាំងណាស់ វាហាក់ដូចជាថាគេនឹងអាចគាស់រំលើងអ្វីៗទាំងអស់បាន នៅពេលដែលមានពួកទាហានបារាំង៥នាក់នោះបញ្ជា ។ ព្រះអង្គស ជាព្រះអនុជបន្ទាប់របស់ព្រះរាជាសព្វថ្ងៃនេះ ដែលពេលនោះទ្រង់ជាព្រះកែវហ្វ៊ា ហើយក៏ជាព្រះរាជានុសិទ្ធិផងដែរពេលអវត្ដមានព្រះរាជាដែលកំពុងតែគង់នៅឯបាងកក បានប្រគល់នាវាមួយកងឱ្យពួកនោះទៅវាយដណ្ដើមយកបន្ទាយរបស់រាមាយោធានៅមាត់ក្រសារ ។ នៅពេលទទួលបានដំណឹងថាពួកបារាំងជាអ្នកបញ្ជាដឹកនាំទ័ពនាវានោះ រាមាយោធាមិនបាននៅតទល់ទេ តែបាននាំទ័ពរត់គេចអស់ទៅ ។
ពេលនោះ ព្រះបាទនរោត្ដមបានចាប់គិតឃើញថា ព្រះអង្គមិនគួរនឹងយាងចេញពីព្រះនគរសោះ ដល់ឃើញព្រះអនុជព្រះកែវហ្វ៊ាចាត់ចែងកិច្ចការព្រះរាជាណាចក្រ ហើយដឹកនាំសង្គ្រាមប្រឆាំងនឹងអ្នកអង្គម្ចាស់វត្ថាផង ព្រះអង្គពិភាល់ថាព្រះអនុជមានបំណងប្រឆាំងនឹងព្រះអង្គ ហើយឱ្យគេជ្រើសតាំងជាព្រះមហាក្សត្រជំនួសព្រះអង្គវិញ ។ ការដែលព្រះរាជាទ្រង់គិតដូច្នេះខុសស្រឡះ ក៏ប៉ុន្ដែបើទោះជាយ៉ាងណាក្ដីអ្នកអង្គម្ចាស់ស៊ីសុវត្ថិ បានត្រូវរងគ្រោះដោយសារព្រះរាជាជាព្រះរៀមរហូត ។
ពេលនោះពួកមន្ដ្រីៗនៅឧត្ដុង្គបានជំរុញឱ្យអេវ៉ែកមីស្ហ សរសេរលិខិតមួយទៅកុងស៊ុលបារាំងប្រចាំរាជធានីបាងកកឱ្យទៅជួបស្ដេចសៀម សំណូមពរសុំព្រះអង្គចាត់ឱ្យកប៉ាល់មួយដឹកព្រះបាទនរោត្ដមមកចុះចតនៅកំពត ហើយនិងសុំឱ្យបញ្ជូនទ័ពមួយកងមកតាមបាត់ដំបង សម្រាប់ជួយការពារព្រះរាជានៅឧត្ដុង្គផង ។ ស្ដេចសៀមរីករាយណាស់នឹងបានលូកដៃចូលមកក្នុងកម្ពុជាជាថ្មីម្ដងទៀត ហើយសង្ឃឹមថានឹងអាចស្ដារឥទ្ធិពលចាស់របស់សៀមមកលើកម្ពុជាឡើងវិញបាន ។ ទ្រង់បានចាត់ឱ្យគេជូនដំណើរព្រះបាទនរោត្ដមមកកំពត ។ ព្រះរាជាយាងចូលមកឧត្ដុង្គវិញនៅក្នុងខែមីនា ឆ្នាំ១៨៦២ ហើយក៏ចាប់ទទួលអំណាចទាំងអស់ពីមុនមកភ្លាមដែរ ។ ការដែលអេវ៉ែកមីស្ហ ធ្វើដូច្នេះគឺផ្ទុយនឹងនយោបាយរបស់បារាំង ថ្វីបើបានធ្វើឱ្យព្រះរាជាយាងត្រលប់មកកាន់ព្រះនគរវិញក៏ដោយ ព្រោះវាបានធ្វើឱ្យមានអន្ដរាគមន៍របស់សៀមឡើងវិញ ដែលនៅពេលនោះ បារាំងមានវត្ដមាននៅកូសាំងស៊ីនរួចទៅហើយ ហើយជិតជាងបាងកកផង ។ ម្ល៉ោះហើយគេបានស្ដីបន្ទោសអេវ៉ែកមីស្ហបន្ដិចបន្ដួច ហើយស្ដេចសៀមក៏មិនបានបញ្ជូនទ័ពមកដែរ ។
ក្រោយមក គេសម្លាប់រាមាយោធាបាន (92) ហើយស្នងសូរក៏ត្រូវចាប់ខ្លួនដាក់ក្នុងទ្រុងដែរ ប៉ុន្ដែបានរត់រួចទៅវិញ ហើយគេចខ្លួនទៅកូសាំងស៊ីនបាត់ទៅ ។ អ្នកអង្គម្ចាស់វត្ថាក៏គេចព្រះអង្គបាត់ បក្សពួកមួយចំនួនបានត្រូវគេដឹកយកទៅដាក់នៅឯកោះត្រឡាច (ពូឡូកុងឌ័រ) ការបះបោរក៏ស្ងាត់បាត់ទៅ ។ ក៏ប៉ុន្ដែ ចាប់ពីទ្រង់បានយាងត្រលប់មកវិញនេះ ព្រះរាជាកម្ពុជាហាក់ដូចជាកាន់តែចំណុះស្ដេចសៀមខ្លាំងឡើងៗ រហូតដល់មើលទៅឃើញថា រ៉េស៊ីដង់សៀមទេដែលមានសិទ្ធិអំណាចមែនទែន ។
នៅក្នុងឆ្នាំដដែលនោះមានជនកំបុតជើងត្រឹមភ្លៅម្នាក់ឈ្មោះថា បា បានបំបះបំបោរយុវជនក្មេងៗនៅក្នុងខែត្រសំរោងទង ឱ្យសែងខ្លួនទៅរាជធានីឧត្ដុង្គ ហើយបើកការវាយប្រហារទៅលើព្រះរាជវាំង ។ ក៏ប៉ុន្ដែទ័ពរបស់ បា ត្រូវបរាជ័យ បែកខ្ញែកគ្នាអស់ ឯបាបានរត់គេចខ្លួនរួចរហូតទៅដល់ខែត្រពោធិ៍សាត់ ។ គេតាមចាប់មេបះបោរនេះបាន រួចដឹកតាមរទេះមករាជធានីវិញ ប៉ុន្ដែ បា បានស្លាប់តាមផ្លូវទៅហើយ ។ គេបានយកខ្មោចជនក្បត់នេះដាក់តាំងជាសាធារណៈអស់ពេល៣ថ្ងៃ រួចយកមកព្យួរនៅខាងកើតផ្សារដែក ដាក់ក្បាលសំយុងចុះក្រោម ទ្រូងត្រូវគេវះចំហធ្លុង ។
នៅសម័យនោះគេបានរៀបចំពិធីបូជាព្រះសពរបស់ព្រះបាទអង្គឌួង ហើយរើសអដ្ឋិធាតុដាក់ក្នុងកោដិមាសមួយដែលស្ដេចសៀមបានផ្ញើមកឱ្យកាលពីឆ្នាំមុន ។
កាលពីមុន គឺក្នុងខែមីនា ឆ្នាំ១៨៦១ លោកឧត្ដមនាវី ស្ហាកនេ ដែលជាមេបញ្ជាការនៅសាយហ្គន បានបញ្ជូននាយទាហានជើងទឹកម្នាក់ឱ្យមកថ្វាយដំណឹងដល់ព្រះបាទនរោត្ដមថា រដ្ឋាភិបាលបារាំងបានសម្រេចមកតាំងនៅកូសាំងស៊ីនយូរអង្វែង ហើយមានចេតនាចង់រក្សាទំនាក់ទំនងល្អជាមួយកម្ពុជា ។ នៅក្នុងការសន្ទនាពេលចូលគាល់ព្រះរាជា នាយទាហាជើងទឹកនោះបានទូលព្រះអង្គថាលោកឧត្ដមនាវីចង់ឱ្យព្រះរាជាណាចក្រកម្ពុជាមានចំណងមេត្រីភាពសេរីជាមួយបរទេស មិនចំណុះអ្នកណាមួយទេ ហើយនៅពេលនោះ បារាំងនឹងទៅជាមិត្ដរបស់ប្រជាជនកម្ពុជាវិញ ។ ព្រះរាជាបានឆ្លើយតបទៅវិញថា កម្ពុជាមានសេរីភាពពេញលេញជាមួយសៀម ហើយគ្មានបានចុះសន្ធិសញ្ញាអ្វីដែលចងកម្ពុជាដែរ ក៏ប៉ុន្ដែព្រះអង្គបានមានបន្ទូលដោយឥតលាក់លៀមប្រាប់ទៅនាយទាហានជើងទឹកនោះដែរថា សៀមនៅមានគុណលើកម្ពុជាច្រើនក្នុងការដែលគេបានជួយដណ្ដើមយកយើងចេញពីដៃពួកអាណ្ណាមមកវិញ នៅពេលដែលពួកអាណ្ណាមនេះបានគ្រប់គ្រងកម្ពុជាតាមរបៀបរបបស្រុកគេទៅហើយ ដោយប្រើប្រាស់មន្ដ្រីរបស់គេទៀត ។ តាមពិតទៅ គេសង្កេតឃើញថា ព្រះបាទនរោត្ដមហាក់ដូចជាចំណុះបញ្ជារបស់ស្ដេចសៀមកាន់តែខ្លាំងឡើងៗ ចាប់តាំងតែពីពេលដែលព្រះអង្គបានយាងត្រលប់ចូលមកក្នុងរាជធានីឧត្ដុង្គវិញ អាចប្រហែលជាស្ដេចសៀមបានចាត់មន្ដ្រីរបស់គេណាម្នាក់ឱ្យមកនៅអែបនឹងព្រះអង្គជាប់ ដែលយើងមិនទាំងស្គាល់ផងក៏មិនដឹង ។
ប្រទេសបារាំងមិនអាចគាំទ្រឱ្យប្រជាជនមួយដែលនៅជិតបង្កើយនឹងកូសាំងស៊ីន ក្លាយទៅជាចំណុះអធិរាជមួយដែលនៅឆ្ងាយជាងហើយដែលតែងតែ និងកំពុងមានបំណងចង់ដណ្ដើមយកនគរទៅដាក់បញ្ចូលជាទឹកដីរបស់គេបានទេ ។ ដោយស្ដេចសៀមបញ្ជូនរ៉េស៊ីដង់សៀមម្នាក់គឺពញារាជជាសម្ងាត់ឱ្យមកនៅឧត្ដុង្គអែបនឹងព្រះរាជា លោកឧត្ដមនាវីក៏សម្រេចបញ្ជូនរ៉េស៊ីដង់បារាំងម្នាក់មកដែរ ដោយចេញមុខតែម្ដង ។ នៅក្នុងខែមេសា ឆ្នាំ១៨៦២ លោកអនុនាវីឯក ឌូដាដឺឡាគ្រេ បានចេញកប៉ាល់ពីយ៉ាឌិញមកចុះនៅកំពង់ហ្លួង ជាមួយបេសកកម្មត្រូវបង្ហាញខ្លួននៅគ្រប់ទីកន្លែង ធ្វើដំណើរទៅសព្វទិសទីក្នុងប្រទេស ធ្វើដំណើរឡើងចុះតាមទន្លេ និងចូលគាល់ព្រះរាជាឱ្យបានញឹកញាប់ ដោយមិនចាំបាច់មានអន្ដរការីនៅចន្លោះកណ្ដាលរវាងព្រះរាជា និងគាត់ទេ ។
មិនយូរប៉ុន្មានលោកអនុនាវីឯកក៏ក្ដាប់បានរឿងរ៉ាវទាំងអស់ដែលគេខិតខំលាក់នឹងគាត់ ហើយពិនិត្យឃើញថា នៅឧត្ដុង្គស្ដេចសៀមមានអំណាចខ្លាំងជាងព្រះបាទនរោត្ដមទៅទៀត ។ គាត់បានរាយការណ៍អំពីស្ថានភាពនេះទៅទេសាភិបាលកូសាំងស៊ីន ។ លោកឧត្ដមនាវី ឡាហ្គ្រង់ឌីយែរ ដែលជំនួសលោកឧត្ដមនាវី បូណា បានសម្រេចថាត្រូវបញ្ចប់ស្ថានភាពនេះ ព្រោះថាបើបណ្ដោយទុកយូរៗទៅ ឥទ្ធិពលរបស់សៀមនឹងកាន់តែរឹងមាំឡើងៗ ហើយបណ្ដាលឱ្យមានគ្រោះថ្នាក់ចំពោះកម្ពុជា ក៏ដូចជាចំពោះបារាំង ។
នៅក្នុងខែកក្កដា ឆ្នាំ១៨៦៣ លោកឧត្ដមនាវី ឡាហ្គ្រង់ឌីយែរ បានមកឡើងគោកនៅកំពង់ហ្លួង រួចបានធ្វើដំណើរទៅដល់ឧត្ដុង្គមួយម៉ោងក្រោយមក ។ គាត់បានចូលគាល់ព្រះរាជា ទូលប្រាប់ព្រះអង្គអំពីស្ថានភាពស្រុកទេស ហើយក្រោយពីបានស្ដាប់ការប្រកាសរបស់ព្រះរាជាថាព្រះអង្គនៅឯករាជ្យពីប្រទេសសៀម គាត់បានស្នើព្រះអង្គឱ្យដាក់កម្ពុជានៅក្នុងអាណាព្យាបាលបារាំងដែលនៅជិតខាងជាង ហើយដែលនឹងការពារកម្ពុជាឱ្យរួចផុតពីសត្រូវគឺអាណ្ណាម និងសៀម ធានាឱ្យព្រះរាជាណាចក្រស្ថិតស្ថេរតទៅសម្រាប់កូនចៅជំនាន់ក្រោយ ។ ព្រះរាជាបានយល់ព្រមទទួលយកអាណាព្យាបាលរបស់បារាំង ក៏ប៉ុន្ដែទ្រង់នៅមានការញញើតញញើមខ្លះ ដោយទ្រង់បារម្ភខ្លាចដល់ពេលមួយបារាំងបោះបង់កូសាំងស៊ីនចោល ហើយទុកឱ្យកម្ពុជានៅទទួលរងកំហឹងរបស់អាណ្ណាម និងសៀមសាជាថ្មីទៀត ។ អ្វីដែលបណ្ដារដ្ឋនៅឥណ្ឌូចិនបានដឹង គឺបារាំងមិនដែលរក្សាទឹកដីដែលខ្លួនដណ្ដើមយកបានទេ ហើយរឿងនេះ រ៉េស៊ីដង់សៀមបានលើកយកមកទូលប្រាប់ព្រះរាជាម្ដងហើយម្ដងទៀត ក្រោមគ្រប់រូបភាព ។
មកដល់ពេលនោះ ដើម្បីធ្វើសៀមសប្បាយចិត្ដ ឈប់គិតពីកម្ពុជា ហើយផ្ដល់សេរីភាពឱ្យព្រះអង្គធ្វើការចរចាជាមួយបារាំង ព្រះបាទនរោត្ដមបានសម្រេចប្រគល់ខែត្រពោធិ៍សាត់ និងកំពង់ស្វាយទៅឱ្យសៀម នៅក្នុងថ្ងៃទី២ ខែមីនា ឆ្នាំ១៨៦៣ ។ សៀមបានយល់ព្រមទទួលយកខែត្រទាំង២ តែបានប្រកាសថាទុកឱ្យកម្ពុជាប្រើប្រាស់ជាប្រយោជន៍តទៅទៀតសិន ។ តាមពិតស្ដេចសៀមចង់បានខែត្រទាំង២ណាស់ទៅហើយ ក៏ប៉ុន្ដែមិនហ៊ានទទួលយកដោយខ្លាចអន្ដរាគមន៍របស់បារាំង ណាមួយធ្វើយ៉ាងនេះដើម្បីអាចរក្សាឥទ្ធិពលរបស់ខ្លួនលើរាជវាំងឧត្ដុង្គតទៅទៀតផង ។
ពេលនោះព្រះបាទនរោត្ដម ដែលមានការច្រណែននឹងព្រះអនុជអ្នកអង្គម្ចាស់សដែលបានចាត់ចែងកិច្ចការព្រះនគរបានយ៉ាងល្អនៅពេលអវត្ដមានរបស់ព្រះអង្គ ហើយបារម្ភខ្លាចព្រះអនុជនេះទទួលបានប្រជាប្រិយភាពខ្លាំងជាង បានស្នើសុំឱ្យស្ដេចសៀមកោះហៅព្រះអនុជយកទៅបាងកក ។ ស្ដេចសៀមបានចាត់ឱ្យមន្ដ្រីសៀមម្នាក់មករាជធានីឧត្ដុង្គនៅក្នុងខែវិច្ឆិកា ឆ្នាំ១៨៦៣ ដើម្បីនាំអ្នកអង្គម្ចាស់សទៅបើទោះជាព្រះអង្គប្រកែកមិនចង់យាងទៅក៏ដោយ ។ ស្ដេចសៀមគិតថាខ្លួនអាចប្រើប្រាស់អ្នកអង្គម្ចាស់សនេះដើម្បីធ្វើជាឧបករណ៍សម្រាប់កកូរកកាយកម្ពុជាបាននៅពេលក្រោយៗទៀត ។
ស្ដេចសៀមមិនសូវជាសប្បាយចិត្ដប៉ុន្មានទេ ព្រោះព្រះអង្គចង់ឱ្យបារាំងចរចាជាមួយនឹងព្រះអង្គផ្ទាល់អំពីរឿងរ៉ាវដែលទាក់ទិនជាមួយកម្ពុជា និងព្រះរាជាឧត្ដុង្គ ដែលព្រះអង្គបានចាត់ទុកថាគ្រាន់តែជាព្រះរាជារងបន្ទាប់ពីព្រះអង្គប៉ុណ្ណោះ ។ នៅពេលដែលបានជ្រាបពីហេតុការណ៍នេះ ព្រះបាទនរោត្ដមបានប្រកែកដោយព្រះទ័យក្រេវក្រោធ ហើយមិនចង់ឱ្យមានដូច្នេះតទៅទៀតទេ ទើបព្រះអង្គទាមទារឱ្យសៀមបញ្ជូនកេតនភណ្ឌរបស់ព្រះរាជាកម្ពុជាមកឱ្យវិញ ក្នុងនោះមានទាំងព្រះខ័នរាជ្យផង ដែលព្រះអង្គបាននាំយកទៅកាលពីខែសីហា ឆ្នាំ១៨៦១ ហើយទុកចោលនៅក្នុងរាជវាំងបាងកក មិនបានយកមកវិញទេ ។ ស្ដេចសៀមបានឆ្លើយតបមកថា ទ្រង់នឹងយាងមកផ្ទាល់ព្រះអង្គដើម្បីរៀបចំអភិសេកព្រះរាជាកម្ពុជា ។ និយាយយ៉ាងនេះ ជាការបញ្ជាក់ឱ្យឃើញសាជាថ្មីនូវសិទ្ធិអធិរាជភាពរបស់សៀមមកលើកម្ពុជា និងថាស្ដេចសៀមមានសិទ្ធិធ្វើអ្វីៗទាំងអស់មកលើព្រះរាជានៅឧត្ដុង្គ ។ លោកឧត្ដមនាវីបានប្រកែកមិនយល់ស្របតាម ហើយស្ដេចសៀមក៏រក្សាកេតនភណ្ឌទាំងអស់ទុកទៅ (ខែវិច្ឆិកា ឆ្នាំ១៨៦៣) តែក៏មិនបានបដិសេធថា មិនឱ្យមកវិញនោះទេ ធ្វើឱ្យព្រះរាជាចេះតែរង់ចាំដូច្នេះរហូតទៅ ។ ស្ដេចសៀមបានគិតថា មើលទៅប្រហែលជារដ្ឋាភិបាលទីក្រុងប៉ារីសនឹងមិនឱ្យសច្ចាប័នលើសន្ធិសញ្ញាដែលបារាំងបានចុះហត្ថលេខាជាមួយស្ដេចនរោត្ដមទេ សមនឹងមានការយឺតយ៉ាវក្នុងការបញ្ជូនសំបុត្រទៅស្រុកបារាំងផង ការឱ្យសច្ចាប័ននេះហាក់ដូចជាត្រូវនឹងគំនិតគិតឃើញរបស់ខ្លួន ។
រហូតមកដល់ខែមករា ឆ្នាំ១៨៦៤ សៀមនៅតែមិនទាន់បញ្ជូនកេតនភណ្ឌរបស់ព្រះរាជាកម្ពុជាមកឱ្យវិញទេ ព្រះបាទនរោត្ដមក៏សម្រេចឱ្យធ្វើការប្រកាសព្រះអង្គជាព្រះរាជា ដោយឱ្យរៀបចំស្វេតច្ឆត្រ៧ជាន់ ដាក់នៅពីលើព្រះរាជបល្ល័ង្ក ។ ដោយគ្មានព្រះខ័នរាជ្យ ការប្រកាសនេះហាក់បីដូចជាមិនគ្រប់គ្រាន់ទេ ក៏ប៉ុន្ដែមានប្រសិទ្ធភាពសមល្មមដែរ ដោយប្រជារាស្ដ្រទាំងអស់បានស្វាគមន៍អបអរ ។
នៅពេលនោះរាជវាំងបាងកកក៏មិនដឹងថាតើត្រូវធ្វើដូចម្ដេចដែរ ស្រាប់តែបានទទួលដំណឹងនៅក្នុងខែមីនាថា រដ្ឋាភិបាលបារាំងបានឱ្យសច្ចាប័នលើសន្ធិសញា្ញដែលបានចុះកាលពីខែកក្កដា ឆ្នាំ១៨៦៣ហើយ ។ ដោយមិនអាចត្រលប់ក្រោយបាន បាងកកក៏ស្នើទៅឧត្ដមនាវីបារាំងនៅកូសាំងស៊ីនថាឱ្យរៀបចំព្រះរាជពិធីអភិសេកព្រះរាជាកម្ពុជាក្រោមអធិបតីភាពរបស់តំណាងពីរដ្ឋាភិបាលបារាំង និងសៀមរួមគ្នា ។ លោកឧត្ដមនាវីឡាហ្គ្រង់ឌីយែរបានយល់ព្រមតាមសំណើនេះដែលធ្វើឱ្យគេនឹកដល់ការអភិសេកព្រះបាទអង្គឌួងដោយតំណាងរបស់សៀម និងអាណ្ណាមដែរ ពេលនេះបារាំងបានមកជំនួសអាណ្ណាម ម្ល៉ោះហើយត្រូវបន្ដសិទ្ធិគ្រប់គ្រងលើកម្ពុជាជំនួសអាណ្ណាមវិញ ។ ដោយហេតុនេះព្រះបាទនរោត្ដមត្រូវបានគេរៀបចំព្រះរាជពិធីអភិសេកថ្វាយយ៉ាងឱឡារិកនៅថ្ងៃទី៣ ខែមិថុនា ឆ្នាំ១៨៦៤ ដោយមានកេតនភណ្ឌគ្រប់គ្រាន់ដែលបញ្ជូនមកពីបាងកក ។
នៅពេលនោះមានជនម្នាក់ឈ្មោះ អាស្វា បានប្រកាសខ្លួនថា ជាអ្នកអង្គម្ចាស់ភឹម ដែលត្រូវជាបុត្រារបស់អតីតព្រះឧបរាជអង្គឯម បានចាប់បះបោរឡើង អង្គភឹមនេះបានសុគតទៅហើយនៅបាងកកកាលពីឆ្នាំ១៨៥៥ ក្នុងព្រះជន្ម៣១ព្រះវស្សាដោយសាររោគឆ្កួត ។ តាមពិតអាស្វានោះជាខ្ញុំម្នាក់ដែលធ្លាប់បានប្រកាសខ្លួនថាជាអ្នកមានបុណ្យ ហើយត្រូវបានគេចាប់ខ្លួនបញ្ជូនយកមកថ្វាយព្រះបាទអង្គឌួងម្ដងរួចមកហើយនៅក្នុងឆ្នាំ១៨៥៩ ក៏ប៉ុន្ដែព្រះអង្គបានលស់លាត្រាប្រណីទោសបញ្ជូនទៅឱ្យម្ចាស់វិញទៅ ។ ចាប់ពីពេលនោះមកជននេះបានដើរគ្មានទិសដៅទៅសព្វទីកន្លែង ដោយប្រកាន់ថាខ្លួនជាអ្នកមានបុណ្យ ។ ឥឡូវនេះជននោះប្រកាសខ្លួនថា ជាអ្នកអង្គម្ចាស់មួយអង្គ ដែលអ្នកណាក៏ដឹងដែរថាទ្រង់បានសុគតទៅហើយ ។ ជននោះបានសរសេរលិខិត១ច្បាប់ទៅឱ្យលោកឧត្ដមនាវី (93) ទាមទារនូវសិទ្ធិទាំងឡាយដែលខ្លួនត្រូវទទួលបាន ។ លោកឧត្ដមនាវីមិនបានឆ្លើយតបទៅវិញទេ ជននោះក៏ចាប់ផ្ដើមប្រមែប្រមូលបក្សពួកនៅក្នុងខែត្រទ្រាំង បាទី ពាម និងព្រៃកប្បាស អ្នកខ្លះចូលរួមដោយជឿតាមការឃោសនា ខ្លះទៀតមានបំណងចង់ធ្វើចោរកម្ម ធ្វើឱ្យច្របូកច្របល់ពេញប្រទេស ។ មនុស្សមួយចំនួនដែលអាស្វា ទទួលយកមកបញ្ចូលក្នុងជួរកងកម្លាំងរបស់ខ្លួន គឺជាអតីតទាហានរបស់រាមាយោធា និងស្នងសូរ ។ ពួកបះបោរបានសម្លាប់ឧកញ៉ាចក្រីកែបចៅហ្វាយខែត្រទ្រាំងនៅក្នុងការប្រយុទ្ធមួយ រួចហើយបានដុតបំផ្លាញខែត្រកំពតខ្ទេចខ្ទី ។ បន្ទាប់មក ដោយកងកម្លាំងរបស់ខ្លួនកើនកាន់តែច្រើនឡើង អាស្វាក៏ធ្វើដំណើរមកកាន់ភ្នំពេញ ក៏ប៉ុន្ដែបានត្រូវទ័ពព្រះរាជាកាត់វាយតាមផ្លូវ ធ្វើឱ្យបរាជ័យ រួចដកថយទៅកាន់កូសាំងស៊ីនវិញទៅ ។ អាស្វាបានទទួលការការពារពីពួកអាណ្ណាមនៅក្នុងខែត្រវិញឡុង ចូវដុក និងហាទៀង និងពីស្ដេចត្រាញ់របស់ខែត្រទាំងនោះផងដែរ ព្រោះអាណ្ណាមគិតថាសង្គ្រាមស៊ីវិលនឹងធ្វើឱ្យកម្ពុជាចេះតែរេចរឹលទៅៗ ។ ប៉ុន្ដែនៅទីបំផុតពួកអាណ្ណាមក៏ចាប់អាស្វាប្រគល់ឱ្យលោក ដឺឡាគ្រេ នៅចូវដុក នៅថ្ងៃទី១៩ ខែសីហា ឆ្នាំ១៨៦៦ ។
នៅពេលដែលព្រឹត្ដិការណ៍នេះបញ្ចប់ទៅនៅភាគនិរតីព្រះរាជាណាចក្រ មានព្រឹត្ដិការណ៍មួយផ្សេងទៀតបានកើតឡើងនៅឧត្ដុង្គ ។ ថ្ងៃមួយព្រះរាជាបានទទួលភ្នាក់ងារម្នាក់មកពីបាងកក សុំយាងព្រះអង្គឱ្យធ្វើដំណើរទៅកំពត ដើម្បីទៅទទួលស្ដេចសៀមដែលរង់ចាំជួបជាមួយព្រះអង្គ ។ ព្រះរាជាបានប្រាប់លោកឌូដាដឺឡាគ្រេ អំពីការអញ្ជើញនេះ ហើយបានមានព្រះបន្ទូលថានេះគឺជាកិត្ដិយសមួយចំពោះព្រះអង្គហើយទ្រង់នឹងយាងទៅតាមការអញ្ជើញ ។ លោក ឌូដាដឺឡាគ្រេ មិនចង់ឱ្យព្រះរាជាយាងទៅទេ ហើយបានទូលតបទៅវិញថា ស្ដេចសៀមមិនបានយាងមកទេ ។ ព្រះរាជាមិនព្រមស្ដាប់ឡើយហើយបានយាងទៅកំពតដោយមានលោកឌូដាដឺឡាគ្រេជូនដំណើរទៅផង ។ ទៅដល់កំពត ព្រះអង្គទទួលបានសារលិខិតរបស់ស្ដេចសៀមមួយច្បាប់ទូលព្រះអង្គថា ស្ដេចសៀមមិនបានយាងមកតាមការណាត់ទេ ហើយសូមឱ្យព្រះអង្គយាងត្រលប់ទៅរាជធានីវិញចុះ ។ ព្រះបាទនរោត្ដមទ្រង់ខ្ញាល់ជាខ្លាំង ក៏យាងត្រលប់ទៅឧត្ដុង្គវិញទាំងខ្មាស់អៀន ដែលត្រូវរំខានអត់ប្រយោជន៍ដូច្នេះ ។
នៅសម័យនោះ គឺនៅចុងឆ្នាំ១៨៦៥ មានខ្មែរម្នាក់ទៀតបានប្រកាសខ្លួនថាជា ពោធិកំបោរ (94) ត្រូវជាបុត្រារបស់ព្រះអង្គចន្ទ បង្ហាញខ្លួននៅក្រចេះ រួចនៅតាមបណ្ដាខែត្រខាងកើត ចុះរហូតទៅដល់ទឹកដីកូសាំងស៊ីន នៅត្រាវិញ(បាសាក់) ។ ប្រជាជនជាច្រើននាក់បានជឿតាមសម្ដីរបស់ជននេះ ហើយនាំគ្នាដើរតាមជាហូរហែ ។
លោកឧត្ដមនាវីជាចៅហ្វាយក្រុងសាយហ្គនបានកោះហៅឈ្មោះនេះឱ្យទៅជួប ហើយបានឃាត់ខ្លួនទុក ។ តាមពិតជននោះមានឈ្មោះថា ពោធិ អ្នកខ្លះនិយាយថាកើតនៅត្បូងព្រះឃ្លាំងក្នុងខែត្រកំពង់ស្វាយ តែអ្នកខ្លះថាជននេះមានកំណើតជាជនជាតិភាគតិចរដែ ។ ទោះជាយ៉ាងណាក្ដីជននេះបានធ្វើដំណើរចេញពីភូមិពួករដែមកមុននឹងមកដល់ក្រចេះ ។ ជននោះមានប្រពន្ធ៤នាក់ នារីព្នងម្នាក់ នារីអាណ្ណាមម្នាក់ និងនារីខ្មែរ២នាក់ ។ មកដល់ក្រចេះ គាត់បានយកប្រពន្ធខ្មែរម្នាក់ទៀត ។ ពោធិបានសម្លាប់ចៅហ្វាយខែត្រក្រចេះ និងសម្បុកដែលប្រកែកមិនព្រមគោរពបញ្ជារបស់ខ្លួន រួចបានទៅសង់បន្ទាយមួយនៅក្នុងភូមិឈើទាលភ្លោះ នៅក្នុងខែត្រកញ្ជរ ។ ពេលនោះអាណាខែត្រទាំងឡាយនៅខាងកើតទន្លេមេគង្គបានចុះចូលជាមួយនឹងជនក្បត់នេះ ។ ព្រះរាជាបានបញ្ជាឱ្យលោកក្រឡាហោមចេញតាមវាយទៅលើពោធិកំបោរដល់បាភ្នំនៅក្នុងខែមិថុនា ឆ្នាំ១៨៦៦ ។ មុនដំបូងទ័ពពោធិកំបោរទទួលបានជ័យជម្នះ ប៉ុន្ដែបន្ទាប់មកក៏បរាជ័យវិញ ហើយបានគេចខ្លួនបាត់ទៅ ។ ប៉ុន្មានថ្ងៃក្រោយមក ពោធិកំបោរបានបង្ហាញខ្លួនឡើងវិញ ក៏ត្រូវទ័ពបារាំងវាយលើកទី១នៅថ្ងៃទី២៥-២៦ ខែវិច្ឆិកា ឆ្នាំ១៨៦៦ លើកទី២នៅក្នុងខែមករា ឆ្នាំ១៨៦៧ ។ ពោធិកំបោរបានបាត់ខ្លួនម្ដងទៀត បន្ដិចក្រោយមកលេចឃើញនៅក្នុងខែត្របារាយណ៍ និងកំពង់លែង ហើយធ្វើការគំរាមកំហែងមកលើរាជធានីឧត្ដុង្គ ។ ពោធិកំបោរបានត្រូវវាយឱ្យបរាជ័យជាច្រើនលើកច្រើនសា ក៏បាត់ខ្លួនម្ដងទៀតរួចមកដល់កំពង់ធំ ។ នៅកំពង់ធំនោះ អ្នកស្រុកស្រីៗបានជំរុញឱ្យប្ដីខ្លួនដេញតាមចាប់ពោធិកំបោរបាននៅក្នុងត្រពាំងទឹក រួចសម្លាប់ចោលទៅ ។ គេបានកាត់ក្បាលពោធិកំបោរប្រឡាក់អំបិលផ្ញើថ្វាយព្រះរាជា ដែលទ្រង់បានចេញបញ្ជាឱ្យយកទៅដោតនៅចុងដើមឫស្សីមួយនៅភ្នំពេញ (ខែធ្នូ ឆ្នាំ១៨៦៧) ។
កន្លងមក នៅពេលដែលមានព្រឹត្ដិការណ៍អស់នេះកើតឡើង ក្រោយពីបានពិនិត្យឃើញថាពួកអាជ្ញាធរអាណ្ណាមតែងតែជួយពួកបះបោរ ដោយផ្ដល់ឱ្យជ្រកកោនលើទឹកដី ឬជួនកាលជួយទាំងកម្លាំងថែមទៀត បញ្ជាក់ឱ្យឃើញថា ពួកនេះមានបំណងចង់បង្កការរំខានដល់សកម្មភាពរបស់បារាំងនៅកម្ពុជា លោកឧត្ដមនាវី ឡាហ្គ្រង់ឌីយែរ បានសម្រេចប្រកាសថា ត្រូវបញ្ចប់ការដណ្ដើមយកកូសាំងស៊ីនភាគខាងក្រោមទាំងមូលតែម្ដង ដោយកាត់យកខែត្រ៣ថែមទៀតដែលខ្មែរបានបោះបង់ចោលឱ្យអាណ្ណាមគឺចូវដុក វិញឡុង និងហាទៀងដាក់បញ្ចូលជាមួយខែត្រ៣មុន គឺបៀនវ៉ា យ៉ាឌិញ និងឌិញទឿង ។ ការកាត់យកទឹកដីនេះប្រព្រឹត្ដទៅនៅក្នុងខែមិថុនា ឆ្នាំ១៨៦៧ ៖ វិញឡុងបានធ្លាក់ចូលមកក្នុងដៃបារាំងនៅថ្ងៃទី២០ ចូវដុកក្នុងថ្ងៃទី២២ ហើយហាទៀងនៅក្នុងថ្ងៃទី២៤ ដោយគ្មានអស់គ្រាប់កាំភ្លើង១គ្រាប់ ។ ចៅហ្វាយលើទឹកដីទាំងនោះ គឺផានថានយ៉ាង ដោយពិនិត្យឃើញថាមិនអាចតទល់នឹងពួកបារាំងបានប្រកែកមិនព្រមចូលបម្រើបារាំងតាមសំណើរបស់លោកឧត្ដមនាវីឡាហ្គ្រង់ឌីយែរទេតែបានចេញបញ្ជាឱ្យប្រគល់ទីក្រុងទាំងអស់នោះឱ្យបារាំងវិញ រួចហើយបានផឹកថ្នាំសម្លាប់ខ្លួនបាត់ទៅ ដើម្បីជាការដាក់ទោសចំពោះអសមត្ថភាពក្នុងការបំពេញកាតព្វកិច្ចរបស់ខ្លួន ។
ដោយហេតុនេះ បារាំងមានព្រំប្រទល់ជាប់ពីខាងត្បូងកម្ពុជាហើយ ហើយក៏មិនអាចមានរឿងអ្វីកើតឡើងដែលបារាំងមិនបានដឹងនោះទេ ។ ស្ថានភាពនេះអាចឱ្យយើងផ្ដល់ជំនួយប្រកបទៅដោយប្រសិទ្ធភាពដល់ព្រះរាជាកម្ពុជា ជាអាវុធយុទ្ធភណ្ឌដែលព្រះអង្គត្រូវការក្នុងការប្រយុទ្ធតទល់នឹងពួកបះបោរ ជួនកាលជាទ័ពដឹកនាំដោយនាយទាហានបារាំងតែម្ដងក៏មាន ។
ដោយមានការចាក់ចុចពីតំណាងស្ដេចសៀមនៅឧត្ដុង្គ ព្រះបាទនរោត្ដមបានលួចចុះសន្ធិសញ្ញាមួយជាសម្ងាត់ជាមួយសៀម ប្រហាក់ប្រហែលនឹងសន្ធិសញ្ញាដែលព្រះអង្គបានចុះជាមួយបារាំងដែរ ។ នៅខែមីនា ឆ្នាំ១៨៦៧ ពេលពិនិត្យឃើញថាបារាំងមានការសង្ស័យអំពីសន្ធិសញ្ញានេះ អភិបាលរាជធានីបាងកកបានប្រកាសយ៉ាងប្រញាប់ថាគេបានចុះសន្ធិសញ្ញាមួយនេះជាមួយព្រះបាទនរោត្ដមនៅក្នុងសម័យមួយដែលពួកគេមិនបានដឹងថាកម្ពុជាបានចុះសន្ធិសញ្ញាមួយជាមួយបារាំងរួចទៅហើយទេ ។ នៅពេលបានដឹងពីសន្ធិសញ្ញាជាមួយបារាំងនេះ គេបានប្រកាសបដិសេធសន្ធិសញ្ញារបស់គេជាអសារបង់ហើយដើម្បីកុំឱ្យរំខានដល់ការអនុវត្ដសន្ធិសញ្ញាជាមួយបារាំងផង ។ ក៏ប៉ុន្ដែនៅពេលនោះដែរ ស្ដេចសៀមដែលទើបតែបានចុះសន្ធិសញ្ញាមួយជាមួយកុងស៊ុលបារាំងប្រចាំរាជធានីបាងកក បានទទួលស្គាល់ថាទឹកដីអង្គរ និងបាត់ដំបងជារបស់សៀម ទាំងដែលកុងស៊ុលនោះមិនបានដឹងអំពីស្ថានភាពពិតប្រាកដ ហើយក៏មិនបានជូនដំណឹងដល់លោកឧត្ដមនាវីជាអភិបាលក្រុងសាយហ្គនឱ្យដឹងផងទេ ។
គេបានដឹងអំពីការមានសន្ធិសញ្ញានេះនៅឯសាយហ្គន នៅក្នុងខែកក្កដា ឆ្នាំ១៨៦៧ ។ រដ្ឋាភិបាលបារាំងនាសម័យនោះដែលមិនបានយកចិត្ដទុកដាក់ដល់រឿងនេះបានឱ្យសច្ចាប័នដោយមិនបានគិតវែងឆ្ងាយជាហេតុធ្វើឱ្យខែត្រដ៏មានសារសំខាន់ទាំង២នេះដែលលោកឧត្ដមនាវី និងលោកដឺឡាហ្គ្រង់ឌីយែរមានបំណងទាមទារយកមកប្រគល់ឱ្យកម្ពុជាវិញតាំងតែពីពេលនោះម្ល៉េះ ត្រូវបាត់បង់ទៅអស់កាល៤០ឆ្នាំថែមទៀត ។ លោកឧត្ដមនាវីមិនសប្បាយចិត្ដទេ រីឯលោកដឺឡាគ្រេ ដែលជាតំណាងអាណាព្យាបាលបារាំងប្រចាំនៅរាជធានីឧត្ដុង្គវិញ បានខឹងសម្បាជាខ្លាំង ។ ដើម្បីកុំឱ្យលោកដឺឡាគ្រេខឹងខ្លាំងពេកព្រះរាជាកម្ពុជាបានប្រកែកថាទ្រង់មិនបានដឹងអ្វីទេ ហើយថាព្រះរាជាកម្ពុជាមុនៗមិនដែលបានទទួលស្គាល់ការដែលស្ដេចសៀមយកខែត្របាត់ដំបង និងអង្គរនេះម្ដងណាទេ ដូចនេះ ប្រទេសបារាំងដែលជាអ្នកការពារកម្ពុជាក៏គ្មានសិទ្ធិអ្វីយកទឹកដីកម្ពុជាទៅប្រគល់ឱ្យគេដោយគ្មានការឯកភាពពីព្រះអង្គដែរ ។ ព្រះរាជបន្ទូលរបស់ព្រះរាជានេះត្រឹមត្រូវណាស់ គឺដោយសារព្រះអង្គបានទទួលឥទ្ធិពលខ្លះៗពីលោកតំណាង ក៏ប៉ុន្ដែទោះជាយ៉ាងណាក៏ដោយ បារាំងមានចំណងការទូតជាមួយសៀម ម្ល៉ោះហើយមិនអាចធ្វើអ្វីបានឡើយ ។ មកដល់សព្វថ្ងៃនេះយើងបានដោះស្រាយកំហុសឆ្គងខាងលើនេះរួចវិញហើយៈ បាត់ដំបង អង្គរ ស៊ីសូផុន ម្លូព្រៃ ទន្លេរពៅ ស្ទឹងត្រែង និងទឹកដីទាំងអស់នៅខាងត្បូងភ្នំដងរែក ព្រមទាំងខែត្រកោះកុងនៅលើឈូងសមុទ្រសៀមផង បានវិលត្រលប់មកជាដីកម្ពុជាវិញហើយ ក្រោយរយៈពេលកន្លះសតវត្សរ៍ ។ ព្រះបាទនរោត្ដម និងព្រះវររាជមាតា ដែលមានបំណងឱ្យបារាំងទាមទារយកទឹកដីទាំងនោះមកឱ្យកម្ពុជាវិញយ៉ាងខ្លាំងនោះ បានសុគតអស់ទៅហើយ ដោយមិនបានឃើញទឹកដីទាំងនោះវិលត្រលប់មកវិញផងទេ ។
ព្រះបាទនរោត្ដមបានសម្រេចលើករាជធានីមកតាំងនៅភ្នំពេញវិញតាំងពីឆ្នាំ១៨៦៣មកម្ល៉េះ ។ ព្រះអង្គបានយាងមកពិនិត្យទីតាំងថ្មីនៅត្រង់កណ្ដាលភូមិតាកែវ ចំពីខាងមុខទន្លេចតុម្មុខនៅដំណាច់ឆ្នាំមុន បន្ទាប់មកទ្រង់ក៏ចាត់ឱ្យរៀបចំពង្រាបដីភ្លាម ។ ដើម្បីមានថវិកាចំណាយក្នុងការរៀបចំរាជធានីថ្មីនេះ ព្រះរាជាបានរៀបចំឱ្យមានការយកពន្ធលើបុគ្គល យកពន្ធបនអាភៀនឡើងវិញ ដែលព្រះបិតាព្រះអង្គបានការពារមិនឱ្យយក ហើយក៏បានរៀបចំប៉ុស្ដិគយមួយចំនួនដែលគេបិទក្នុងមួយរយៈពេលប្រទេសមានអសន្ដិសុខកន្លងមកឡើងវិញផងដែរ ។ វិធានការទី៣នេះគ្មានការតវ៉ាអ្វីទេ ។ មន្ដ្រីចាស់ៗដែលធ្លាប់តែឃើញគ្រឿងញៀននេះធ្វើចរាចរដោយសេរីក្នុងព្រះរាជាណាចក្រ បានមានប្រតិកម្មតបទៅនឹងវិធានការទី២ ។ ក៏ប៉ុន្ដែវិធានការទី១ គឺការបង្កើតពន្ធដារប្រភេទថ្មីមួយដែលមិនដែលមានពីមុនមកមានផលវិបាកអាក្រក់ជាងគេ គឺបានធ្វើឱ្យប្រជាជនទូទាំងប្រទេសមិនពេញចិត្ដ ។ ពេលនោះ បើសិនជាគ្មានវត្ដមានរបស់បារាំងនៅជួយទេ ប្រហែលជាព្រះបាទនរោត្ដមត្រូវបានព្រះអនុជវត្ថា ឬស៊ីសុវត្ថិ បើពុំនោះទេគឺពួកបះបោរអាស្វា និងពោធិកំបោរ ទម្លាក់ពីលើរាជបល្ល័ង្កបាត់ទៅហើយ (95) ។ គឺអំណាច និងការគាំទ្ររបស់បារាំងដែលជួយព្រះអង្គឱ្យគង់នៅលើរាជបល្ល័ង្កជាប់ និងបានជួយឱ្យស្រុកនេះមានសន្ដិភាពឡើងវិញ ឱ្យពាណិជ្ជកម្មចាប់កំណើតជាថ្មី ហើយអភិវឌ្ឍន៍រីកលូតលាស់ គ្មានអ្នកណាគិតស្មានដល់ ខុសពីប៉ុន្មានឆ្នាំមុនឆ្ងាយណាស់ ។ ព្រះរាជាណាចក្រមានសុភមង្គល អ្នកតូចតាចក៏មានប្រាក់កាសចាយ អ្នកស្រុកក៏លែងរអ៊ូរទាំ ហើយចាប់គោរពព្រះរាជាឡើងវិញ និងទម្លាប់ខ្លួនជាមួយនឹងអាណាព្យាបាលរបស់បារាំង ។
សន្ដិភាពបានកើតមានឡើងរវាងស្ដេចនរោត្ដមជាមួយនឹងអនុជរបស់ព្រះអង្គ គឺអ្នកអង្គម្ចាស់ស៊ីសុវត្ថិ ដែលមានឋានៈជាព្រះកែវហ្វ៊ានៅក្រោមរជ្ជកាលរបស់ព្រះបិតាព្រះអង្គ នៅពេលដែលព្រះអង្គជាព្រះឧបរាជ ។ អ្នកអង្គម្ចាស់ស៊ីសុវត្ថិបានគង់នៅឯសាយហ្គនចាប់តាំងពីខែឧសភា ឆ្នាំ១៨៦៦មក ហើយព្រះរាជាទ្រង់ប្រទានប្រាក់ឧបត្ថម្ភចំនួន១៤០ណែន (ប្រហែលជា១ម៉ឺនហ្វ្រង់) ក្នុង១ឆ្នាំៗ ដែលអាចឱ្យព្រះអង្គរស់ជាមួយមហេសី និងសេនាអាមាត្យបានយ៉ាងស្រួល ។ ដល់មកខែឧសភា ឆ្នាំ១៨៧០ ព្រះរាជាបានតែងតាំងព្រះអនុជជាព្រះឧបរាជទាំងបង្ខំព្រះទ័យ តាមសំណើរបស់លោកទេសាភិបាលទឹកដីកូសាំងស៊ីន ។
និយាយអំពីព្រះអនុជមួយព្រះអង្គទៀត គឺអ្នកអង្គម្ចាស់វត្ថា ក្រោយពីទទួលបរាជ័យដណ្ដើមយករាជសម្បត្ដិពីព្រះបាទនរោត្ដមមិនបានរួចមក បានគេចព្រះអង្គទៅគង់នៅឯដីកំពង់ធំ ខែត្រកំពង់ស្វាយ រួចទៅនៅខែត្រស្ទោង បន្ទាប់មកទៀតទ្រង់បាននាំបក្សពួកប្រហែលជា១០០នាក់ ទៅគង់នៅខែត្រសម្បូរតាមមាត់ទន្លេមេគង្គត្រើយខាងស្ដាំ ។ នៅទីនោះមិនសូវមានប្រជាជនរស់នៅទេ តែអ្នកស្រុកបានបង់ពន្ធជាស្រូវថ្វាយ ។ គ្មាននរណាគិតពីព្រះអង្គទៀតទេ តែព្រះអង្គចេះតែទន្ទឹងរង់ចាំក្រែងមានឱកាសបានយាងមកសោយរាជ្យសម្បត្ដិវិញ រហូតទាល់តែទ្រង់សុគតទៅនៅក្នុងភូមិក្រាក់ នៅថ្ងៃទី៣១ ខែធ្នូ ឆ្នាំ១៨៩១ ក្នុងព្រះជន្មាយុ៥០ព្រះវស្សា ។
នៅក្នុងឆ្នាំ១៨៧២ មានអតីតជំនួយការរបស់ពោធិកំបោរម្នាក់ បានចេញបង្ហាញខ្លួននៅក្នុងខែត្រត្បូងឃ្មុំ ជាមួយទ័ព៤រយនាក់ ។ ពួកនេះចេញពីស្រុកពួកស្ទៀងដែលមិនចេះចំណុះគេ តែត្រូវបង្ខំចិត្ដវិលត្រលប់ទៅទីនោះវិញ ដោយមានទ័ពលោកទេសាភិបាលកូសាំងស៊ីនដេញប្រកិតពីក្រោយ ។
នៅខែកក្កដា និងខែសីហា ឆ្នាំដដែល ព្រះរាជាទ្រង់បានយាងធ្វើព្រះរាជទស្សនកិច្ចយ៉ាងយូរនៅហុងកុង ម៉ាកាវ កង់តុង និងម៉ានីល ដោយជិះនាវាចម្បាំងឈ្មោះ ឡឺប៊ួរីយ៉ាន ដែលលោកទេសាភិបាលដីកូសាំងស៊ីនប្រគល់ថ្វាយសម្រាប់ជូនដំណើរ (96) ។
ពេលយាងត្រលប់មកពីទស្សនកិច្ចវិញ ព្រះរាជាកម្ពុជាហាក់ដូចជារំភើបនឹងអ្វីៗដែលព្រះអង្គបានទតឃើញណាស់ ហើយយល់ឃើញថាព្រះអង្គត្រូវរៀបចំប្រទេសរបស់ព្រះអង្គឱ្យមានការវិវត្ដន៍ដូចគេ ។ ក៏ប៉ុន្ដែ ព្រះរាជបំណងនេះមានតែក្នុងមួយរយៈខ្លីប៉ុណ្ណោះ មិនបានប៉ុន្មានផងទ្រង់ក៏ត្រលប់មកប្រកាន់តាមទម្លាប់ចាស់វិញ ហើយមិនបានធ្វើអ្វី គិតអ្វីជាប្រយោជន៍ដល់ប្រជារាស្ដ្ររបស់ព្រះអង្គបន្ដិចណាទេ ទោះបីជាស្ដេចសៀមបានបង្ហាញឱ្យឃើញឧទាហរណ៍ខ្លះៗក៏ដោយ ។ នោះហើយជាគ្រោះថ្នាក់ ។ តើប្រទេសបារាំងសុខចិត្ដបណ្ដោយឱ្យជាតិសាសន៍មួយដែលគេបានស្រោចស្រង់ចេញពីការប្រញីដណ្ដើមហែកហួរគ្នា ហើយសព្វថ្ងៃស្ថិតនៅក្រោមអាណាព្យាបាលរបស់គេឱ្យរលត់រលាយទៅបានដែរឬទេ ? ប្រាកដណាស់ថាបារាំងនឹងជំរុញព្រះរាជាឱ្យចាប់ផ្ដើមធ្វើកំណែទម្រង់ខ្លះៗជាបន្ទាន់ ដោយមិនមានធ្វើឱ្យប៉ះពាល់ដល់ព្រះរាជបុព្វសិទ្ធិរបស់ព្រះអង្គទេ ដូចជានាំព្រះអង្គឱ្យរៀបចំខ្លួនធ្វើការកែប្រែខ្លះដែលនឹងធ្វើឱ្យមានការផ្លាស់ប្ដូរបន្ដិចម្ដងៗ ដើម្បីប្រែក្លាយប្រជាជនកម្ពុជាទៅជាប្រជាជនមួយប្រកបទៅដោយមធ្យោបាយអាចរស់រានមានជីវិតរហូតទៅ ។
ប្រទេសបារាំងមិនមានញញើតទេ ដើម្បីបញ្ជាក់ឱ្យឃើញអន្ដរាគមន៍របស់ខ្លួនមកលើកម្ពុជាថា ពិតជាត្រឹមត្រូវ ។ គេបានសម្រេចចិត្ដធ្វើសកម្មភាពទៅលើប្រជារាស្ដ្រ តាមរយៈព្រះរាជា ដោយហេតុនោះហើយបានជាព្រះបាទនរោត្ដមបានចុះព្រះហស្ដលេខាលើព្រះរាជក្រឹត្យមួយចំនួននៅថ្ងៃទី១៥ ខែមករា ឆ្នាំ១៨៧៧ លុបបំបាត់ឋានៈឧបរាជចេញ ដូចដែលគេបានអនុវត្ដរួចមកហើយនៅស្រុកសៀម លុបឋានៈឧភយោរាជដែលអស់ន័យទៅហើយ លុបឋានៈព្រះវររាជជននីដែលនៅឯបាងកកឯណោះគឺជាឋានៈរបស់ព្រះវររាជមាតា តែគ្មានអំណាចអ្វីទេ ព្រមទាំងលុបបំបាត់ឋានៈ និងមុខងារមន្ដ្រីមួយចំនួនធំដែលគ្មានការងារអ្វីជាសំខាន់ ។
ចំនួនខែត្រក៏ត្រូវកែប្រែ និងកាត់បន្ថយ ។ ការយកពន្ធដារឈប់ប្រគល់ឱ្យពួកចិនប្រមូលទៀតហើយព្រោះពួកនេះតែងតែកាត់យកមួយចំណែកធំសម្រាប់ខ្លួនឯង ។ ល្បែងស៊ីសងមួយចំនួនត្រូវហាមឃាត់ ដូចជា ល្បែង សត្វ៣៦បែប ល្បែងឯទៀតៗត្រូវរៀបចំត្រួតពិនិត្យ ។ កំណែនធ្វើការចំនួន៩០ថ្ងៃអាចគេចផុតបានដោយបង់ប្រាក់ចំនួន២០ហ្វ្រង់ ស្មើនឹង៤ពីយ៉ាស (97) ។ កំណែទម្រង់តុលាការ ដោយចាត់តាំងតែចៅក្រមដែលបានសិក្សា ចេះចាំច្បាប់ច្បាស់លាស់ ។ លុបបំបាត់មិនឱ្យមានខ្ញុំបម្រើដែលមិនឱ្យរំដោះខ្លួនចេញ និងរៀបចំលុបបំបាត់ចោលទាំងស្រុង រង់ចាំតែព្រះរាជាចេញច្បាប់កំណត់ឱ្យផ្ដល់ប្រាក់បៀវត្សឱ្យ ដែលពួកខ្ញុំទាំងនោះអាចកាត់សងបំណុលរបស់គេបាន ។
កំណែទម្រង់ទាំងអស់នេះនឹងធ្វើឱ្យស្ថានភាពកម្ពុជាកាន់តែល្អប្រសើរឡើងប្រសិនបើគេអនុវត្ដបានត្រឹមត្រូវ ព្រោះថាវាមានអត្ថប្រយោជន៍ផ្ទាល់ភ្លាមតែម្ដង ហើយនឹងទាក់ទាញឱ្យមានកំណែទម្រង់ផ្សេងៗជាបន្ដទៀត ដែលនឹងនាំមកនូវការរីកចម្រើន ហើយនឹងធ្វើឱ្យប្រទេសឈានឡើងមានឋានៈស្មើនឹងបណ្ដាប្រទេសស៊ីវីល័យឯទៀតៗ និងមានជីវិតរស់រានជាអង្វែងតទៅ ។ ក៏ប៉ុន្ដែឥទ្ធិពលរបស់បារាំងទៅលើព្រះរាជាពេលនោះ ដែលធ្លាប់តែគ្មានកម្រៃជាយូរណាស់មកហើយដែលមានឆន្ទៈតែមិនច្បាស់លាស់មិនទៀងទាត់ ខ្វះការប៉ិនប្រសប់ហើយអកម្ម គ្មានគំនិតជាប់បន្ដ ដោយហេតុនេះព្រះអង្គនៅខ្សោយខ្លាំងណាស់ ។ បារាំងគ្មានឥទ្ធិពលបន្ដិចបន្ដួចទៅលើពួកមន្ដ្រីដែលកំពុងតែព្រឺខ្លាចចំពោះការផ្លាស់ប្ដូរដែលគ្រោងទុកជាមុន ពីព្រោះនោះគឺការបញ្ជូលរបៀបថ្មី ដែលធ្វើឱ្យពួកគេងឿងឆ្ងល់ ប៉ះពាល់ដល់ទម្លាប់ ភ័យព្រួយខ្លាចបាត់បងផលប្រយោជន៍របស់គេ ។ ពួកស្រីៗនៅក្នុងព្រះរាជវាំងមានពួកអ្នកអង្គម្ចាស់ក្សត្រី ពួកស្រីស្នំ ពួកភីលៀង បានប្រឆាំងយ៉ាងខ្លាំងចំពោះការប្រែប្រួលទាំងឡាយ បានព្រួតគ្នាធ្វើប្រតិកម្មតបមួយ ដែលបារាំងមិនដឹងតទល់យ៉ាងណា ឬក៏មិនបានឱ្យតម្លៃដល់ ដោយធ្វេសប្រហែស ។
ចំណែកប្រជាជនវិញ មិនមានព្រួយបារម្ភអ្វីទេ ដោយគិតថាបារាំងមកជួយរៀបចំសណ្ដាប់ធ្នាប់ឱ្យ ជួយធ្វើឱ្យមានសន្ដិសុខនៅក្នុងព្រះរាជាណាចក្រ ខុសពីអាណ្ណាម និងសៀម ។ ប្រជាជនធ្លាប់បានឃើញបារាំងធ្វើដំណើរពាសពេញស្រុកហើយគាត់រីករាយនឹងឃើញអ្នកតំណាងអាណាព្យាបាលរស់នៅភ្នំពេញក្បែរព្រះរាជា តែគ្មានរវីរវល់លូកដៃចូលក្នុងកិច្ចការអ្វីៗទេ ។ ការបើកឱ្យធ្វើនាវាចរតាមទន្លេពីកូសាំងស៊ីនឡើងវិញ ដែលពីមុនអាណ្ណាមបិទជិត ធ្វើឱ្យមាននាវាប្រើចំហាយជាច្រើនឡើងមកដល់ទឹកដីព្រះរាជាណាចក្រ ធ្វើឱ្យពាណិជ្ជកម្មរីកចម្រើន និងធ្វើឱ្យប្រជាជនកម្ពុជារីករាយសប្បាយចិត្ដជាខ្លាំង ហើយគេបាននិយាយថា នេះគឺដោយសារបារាំង ម្ល៉ោះហើយអ្នកស្រុកស្រលាញ់បារាំងណាស់ ។
ក៏ប៉ុន្ដែ ដើម្បីបញ្ជាក់ពីអាណាព្យាបាល និងវត្ដមានរបស់បារាំងនៅកម្ពុជា និយាយឱ្យខ្លីថាដើម្បីអាចធ្វើការកែប្រែស្រុកនេះស្របទៅតាមកម្មវិធីមួយ ដោយផ្លាស់ប្ដូរស្ថាប័នចាស់គំរឹលចេញ បារាំងត្រូវការឱ្យមានភ្នាក់ងារដែលមានការគិតគូរក្នុងការបំពេញភារកិច្ចរបស់ខ្លួន មានស្ថាប័នថ្មីបំពេញកាតព្វកិច្ចច្បាស់លាស់ ជាពិសេសគឺត្រូវឱ្យព្រះរាជាស្ដាប់ការផ្ដល់យោបល់ មានមន្ដ្រីដែលស្ដាប់ព្រះរាជបញ្ជា ហើយបារាំងខ្លួនឯងក៏ឈប់លែងជាទីប្រឹក្សាគ្មានឥទ្ធិពល តែជាអ្នកគ្រប់គ្រងរដ្ឋបាលមានសិទ្ធិចាត់ចែងការងារក្នុងនាមព្រះរាជា ហើយក៏អាចបញ្ជាពួកមន្ដ្រីឱ្យអនុវត្ដភារកិច្ចបានផងដែរ ។
នៅស្រុកសៀមឯណោះវិញ នៅពេលដែលព្រះរាជាបាងកកសម្រេចថានឹងធ្វើការកែទម្រង់ដូចដែលបារាំងមានគម្រោងចង់ធ្វើ និងមានកាតព្វកិច្ចត្រូវធ្វើនៅកម្ពុជា ដោយសៀមគ្មានប្រទេសអាណាព្យាបាលដូចកម្ពុជា ព្រះរាជាបានអំពាវនាវរកប្រទេសនៅអឺរ៉ុបឱ្យមកជួយ ហើយបានប្រគល់ការដឹកនាំបច្ចេកទេសលើគ្រប់សេវាទៅឱ្យគេកាន់កាប់ទាំងអស់ ។ ចំពោះកម្ពុជាដែលមានបារាំងជាអាណាព្យាបាល គេក៏ត្រូវការជាចាំបាច់ណាស់នូវអ្នកបច្ចេកទេសអឺរ៉ុបមកធ្វើការបម្រើផលប្រយោជន៍ត្រឹមត្រូវទៅតាមបច្ចេកទេសដែលគេកំពុងតែប្រើនៅអឺរ៉ុបដែរ ហើយអ្នកបច្ចេកទេសនោះសមណាស់តែមានសញ្ជាតិជាប្រទេសអាណាព្យាបាលគឺបារាំង ។
ព្រះបាទនរោត្ដមបានយល់ច្បាស់ណាស់អំពីសារសំខាន់ទាំងអស់នេះ ក៏ប៉ុន្ដែទ្រង់អាចមិនទាន់បានយល់ច្បាស់ទាំងអស់នៅឡើយ ព្រោះគ្មានអ្នកណាផ្ដល់គំនិតថ្វាយ គ្មានអ្នកណាផ្ដល់ទីប្រឹក្សាល្អិតល្អន់ ជាពិសេសគឺមកពីបារាំងមិនហ៊ានបង្ខិតបង្ខំព្រះអង្គខ្លាំងពេក ។ ម្ល៉ោះហើយព្រះអង្គមានការញញើតញញើម មិនហ៊ានសម្រេចយ៉ាងណាជាយ៉ាងណាទេ ណាមួយទ្រង់ចង់ស្ថិតនៅជាព្រះរាជាផ្ដាច់ការផង ចង់ក្ដាប់ក្នុងព្រះហស្ដនូវជីវិត សេចក្ដីស្លាប់ និងទ្រព្យធនទាំងអស់របស់ប្រជារាស្ដ្រព្រះអង្គផង ហើយគ្មានសេចក្ដីក្លាហាននឹងអនុវត្ដកំណែទម្រង់ទាំងនោះទេ ។ ព្រះអង្គចង់ក្ដាប់ផលនៃពន្ធដារទាំងអស់ហើយចាត់ចែងទៅតាមតែព្រះទ័យដោយមិនបានគិតធ្វើអ្វីជាផលប្រយោជន៍ដល់ប្រជារាស្ដ្រ ឬធ្វើអ្វីជាប្រយោជន៍សាធារណៈសោះឡើយ ។ ធ្វើយ៉ាងនេះ មិនសមនឹងការស្ថិតនៅក្រោមអាណាព្យាបាលរបស់បារាំងទេ (98) ។
ដោយអត់ទ្រាំនឹងពិនិត្យមើលរបាយការណ៍ស្ដីពីការយឺតយ៉ាវនេះតទៅទៀតមិនបាន លោក ហ្ស៊ុលហ្វ៊េរី ដែលកាលនោះជានាយករដ្ឋមន្ដ្រីបារាំងបានចាត់ឱ្យលោក ស្ហាល ថុមសុន ជាទេសាភិបាល និងជាតំណាងដ៏ខ្ពង់ខ្ពស់នៃប្រទេសបារាំងនៅកូសាំងស៊ីន សហការជាមួយអ្នកតំណាងអាណាព្យាបាលបារាំងនៅភ្នំពេញ ចូលគាល់ព្រះបាទនរោត្ដម ហើយយាងព្រះអង្គឱ្យឡាយព្រះហស្ដលេខាលើអនុសញ្ញាមួយដើម្បីប្រគល់កិច្ចដឹកនាំព្រះរាជាណាចក្រដែលកន្លងមកព្រះអង្គក្ដោបក្ដាប់តែមួយព្រះអង្គឯង ឱ្យអាណាព្យាបាលបារាំងចាត់ចែងជំនួសវិញម្ដង ។ ដោយមិនបានគិតអ្វីវែងឆ្ងាយ លោកទេសាភិបាលកូសាំងស៊ីនបានឡើងជិះកប៉ាល់ជាមួយទាហាន១០០នាក់ មកឡើងគោកនៅខាងអាគ្នេយ៍ព្រះរាជវាំង ។ គាត់បានចុះពីកប៉ាល់ ហើយចូលគាល់ព្រះបាទនរោត្ដម សម្ដែងការគួរសមតាមរបៀបពិធីការ រួចបានដកខ្លួនចេញទៅវិញ ។ បន្ដិចក្រោយមក ព្រះរាជាបានយាងទៅជួបជាមួយលោកទេសាភិបាលនៅក្នុងវិមានអាណាព្យាបាល ។
លោក ថុមសុន ជាមនុស្សខ្វះការប៉ិនប្រសប់ គ្មានបទពិសោធន៍ជាអ្នកការទូតម្នាក់ដែលឆ្លាតវាងវៃ មានអំណត់ យល់ដឹងពីកាលៈទេសៈដើម្បីដោះស្រាយបញ្ហាឱ្យបានល្អជាមួយព្រះរាជាកម្ពុជា ដែលទ្រង់ក៏មិនយល់ដឹងច្បាស់អំពីរបៀបធ្វើការរបស់បារាំងដែរ ។ គាត់មិនចេះប្រើវិធីសាស្ដ្រពន្យារពេលដែលនឹងនាំមកនូវលទ្ធផលល្អនៅពេលក្រោយទេ ។ គាត់បានសម្រេចចិត្ដថាត្រូវបង្ខំសភាពការណ៍ ចាប់បង្ខំឱ្យព្រះរាជាឡាយព្រះហស្ដលេខា ដោយធ្វើឱ្យព្រះអង្គភ័យខ្លាចតាមការបង្ហាញកម្លាំងទ័ព ។ គាត់បានចាត់មន្ដ្រីម្នាក់នាំយកអនុសញ្ញាដែលលោករដ្ឋមន្ដ្រីមហាផ្ទៃ ក្លូប៊ូកូវស្គី បានរៀបចំប្រញិបប្រញាប់ជាមួយគាត់មុននឹងចេញពីសាយហ្គនមកដើម្បីឱ្យព្រះរាជាឡាយព្រះហស្ដលេខា ។
មុនដំបូងព្រះរាជាមិនយល់ថាតើគេចង់ឱ្យព្រះអង្គធ្វើអ្វីទេ ។ ពួកមន្ដ្រីទាំងឡាយគិតថាបារាំងចង់លុបបំបាត់ព្រះរាជាណាចក្រចោល ហើយដឹកនាំប្រទេសដោយគ្មានពួកគេ គឺទុកកម្ពុជាជាអាណានិគមរបស់បារាំង ម្ល៉ោះហើយពួកគេបានថ្វាយយោបល់ដល់ព្រះរាជាសូមកុំឱ្យព្រះអង្គយល់ព្រមតាម ។ មានការតឹងតែងអស់ពេលប៉ុន្មានថ្ងៃ រហូតដល់មានឱសានវាទ ៖ ព្រះរាជាបានប្រកែកមិនព្រមទទួលលោកទេសាភិបាលដោយយកលេសថា ព្រះអង្គប្រឈួន ។ បារាំងកំញើញថាបើព្រះអង្គមិនយល់ព្រមទេគេនឹងយកព្រះអង្គទៅដាក់នៅប្រទេសអាល់ហ្សេរី ។ ព្រះអង្គបានត្រូវហ៊ុមព័ទ្ធដោយនាយទាហាន និងមន្ដ្រីបារាំងជាច្រើនរូបក្នុងនោះមានលោក ហ៊្វូរ៉ែស អ្នកតំណាងអាណាព្យាបាលបារាំងនៅកម្ពុជាលោកលូសដែលក្រោយមកជារ៉េស៊ីដង់ជាន់ខ្ពស់នៅកម្ពុជា(១៨៩៨) ហើយគេធ្វើឱ្យព្រះអង្គអាចទតពីព្រះបរមរាជវាំងទៅឃើញកប៉ាល់ដែលចាំតែដឹកយកព្រះអង្គទៅ ធ្វើឱ្យព្រះរាជាភ័យញ័រ រន្ធត់ អត់មិនបានក៏ឡាយព្រះហស្ដលេខាលើអនុសញ្ញាដែលបារាំងយកមកបង្ខំព្រះអង្គទៅនៅថ្ងៃទី២៤ ខែមិថុនា ឆ្នាំ១៨៨៤ ។ តាមពិតទៅមានព្រឹត្ដិការណ៍ដ៏គួរឱ្យសោកស្ដាយមួយបានកើតឡើងដែលធ្វើឱ្យព្រះរាជាទ្រង់ភិតភ័យ ខ្លាំងៈ លោក កុលដឺម៉ុងតេរ៉ូ ដែលជាអ្នកបកប្រែរបស់ព្រះអង្គបានប្រែពាក្យមួយម៉ាត់ខុសមកពីពាក្យនោះមានន័យ២យ៉ាង ។ លោក ប៉ាវី អ្នករុករកបារាំងសម្រាប់ប្រទេសលាវបានកែតម្រូវលើការបកប្រែនោះ ជាហេតុធ្វើឱ្យគេឃាត់ខ្លួនលោកកុលដឺម៉ុងតេរ៉ូ ហើយឱ្យទាហាន២នាក់ដែលឈរសងខាងបានវាយធ្វើបាបគាត់បន្ដិចបន្ដួច ។
ព្រះរាជាមិនបានដឹងថា បើសិនជាព្រះអង្គរក្សាបាននូវពាក្យដែលព្រះអង្គបានសន្យាកាលពីឆ្នាំ១៨៧៧ ព្រះអង្គមិនចាំបាច់ត្រូវគេបង្ខំឱ្យចុះអនុសញ្ញាឆ្នាំ១៨៨៤នេះទេ ។ ក៏ប៉ុន្ដែគ្មាននរណាម្នាក់បានជួយរំលឹកព្រះអង្គអំពីរឿងនេះសោះ តាំងតែពីពេលនោះមក ។ ហើយព្រះអង្គរឹតតែមិនបានដឹងសោះថា ទ្រង់នឹងមិនមានខាតបង់អ្វីទាំងអស់ជាមួយអនុសញ្ញាថ្មីនេះ ។ បើនិយាយអំពីអ្នកតំណាងរបស់ប្រទេសបារាំងប្រចាំនៅកម្ពុជាវិញ អស់លោកមិនបានគិតថាអស់លោកគ្មានបានធ្វើអ្វីសោះក្នុងរយៈពេល៧ឆ្នាំកន្លងទៅនេះ ដើម្បីធ្វើឱ្យការកែទម្រង់ដែលមានកត់ត្រានៅលើក្រដាសរួចហើយប្រែក្លាយទៅជាការពិត ។ អស់លោកមិនដែលបានរំលឹកព្រះរាជាអំពីអ្វីដែលព្រះអង្គបានសន្យារួចមកហើយទេ ។ ជាពិសេសអស់លោកមិនដែលពន្យល់ព្រះរាជាឱ្យទ្រង់ជ្រាបអំពីគោលបំណងល្អដែលបារាំងចង់ធ្វើ ហើយក៏មិនបានចង្អុលបង្ហាញឱ្យព្រះអង្គជ្រាបថា តើត្រូវចាត់វិធានការដូចម្ដេចទេ ។ អស់លោកអ្នកតំណាងអាណាព្យាបាលបានមករស់នៅក្បែរព្រះរាជារបៀបដូចជាកុលស៊ុលអីចឹងមិនមែនរបៀបជារ៉េស៊ីដង់ដែលប្រទេសបារាំងផ្ទុកផ្ដាក់ឱ្យមកជំរុញការកសាងទេ ។
ពេលត្រលប់មកកាន់វិមានអាណាព្យាបាលវិញ លោកទេសាភិបាលកូសាំងស៊ីនបានចេញបញ្ជាឱ្យគេរៀបចំសេចក្ដីសម្រេចផ្សេងៗដែលគាត់យល់ថាចាំបាច់ ហើយបានបង្ខាំងលោក ឌៀប ជាអ្នកបកប្រែរបស់ព្រះរាជា ដែលសព្វថ្ងៃនេះជារដ្ឋមន្ដ្រីខាងទ័ពជើងទឹក ឱ្យធ្វើការតែមិនឱ្យមានទំនាក់ទំនងទៅខាងក្រៅទេ ។ ដោយមិនបានប្រុងប្រៀបរៀបចំទុកជាមុន មិនបានគិតឱ្យល្អិតល្អន់ កិច្ចការដែលគេបានធ្វើពេលនោះក៏ខ្វះនូវប្រសិទ្ធភាព ហើយក៏គ្មានអនាគតវែងឆ្ងាយប៉ុន្មានដែរ ។ គេអាចពិនិត្យមើលឃើញនូវការប្រញិបប្រញាប់ដែលគួរឱ្យអស់សំណើចហើយប៉ាន់ស្មានបាននូវអ្វីដែលគេបានស្រមើស្រមៃ ។
ពេលវេលាបានកន្លងផុតទៅប៉ុន្មានខែហើយ បារាំងហៀបតែនឹងចាប់ផ្ដើមធ្វើការសើរើរៀបចំព្រះរាជាណាចក្រឡើងវិញទៅហើយ ស្រាប់តែលោកតំណាងអាណាព្យាបាលទទួលដំណឹងថាមានការបង្កបង្កើតជាទ័ពទីងនៅកន្លែងជាច្រើនក្នុងប្រទេស ហើយគំរាមកំហែងមកលើទីតាំងរ៉េស៊ីដង់ថ្មីៗរបស់បារាំង ។
ដូច្នេះ សង្គ្រាមបានផ្ទុះឡើង ហើយគេបានចេញបញ្ជាពីកូសាំងស៊ីនមកឱ្យកាន់កាប់ទីប្រជុំជនឱ្យបាន ហើយឱ្យចាត់បញ្ចេញទ័ពចល័តតាមវាយទៅលើពួកបះបោរ ។ ពួកនេះត្រូវបរាជ័យជានិច្ច ហើយបានរត់គេចខ្លួនរាល់ពេលដែលបានជួបទាហានបារាំង ។
ការបះបោរនេះបានកើតឡើងក្រោមការញុះញង់ពីពួកមន្ដ្រី និងតាមបញ្ជាពីព្រះរាជា ហើយស៊ីពេលអស់១៨ខែ ។ មិនមានការប្រយុទ្ធអ្វីធំដំប៉ុន្មានទេ ក៏ប៉ុន្ដែវាបានធ្វើឱ្យប្រទេសហិនហោចយ៉ាងឆាប់រហ័ស ។ តាមពិត បារាំងជាអ្នកខ្លាំងជាង ហើយព្រះរាជាដែលគង់នៅក្នុងរាជធានីភ្នំពេញ ទ្រង់ស្ថិតនៅក្នុងកណ្ដាប់ដៃរបស់បារាំង ។ បារាំងអាចចាប់ខ្លួនព្រះរាជាប្រកាសលើកព្រះឧបរាជឱ្យឡើងកាន់ការជំនួស និងអាចបញ្ចប់សង្គ្រាមបានដោយនាំយកព្រះរាជាទៅប្រទេសបារាំង ឬទៅកាន់ទឹកដីនៅអាហ្វ្រិក ។ ក៏ប៉ុន្ដែបារាំងមិនធ្វើដូច្នេះទេ គឺពេញចិត្ដនឹងចាត់ការទៅលើព្រះរាជា ពួកនាម៉ឺនមន្ដ្រីនៅក្នុងប្រទេសតែម្ដង ធ្វើឱ្យទាំងអស់គ្នាយល់ស្របតាម ហើយចាប់ធ្វើការកែទម្រង់ដែលចាំបាច់វិញ ។
ការបះបោរបានរីករាលដាលទៅពេញទូទាំងកម្ពុជានៅចុងឆ្នាំ១៨៨៥ បារាំងមានប៉ុសិ៍្ដយោធាទាំងអស់៥២ នៅក្នុងព្រះរាជាណាចក្រ ។ សង្គ្រាមនោះគឺព្រះរាជាបានបង្កឡើង ក៏ប៉ុន្ដែពួកអ្នកស្រុកស្រលាញ់ចូលចិត្ដបារាំង សប្បាយរីករាយទទួលបារាំងថាជាអ្នកការពារ ។ សង្គ្រាមនោះបានធ្វើឱ្យបារាំងបាត់បង់កម្លាំងអស់ប្រហែលជា១ពាន់នាក់ ដែលភាគច្រើនត្រូវស្លាប់ដោយជំងឺគ្រុន និងកម្ដៅព្រះអាទិត្យ មិនមែនស្លាប់ដោយគ្រាប់កាំភ្លើងសត្រូវទេ ។ ក៏ប៉ុន្ដែសង្គ្រាមនោះបានធ្វើឱ្យខ្មែរប្រហែល១ម៉ឺននាក់ស្លាប់ដោយអត់ឃ្លានដោយទុរ្ភិក្ស និងការខ្វះខាត ដោយជំងឺគ្រុន និងជំងឺផ្សេងៗទៀតនៅពេលរត់គេចទៅរស់នៅក្នុងព្រៃរបោះ និងព្រៃរនាម ។
គេបានបញ្ជូនទ័ពពីសាយហ្គនមក ដែលធ្វើបាបអ្នកស្រុកហើយដុតរោលឱ្យអ្នកស្រុកអត់ទ្រាំមិនចូលរួមធ្វើសង្គ្រាមមិនបាន ។ ក៏ប៉ុន្ដែសង្គ្រាមដែលផ្ទុះឡើងក្រោមការញុះញង់របស់ពួកមន្ដ្រី តាមបញ្ជារបស់ព្រះរាជា ដែលផ្ទុយនឹងឆន្ទៈរបស់អ្នកស្រុកស្រែចម្ការដែលចង់បានសន្ដិភាព បានចាប់ផ្ដើមស្ងប់ស្ងាត់នៅចុងឆ្នាំបន្ទាប់ ។ គេចាប់បិទប៉ុស្ដិ៍យោធាជាបន្ដបន្ទាប់ ហើយព្រះរាជាណាចក្រទាំងមូលមានសភាពស្ងប់ស្ងាត់ឡើងវិញនៅក្នុងខែមករា ឆ្នាំ១៨៨៧ ដោយមិនមានការបង្ហូរឈាមច្រើនពេកទេ តែក៏បានធ្វើឱ្យខូចខាតជីវិតអ្នកស្រុក និងទាហានបារាំងអស់ចំនួនច្រើនគួរសមដែរ បណ្ដាលមកពីចលាចល ការផ្លាស់ប្ដូរទីកន្លែង ការរត់ចូលព្រៃ និងជំងឺ ។
ពួកបះបោរចាប់វិលត្រលប់ចូលក្នុងស្រុកវិញ មកចុះចូលសារភាពនៅតាមទីកន្លែងដែលមានរ៉េស៊ីដង់បារាំងនៅ ហើយដោយបារាំងបានស្រុះស្រួលមូលមតិជាមួយព្រះរាជា និងពួកនាម៉ឺនសព្វមុខមន្ដ្រី បង្អង់មិនទាន់អនុវត្ដការកែទម្រង់ ដើម្បីធ្វើការសិក្សាឱ្យល្អិតល្អន់សិន សន្ដិភាពក៏បានវិលត្រលប់មកក្នុងស្មារតីប្រជាជនម្នាក់ៗឡើងវិញដែរ ។ មានតែរ៉េស៊ីដង់បារាំងនៅកំពត ក្រចេះ កំពង់ធំ និងពោធិ៍សាត់ប៉ុណ្ណោះ ដែលលោក ពីកេ (99) ជារ៉េស៊ីដង់ធំនៅកម្ពុជា បានបញ្ជាឱ្យបន្ដធ្វើការសិក្សាអំពីទឹកដី ទំនៀមទម្លាប់របស់អ្នកស្រុកដោយមិនឱ្យលូកដៃជ្រៀតជ្រែកទៅក្នុងការគ្រប់គ្រងរដ្ឋបាលក្នុងស្រុកទេ ហើយត្រូវរក្សាទំនាក់ទំនងល្អជាមួយអភិបាលខែត្រ ត្រួតពិនិត្យសកម្មភាពអភិបាលខែត្រទាំងនោះ ជាពិសេសត្រូវចេះធ្វើឱ្យប្រជាជនស្រលាញ់ផង ។
នៅឆ្នាំ១៨៨៨ ព្រះរាជាដែលយល់កាន់តែច្បាស់ជាងមុន បានប្រគល់ការគ្រប់គ្រងព្រះរាជាណាចក្រដែលនៅតែស្ថិតនៅក្រោមអំណាចរបស់ព្រះអង្គ ទៅឱ្យបារាំងចាត់ចែងជំនួសវិញ ។ ព្រះអង្គបានឱ្យលោកតំណាងអាណាព្យាបាលធ្វើជាអធិបតីលើក្រុមប្រឹក្សារដ្ឋមន្ដ្រី តែបានស្នើសុំឱ្យគេថ្វាយជូននូវប្រាក់៤សែនពីយ៉ាស (ប្រហែល១លាន៧សែនហ្វ្រង់) ។ ការកែទម្រង់ទាំងឡាយត្រូវមានការយល់ព្រមពីព្រះអង្គ សេចក្ដីសម្រេចផ្សេងៗត្រូវមានព្រះហស្ដលេខា និងត្រារបស់ព្រះអង្គផង ។
ចាប់ពីពេលនោះមក អាណាព្យាបាលបានដំណើរការទៅ មិនជាល្អមិនជាអាក្រក់ណាស់ណាទេ គឺសមស្របទៅនឹងផលប្រយោជន៍របស់ព្រះរាជាណាចក្រដែរ ។ បារាំងកាន់កាប់ការងាររដ្ឋបាលមានមធ្យោបាយគ្រប់គ្រាន់នឹងចាប់ផ្ដើមធ្វើកំណែទម្រង់ដែលចាំបាច់ ហើយការរៀបចំស្រុកទេសបានចាប់ផ្ដើមធ្វើដំណើរទៅមុខយ៉ាងយឺតៗ ។ មកដល់សព្វថ្ងៃនេះ ព្រះរាជាណាចក្រមានផ្លូវ មានស្ពានខ្លះៗហើយ ។ គេចាប់ធ្វើការសិក្សាលើកិច្ចការធំៗ ចាប់សាងសង់សាលារៀន ហើយរដ្ឋាភិបាលបារាំងបានចាប់ផ្ដើមតាំងពីដប់ពីរឆ្នាំមកហើយក្នុងការគិតគូរពីគម្រោងសាងសង់ផ្លូវដែកមួយ ។ គេក៏បានសើរើពិនិត្យច្បាប់ឡើងវិញដែរ ។
ព្រះបាទនរោត្ដម បានសុគតទៅនៅថ្ងៃទី២៤ ខែមេសា ឆ្នាំ១៩០៤ ក្នុងព្រះជន្មាយុ៧០ព្រះវស្សា ។
៤៤. ព្រះបាទស៊ីសុវត្ថិ (១៩០៤- …)
ព្រះអនុជរបស់ព្រះបាទនរោត្ដមគឺព្រះបាទស៊ីសុវត្ថិដែលជាព្រះឧបរាជ ទ្រង់មានព្រះជន្ម៦៥ព្រះវស្សាហើយ ហើយបានត្រូវគេលើកឱ្យឡើងសោយរាជ្យបន្ដនៅក្នុងថ្ងៃជាមួយគ្នានោះ ។ ព្រះអង្គបានទទួលព្រះរាជពិធីរាជាភិសេកនៅថ្ងៃទី២៦ ខែមេសា ឆ្នាំ១៩០៦ ដោយមានលោក បូ ជាទេសាភិបាលបំពាក់ម្កុដរាជថ្វាយ ក្នុងនាមនៃសាធារណរដ្ឋបារាំង ។
ព្រះរាជាថ្មីបានយាងទៅធ្វើទស្សនកិច្ចនៅប្រទេសបារាំងនៅខែបន្ទាប់ រួចបានយាងត្រលប់មកវិញនៅខែសីហា ឆ្នាំ១៩០៦ ។ ទ្រង់មានព្រះទ័យរីករាយខ្លាំងណាស់ចំពោះព្រះរាជទស្សនកិច្ចនេះ ដែលបានឃើញថា ប្រទេសដែលជាអាណាព្យាបាលលើកម្ពុជា ហើយដែលកម្ពុជាផ្ញើវាសនាជាមួយនោះ ជាប្រទេសធំមួយ ។
សន្ធិសញ្ញាមួយជាមួយប្រទេសសៀម ចុះថ្ងៃទី២៣ ខែមីនា ឆ្នាំ១៩០៧ បានមកបំពេញបន្ថែមឱ្យសន្ធិសញ្ញាឆ្នាំ១៩០៤ ដោយបាននាំយកទឹកដីមួយចំនួនដែលកម្ពុជាបានបាត់បង់ទៅ ត្រលប់មកវិញ ធ្វើឱ្យទឹកដីព្រះរាជាណាចក្រពេលនោះប្រហាក់ប្រហែលទៅនឹងទឹកដីកាលពីសតវត្សរ៍ទី១៦ដែរ ។ ខែត្របាត់ដំបងជាមួយនឹងស្រុក៤ក្នុងបណ្ដាស្រុកទាំង៥មាន សិរីសោភ័ណ មង្គលបុរី សៀមរាប និងត្នោត (100) បានក្លាយមកជាទឹកដីរបស់កម្ពុជាឡើងវិញ ហើយព្រំប្រទល់ដែនរបស់កម្ពុជាបានត្រូវលើកទៅទល់នឹងភ្នំដងរែកនៅខាងជើង នៅខាងលិច រហូតជិតដល់អារញ្ញតាមផ្លូវទៅវឌ្ឍនៈ និងទៅទល់នឹងមុនសាលាប៉ាកាតបន្ដិច តាមផ្លូវទៅចន្ទតាប៊ុន ។
ជាមួយនឹងទឹកដីដែលសន្ធិសញ្ញាឆ្នាំ១៩០៤ជាមួយសៀមបានប្រគល់មកឱ្យបារាំង ហើយបារាំងបានដាក់បញ្ចូលមកក្នុងព្រះរាជាណាចក្រកម្ពុជាមានទន្លេរពៅ ម្លូព្រៃ កោះកុង ជាមួយនឹងការកាត់ខែត្រស្ទឹងត្រែងរបស់លាវក្រោមការគ្រប់គ្រងរបស់បារាំង ឱ្យមកព្រះរាជាណាចក្រខ្មែរវិញ ទឹកដីកម្ពុជាពេលនោះបានកើនឡើងទ្វេ ដោយសារតែការត្រួតត្រារបស់បារាំង ។
ប្រជាជនកម្ពុជារួបរួមគ្នាជាប្រជាជាតិមួយដោយសារតែព្រះរាជា ។ ប្រជាជននេះមានសាមគ្គីគ្នា តែនៅពេលណាដែលទុក្ខវេទនានៅត្រង់កន្លែងណាមួយ ធ្វើឱ្យមានការប៉ះពាល់ដល់ទីកន្លែងផ្សេងៗទៀត ។ ដរាបណាការឈ្លានពានចូលមកក្នុងទឹកដីមួយ ឬការឆក់ប្លន់នៅតាមព្រំប្រទល់ដែនមួយ មិនធ្វើឱ្យប៉ះពាល់ដល់ព្រះរាជាទេ ប្រជារាស្ដ្រក៏មិនបានគិតថា ហេតុការណ៍នោះធ្វើឱ្យខូចខាតដល់ផលប្រយោជន៍របស់គេដែរ ។ គេស្ដាប់ការដំណាលរឿងដែលឮតៗគ្នាមកដល់គេ ដោយមិនបានគិតថាត្រូវចូលរួមជួយសងសឹកផងទេ ។ សព្វថ្ងៃនេះ បារាំងកំពុងតែខិតខំជួយធ្វើយ៉ាងណាឱ្យប្រជាជននេះមានថាមពលឡើងវិញ ឱ្យមានទំនុកចិត្ដលើខ្លួនឯង និងឱ្យពួកគេមានស្មារតីសាមគ្គីជាតិ និងគំនិតច្នៃប្រឌិតឡើងវិញ ។ បារាំងមិនចង់ធ្វើជាម្ចាស់លើប្រជាជននេះទេ ក៏ប៉ុន្ដែចង់ធ្វើជាមេកោយ ដូចដែលគេតែងតែនិយាយនៅកម្ពុជាថា ជាគ្រូអាចារ្យ និងជាអ្នកការពារ (101) ។
(1) ពាក្យនេះមានប្រភពចេញពីភាសាសំស្ក្រឹត ប្រើសម្រាប់សម្គាល់រាជវង្សដែលមិនអាចទទួលរាជសម្បត្ដិបាន បើទោះបីជាព្រះរាជបុត្រា ឬនត្ដារបស់ស្ដេចគ្រងរាជ្យក៏ដោយ ។ និយាយឱ្យខ្លីគឺថាឋានៈនេះគេប្រើសម្រាប់ធ្វើឱ្យរាជវង្សមួយអង្គឃ្លាតឆ្ងាយចេញពីរាជសម្បត្ដិ ។
(2) ឈ្មោះនេះបានប្រែមកជាស្រីសន្ធរតាំងពីយូរយារណាស់មកហើយ ហើយដែលពួកអេស្ប៉ាញនិងព័រទុយហ្គាល់ហៅថា ស៊ីស្ធរ ឬស៊ីស្ទ័រ នៅក្នុងសតវត្សរ៍ទី១៧ ។ គឺជារាជធានីរបស់កម្ពុជានាសម័យនោះ ហើយជាមជ្ឈមណ្ឌលពាណិជ្ជកម្មដ៏សំខាន់មួយ មានប្រជាជន៩ម៉ឺននាក់ ។ ពាក្យស៊ីស្ទ័រ ក្លាយមកពីស្រីសន្ធរ ហើយកាលពីពេលនោះគេមានស្រុក៣ គឺស៊ីធរឆ្វេង ស៊ីធរស្ដាំ និងស៊ីធរកណ្ដាល នៅខាងកើតខែត្រខ្សាច់កណ្ដាល ។ ទីក្រុងនេះស្ថិតនៅខាងត្បូងបឹងស៊ីធរ ខាងកើតបឹងតាគង់ និងនៅខាងជើងព្រែកមួយដែលហូរកាត់ផ្លូវទៅល្វាឯម ដែលស្ថិតនៅចំពីមុខចតុម្មុខ ឬភ្នំពេញ ។ ចម្ងាយត្រង់ពីស៊ីធរមកភ្នំពេញ គឺ៣០គីឡូម៉ែត្រ ។
(3) ត្រង់នេះ គឺដូចដែលលោកកាបាតុងបានរៀបរាប់អីចឹង ព្រះរាជាមិនបានភៀសព្រះអង្គទៅរាជវាំងស្ដេចលាវ គឺវៀងចន្ទ នោះទេ ។
(4) ជនជាតិហូឡង់ឈ្មោះ ហ្សេរ៉ាវ៉ាន់ វូសូវ ដែលធ្វើដំណើរឡើងតាមទន្លេមេគង្គទៅដល់វៀងចន្ទនៅក្នុងឆ្នាំ១៦៤១-១៦៤២ បានរៀបរាប់ថា ព្រំដែនកម្ពុជាពេលនោះនៅខ្ពស់ណាស់ គឺរហូតដល់ចន្លោះខោន និងបាសាក់ ។
(5) ជើងព្រៃ ជាឈ្មោះខែត្រមួយរបស់កម្ពុជាស្ថិតនៅលើច្រាំងខាងស្ដាំរបស់ទន្លេមេគង្គចន្លោះខែត្រស្ទឹងត្រង់ និងខែត្រអន្លង់រាជ ។
(6) ចៅពញាតន់ ទ្រង់ប្រសូតនៅក្នុងឆ្នាំ១៥៦៨ ឯចៅពញាយោម ដែលជាបុត្ររបស់ព្រះសត្ថាជាមួយអ្នកម្នាងលាវមួយអង្គ ប្រសូតនៅក្នុងឆ្នាំ១៥៧៣ ។ ដូច្នេះពេលនោះ ពញាតន់ មានព្រះជន្ម២៦ព្រះវស្សាហើយ ហើយពញាយោមមានព្រះជន្ម២១ព្រះវស្សា ។ ក៏ប៉ុន្ដែរាជពង្សាវតារ និងការនិទានតៗគ្នានិយាយថា ពញាតន់ ទើបតែមានព្រះជន្ម១៦ព្រះវស្សាទេ ហើយពញាយោម មានព្រះជន្ម១១ព្រះវស្សា ។
(7) កន្លែងនេះមានការច្របូកច្របល់ជាខ្លាំង ប្រហែលដោយមកពីខ្ញុំគិតថាព័ត៌មានដែលបានពីឯកសារអេស្ប៉ាញផ្ដល់ថ្ងៃខែ និងហេតុការណ៍ច្បាស់លាស់ជាង និងម្យ៉ាងទៀត ខ្ញុំកំណត់យកឆ្នាំ១៥៩៣ ជាឆ្នាំដែលសៀមដណ្ដើមយករាជធានីលង្វែកបាន ។ រាជពង្សាវតារបានកំណត់ថាព្រះសត្ថាទ្រង់ប្រសូតនៅក្នុងឆ្នាំ១៥៤៣ ហើយព្រះជ័យជេដ្ឋាប្រសូតនៅក្នុងឆ្នាំ១៥៦៤ រួចហើយថា ស្ដេចទាំង២អង្គបានសុគតទៅនៅស្ទឹងត្រែងក្នុងឆ្នាំ១៥៨៥ បានសេចក្ដីថានៅពេលដែលព្រះសត្ថាមានព្រះជន្មាយុ៤២ព្រះវស្សា ហើយព្រះជ័យជេដ្ឋាមានព្រះជន្មាយុ២០ព្រះវស្សា ។ ប៉ុន្ដែបើយើងគិតថាសៀមវាយយកលង្វែកបាននៅឆ្នាំ១៥៩៣ ហើយស្ដេចទាំង២អង្គសុគតនៅក្នុងឆ្នាំ១៥៩៤ នោះស្ដេចទាំង២នឹងត្រូវមានព្រះជន្មាយុ៥១ឆ្នាំ និង៣០ឆ្នាំ ។ ហើយរាជពង្សាវតារបានលើកបន្ថែមទៀតថាស្ដេចឪពុកសោយរាជ្យបាន១៧ឆ្នាំ ស្ដេចកូនសោយរាជ្យបាន១០ឆ្នាំ ។ ឃើញថាកាលបរិច្ឆេទដែលផ្ដល់ឱ្យដោយរាជពង្សាវតារឆ្លើយគ្នាល្អណាស់ ហើយព័ត៌មានរបស់ឯកសារអេស្ប៉ាញមិនត្រឹមត្រូវទេ ។ បើដូច្នេះ តើយើងត្រូវទាត់ព័ត៌មានឯកសារអេស្ប៉ាញចោល ហើយនិយាយថា លោកឪពុក សង់អង់តូនីញ៉ូ ច្រឡំពេលវេលាដល់ទៅ១០ឆ្នាំឬ ? ឬមួយក៏ថា កំហុសមកពីពួកអ្នកដែលចម្លងរាជពង្សាវតារទៅវិញទេ ដែលបានខិតខំកែសម្រួលកាលបរិច្ឆេទឱ្យសមស្របទៅតាមគ្នា ដើម្បីកុំឱ្យគេមើលទៅមិនត្រូវ ? ខ្ញុំគិតថាសម្មតិកម្មក្រោយនេះ អាចនឹងចាត់ទុក ថាមានពិតប្រាកដបាន ពីព្រោះថាចំពោះហេតុការណ៍ខ្លះ យើងជាជនជាតិអឺរ៉ុបមានការស្មុគស្មាញនឹងសម្រេច ខ្មែរមិនញញើតនឹងធ្វើការកែសម្រួលតម្រឹមទេ ដរាបណាគេគ្មានការទទួលខុសត្រូវផ្ទាល់ ឬមិនមានការដាក់ទណ្ឌកម្មជាក់ស្ដែង គឺអ្នកដែលកែសម្រួលប្រវត្ដិសាស្ដ្រមិនដែលមានទោសទេនៅកម្ពុជា ។ បើទោះជាយ៉ាងណាក្ដី យើងត្រូវរង់ចាំដល់ពេលដែលមានឯកសារផ្សេងៗទៀត ដើម្បីកាត់សេចក្ដីលើរឿងនេះ ជាពិសេសឯកសារមកពីម៉ានីល ដែលគេបានប្រកាសថា ជិតនឹងផ្សព្វផ្សាយហើយ ។
(8) ចំណុចត្រង់នេះបើសិនណាជាពញាតន់មានព្រះជន្ម២៦ព្រះវស្សាដូចដែលរាជពង្សាវតារបានលើកមែន ពីព្រោះថាទ្រង់ប្រសូតនៅក្នុងឆ្នាំ១៥៦៨ ហើយលង្វែកត្រូវសៀមវាយយកបាននៅ១៥៩៣ រួចព្រះជ័យជេដ្ឋាសុគតនៅក្នុងឆ្នាំ១៥៩៤ ព្រះអង្គមានវ័យសមល្មមអាចនឹងទាមទារយកអំណាចពីស្ដេចជ្រែករាជ្យបានដោយបង្កបក្សពួកមួយក្រុម ។ ក៏ប៉ុន្ដែប្រហែលជាព្រះអង្គមានព្រះជន្មតែ១៦ព្រះវស្សាទេ ទើបបានជាមិនអាចកេណ្ឌគ្នាឱ្យគាំទ្រ ព្រោះនៅវ័យក្មេងពេក មិនទាន់អាចសម្រេចកិច្ចការធំៗបាន ។
(9) រាជពង្សាវតារនិយាយថាតែ១០នាក់ទេ ។
(10) រាជពង្សាវតារបានអះអាងថា ព្រះរាមាជើងព្រៃ បានចេញបញ្ជាឱ្យកាប់សម្លាប់ពួកអឺរ៉ុបមុន ជាហេតុធ្វើឱ្យពួកនេះបើកការវាយប្រហារមុនពេលអនុវត្ដព្រះរាជបញ្ជា ។ ប៉ុន្ដែកំណត់ត្រាមួយជាភាសាអេស្ប៉ាញដែលលោកកាបាតុងទើបតែរកឃើញ មិនបាននិយាយដូច្នេះទេ ។
(11) បើសិនជាគេគិតថា ព្រះអង្គប្រសូតនៅក្នុងឆ្នាំ១៥៦៨នោះ ព្រះអង្គមានព្រះជន្ម២៨ព្រះវស្សា ក៏ប៉ុន្ដែលោកកាបាតុងនិយាយថា ព្រះអង្គមានព្រះជន្ម១៨ព្រះវស្សានេះឯងមិនដឹងថាលោកផ្អែកទៅលើឯកសារអេស្ប៉ាញ ឬក៏ឯកសាររាជពង្សាវតារខ្មែរ ?
(12) ពាក្យនេះក្នុងភាសាម៉ាឡេ គឺជាឋានៈរបស់ឧត្ដមនាវី ។ ជននេះមានដើមកំណើតនៅឯហ្សូហ័រ ។
(13) បើតាមរាជពង្សាវតារដែលខ្ញុំមាន ទ្រង់បានត្រូវចាមម្នាក់ធ្វើឃាត ។
(14) បើគេឯកភាពគ្នាថារាជធានីលង្វែកបែកបាក់នៅក្នុងឆ្នាំ១៥៩៣ ហើយពញាយោមប្រសូតនៅក្នុងឆ្នាំ១៥៧២ នោះ ព្រះអង្គត្រូវមានព្រះជន្ម២៥ព្រះវស្សាហើយ ។
(15) ពាក្យ «កែវហ្វ៊ា» ក្នុងភាសាភូមា គឺជាឋានៈជាព្រះរាជា ។
(16) តើពាក្យ «ពណ៌» ក្លាយមកពី «វរ្ម័ន» ឬយ៉ាងណា ? រាជពង្សាវតារនិយាយថាទ្រង់ប្រសូតនៅក្នុងឆ្នាំ១៥៤៨ តែបើសិនជាក្នុងមូលហេតុដូចដែលបានរៀបរាប់ខាងលើ គេត្រូវគិតថា ១៥៥៨វិញ ។
(17) នៅជិតកំពត លើផ្លូវពីកំពង់ក្នុងទៅកំពង់ត្រាច ត្រង់កន្លែងដែលពួកវៀតណាមកសាងប៉មមួយនៅក្នុងឆ្នាំ១៨៤០ ។
(18) និទានស្ដីអំពីរឿងនេះនិយាយថា តេជោព្រះអង្គបានបញ្ជាឱ្យទ្រមាក់ដំរីរបស់គាត់រៀបចំគំនរឧស ហើយដុតគាត់ទាំងរស់ ដើម្បីបំពេញការសប្បាយរបស់ភរិយាគាត់ ។ និទាននោះនិយាយទៀតថា គាត់ជាស្ដេចត្រាញ់នៅដីកំពង់ស្វាយ មិនមែននៅសំរោងទងទេ ហើយបាននិយាយបន្ថែមទៀតថា ព្នងយ៉តនេះបន្ទាប់មកបានយកប្រពន្ធរបស់តេជោព្រះអង្គធ្វើជាភរិយា ។
(19) រាជធានីនេះព្រះរាជាបានឱ្យកសាងឡើងនៅក្នុងព្រៃល្វាផ្អែម ក្រោយមកបានក្លាយទៅជាទីក្រុងសំខាន់មួយដែលពួកព័រទុយហ្គាល់ និងអេស្ប៉ាញ ហៅថា ឡូអ៊ីម ។
(20) កាលបរិច្ឆេទនេះមានកំណត់ហេតុមួយបញ្ជាក់ច្បាស់អំពីព្រះរាជពិធីអភិសេកព្រះស្រីសុរិយោពណ៌ ។
(21) មានទ័ពសៀមជាច្រើនត្រូវចាប់បានជាឈ្លើយនៅក្នុងការប្រយុទ្ធមួយនៅជើងភ្នំចងកង ប្រហែលជា៥០គីឡូម៉ែត្រ ពីខាងជើងទន្លេសាប ជាហេតុធ្វើឱ្យគេហៅថា សៀមចង្កង់ៗ ដូច្នេះរហូតមក ។
(22) ខែត្រចុងខាងត្បូងរបស់កម្ពុជានេះ និយាយឱ្យចំថាកន្លែងដែលជាទីតាំងរបស់ទីក្រុងសាយហ្គុង និងច្រឺឡឺងសព្វថ្ងៃ មិនមានឈ្មោះ ថាព្រៃនគរទេ តែមានឈ្មោះថា ព្រៃគរ ឯពាក្យវៀតណាមថា សាយហ្គន មានន័យថាព្រៃគរដូច្នេះឯង ។
(23) ហេតុការណ៍ជាភស្ដុតាងមួយទៀតបញ្ជាក់ថានៅក្នុងសតវត្សរ៍ទី១៧ ស្ទឹងត្រែង និងអាតូពឺជាទឹកដីរបស់ព្រះរាជាណាចក្រកម្ពុជា ហើយព្រះរាជាក្រោយបង្អស់របស់លង្វែក ព្រះជ័យជេដ្ឋាពេលភៀសព្រះអង្គទៅស្ទឹងត្រែង ទ្រង់គង់នៅក្នុងទឹកដីកម្ពុជាមិនមែនចូលទៅស្រុកលាវទេ ។
(24) ឯកសារខ្លះនិយាយថា ទ្រង់សោយរាជ្យបាន៨ឆ្នាំ ហើយសុគតក្នុងជន្មាយុ៣៧ព្រះវស្សា ។
(25) កាលបរិច្ឆេទនេះបានមកពីឯកសារមួយសរសេរដោយជនជាតិហូឡង់ម្នាក់ ឯកសារនោះមានឈ្មោះថា Récit succinct de ce qui s’est passé de curieux aux Indes Orientales dans le Royaume du Cambodge ។ បើតាមរាជពង្សាវតារថាទ្រង់សុគតនៅក្នុងឆ្នាំ១៦៦៤ ។
(26) ឯកសារខាងលើបានលើកពីព្រះអង្គថា «ទ្រង់ស្លូតបូត ហើយមានព្រះភ័ក្ដ្រស្រស់ល្អ» ហើយថា «ទ្រង់ចូលចិត្ដពួកហូឡង់» ។
(27) ឯកសាររបស់ពួកហូឡង់ខាងលើបានឱ្យដឹងថា ព្រះឧភយោរាជព្រះឧទ័យបានត្រូវធ្វើឃាតនាល្ងាចមួយនៅពេលដែលទ្រង់កំពុងតែក្រសាលបៀចិនជាមួយអ្នកអង្គម្ចាស់ចន្ទ ហើយនិងមន្ដ្រីធំៗផ្សេងទៀតនៅក្នុងព្រះរាជាណាចក្រ ។ ពេលព្រះអង្គកំពុងតែក្រសាលនោះ មហាតលិករបស់ព្រះអង្គដែលបានចូលដៃចូលជើងជាពួកក្បត់បានលូនចូលមកជិតព្រះអង្គ ពីខាងក្រោយហាក់ដូចជាចង់មកចូលទូលព្រះអង្គអំពីបញ្ហាអ្វីមួយ ដូចដែលធ្លាប់តែធ្វើដូច្នេះជាធម្មតា រួចហើយក៏ដកកាំបិតស្នៀតចាក់សម្លាប់ព្រះអង្គតែម្ដង ។ ភ្លាមនោះពួកដៃជើងឯទៀតៗក៏ស្ទុះក្រោកឡើង ពន្លត់ភ្លើង វាយសំពងទៅលើអ្នកទាំងអស់ដែលនៅទីនោះ រួចហើយក៏ដុតវាំងចោលតែម្ដងទៅ ។ ភ្លើងឆេះឡើងនេះ ជាសញ្ញាប្រាប់ដល់ពួកក្បត់ឯទៀតៗឱ្យសំរុកចូលទៅក្នុងគេហដ្ឋានរបស់ពួកមន្ដ្រីដែលស្មោះត្រង់នឹងព្រះឧភយោរាជ ហើយដុតចោលទាំងអស់ដែរ ។ មានមន្ដ្រីខ្លះដែលដឹងខ្លួនទាន់ បានឆ្លៀតឱកាសកំពុងច្របូកច្របល់រត់គេចខ្លួនទៅកាន់ស្រុកស្រែចម្ការបាន ក៏ប៉ុន្ដែបន្ទាប់មកត្រូវចាប់ខ្លួននាំយកមករាជធានីវិញ ហើយទទួលការវាយដំធ្វើបាបឥតត្រាប្រណីមិនគួរនឹងមើល រួចហើយក៏ត្រូវសម្លាប់ចោលទៅ ។ ទារុណកម្មចំពោះមន្ដ្រីទាំងអស់នោះសាហាវព្រៃផ្សៃណាស់ ៖ គេយកឈើដោតទម្លាយពោះ ខ្វេះយកកំប៉េះគូទ រួចប្រើកាំបិតចុងស្រួចឆ្កៀលសាច់ឆ្អឹងខ្នងតាំងពីក្រោមរហូតដល់កដៃទាំង២ គេចងភ្ជាប់ទៅនឹងបង្គោលចងខ្វែងជើងក្អែក ជើងជាន់លើក្ដារ១បន្ទះ ហើយគេទុកចោលហាលថ្ងៃនៅលើផ្លូវសាធារណៈ ទុកឱ្យអ្នកស្រុកដើរមកជេរ ប្រទេចផ្ដាសារហូតដល់ស្លាប់ក្នុង២ ឬ៣ថ្ងៃ ។ ឯកសារមួយដែលខ្ញុំមាននៅក្នុងដៃ និយាយថា ចេតិយជាច្រើនដែលគេសង់នៅជុំវិញភ្នំផ្នែកខាងក្រោម គឺសម្រាប់ដាក់អដ្ឋិធាតុរបស់មន្ដ្រីទាំងអស់នោះឯង ដែលត្រូវសម្លាប់ដោយបញ្ជាពញាចន្ទ ។
(28) ចៅពញាចន្ទមានព្រះមាតាជាជនជាតិលាវ ។
(29) ពួកខ្មែរបានដណ្ដើមយកទំនិញអស់ពីកប៉ាល់ ក្នុងនោះមានទាំងស្ពាន់មកពីជប៉ុនចំនួន៥០០ហាប និងកាំភ្លើងធំ១៣ដើមផង ។
(30) ឧត្ដមសេនីយ៍របស់ក្រុមហ៊ុនហូឡង់នៅចុងបូព៌ា (Compagnie hollandaise des Indes – Orientales) ដែលនៅបាតាវីយ៉ាហើយដឹកនាំគ្រប់គ្រងរាល់អគារពាណិជ្ជកម្មហូឡង់ទាំងអស់ គឺជាមេដឹកនាំពាណិជ្ជកម្ម មិនមែនជាមេទ័ពទេ ។
(31) កោះហ្វ័រម៉ូស ចិនហៅថា តៃវ៉ាន់ អ្នកស្រុកអាយហៅថា ប៉េកាន ។ ពួកហូឡង់កាន់កាប់កោះនេះបាននៅក្នុងឆ្នាំ១៦៣៤ ក៏ប៉ុន្ដែដល់មកឆ្នាំ១៦៦១ មានចោរសមុទ្រឈ្មោះ កុកស៊ីងហ្គា ដែលជាដៃជើងរបស់រាជវង្សមិញដណ្ដើមយកវិញ ក្រោយពីបានកាន់កាប់មួយរយៈ ។ មានបន្ទាយសំខាន់២ គឺតៃវ៉ាន់ ឬហ្វៃយ៉ូវ៉ាន់ និងហ្គាឡង់ដាំង ។ ឈ្មោះដែលពួកហូឡង់ហៅថា កុកស៊ីងហ្គា តាមមើលទៅប្រហែលគឺ បេវឌិញ ។
(32) មានសង្គ្រាមមួយកើតឡើងនៅក្នុងឆ្នាំ១៦៥៨-៥៩ ។ ពេលនោះផ្ទះពាណិជ្ជកម្មរបស់ហូឡង់បានត្រូវពួកអាណ្ណាមដុតបំផ្លាញខ្ទេចខ្ទី ហើយមានពួកហូឡង់ជាច្រើននាក់បានត្រូវចាប់ខ្លួន និងសម្លាប់ចោល ។ អ្នកដែលគេចខ្លួនរួចបានរត់ទៅស្រុកស្រែ រួចបន្ដដំណើរទៅស្រុកសៀមទើបឆ្លងទៅបាតាវីយ៉ាបានជាមួយនឹងមេរបស់គេម្នាក់ឈ្មោះថា ពីយែរឃែទីញ នៅថ្ងៃទី១៧ ខែសីហា ឆ្នាំ១៦៥៩ ។
មានចុះសន្ធិសញ្ញាមួយទៀត នៅក្នុងថ្ងៃទី១ ខែកុម្ភៈ ឆ្នាំ១៦៦៥ ជាមួយនឹងព្រះរាជាបទុមរាជា ។ ពីយែឃីទីញបានទទួលការអនុញ្ញាតឱ្យតាំងអគារពាណិជ្ជកម្មនៅលង្វែក ក៏ប៉ុន្ដែពួកហូឡង់នៅតែមិនអាចស្ដារស្ថានភាពរបស់គេនៅកម្ពុជាបាន បើទោះបីជាពួកព័រទុយហ្គាល់ ម៉ាឡេ និងចាម លែងបានទទួលនូវការប្រោសប្រណីទៀតហើយក៏ដោយ ។
(33) រាជពង្សាវតារអាណ្ណាមបាននិយាយថា ក្សត្រាទាំង២អង្គបានទូលថ្វាយព្រះរាជាអាណ្ណាមថា ក្សត្រាទាំង២សុខចិត្ដលះបង់រាជសម្បត្ដិថ្វាយព្រះអង្គ ឱ្យតែព្រះអង្គជួយសងសឹកនឹងព្រះអង្គចន្ទ ដែលបានធ្វើឃាតបិតាក្សត្រាទាំង២ ។ អ្នកប្រវត្ដិវិទូខ្មែរ មិនឯកភាពនឹងសម្ដីនេះទេ ហើយមានព្រះសង្ឃចាស់មួយអង្គមានសង្ឃដីកាថា សូម្បីតែព្រះរាជាដែលកំពុងតែសោយរាជ្យសម្បត្ដិ ក៏មិនអាចចេះតែលើកស្រុកប្រគល់ឱ្យនរណាបានតាមចិត្ដនោះទេ ។
(34) មានឯកសារមួយនិយាយថា ព្រះអង្គជាព្រះរាជបុត្រារបស់មហេសីមួយអង្គព្រះនាមថា នាងសួស ហើយទ្រង់ប្រសូតនៅក្នុងឆ្នាំ១៦២៨ ។ ឯកសារមួយទៀតថាទ្រង់ប្រសូតនៅក្នុងឆ្នាំ១៦៣១ ចំណែកឯកសារដែលខ្ញុំមានថាប្រសូតឆ្នាំ១៦២១ និងមានព្រះជន្ម៣៨ព្រះវស្សា នៅពេលទ្រង់ឡើងសោយរាជ្យ ។
(35) ព្រះរាជាអង្គនេះបានត្រូវព្រះរាជាមុន គឺព្រះជ័យជេដ្ឋា ធ្វើឃាតនៅក្នុងឆ្នាំ១៦៧២ ។
(36) មានឯកសារមួយទៀតនិយាយថាទ្រង់ត្រូវបរាជ័យ ក៏ភៀសព្រះអង្គទៅគង់នៅឯស្រុកប្រាំដំឡឹង ក្នុងខែត្រសំរោងទង ហើយសុគតនៅទីនោះដោយសារជំងឺ ។
(37) ស្ដេចអាណ្ណាមនេះសុគតនៅក្នុងឆ្នាំ១៦៨៨ ។
(38) ភូមិទាំង៩នោះមាននៅរហូតដល់សព្វថ្ងៃ នៅខាងលិចភ្នំពេញ ពីក្រោយបឹង ។ ម្យ៉ាងទៀត ចៅពញាសួសមានសល់កូនចៅរស់នៅដល់សព្វថ្ងៃនេះដែរ ។
(39) ការលើកអំពីភូមិចំនួន៩ជាកម្មសិទ្ធិរបស់រាជវង្សមួយអង្គនេះ ក៏ដូចជាការបញ្ជាក់ខាងលើអំពីចៅពញាសួសទទួលបានភូមិ៩ដែរ ហាក់ដូចជាបង្ហាញឱ្យឃើញថានៅសម័យនោះព្រះរាជាប្រទានរង្វាន់ដល់អ្នកដែលតាមបម្រើព្រះអង្គ ដោយប្រគល់ភូមិមួយចំនួនឱ្យ ។
(40) មឿងគោកសេះនេះនៅក្នុងខែត្របារាយណ៍ ដោយមានវត្ដបារាយណ៍នៅចំកណ្ដាល ។
(41) ដូចជាក្រមស្រុក ជាប្រភេទច្បាប់រដ្ឋធម្មនុញ្ញមួយបែបដែលគេច្រើនហៅថា ក្រមស្រុកជ័យជេដ្ឋា ។
(42) ខ្ញុំសូមលើករឿងមួយគឺនៅក្នុងពេលដែលលោកដឺសូម៉ុងជារាជទូតរបស់ស្ដេចល្វីទី១៤អញ្ជើញមកដល់រាជវាំងសៀមនៅក្នុងឆ្នាំ១៦៩៥ ទោសប្រហារជីវិតមានអនុវត្ដតែចំពោះជនណាដែលបានប្រព្រឹត្ដបទល្មើសឧក្រិដ្ឋចំពោះព្រះរាជាប៉ុណ្ណោះ ។ ហើយច្បាប់សៀមពេលនោះមិនសូវខុសពីច្បាប់ខ្មែរប៉ុន្មានទេ ។
(43) រាជពង្សាវតារបាននិយាយថា ព្រះជ័យជេដ្ឋា ទ្រង់មានដំរីញីពណ៌សមួយក្បាល ។
(44) ម៉ាក់គូ កើតនៅក្នុងភូមិឡេក្វាត សង្កាត់ហៃគឿង ស្រុកឡយចៅ ខែត្រកង់តុង ។ គាត់ស្លាប់នៅហាទៀង នៅក្នុងឆ្នាំ១៧៣៦ ក្នុងអាយុ៧៨ឆ្នាំ ។ កូនប្រុសគាត់ឈ្មោះ ម៉ាក់តុង បានឡើងកាន់អំណាចតពីគាត់ មានឋានៈជាបេសកជនរបស់ព្រះចៅអធិរាជចិន ហើយមានសិទ្ធិបោះពុម្ពកាក់ស័ង្កសី ។ គេនិយាយថាម៉ាក់តុងនេះបានកសាងផ្លូវជាច្រើនដែលយើងបានជួសជុលឡើងវិញ ហើយក៏បានជីកព្រែកជីកប្រឡាយច្រើនផងដែរ តែអ្នកក្រោយៗមិនបានថែរក្សាឱ្យល្អទេ ។ គាត់បានឱ្យគេសាងសង់ផ្សារមួយ ហើយបានចាត់ឱ្យពង្រឹងប្រព័ន្ធការពារទីក្រុង ដែលឪពុករបស់គាត់បានសង់ឡើងនៅត្រង់ច្រកចូលកំពង់ផែ ។ គាត់ល្បីល្បាញពូកែខាងការការពារទីក្រុងប្រឆាំងនឹងមេចោរសមុទ្រជាតិចិនឈ្មោះ ហួកញាន នៅក្នុងឆ្នាំ១៧៧០ និងប្រឆាំងអ្នកផ្សងព្រេងចិនម្នាក់ទៀតឈ្មោះ ត្រាន់ថាយ ដែលត្រូវរ៉ូវគ្នាជាមួយបងប្អូនជីដូនមួយគាត់២នាក់ ហើយប្រឆាំងនឹងឧកញ៉ាខែ និងជនជាតិម៉ាឡេឈ្មោះ លីម៉ាលូ ដែលបានដឹកនាំកម្លាំង១ពាន់នាក់ មកវាយប្រហារលើគាត់ ។ មានតែពួកសៀមទេដែលអាចដណ្ដើមយកហាទៀងបាននៅក្នុងឆ្នាំ១៧៧២ ក្រោយពីឡោមព័ទ្ធអស់ពេល៣ថ្ងៃ ។ ប៉ុន្ដែម៉ាក់តុងបានទទួលអំណាចគ្រប់គ្រងលើហាទៀងវិញនៅឆ្នាំ១៧៧៥ ក្រោយពីបានចុះសន្ធិសញ្ញាមួយជាមួយសៀម ។ នៅចុងឆ្នាំ១៧៧៩ នៅពេលដែលគាត់ធ្វើដំណើរទៅកាន់រាជធានីបាងកក ចូលគាល់ស្ដេចសៀម ម៉ាក់តុងបានត្រូវស្ដេចសៀមឃាត់មិនឱ្យវិលត្រលប់មកហាទៀងវិញទេ ។ ស្ដេចសៀមបានឱ្យគេកាត់កកូនច្បងគាត់ ជាមួយនឹងរាជវង្សអាណ្ណាមម្នាក់ដែលបានធ្វើដំណើរទៅជាមួយគ្នា និងបរិពារហែហម៥០នាក់ទៀត ។ ម៉ាក់តុងត្រូវគេធ្វើទារុណកម្មយ៉ាងខ្លាំង ។ ដោយទ្រាំមើលទារុណកម្មនោះមិនបាន ជនជាតិសៀមម្នាក់ ក៏បានលួចប្រគល់ថ្នាំពុលឱ្យគាត់ផឹកសម្លាប់ខ្លួនទៅនៅក្នុងឆ្នាំ១៧៨១ ហើយបានជួយជីវិតកូនគាត់៣នាក់ និងចៅគាត់៤នាក់ ។ ក្នុងពេលដែល ម៉ាក់តុង ជាប់ឃុំឃាំងនៅឯស្រុកសៀម កូនគាត់ឈ្មោះ ម៉ាក់ទឺសាញ បានឡើងកាន់អំណាចតពីគាត់នៅឯហាទៀង ហើយបានក្លាយខ្លួនជាអ្នកគាំទ្រស្ដេចយ៉ាឡុងយ៉ាងដាច់ខាតម្នាក់ ដែលកំពុងតស៊ូដណ្ដើមអំណាចពីពួកតៃសឺននៅអាណ្ណាម ។ នៅពេលដែលម៉ាក់ទឺសាញ ស្លាប់នៅក្នុងឆ្នាំ១៧៩០ ប្អូនប្រុសរបស់គាត់ឈ្មោះ ម៉ាក់កុងប៊ិញ បានឡើងកាន់អំណាចបន្ដ ។ គឺម៉ាក់កុងប៊ិញនេះឯងដែលបានទទួលសព ម៉ាក់តុង ពីស្ដេចសៀម ដែលផ្ញើមកឱ្យនៅក្នុងឆ្នាំដដែលនោះ ។ ម៉ាក់កុងប៊ិញ បានរៀបចំបញ្ចុះសពជីតានៅលើភ្នំប៊ិញសឺន ។ គាត់ស្លាប់នៅក្នុងឆ្នាំ១៨០៩ ដោយបន្សល់ទុកតែកូនតូចៗ មិនអាចកាន់អំណាចបន្ដពីគាត់បាន ។ ក៏ប៉ុន្ដែដល់មកឆ្នាំ១៨១៦ មានកូនប្រុសគាត់ម្នាក់ឈ្មោះ ម៉ាក់ឌិន បានឡើងធ្វើជាអ្នកគ្រប់គ្រងក្រុងហាទៀង រួចជាចៅហ្វាយក្រុងនៅក្នុងឆ្នាំ១៨១៨ ។ ដូចជាគ្មានអ្នកស្នងត្រកូលនេះ រស់នៅរហូតមកដល់សព្វថ្ងៃទេ ក៏ប៉ុន្ដែគេនិយាយថា នៅមានត្រកូលនេះនៅឡើយនៅក្នុងឆ្នាំ១៨៦៧ នៅពេលដែលពួកបារាំងចូលកាន់កាប់ហាទៀង ពួកនោះបានរត់គេចខ្លួនទៅកាន់ទីក្រុងវ៉េទៅ ។
(45) ពាម នេះ ជាឈ្មោះទីប្រជុំជនរបស់ខែត្រខម ឬមឿងខម ។ ពួកអាណ្ណាមហៅថា ភួនថាញ់ ។
(46) គេនិយាយថា នៅពេលនោះរាជវាំងកម្ពុជាមានដំរីសមួយក្បាល ។
(47) ក្សត្រាកម្ពុជាច្រើនតែបានទទួលឈ្មោះ៣ដងនៅក្នុង១ជីវិត ៖ គឺទទួលឈ្មោះម្ដងនៅពេលដែលគេរៀបចំពិធីកោរសក់ព្រៃពីកំណើត ម្ដងទៀតនៅក្នុងឱកាសកោរជុក ដែលជាពិធីរៀបចំថ្វាយពេលពេញវ័យ ហើយម្ដងទៀតនៅពេលដែលរៀបចំពិធីអភិសេកជាស្ដេច ជាឧបរាជ ឬក៏ជាព្រះឧភយោរាជ ។ ព្រះអង្គអាច និងមានព្រះនាមទី៤ មួយទៀតនៅពេលដែលទ្រង់សុគត ។ មុនពេលទទួលព្រះនាមក្នុងពិធីកោរជុក ព្រះក្សត្រាអង្គនេះមានព្រះនាមថា អង្គហ៊ីង ។ ទ្រង់ជាបុត្រារបស់ព្រះធម្មោរាជាជាមួយនឹងអ្នកម្នាងសៀមម្នាក់ឈ្មោះ អ្នកម្នាងរ័ត្ន (១៧៣០) ហើយទ្រង់មានព្រះអនុជរួមមាតាមួយអង្គទៀតព្រះនាមថា ព្រះអង្គដួង ។
(48) ពួកអាណ្ណាមហៅថា ម៉ាក់ធានទឺ ខ្មែរហៅថា ព្រះសុទត្ដ ។
(49) ការគ្រងចីវរលឿងអាចធ្វើឱ្យគេចផុតពីការចាប់ទោសពៃរ៍បាន ។ គេនឹងជួបរឿងដូចគ្នានៅស្រុកសៀម នៅពេលដែលស្ដេចជ្រែករាជ្យ ភ្យាទន ត្រូវធ្វើឃាត ។
(50) នោះគឺព្រះរាជាទី៣នៃសន្ដតិវង្សអាឡោងផ្រា ដែលបានឡើងសោយរាជ្យលើរាជបល្ល័ង្កអវ៉ាក្រោយពីបដិវត្ដន៍ឆ្នាំ១៧៥៤ ។
(51) អ្នកអង្គម្ចាស់នេះបានសុគតកម្ពុជាក្នុងឆ្នាំ១៧៧១ ។ រាជពង្សាវតារអាណ្ណាមហៅព្រះអង្គថា ចៅស៊ីសាង ។ ចំណែកបព្វជិតពីញ៉ូ វិញ ក្រោយមកបានទទួលឋានៈជា អេវ៉ែកអាដ្រង់ ។
(52) តាមរាជពង្សាវតារបាននិយាយថា នៅក្នុងឆ្នាំនោះមានផ្កាយដុះកន្ទុយមួយល្អណាស់ លេចឡើងនៅក្នុងដើមខែកញ្ញា ចេញពីទិសខាងកើត ហើយបន្ដសំដៅទៅទិសនិរតី ។
(53) រាជពង្សាវតារខ្មែរនិយាយថា ស្ដេចអាណ្ណាមពេលនោះមានព្រះនាមថា យ៉ាឡុង ។ តាមពិតស្ដេចនោះមានព្រះនាមថា ហ្វេវឿង អភិសេកនាមគឺ ង្វៀងភុកធន់ ។ គឺជាបុត្រារបស់ស្រីស្នំម្នាក់ ។ ព្រះអង្គសោយរាជ្យបាន១៣ឆ្នាំ ពីឆ្នាំ១៧៥៦ ដល់១៧៧៨ ។
(54) ភូមិនេះនៅជិតឧត្ដុង្គ ត្រង់កន្លែងមួយមាននៅរហូតដល់សព្វថ្ងៃ សម្រាប់ទុកស្បែកគោក្របីដែលបារគូវះទុកធ្វើជាព្រ័ត្រនៅក្នុងព្រះរាជពិធីអុំទូកនាថ្ងៃពេញបូណ៌មីខែតុលា ។
(55) ពួកអាណ្ណាមដាក់ឈ្មោះគេថា ង្វៀងវ៉ាន់ញ៉ាក់ និងង្វៀងវ៉ាន់ហ្វេធុង ។
(56) ឯកសារខ្លះនិយាយថា នៅបឹងប្រមា នៅចំពីខាងមុខព្រះរាជវាំង ។
(57) នៅក្នុងខែត្រកៀនស្វាយ ខាងត្បូងភ្នំពេញ នៅលើទន្លេមេគង្គខាងក្រោម ។
(58) ស្ដេចនេះឡើងសោយរាជ្យនៅក្នុងឆ្នាំ១៧៧៩ បន្ដពីង្វៀងភុកតាន់ចាញដែលទទួលរាជសម្បត្ដិបន្ដពីង្វៀងភុកធន់ដែលដាក់រាជ្យថ្វាយកាលពី១ឆ្នាំមុន ។
(59) លោក ប៉ាឡឺហ្គ័រ ហៅព្រះអង្គថា ព្រះពុទ្ធិចៅហ្លួង បាននិយាយថា ទ្រង់សោយរាជ្យបាន២៩ឆ្នាំ គឺពីឆ្នាំ១៧៦៦ដល់១៨១១ ។
(60) អរជូន ជាងាររបស់ស្ដេចត្រាញ់ ដែលជាចៅហ្វាយខែត្រដីត្បូងឃ្មុំ ។
(61) តាមមើលទៅកៃសឺនមាសនេះគឺជាឈ្មោះមាសដែលមានដើមកំណើតនៅសុកត្រាំងជាប់នឹងព្រំដែនរបស់អាណ្ណាមនៅកូសាំងស៊ីនខាងក្រោម ហើយបានចូលដៃចូលជើងជាមួយពួកតៃសឺន តែខ្មែរយើងហៅថា កៃសឺនៗ ទៅវិញ ដោយហេតុនោះហើយ ទើបបានជាមានឈ្មោះថា កៃសឺនមាសៗ ដូច្នេះទៅ ។ តាមការនិទានតៗគ្នានៅកម្ពុជា ក៏ដូចជានៅឯសុកត្រាំង មាសនេះជាមនុស្សស្វាហាប់ ក្លាហានមិនចេះខ្លាច ហើយសាហាវ ។
(62) ប្រអប់ស្លាធ្វើអំពីឈើស្រោបដោយក្រណាត់ ។
(63) ពាក្យ «ហ៊ូពាន់» នេះសម្គាល់ឋានន្ដរសក្ដិមន្ដ្រីមកពីពាក្យសៀម២ម៉ាត់គឺៈ ហ៊ូ ឬ ហួ=មេកោយ ពាន់=១ពាន់ ។ ដូច្នេះពាក្យនេះ មានន័យថា មេកោយកាន់ពល១ពាន់នាក់ ។
(64) គឺ ឃុន=មេ និង ណាង=នាង ។
(65) តាមមើលទៅប្រហែលជាគេយកមកបន្ទាយពេជ្រទេ ។ ទោះជាយ៉ាងណាក្ដី សពព្រះរាជាបានត្រូវគេបូជានៅពេលដែលទ័ពនាំត្រលប់មកវិញនៅក្នុងឆ្នាំ១៧២៨ រួចហើយគេបានយកព្រះអដ្ឋិធាតុព្រមទាំងរូបចម្លាក់២ ធ្វើអំពីលង្ហិនទៅបញ្ចុះនៅក្នុងចេតិយមួយ ដែលគេបានសង់ឡើងពីខាងកើតចេតិយធំនៅលើខ្នងភ្នំព្រះរាជទ្រព្យក្បែរឧត្ដុង្គ ។ ពិធីបុណ្យបូជាព្រះសពនេះមានរយៈកាលពេញមួយឆ្នាំ ។
(66) ផ្កាយដុះកន្ទុយនេះមានឈ្មោះថា ហាឡី គេមើលឃើញគ្រប់គ្នានៅលើសកលលោក ។ នៅស្រុកបារាំង ផ្កាយដុះកន្ទុយនេះបានធ្វើឱ្យគេដាក់ឈ្មោះស្រាទំញំងបាយជូរដែលផលិតនៅក្នុងឆ្នាំ១៨១១ ថាជាស្រាផ្កាយដុះកន្ទុយ ។ ផ្កាយដុះកន្ទុយដដែលនេះបានបង្ហាញខ្លួនម្ដងទៀតនៅក្នុងឆ្នាំ១៩១០ មានពណ៌ស្អាតល្អណាស់ ហើយបានធ្វើឱ្យមានការរំជើបរំជួលក្នុងបណ្ដាអ្នកតារាសាស្ដ្រទាំងឡាយនាសម័យនោះ ព្រោះគេមានជំនឿថាពិភពលោកអាចនឹងត្រូវបញ្ចប់នៅក្នុងឆ្នាំនោះ ។ គេបានឃើញផ្កាយដុះកន្ទុយនេះលើកដំបូងនៅក្នុងឆ្នាំ១៤៥៦ នៅពេលដែលពួកមូស៊្លីមចូលកាន់កាប់ទីក្រុងបែលក្រាដ ។ ការលេចចេញនូវផ្កាយដុះកន្ទុយនេះ នៅពេលនោះបានធ្វើឱ្យទ័ពទាំងសងខាង មានការភិតភ័យ ហើយសម្ដេចប៉ាបកាលីសទី៣បានសម្រេចថា ចាប់ពីពេលនោះមក គេត្រូវសូត្រធម៌អង់ហ្សេលុសរាល់ថ្ងៃនៅពេលថ្ងៃត្រង់ ។
(67) ខែត្រនេះសព្វថ្ងៃជាទឹកដីរបស់កម្ពុជាវិញហើយ ហើយស្ថិតនៅលើត្រើយទន្លេមេគង្គខាងឆ្វេង នៅខាងជើងខែត្រម្លូព្រៃ និងខាងត្បូងខែត្រគង់របស់លាវ ។
(68) ចាប់តាំងពីឆ្នាំ១៧១៥មក ដីបាសាក់នៅចំណុះវៀងចន្ទនៅឡើយ ក៏ប៉ុន្ដែបានពង្រីកឯករាជ្យភាពល្អគ្រាន់បើហើយ ។ ពេលនោះហ្លួងប្រាបាងបានផ្ដាច់ខ្លួនចេញផុតពីការគ្រប់គ្រងរបស់វៀងចន្ទដែរ ។ សៀមមិនបានជំទាស់ទេនៅពេលដែលស្ដេចបាសាក់ប្រកាសខ្លួនជាព្រះរាជា ។
(69) ខែត្រស្ទឹងត្រែងបានក្លាយទៅជាខែត្រលាវ-បារាំងនៅក្នុងឆ្នាំ១៨៩៤ ក្រោយពេលដែលត្រើយខាងឆ្វេងរបស់ទន្លេមេគង្គបានត្រូវកាត់បញ្ចូលមក ។ បារាំងបានបង្វិលមកឱ្យកម្ពុជាវិញហើយនៅក្នុងឆ្នាំ១៩០៤ ។
(70) គេចាប់ផ្ដើមជីកនៅក្នុងឆ្នាំ១៨១៥-១៨១៦ ក្នុងខែមិគសិរ ហើយជីកចប់នៅក្នុងខែមករា ។
(71) មានកូនចៅរបស់ បែនម៉ុងតេរ៉ូ ម្នាក់ ឈ្មោះថា កុលដឺម៉ុងតេរ៉ូ ដែលបានស្លាប់នៅក្នុងខែវិច្ឆិកា ឆ្នាំ១៩០៨ ក្នុងឋានៈជាអគ្គមហាសេនា គឺនាយករដ្ឋមន្ដ្រី ។
(72) ចៅឃុនបឌិននេះស្លាប់នៅបាងកកក្នុងអាយុ៧៧ឆ្នាំនៅក្នុងឆ្នាំ១៨៤៧ ឬ១៨៤៨ ។ អ្នកខ្លះគិតថាគាត់នេះមានសញ្ជាតិបារាំង ក៏ប៉ុន្ដែតាមពិត គាត់ជាជនជាតិសៀមទេ ។
(73) ស្ដេចនេះមានព្រះជន្ម៤៤ឆ្នាំ ហើយបានសោយរាជ្យ១៨ឆ្នាំហើយ ។
(74) ពួកអាណ្ណាមថ្វាយព្រះឋានៈថា បាកុងជួ មានន័យថា ព្រះក្សត្រីជាម្ចាស់ជីវិត តែខ្មែរយើងសរសេរ បាគុនចាវ ទៅវិញ ។
(75) ព្រះនាងសុគតនៅឧត្ដុង្គ នៅរវាងឆ្នាំ១៨៧៨ ។
(76) ឋានៈនោះមាន អុងចាញ់ អុងផ ដូយ កាយឡាង ថុន ទ្រឿង ត្រាំ ។ល ។
(77) ផ្លូវនេះសង់ចេញពីភ្នំត្រង់ក្បែរផ្ទះលោកគ្រូពេទ្យធំ ។ មានមួយចំណែក គេហៅថា ផ្លូវប៉េត្រូល ។
(78) ព្រះអង្គឌួងមានបុត្រា៣ព្រះអង្គ និងបុត្រីមួយព្រះអង្គ ពីឆ្នាំ១៨៣៤ដល់១៨៤៤ ៖ មានព្រះរាជឱរសមួយព្រះអង្គបាន ប្រសូតពីអ្នកម្នាងប៉ែនជាមហេសីទី៣នៅក្នុងខែមាឃធំឆ្នាំ១៨៣៤ ទ្រង់ទទួលព្រះនាមថា ច្រឡឹង រួចថា អង្គវតី គឺព្រះបាទនរោត្ដម ។ នៅក្នុងឆ្នាំ១៨៣៩ ទ្រង់មានបុត្រីមួយអង្គ គឺអ្នកអង្គម្ចាស់ចង្កុលណី ។ ដល់មកឆ្នាំ១៨៤០ អ្នកម្នាងពៅប្រសូតបានបុត្រាមួយអង្គ ដែលក្រោយមកមានឋានៈជាព្រះកែវហ្វ៊ារួចជាព្រះឧបរាជ ហើយជាព្រះរាជា ស៊ីសុវត្ថិ ក្រោយពីព្រះនរោត្ដមសុគតទៅ ។ នៅក្នុងឆ្នាំ១៨៤១ អ្នកម្នាងខាំប្រសូត្របានបុត្រាមួយអង្គគឺព្រះអង្គម្ចាស់ វត្ថា ឬស៊ីវត្ថា ដែលក្រោយមកបានបះបោរប្រឆាំងនឹងព្រះរៀម ។
(79) ទ្រង់មានព្រះជន្ម៥១ព្រះវស្សា នៅពេលដែលសុគតនោះ ។
(80) ស្ថិតនៅលើត្រើយទន្លេមេគង្គខាងឆ្វេង ចម្ងាយប្រហែល៧០គីឡូម៉ែត្រ ខាងលើភ្នំពេញ ។
(81) សៀមបានទាក់ទាញយកអ្នកអង្គម្ចាស់អង្គភឹម បុត្រារបស់ព្រះអង្គឯម ដែលបានប្រយុទ្ធប្រឆាំងនឹងសៀមនៅក្នុងជួរកងទ័ពអាណ្ណាមឱ្យយាងទៅបាងកក ហើយក៏រក្សាទុកនៅទីនោះទៅ ។ ធ្វើដូច្នេះ គេអាចមានមធ្យោបាយមួយនៅក្នុងដៃរបស់គេ ដើម្បីញាក់កម្ពុជាជាបន្ដទៅទៀត ។ ក៏ប៉ុន្ដែចៃដន្យអាក្រក់ ក្សត្រាអង្គនេះបានធ្លាក់អាពាធ ហើយសុគតទៅនៅក្នុងឆ្នាំ១៨៤៨ ។
(82) ពួកអេស្ប៉ាញ និងព័រទុយហ្គាល់ហៅថា បារីរាជាទីដែលបេឡូសូបានចុះចតកប៉ាល់ពេលវិលត្រលប់មកពីម៉ានីលវិញនៅក្នុងឆ្នាំ១៥៩៧ មុនពេលដែលមានឃាតកម្មទៅលើព្រះរាមាជើងព្រៃបន្ដិច ។
(83) ក្រោយព្រះរាជពិធីកោរជុករួច អ្នកអង្គម្ចាស់ច្រឡឹង បានប្ដូរព្រះនាមថា ព្រះអង្គវតី ។ ក្រោយមកទ្រង់បានឡើងជាព្រះឧបរាជមានព្រះនាមថា នរោត្ដម រួចឡើងគ្រងរាជសម្បត្ដិក្រោមព្រះនាមដដែលនេះ ។
(84) អ្នកអង្គម្ចាស់អង្គភឹម ជាបុត្រាទី៣របស់ព្រះបាទអង្គឌួង ។ ក្រោយព្រះរាជពិធីកោរជុក ទ្រង់បានប្ដូរព្រះនាមថា ស៊ីវត្ថា ជាព្រះនាមដែលគេស្គាល់ព្រះអង្គច្រើនជាងគេ ។ នៅពេលដែលព្រះរៀមនរោត្ដមឡើងសោយរាជ្យ ទ្រង់បានបះបោរប្រឆាំង ។ ទ្រង់សុគតទៅនៅថ្ងៃទី៣១ ខែធ្នូ ឆ្នាំ១៨៩១ នៅភូមិភ្នំក្រែក ខាងជើងខែត្រសម្បូរ លើត្រើយទន្លេមេគង្គខាងស្ដាំ ជាទីកន្លែងដែលព្រះអង្គបានគង់នៅជាមួយបក្សពួកជាង២០ឆ្នាំមកហើយ ។
(85) ដើម្បីឱ្យបានមួយ ពីយ៉ាសម៉ិកស៊ីក (លុយជំនាន់ដើម) ដែលមាន២៩ក្រាមជាប្រាក់សុទ្ធ គេត្រូវការកាក់៦ចង្កោម មានទាំងអស់ ៣៦០០កាក់ ។
(86) ពួកសៀមច្រើនរំលោភតែស្រីក្រមុំ និងមេម៉ាយ ម្ល៉ោះហើយ កាលណាមានទ័ពសៀមចូលមក គេនាំគ្នាប្រញាប់ប្រញាល់រៀបចំការកូនស្រីឱ្យហើយ ។ ពួកអាណ្ណាមមិនសូវជាអាក្រក់ពេកទេ ។
(87) ទ្រង់ខ្លាចរអាពួកសៀម ព្រោះថា ព្រះអង្គមិនអាចតែងតាំងរដ្ឋមន្ដ្រីណាម្នាក់ដោយគ្មានការអនុញ្ញាតពីស្ដេចសៀមបានទេ ។ ជាក់ស្ដែង គឺនៅក្នុងឆ្នាំ១៨៤៨ ព្រះអង្គបានបញ្ជូនឧកញ៉ាចក្រី និងឧកញ៉ាក្រឡាហោម ទៅស្រុកសៀម ដើម្បីសុំការឯកភាពពីស្ដេចសៀម តែងតាំងជាចៅហ៊្វាទឡ្ហៈ និងជាសម្ដេចចៅពញា តែស្ដេចសៀមក្នុងនាមជាស្ដេចអធិរាជ បែរជាតែងតាំងមន្ដ្រី២រូប ពីខែត្របាត់ដំបង ឱ្យទទួលតួនាទីនេះជំនួសវិញ ។
(88) មេសំខាន់៣នាក់របស់ពួកបះបោរនោះត្រូវជាកូនរបស់ចាមម្នាក់មានឈ្មោះថា ទួនសែតអស្មិត ឬទួនផា ។ ទួនផានេះបានវាយពួកអាណ្ណាមនៅប៊ិញធន់ រួចហើយបានមកតាមវាយពួកអាណ្ណាមនៅកម្ពុជាទៀត នៅក្នុងរជ្ជកាលស្ដេចអង្គចន្ទ ។ ព្រះបាទអង្គចន្ទ បានលើកទួនផាឱ្យឡើងធ្វើជារដ្ឋមន្ដ្រី ប៉ុន្ដែដល់ក្រោយមកបានបោះបង់ចោលទៅវិញ នៅក្នុងឆ្នាំ១៨២០ តាមការញុះញង់របស់អាណ្ណាម ។ កូនគាត់ទាំង៣នាក់ គឺទួនហ៊ីម ទួនស៊ូ និងទួនអ៊ិត មានឥទ្ធិពលទៅលើពួកអ្នកកាន់សាសនាដូចគ្នា ។ ចំណែកឯកូនទី៤ ដែលការពារពួកចាម និងម៉ាឡេ ខ្លាំងណាស់ដែរនៅក្នុងព្រះរាជវាំងកម្ពុជា បានឡើងជាសម្ដេចចៅពញានៅក្នុងរជ្ជកាលស្ដេចនរោត្ដម ។
(89) រាជពង្សាវតារបានកត់សម្គាល់ថាមានផ្កាយដុះកន្ទុយមួយនៅក្នុងឆ្នាំ១៨៥៨ ដែលលេចឡើងនៅទិសពាយ័ព្យ ហើយមានកន្ទុយវែងចុះទៅខាងទិសអាគ្នេយ៍ ។ ផ្កាយដុះកន្ទុយនេះមានប្រវែង៩០អង្សាដែលគេអាចមើលឃើញច្បាស់នៅស្រុកបារាំងក្នុងរដូវក្ដៅ ។
(90) នៅពេលដែលអ្នកអង្គម្ចាស់អង្គវតី ត្រូវបានលើកឱ្យឡើងជាមហាឧបរាជ ស្ដេចសៀមបានលើកអ្នកអង្គម្ចាស់សនេះឱ្យឡើងជាព្រះកែវហ្វ៊ា ។ ព្រះអង្គបានទទួលយកបុត្រីរបស់ព្រះអនុជក្សត្រីមួយអង្គរបស់ព្រះក្សត្រីអង្គម៉ី ជាព្រះជាយា ដែលត្រូវជាព្រះភាគិនេយ្យេរបស់ព្រះអង្គ តែមានព្រះជន្មច្រើនជាងព្រះអង្គ១ឆ្នាំ ។ អ្នកអង្គម្ចាស់សនេះ ប្រុងតែនឹងដើរតាមអ្នកអង្គម្ចាស់វត្ថា ធ្វើការបះបោរទៅហើយ តែទ្រង់បានត្រូវគេលើកឱ្យឡើងជាព្រះឧបរាជនៅក្នុងឆ្នាំ១៨៦៨ រួចបានសោយរាជ្យបន្ដពីព្រះរៀម នរោត្ដម នៅក្នុងឆ្នាំ១៩០៤ ។
(91) មេដឹកនាំក្រុមបះបោរទាំង២នាក់នេះជាមិត្ដជិតស្និទ្ធ និងជាដៃស្ដាំរបស់អ្នកអង្គម្ចាស់វត្ថា មានដើមកំណើតចេញពីខែត្របាភ្នំ ។ អ្នកម្នាងជាព្រះមាតារបស់អ្នកអង្គម្ចាស់ក៏មានដើមកំណើតនៅបាភ្នំនេះដែរ ហើយបានយកអ្នកទាំង២ទៅនៅបម្រើបុត្រាព្រះនាង ។
(92) គេបានកាត់ក្បាលយកមកថ្វាយព្រះរាជា រួចឱ្យជនក្បត់ម្នាក់ទៀតទូលដើរកាត់ផ្សារ រួចយកទៅដោតចុងឫស្សីដែលបោះនៅពីខាងមុខព្រះរាជវាំង ។
(93) នៅក្នុងសេចក្ដីសំបុត្រនោះ អាស្វាបានអះអាងថា ខ្លួនគេគឺជាអ្នកអង្គម្ចាស់អង្គភឹម ត្រូវជារាជបុត្ររបស់ព្រះអង្គឯម ដែលជាព្រះរាមរបស់ព្រះអង្គឌួង ។ ខ្លួនគេបានបែកបាក់ព្រាត់ឆ្ងាយពីព្រះមាតា និងព្រះជាយាព្រះនាមស្ងួន ហើយត្រូវគេនាំខ្លួនយកទៅបាងកកនៅពេលដែលគេរៀបចំព្រះរាជពិធីអភិសេកព្រះបាទអង្គឌួង ធ្វើឱ្យគេកើតទុក្ខជាខ្លាំង ស្ទើរតែឆ្កួត ក៏ឱ្យមិត្ដភក្ដិក្លែងបន្លំថា ខ្លួនស្លាប់ហើយៗបានយកសពខ្មែរម្នាក់ផ្សេងទៀតមកដាក់នៅក្នុងមឈូសជំនួសវិញ ។ ឯព្រះអង្គភឹមផ្ទាល់ បានរត់គេចខ្លួនទៅរស់នៅជាមួយពួកស្ទៀង និងព្នង ទើបតែចេញមកវិញនេះដើម្បីកេណ្ឌទ័ពទាមទារយកសិទ្ធិរបស់ខ្លួនមកវិញ ។ នៅកម្ពុជាសព្វថ្ងៃ នៅមានអ្នកខ្លះយល់ថារឿងនេះជាការពិត ។
(94) អ្នកអង្គម្ចាស់ពោធិកំបោរ នេះ បានសុគតទៅក្រោយពីប្រសូតបានប៉ុន្មានម៉ោងនៅឧត្ដុង្គ ។
(95) លោកឌូដាដឺឡាគ្រេបានសរសេរនៅក្នុងថ្ងៃទី៧ ខែកក្កដា ឆ្នាំ១៨៦៥ ថា ៖ «ព្រះរាជាមិនសូវមានប្រជាប្រិយភាពប៉ុន្មានទេ ដោយសារអតីតកាលរបស់ព្រះអង្គ និងដោយសារទ្រង់ចំណាយច្រើនលើសលុប» ។ ឯលោកប៉ូធីយេក៏បាននិយាយ ដែរនៅថ្ងៃទី៧ ខែកុម្ភៈ ឆ្នាំ១៨៦៧ ថា ៖ «អ្នកណាៗក៏ស្អប់ព្រះរាជាដែរ គ្មាននរណាម្នាក់ចូលចិត្ដព្រះអង្គទេ» ។ តាមពិតទៅ ទាំងប្រជារាស្ដ្រទាំងនាម៉ឺនសព្វមុខមន្ដ្រី គេចូលចិត្ដព្រះអនុជស៊ីសុវត្ថិខ្លាំងជាង ។
(96) ព្រះរាជាទ្រង់បាននាំយកពួកភ្លេងមួយក្រុម មានឈ្មោះថាតាហ្គាល់ ពីម៉ានីលមកកម្ពុជា ដែលជាប្រភពនៃក្រុមភ្លេងមួយក្រុម ដែលតែងសម្ដែងជូនសាធារណជនទស្សនានៅវត្ដភ្នំ រាល់ថ្ងៃអាទិត្យចាប់ពីម៉ោង៥កន្លះដល់ម៉ោង៦កន្លះ និងរាល់ថ្ងៃព្រហស្បតិ៍ ចាប់ពីម៉ោង៨កន្លះ ដល់ម៉ោង៩កន្លះ ។
(97) សព្វថ្ងៃនេះ ៤ពីយ៉ាស ស្មើនឹង៩ហ្វ្រង់កន្លះ ។
(98) នៅក្នុងខែកុម្ភៈ ឆ្នាំ១៨៧៧ អ្នកអង្គម្ចាស់វត្ថា បានបង្ហាញវត្ដមានឡើងវិញនៅក្នុងខែត្របាភ្នំ ដោយមានទ័ពមួយកង ។ គេបានបញ្ជូនទ័ពមួយកងទៅវាយទ័ពនោះឱ្យបរាជ័យ ដណ្ដើមយកបន្ទាយបាភ្នំបាន ក៏ប៉ុន្ដែសង្គ្រាមនោះបានធ្វើឱ្យមនុស្សស្លាប់ និងខូចខាតទ្រព្យសម្បត្ដិអស់ជាច្រើន ។ ហេតុការណ៍នេះបញ្ជាក់ថា នៅពេលនោះប្រជាជនមិនសូវជាចូលចិត្ដព្រះបាទនរោត្ដមប៉ុន្មានទេ ។
(99) លោកពីកេនេះ មុនដំបូងជាអនុនាវីកប៉ាល់ បន្ទាប់មកជាអ្នកធ្វើការងាររដ្ឋបាល រួចជាចាងហ្វាងមហាផ្ទៃនៅកូសាំងស៊ីន ។ នៅពេលចូលនិវត្ដន៍ គាត់បានត្រូវគេលើកឱ្យធ្វើជាភ្នាក់ងារទារពន្ធនៅ Flèche រួចជារ៉េស៊ីដង់ធំនៅកម្ពុជា ។ គាត់បានមកដល់កម្ពុជានៅខែមីនា ឆ្នាំ១៨៨៦ ដើម្បីទទួលដំណែងជំនួសលោកវរសេនីយ៍ទោ បាដេន ដែលបានមកកាន់តំណែងស្ដីទីជាង១ឆ្នាំមកហើយ ដោយមានលោក ហ៊្វូរ៉ែស ជាទីប្រឹក្សា ។ ពេលនោះ លោករ៉េស៊ីដង់ពេញសិទ្ធិគឺលោក អៃម៉ូនីញេ ដែលជាប់ចូលរួមធ្វើបេសកកម្មវិទ្យាសាស្ដ្រមួយ ។
(100) អារញ្ញ និងវឌ្ឍនៈ ដែលមានរ៉ែមាសកំពុងតែយកផលដោយក្រុមហ៊ុនអង់គ្លេសមួយ បាននៅជារបស់សៀមតទៅទៀត ។ នោះគឺជាការខុសឆ្គងមួយ ពីព្រោះថាវាជាមជ្ឈមណ្ឌលចោរកម្ម និងការឃុបឃិតគ្នារវាងសត្រូវរបស់របបថ្មី ដែលធ្វើឱ្យមានការលំបាកជាច្រើនដល់នគរបាលព្រំដែន ។ បើសិនជាវឌ្ឍនៈបានមកកម្ពុជា នោះប្រហែលជាគ្មានការលំបាកក្នុងការគ្រប់គ្រងអ្នកស្រុកទេ ។ ក៏ប៉ុន្ដែវាមានផលប្រយោជន៍របស់ពួកបរទេសដែលបារាំងត្រូវតែគិតគូរកុំឱ្យប៉ះពាល់ដល់ ។
(101) មានចំណុចជាច្រើនដែលត្រូវលើកយកមករៀបរាប់ ការទិតៀនជាច្រើនដែលត្រូវនិយាយ ការខ្វះការប៉ិនប្រសប់មួយចំនួនដែលត្រូវលើក និងកំហុសឆ្គងដែលត្រូវបញ្ជាក់ ។ ក៏ប៉ុន្ដែក្រោយពីបានពិចារណារួច ខ្ញុំគិតថាស្នាដៃនេះមិនគួរបើនឹងលើកយកសកម្មភាពគ្រប់គ្រងដែលកំពុងតែដំណើរការទៅ មកធ្វើការទិតៀនទេ ។ ខ្ញុំទើបតែបានទទួលព័ត៌មានចុងក្រោយនេះថា គេទើបតែបានរៀបចំការបោះឆ្នោតជ្រើសតាំងសភាពិគ្រោះយោបល់មួយ ដែលមានតំណាងរាស្ដ្រចំនួន៤២នាក់ ជ្រើសរើសចេញពីគ្រប់ខែត្រ ប៉ុន្ដែខ្ញុំមិនបានដឹងអ្វីវែងឆ្ងាយទេ ។ និយាយប៉ុននេះមិនគ្រប់គ្រាន់ទេ ក៏ប៉ុន្ដែខ្ញុំអាចបានត្រឹមជម្រាបអំពីការខិតខំប្រឹងប្រែងដ៏មានសារសំខាន់នេះ ដែលទាមទារឱ្យមានការប៉ិនប្រសប់ ហើយចេះអនុវត្ដ ។