បញ្ហានានាអំពីដំណាំស្រូវ
ការណែនាំនៃអត្តសញ្ញាណកម្ម
៥៥. ស្មៅពុកបង្កង
(Digitaria Ciliaris (Retz.) Koel, syn. D. adscendens (H. B. K. Henr)
(រូបទី១១៥) ស្មៅពុកបង្កង គឺជាប្រភេទរុក្ខជាតិប្រចាំឆ្នាំ ឬស្ថិតស្ថេរ មានជីវិតខ្លីមានសភាពបាក់ខ្លបចុះក្រោម ឬក្រាបលើដីតែម្ដងមានកម្ពស់ពី២០ ទៅ៦០មម ។ ស្មៅនេះបែកធាងច្រើន មានឫសដុះចេញពីថ្នាំងទាបបំផុតនៃដើមវា ។ ស្រទបស្លឹកច្រើនមានរោម ។ តួស្លឹកវាសំប៉ែតមានសណ្ឋានដូចខ្សែបន្ទាត់មានប្រវែងពី៥ ទៅ១៥សម និងទទឹងប្រវែងពី៣ ទៅ៨មម ។ តាមធម្មតាស្លឹកច្រើនគ្មានរោមទេ ហើយមានគែមគគ្រាត និងរាងដូចទឹករលក ។ អណ្ដាតស្ទបវា “ligule” មានសភាពជាភ្នាសកំបុតដែលមានប្រវែងពី១ ទៅ៣មម ។
កញ្ចុំផ្កាវាមានបែកខ្នែងចំនួនពី៣ ទៅ៨ មានប្រវែងពី៥ ទៅ១៥សម (រូបទី១១៦) ។ ខ្នែងទាំងនេះច្រើនចេញជាកញ្ចុំៗនៅខាងចុងដើម ជួនកាលតម្រៀបគ្នាជាថ្នាក់ៗនៅលើអ័ក្សមួយដែលមានប្រវែងដល់ទៅ២សម ។ ស្នូលកួរវាស្ដើងមានស្លាបតែគ្មានរោមទេ ។ អេពីយេបង្រួមជាពីរខ្សែនៅតាមបណ្ដោយផ្នែកម្ខាងនៃអ័ក្សមានប្រវែងប្រហែល៣មម ។ គ្លូមក្រោមរាងត្រីកោណមានប្រវែងប្រហែល២មម ។ គ្លូមលើរាងដូចលំពែងមានបណ្ដោយស្មើពាក់កណ្ដាល ឬ៤/៦ នៃប្រវែងអេពីយេ ។ សម្បកធំរាងលំពែងសុទ្ធសាធមានសរសៃពី៥ ទៅ៧ មានរោមសម្លីតិច ឬច្រើន ។
ផ្លែវាជាផ្លែគ្រាប់សាច់ (Caryopse) រាងប្រហាក់ប្រហែលអេលីប ។ ការដុះដាលរបស់វាប្រព្រឹត្តទៅដោយសារគ្រាប់ ។
Chouk Khmer 